HULI sa lalong naggagrabeng sitwasyon sa “huring mga aldaw,” kaipuhan kan mga lingkod ni Jehova nin pakatios urog kisa kasuarin man. (2 Tim. 3:1-5) Sa parati, an mga tawo sa kinaban na kinabubuhayan ta interesado na sana sa sadiri nindang kapakanan, habo nin ano man na kasunduan, asin daing pagpupugol sa sadiri. An mga nagpapahiling nin arog kaiyan na ugali parati nang mayong pakatios o pasensiya. Kaya, dapat na ihapot kan lambang Kristiyano sa saiyang sadiri: ‘Naimpluwensiyahan na daw ako kan kawaran nin pakatios kan kinaban? Ano an buot sabihon kan tunay na pakatios? Asin paano ko magigibong magin permanenteng kabtang kan sakuyang personalidad an marahayon na Kristiyanong kuwalidad na ini?’

Sigun sa pagkagamit sa Bibliya, an terminong pakatios bako lang basta pagtagal sa masakit na sitwasyon. An saro na igwa nin diyosnon na pakatios nagtatagal na may katuyuhan. Bako lang kapakanan niya an iniisip niya kundi pati man an kapakanan kan saro na dahilan kan nakakairitar na sitwasyon. Kaya pag nagibuhan nin sala o naprobokar an tawong may pakatios, padagos siyang naglalaom na mapapakarhay pa an naraot na relasyon. Kaya bakong makangangalas na sa Bibliya, ininot an pagigin “mapasensiya” sa dakul na marahay na kuwalidad na resulta kan pagkamuot. * (1 Cor. 13:4) Iiniba man kan Tataramon nin Diyos an “pakatios” sa mga aspekto kan “bunga kan espiritu.” (Gal. 5:22, 23) Pero, ano an kaipuhan tang gibuhon tanganing mas maipahiling an diyosnon na kuwalidad na ini?

Tanganing mas maipahiling an kuwalidad na pakatios, dapat na hagadon ta sa pamibi an tabang kan espiritu ni Jehova, na itinatao niya sa mga nagtitiwala asin nananarig sa saiya. (Luc. 11:13) Mapuwersa an espiritu nin Diyos, pero kaipuhan na may gibuhon kita; kaipuhan tang humiro kauyon kan satong mga pamibi. (Sal. 86:10, 11) Nangangahulugan ini na dapat na gibuhon ta an satong pinakamakakaya na magpahiling nin pakatios aroaldaw tanganing makagamot ini sa satong puso. Pero bako lang iyan an kaipuhan tang gibuhon tanganing an pakatios magin permanenteng aspekto kan satong personalidad. Ano pa an makakatabang sato?

Mas makakapahiling kita nin pakatios paagi sa pagsiyasat asin pag-arog sa perpektong halimbawa ni Jesus. Kauyon kan halimbawang iyan, pinasabngan si apostol Pablo na iladawan “an bagong personalidad,” na diyan kaiba an “pagkamapasensiya,” dangan dinagka niya kita na “pabayaan an katuninungan kan Cristo na maghadi sa [satong] mga puso.” (Col. 3:10, 12, 15) Puwede niyatong tugutan an siring na katuninungan na “maghadi” sa satong mga puso paagi sa pag-arog sa makusugon na pagtitiwala ni Jesus na itatanos nin Diyos sa Saiyang itinalaan na panahon an mga bagay-bagay na ikinakahadit ta. Pag sinusunod ta an halimbawa ni Jesus, dai kita mawawaran nin pasensiya, maski ano pa an tibaad nangyayari sa palibot ta.—Juan 14:27; 16:33.

 Dawa gustong-gusto na niyatong mahiling an bagong kinaban na ipinanuga nin Diyos, magigi kitang mas mapasensiya pag hinuhurop-hurop ta an pagpapasensiya sa sato ni Jehova. Inaasigurar kita kan Kasuratan: “Si Jehova dai nag-aatraso sa pag-utob kan saiyang panuga, siring kan pighuhuna nin ibang tawo, kundi mapasensiya siya sa saindo huling habo niyang malaglag an siisay man, imbes, gusto niya na an gabos magkaigwa nin oportunidad na magsulsol.” (2 Ped. 3:9) Mantang iniisip-isip ta an pagpapasensiya ni Jehova sa sato, bako daw na napapahiro man kita na magin mas mapasensiya sa iba? (Roma 2:4) May koneksiyon digdi, anong mga sitwasyon an nangangaipo na kita magin matinios?

Sa aroaldaw, dakul na sitwasyon an puwedeng makabalo sa satong pakatios. Halimbawa, kun may importante kang sasabihon, tibaad kaipuhan mong magpahiling nin pasensiya tanganing patapuson ngunang magtaram an iba. (Sant. 1:19) Tibaad kaipuhan mo man magpahiling nin pasensiya sa pakikiiba sa mga kapagtubod na may mga ugaling nakakairitar sa saimo. Imbes na masuya tulos, madunong na isip-isipon kun paano minamansay ni Jehova asin ni Jesus an satong mga kaluyahan. Nakapokus sinda bako sa pagkritika sa satong saradit na pagkukulang. Imbes, hinihiling ninda an satong marahay na mga kuwalidad asin mapasensiyang pinagmamasdan an paghihinguwa tang umuswag.—1 Tim. 1:16; 1 Ped. 3:12.

Puwede man mabalo an satong pakatios pag may nagsabi sato na nakasabi o nakagibo kita nin sala. Sa parati, tibaad nagkukulog tulos an satong buot asin idinedepensa an sadiri. Alagad, kabaliktaran an irinerekomendar kan Tataramon nin Diyos na gibuhon ta. Sinasabi kaiyan: “Mas marahay na magin mapasensiya kisa magin maabhaw. Dai ka tulos makulgan nin buot, huling an pagkulog nin buot yaon sa daghan kan mga mangmang.” (Par. 7:8, 9, NW) Kaya, dawa kun bako man totoo an sahot, dapat na mapasensiya niyatong pag-isipan an satong simbag. Sinunod ni Jesus an prinsipyong iyan kan bakong makatanusan siyang tinuya-tuya kan iba.—Mat. 11:19.

Lalo nang kaipuhan kan mga magurang na magin mapasensiya pag nahiling nindang may kaipuhan itanos na bakong marahay na mga ugali, pagmawot, o tendensiya sa saindang mga aki. Pag-isipan an dapit ki Mattias, na miyembro kan pamilyang Bethel sa Scandinavia. Kan tin-edyer pa si Mattias, nagtagal siya nin grabeng pagtuya-tuya sa eskuwelahan huli sa saiyang mga tinutubod. Kan inot, dai iyan aram kan saiyang mga magurang. Pero kan huri, kaipuhan nindang atubangon an epekto kaini sa saindang aki, na nagpuon nang kuwestiyunon kun baga talagang nasa katotoohan siya. “Kaipuhan mi nin halabang pasensiya sa sitwasyon na idto,” an sabi kan ama ni Mattias na si Gillis. Mahapot si Mattias: “Siisay an Diyos? Paano kun an Bibliya bako man Tataramon nin Diyos? Paano ta maaaraman na ini o iyan an talagang gusto nin Diyos na gibuhon ta?” Sinasabi niya man ki Papa niya: “Taano ta huhusgaran ako kun bako man arog saindo an pagmati saka pagtubod ko?”

Sinabi ni Gillis: “Minsan, an mga hapot kan samong aki nagpapahiling na anggot siya, bako ki Mama niya o sako, kundi sa katotoohan na sa pagmati niya iyo an dahilan kan mga kasakitan sa buhay niya.” Ano an ginibo ni Gillis? “Kun minsan pirang oras kaming maulay ni Nonoy. Sa haros bilog na pag-uulay mi, dinadangog ko sana siya asin paminsan-minsan naghahapot ako para masabutan  nin lubos an namamatian saka iniisip niya. May minsan na tinatawan ko siya nin paliwanag na pag-iisipan niya sa bilog na aldaw o labi pa bago ipadagos an pag-uulay mi. May mga pagkakataon man na sasabihon kong kaipuhan ko ngunang pag-isipan nin pirang aldaw an sarong bagay na sinabi niya. Paagi kan regular na mga pag-uulay na ini, luway-luway nang mas nasabutan asin inako ni Mattias an mga katukduan arog kan pantubos, soberaniya nin Diyos, asin pagkamuot ni Jehova. Haloy iyan, asin sa parati dipisil, pero luway-luway na nagtalubo sa puso niya an pagkamuot ki Jehova. Ugmahon kami ni agom huling an mapasensiya ming paghihinguwa na tabangan an samong aki kan siya tin-edyer nagbunga nin marahay saka naabot an saiyang puso.”

Si Gillis asin an saiyang agom nagtiwala sa tabang ni Jehova mantang mapasensiyang tinatabangan an saindang aki. Sa pag-isip-isip sa nakaagi, sinabi ni Gillis: “Parati kong sinasabi ki Mattias na huli sa dakulang pagkamuot mi saiya napahiro kami ni Mama niya na mas udok na ipamibi na tabangan siya ni Jehova na makasabot.” Ipinagpapasalamat nanggad kan mga magurang na iyan na ipinahiling ninda an mahalagang marhay na kuwalidad na pagigin mapasensiya!

Apuwera sa pagtao nin espirituwal na tabang, an tunay na mga Kristiyano dapat na magpahiling nin mamumuton na pagpapasensiya pag inaataman an mga kapamilya o amigo nindang may nagdadanay na hilang. Pag-isipan an halimbawa ni Ellen, * na nakaistar man sa Scandinavia.

Mga walong taon na an nakaagi, naistrok nin duwang beses an agom ni Ellen na nakaapektar sa pagpunsiyonar kan saiyang hutok. Kaya dai na siya nakakamati nin simpatiya, kaugmahan, o kamunduan. Dipisilon na sitwasyon ini para ki Ellen. Sinabi niya: “Kinaipuhan ko nin halabaon na pasensiya saka dakul na pamibi.” Sinabi pa niya: “An paborito kong teksto na nakakaranga sako iyo an Filipos 4:13 na an sabi: ‘Kaya kong atubangon an gabos na bagay paagi sa saiya na nagtatao sa sako nin kusog.’” Salamat sa kusog na iyan, mapasensiyang nagtatagal si Ellen na may lubos na pagtitiwala sa tabang ni Jehova.—Sal. 62:5, 6.

Siyempre, pag-abot sa pagigin mapasensiya, si Jehova an pinakanangungurog na halimbawa niyato. (2 Ped. 3:15) May dakul na istorya sa Tataramon nin Diyos dapit sa mga pagkakataon na nagpahiling si Jehova nin dakulaon na pasensiya. (Neh. 9:30; Isa. 30:18) Halimbawa, ano an ginibo ni Jehova kan kuwestiyunon ni Abraham an desisyon Niyang laglagon an Sodoma? Inot sa gabos, dai nagsaliot si Jehova mantang nagtataram si Abraham. Imbes, mapasensiyang nagdangog si Jehova sa lambang hapot asin ikinakapurisaw ni Abraham. Dangan, ipinahiling ni Jehova na nagdangog siya huling inutro niya an mga sinabi ni Abraham asin siniyerto saiya na dai Niya lalaglagon an Sodoma dawa kun sampulo sanang matanos na tawo an nasa siyudad na iyan. (Gen. 18:22-33) Mapasensiyang nagdangog asin dai tulos naanggot si Jehova. Marahayon nanggad na halimbawa para sato!

Tunay nanggad na an diyosnon na pakatios mahalagang marhay na kabtang kan bagong personalidad na dapat isulot kan gabos na Kristiyano. Kun pagmamaigutan tang mas maipahiling an mahalagang marhay asin nagdadanay na kuwalidad na ini, tinatawan ta nin onra an satong mapagmakulog asin mapasensiyang Ama sa langit, asin ibibilang kitang kaiba sa “mga uminako kan mga panuga dahil sa pagtubod asin pakatios.”—Heb. 6:10-12.