BAGWÉLÉL ba Yéhôva ba gwé ngôñ ni wongut, i nya i ba mah bé bana inyule niñ i nlet ndigi let ni let i “dilo di nsôk” tini. (2 Timôtéô 3:1-5) Di niñ ikété nkoñ isi i het bôt ba ntôñ ndik ni bomede, ba gwéhék jomol, ba ban-ga bé to hôtnyuu. I bet ba gwé bilem bibe bi, ba nlôôha hañba wongut. Jon, hiki kristen i nlama badba le: “Baa i béba nkoñ isi unu u nhéya me ndék wongut me ban-ga? Kii bañga wongut i nkobla? Lelaa me nla tééda lem lam i, niñ yem yosôna?

Inoñnaga ni ndoñi i Bibel, wongut i ta ndik bé i hônba ngim jam i ntééñga bés. Mut a gwé bañga wongut a nhônba ni ngim njômbi. A ntôñ ndik bé ni nyemede, a ntôñ yak inyu loñge i bôt bape to ibale ba bi unbaha nye. Inyu hala nyen, ngéda ba nyumbla mut wongut, a gwé ñem kii ngok, hala wee a nwaa bé tééda botñem le mam m’a héñha. Jon, hala a nhélés bé bés le Bibel i nsima “wongut” kiki lem i bisu i nlôl ni gwéha. * (1 Korintô 13:4) Bañga i Djob i nsima “wongut” kiki lem yada i “litam li mbuu.” (Galatia 5:22, 23) Jon, kii di nlama boñ inyu hôlôs lem i Djob a mbat bés?

Inyu hôlôs wongut, di nlama bat Yéhôva mbuu wé mpubi ni njel masoohe, a nti ki wo i bet ba mbôdôl nye ñem. (Lukas 11:13) Ndi tolakii mbuu Djob u nlôôha bana ngui, di nlama bana maboñok ma ma nkiha ni masoohe més. (Tjémbi 86:10, 11) Hala a nkobla le, di nlama boñ biliya i unda wongut hiki kel inyu boñ le i hôlôl i ñem wés. Ndi to hala, i nsômbla bés biliya bi tôbôtôbô inyu boñ le wongut i yila lem lam yada ikété bilem di gwé, ni le di tééda yo. Kii ipe i nla hôla bés?

Di nla hôlôs wongut ngéda di nwan, ni ngéda di nkôna ndémbél i peles i Yésu. Inoñnaga ni ndémbél i, ñôma Paul a bi toñol jam li, ni mahôla ma mbuu mpubi kiki “mut yondo” nu a gwé “wongut,” a bi kônde ki le “nsañ Kristô u ane ikété miñem [nwés].” (Kôlôsé 3:10, 12, 15) Di nla nwas le nsañ u, u “ane” miñem nwés ngéda di nkôna hémle i ngui Yésu a bééna le Djob a’ kodol mam ma ntééñga bés i ngéda Yé. Ngeñ di noñ ndémbél i Yésu, di ga nimis bé wongut yés ngéda ba ga nyumbla bés, to ibale kii i mpémél bés.​—Yôhanes 14:27; 16:33.

Tolakii di nyamnda ni ngôñ i tehe mbok yondo Djob a bôn bés, di nigil i lôôha bana wongut, ngéda di nsoñda mu kii Yéhôva a nwo ngut ipañ yés. Bitilna bi nkal bés le: “[Yéhôva] a ntiñha bé inyu likak jé kiki bôt bahogi ba nhoñol le hala a yé ndiñha, ndi a nwo ndigi ngut inyu bé bobasôna,  lakii a ngwés bé le to mut wada a nimil, ndigi le bobasôna ba pam homa ba nhiel miñem.” (2 Pétrô 3:9) Ngéda di nhoñol lelaa Yéhôva a nwo ngut i pañ yés, baa hala a ntinde bé bés i kônde hônba bôt bape? (Rôma 2:4) Mambe mam ma mbat le di wo ngut?

Ngandak mam i mpémél bés hiki kel, i i ntinde bés i bana wongut. Kiki hihéga, ibale u nôgda le u gwé jam li mahee i kal, hala a mbat wongut inyu boñ le u kit bañ mut hop. (Yakôbô 1:19) U nlama ki unda wongut, ngéda u yé ni lôk kéé, i i gwé bilem bi nhindha we ñem. Iloole u bep unup inyu i nya mam i, njel pék i yé le u wan lelaa Yéhôva bo Yésu ba mboñ i bisu bi mahôha més. Ba ntjél bok mis map i ngii mahôha més. Ndi, ba ntehe bilem gwés bilam, ba béñgege ki ni wongut biliya di mboñ.​—1 Timôtéô 1:16; 1 Pétrô 3:12.

Jam lipe li li ntinde bés i bana wongut, li yé ngéda mut a nhoñol le di mpot tole di mboñ ngim jam libe. Bés bobasôna di mbéna pala unup, tole di nla bôdôl kaaba. Ndi Bañga i Djob i nkal bés le di boñ nya ipe. I nkal le: “Mbuu hônba [wongut] u yé loñge iloo mbuu ngôk. U pala bañ nok liyot i mbuu woñ, inyule liyot li nyén i tôl bijôñ bi bôt.” (Ñañal 7:8, 9) Jon, to ibale mam ba nkal inyu yés ma ta bé maliga, di nlama unda wongut ni le di hek pék ilole di ntimbhe. Yésu a bi noñ litiñ li, ngéda ba bé ôm nye nsohi u bitembee.​—Matéô 11:19.

Bagwal ba nlama wo ngut téntén ngéda ba nkodol maboñok mabe tole mahoñol mabe ma, bon bap ba nhôlôs. Di yoñ hihéga hi Mattias, nu a nsal i Bétel Skandinavia. Ngéda a bé njohok mañge, mawanda mé ma suklu ma bé ndegle nye inyu hémle yé. I bibôdle, bagwal bé ba bé yi bé lelaa mam ma bi bôdôl. Ndi, ba bé tehe lelaa ngolba i i bé tééñga man wap, nu a bi bôdôl bana pééna mu ñem wé inyu maliga. Gillis, isañ Mattias a nkal le: “I jam li, li mbat ngandak wongut.” Mattias a bi kahal badba le: “Njee a yé Djob? Baa Bibel i yé toi Bañga i Djob? Kii i nyis bés le Djob nyen a mbat lini jam tole lii? A bi bat yak isañ le: “Inyuki ba nlama kéés me ibale me nôgda bé mam kiki bé, tole me gwé bé nlélém hémle kiki bé?”

Gillis, a ntoñol le: “Ngim mangéda, lok yés i bé bat bés mambadga ni hiun, ibabé ikolba me to nyañ, ndi ikolba maliga, ma ma bé boñ le a nôgda le niñ i nlédél nye.” Lelaa Gillis a bi pamba mu jam li? A nkônde le: “Me ni man nwem di bé di yén, di kwel ki ntandaa ngéda. Me bé lôôha emble nye, me badak ngim mambadga inyu tibil nok mahoñol mé, ni mam a bé nôgda. Mangéda mahogi, me bé toñle nye ngim jam, me kal ki nye le a hek pék mu jam li i kel i, ilole di ntémb di pôdôl mu.  Mangéda mape, me bé kal nye le, a ti me ndék dilo inyu ôt pék mu jam a bé kal me. Kiki di bééna lem i kwel, ha nyen ndék ni ndék Mattias a bi bôdôl nok ndoñi biniigana kii bo: Binoñ, kunde Djob a gwé i ngii bihégél gwé, ni gwéha i Yéhôva. Hala a bi yoñ bés ngandak ngéda, hala a bé bé to jam li ntomb, ndi ndék ni ndék gwéha yé inyu Yéhôva i bi bôdôl nañ. Me ni nwaa nwem di bi lôôha ba maséé, wongut di bi unda inyu hôla lok yés i bi num matam malam, hala a tihba ki ñem wé.”

Gillis bo nwaa ba bi bôdôl Yéhôva ñem mu kii ba bé hôla man wap ni wongut. Ngéda a mbigda mam ma bi tagbe, Gillis a nkal le: “Me bé béna kal Mattias le, gwéha di gwé inyu yé, i bé tinde me ni nyañ i soohe ni ngui le Yéhôva a hôla nye i nok ngim mam.” Bagwal ba, ba nlôôha ba maséé le ba bi sal lem i mahee ini le wongut!

U héya mahôla i nlona bôt pes mbuu, bañga bikristen i nlama ki hôlôs lem i wongut, ngéda i nyoñ ndun ni mut wap lihaa, tole mawanda map ma ma nkon ngandak. Di yoñ hihéga hi Ellen, * nu yak nye a niñ i loñ i Skandinavia.

Hala a yé bebee le nwii juem i len ini, le AVC i bi bép nlôm Ellen letee ni ngélé iba, i tihba yak boña wé. Sôk i nsôk, a bé la ha bé nôgda konangoo, to maséé, a bééna ha bé to ngôô inyu bôt bape. Jam li, li bé ndutu ngandak inyu Ellen. A nkal le: “Hala a bi lôôha bat wongut, ni ngandak masoohe.” A nkônde le: “Nlôñ Bibel u u mbéna hôgbaha me, u yé Filipi 4:13, u u nkal le: ‘Me gwé ngui i boñ mam momasôna inyu nu a nlédés me.’” Ni ngui i Yéhôva nyen Ellen a bi hônba ndutu i ni wongut.​—Tjémbi 62:6, 7.

Ntiik, ngéda i mpam le di unda wongut, Yéhôva a yé ndémbél i mbôk ni i nsôk di nlama noñ. (2 Pétrô 3:15) Di nléba ngandak miñañ i Bañga i Djob, het Yéhôva a bi lôôha unda wongut. (Néhémia 9:30; Yésaya 30:18) Kiki hihéga, lelaa Yéhôva a bi boñ ngéda Abraham a bi bat nye mambadga inyu tjiba i Sôdôm? Jam li bisu li yé le, Yéhôva a bi kit bé Abraham hop. Ndi ni wongut, Yéhôva a bi emble hiki mbadga ni njelel Abraham a bééna. Mbus, Yéhôva a bi unda le a nok nye ngéda a bi tiimba sima mam ma bé kônha Abraham woñi, a bôn ki nye le a ga tjé bé Sôdôm, to ibale a nléba ndik jôm li bôt li li téé sép mu tison i. (Bibôdle 18:22-33) Kinje loñge ndémbél i yoñ ngéda i emble mut ibabé i unup!

Lem i wongut ini i nlôl ni Djob, i yé toi nseñ inyu libak li mut yondo, li bikristen gwobisôna bi nlama eñgep. Ibale di nsal ni ngui inyu hôlôs lem lam i, di nti Isañ wés nungingii ni nu wongut lipém, hala a’ boñ ki le di ba mu nsoñgi u “bakôdôlbum i nlôl makak inyu hémle ni nihbe.”​—Lôk Héber 6:10-12.