КАЛГАНЧЫ кӱндерде јӱрӱм там ла кӱч болуп барат. Мынаҥ улам Иегованыҥ ишчилерине, алдындагызына кӧрӧ, чыдамкай болорго албаданар керек (2 Тим. 3:1—5). Бис јаҥыс бойын сӱӱп турган, јаражар кӱӱни јок, тудунбас эмезе чыдажып билбес улустыҥ ортозында јададыс. Оныҥ учун кажы ла христиан кижиге мындый сурактарды шӱӱп сананар керек: «Меге бу улустыҥ кӱӱн-санаазы кирип калбаган ба? Чыннаҥ ла чыдамкай кижи кандый болот? Јаан учурлу мындый христиан кылык-јаҥга канайып ӱренип алар?»

Агару Бичикте бу сӧс кӱчтерди јаҥыс ла чыдажып турарын кӧргӱспей јат. Чыдамкай кижи кандый бир амадузына једерге чыдамкай артат: андый кижи јаҥыс бойын сананбай, улус ого јаман баштанып та турза, ӧскӧ улусты база сананат. Ол ачынышкан кижиле јаражып аларына иженет. Оныҥ да учун чыдажыш Агару Бичикте сӱӱшке тӧзӧлӧнгӧн сӱреен јараш кылык-јаҥдардыҥ баштапкызы болот (1 Кор. 13:4) *. Анайда ок бу кылык-јаҥ агару тынныҥ тӱжӱмине кирет (Гал. 5:22, 23). Кудайга јарап турган мындый кылык-јаҥга канайып ӱренип алар?

Чыдамкай болорго Иегованаҥ агару тын сураар керек. Ол бу тынды бойыныҥ чындык ишчилерине берип јат (Лука 11:13). Оныҥ агару тыны сӱрекей јаан ийде-кӱч те болзо, биске бойыстыҥ јаныстаҥ база албаданар керек: мӱргӱӱлдерис аайынча јӱрер керек (Сар. 86:10, 11). Оныҥ учун бу јаан учурлу кылык-јаҥга ӱренип аларга, кӱнӱҥ сайын чыдамкай болорго албаданар керек. Је кезикте бис чыдажып болбой јадыс. Бу тушта биске не болужар?

Биске Иисустыҥ толо кемдӱ темин шӱӱп сананып, оноҥ ӱренер керек. Элчи Павел чыдажышты «јаҥы кижиниҥ» кылык-јаҥына кирип турган деп айткан. Анайда ок: «Јӱректеригерде Христостыҥ амыры башкаргай» — деп бичиген (Кол. 3:10, 12, 15, ЈК 2003). Оныҥ учун јӱрегисте мындый амыр болзын деп турган болзоос, Кудай бойыныҥ ӧйинде чындыкты орныктырар деп, Иисус чылап алаҥзыбай бӱдер керек. Анайып, бистиҥ чыдамкайыс ченелетен айалга да боло берзе, бис чыдамкай артарыс (Иоанн 14:27; 16:33).

Бис ончобыс Кудайдыҥ берер болгон јаҥы јӱрӱмди энчикпей сакып јадыбыс. Је Иегованыҥ бисти чыдажып турганын ундыбай турзаас, бис те чыдамкай болорго ӱренедис. Агару Бичик бисти бӱдӱмјилеп јат: «Кайракан Бойыныҥ берген сӧзин бӱдӱрерге табыланбайт; кезик улус оны табыланыш деп бодойт. Је Ол биске узак чыдажат, нениҥ учун дезе кем де ӧлӱп калбазын, карын, ончо улус кинчегин алынып, Кудайга баштанзын деп кӱӱнзейт» (2 Петр 3:9). Иегованыҥ биске чыдамкайын шӱӱп сананып тура, бис те улуска чыдамкай болорыс (Рим. 2:4). Мындый кылык-јаҥ биске кандый айалгаларда керек болордоҥ айабас?

Бистиҥ чыдамкайыс ченелип турган айалгалар кӧп болуп јат. Темдектезе, кижи слерге та нени де куучындап јаткан ӧйдӧ, слерге бойыгардыҥ санаагарды айдар кӱӱнеер келер болор. Мындый айалгада кижиниҥ куучынына киришпей, оны учына јетире угарга чыдамкай болор керек (Иак. 1:19). Эмезе слерге ака-эјелердиҥ кемизи-кемизи јарабай турган тушта, база чыдамкай болор керек. Мындый ӧйдӧ кыртыштанардыҥ ордына, Иегова ла Иисус бистиҥ јастыраларыска канайып кӧрӱп турганын шӱӱп сананыгар. Олор бистиҥ кичинек јастыраларыска ајару этпей, карын бистиҥ јакшы јанысты кӧрӱп, качан солынарысты чыдажып сакып јат (1 Тим. 1:16; 1 Петр 3:12).

Бистиҥ айткан сӧзис эмезе эткен керегис кемге-кемге јарабай калган тушта база чыдамкай болор керек. Не дезе, андый неме боло берзе, кижи озо ло баштап ачына берет эмезе актанып баштайт. Је Агару Бичикте мындый јӧп берилет: «Чыдамкай кижи улуркак кижинеҥ артык. Ачынарга меҥдебе, нениҥ учун дезе ачыныш тенек кижиниҥ кӧксинде јӱрет» (Јарл. 7:8, 9). Керек дезе, слер актуга ла буруладып та турзагар, ачынбаска, чыдамкай болугар. Иисус та улуска куруга буруладып турарда шак анайып эткен (Матф. 11:19).

Ада-энелерге анчада ла балазыныҥ јастыра кӱӱн-санаазын эмезе кӧрӱмин тӱзедерге, чыдамкай болор керек. Скандинавияныҥ Бэт-Элинде иштеп турган Маттиас деген аканыҥ темин кӧрӱп ийектер. Ол Кудайга бӱткени учун школ ӧйинде јаантайын балдарга јаман кӧрдӱрер болгон. Бу керегинде оныҥ ада-энези баштап тарый нени де билбеген. Је мындый базыныш салтары јок ӧтпӧгӧн: Маттиастыҥ ада-энези балазыныҥ чындыкта алаҥзып турганын кӧрӱп баштаган. Йиллис, Маттиастыҥ адазы, эске алынат: «Бу айалгада бойысты тыҥыда тудунар керек болгон. Не дезе Маттиас јаантайын: „Кудай ол кем андый? Агару Бичик чын ла Кудайдыҥ Сӧзи бе? Слер ондо Кудайдыҥ некелтелери бичилген деп кайдаҥ билереер?“ — деп сураар болгон». Анайда ок: «Менде Кудайга слердий ок бӱдӱмји ле сезимдер јок учун, слер мени нениҥ учун бурулап турганаар?» — деп сурап туратан.

 Йиллис айдат: «Маттиас сурактар берип тура, кезикте ачынар болгон, је меге ле ӱйимге эмес, а чындыкка. Не дезе, чындык оныҥ јӱрӱмин уурладып салган деп ол сананган». Мындый айалгада Йиллис нени эткен? Ол айдат: «Бис уулымла кожо отурып, узак куучындажар болгоныс, керек дезе канча частарга да улай. Кӧп сабада Маттиас куучындаар болгон, мен јӱк кезикте сурактар берип туратам. Анайып, оныҥ санаазын ла сезимдерин оҥдоп алатам. Кезикте мен ого шӱӱп сананатан кандый бир сурак берип салатам, соондо бир-эки кӱннеҥ куучынысты оноҥ ары улалтып туратаныс. Је кезикте уулымныҥ сӧстӧрин канча кӱн шӱӱп сананып јӱретем. Арайынаҥ Маттиас толынтыны, Кудайдыҥ бийик јаҥын ла Кудайдыҥ сӱӱжин оҥдоп баштаган. Бистиҥ уулыс Кудайды сӱӱп баштазын деп, кӧп ийде-кӱчисти ле ӧйисти бергенис. Эмди ӱйимле кожо, балагыска школ ӧйинде болужып, чыдамкай болгоныска тыҥ сӱӱнедис! Уулыстыҥ јӱрегин томултарга албаданганыс калас болбогон».

Йиллис ӱйиле кожо Иеговага иженип, уулына чыдажып болушкан. Ӧткӧн ӧйди сананып, Йиллис айдат: «Мен уулымга бис оны тыҥ сӱӱп турганыс ла Иегова ого сурактарыныҥ аайына чыгарга болужып берзин деп мӱргӱп турганысты јаантайын айдар болгом». Маттиастыҥ ада-энези уулына чыдамкай болгонына тыҥ сӱӱнип јадылар!

Јазылбас оорула ооруп турган јуугын кичеерге база чыдамкай болор керек. Скандинавияныҥ ороондорыныҥ бирӱзинде јадып турган Эллен * деген эјениҥ темин кӧрӱп ийектер.

Элленниҥ ӧбӧӧнинде сегис јыл кайра эки катап инсульт болордо, оныҥ меези јазап иштебей барган. Оноҥ улам ол килебес те, сӱӱнбес те, кунукпас та болуп калган. Элленге мындый айалгада коркышту кӱч болгон. Ол айдат: «Меге чыдамкай болорго кӧп ийде-кӱч керек, оныҥ учун мен кӧп мӱргӱйдим. Бойымныҥ сӱӱген ӱлгеримди, Филиппыдагыларга 4:13-ти кычырып турзам, меге јеҥил боло берет. Ондо мындый сӧстӧр бар: „Меге кӱч берип турганныҥ болужыла ончозын эдер аргам бар, ЈТ“». Эллен Иегованыҥ болужында бир де алаҥзыбай, ӱзе немени чыдажып ӧдӧт (Сар. 62:5, 6).

Чыдамкай болорыныҥ эҥ јакшы темин биске Иегова кӧргӱзет (2 Петр 3:15). Иегованыҥ чыдамкайы керегинде учуралдар Агару Бичикте кӧп бичилген (Неем. 9:30; Иса. 30:18). Иегова Содомды јоголторго турарда, Авраам ого бир канча сурактар берген. Ол бу айалгада Авраамга канайып баштанган? Иегова Авраамнаҥ сӧс блаашпай, оныҥ алаҥзып ла санааркап айткан ончо сӧстӧрин кажы ла катап лаптап, чыдажып уккан. Анайда ок Кудай Содомдо он до чындык кижи табылза, каланы јоголтпос деп, Авраамды бӱдӱмјилеген (Баш. 18:22—33). Бу учуралдаҥ бис улуска кыртыштанбай, чыдажып угарга ӱренедис.

Чыдажыш — јаҥы христиан кижиниҥ јаан учурлу кылык-јаҥы. Бу кылык-јаҥга ончо христиандар ӱренер учурлу. Бис бу кылык-јаҥга ӱренерге албаданзаас, сӱӱштӱ ле чыдамкай Адабысты макка чыгарарыс, анайда ок «бӱдӱп, узак чыдажып» турзаас, алкыштар аларыс (Евр. 6:10—12).