NJIBAN ô ne nya mfii den amu bia nyiñ “melu me asu’ulan,” a mam abui me ne telé bia meve’ele. (2 Tim. 3:1-5) Bôte ba bômane bia ba nye’e bebien, be nji nye’e mame ya mvaé, ba kate kui na be jôé bebien. Be nji bi fulu njiban. Ajô te, Kristen ése ja yiane sili ébiene na: ‘Ye ma fe me kôbôya fulu ôjeja’a ya émo ji? Jé ja titinane na e bi fulu njiban? Aval avé me ne liti mbamba fulu ate ényiñe jame ya môs ôse?’

Éfia be nga kôñelane Bible na njiban, é nji tinane ve na môt a zômbô meve’ele. Môt a bili fulu njibane bia jôô je va, a zômbô nju’u éziñ a sôñe’e ngume jam. A nji simesane ve mintaé a wôk, a jeñe fe mvo’é môt a ndeñele nye. Éyoñ môt a jeñe nye mintañete, a sase ki mo, ve a ke ôsu a buni na ba môt ate be ne beta late ngbwa. Jôm ete nje Kalate Zambe a telé fulu njiban ôsu, éyoñ a lañe mefulu me tii a nye’an. * (1 Bec. 13:4) “Njiban” ô ne fe ngabe jia ya ébuma ya nsisim. (Beg. 5:22, 23) Nde ñhe, aval avé bi ne liti fulu njiban.

Asu na bi bi fulu njiban, bia yiane ja’é Yéhôva mbamba nsisime wé, amu Yéhôva a vo’o nyume môt a buni nye mbamba nsisim. (Luc 11:13) Ve to’o mbamba nsisime Yéhôva a ne ngule ya volô bia, biabebiene bia yiane bo mam bia sili Yéhôva meye’elan. (Bs. 86:10, 11) Nalé a tinane na, bia yiane jeñe môs ôse na bi bo ôjibi, ndembene njiban wo ye su’ulane bo bia fulu. Ve to’o éyoñ éte, bia yiane ke ôsu a yeme mebo si na, bi bo teke jañele mbamba fulu ate. Jé éfe é ne volô bia?

Bia yiane fe fombô ényiñe Yésus, a jeñe na bi vu nye. Jôm ete nje, éyoñ nlômane Paul ô nga jô na bi jaé “mfefé môt,” ñwô ôte ô tii a fulu “njiban,” a nga suu nkobô a jô’ô na, ‘mvo’é Krist ja ye jôé minlem miangan.’ (Beco. 3:10, 12, 15) Bia liti na bia jô’é mvo’é Krist é ‘jôé’ minlem miangan éyoñ bia fe bi too ndi na, Yéhôva Zambe a ye kôm mam ma ndeñele bia mbamba éyoñ. Môt a tôñ éve’ela Yésus a nji sulu mo si to’o a tôban avale minju’u avé.​—Jean 14:27; 16:33.

To’o bi ne evevé ya nyiñe mfefé émo, nge bia tu’a fas avale Yéhôva a jibi bia, bia fe bia ye yeme jibi. Kalate Zambe a  bôé bia nleme si a jô’ô na: “[Yéhôva] a nji langan mfa’a ya ntiñetane wé, aval ane bevo’o be lô nlangan; ve a dañe jibi mfa’a wônan, a ne te kômbô na môt éziñ a . . . jañ, ve na bese be zu kôñelane minlem.” (2 P. 3:9) Éyoñ bia yen avale Yéhôva a jibi bia, nga bia fe bi ne ntindane ya jibi bôte bevok? (Bero. 2:4) Bi tame ñhe zu yene bité bi ne sili na bi bo ôjibi.

Abui mam é ne telé ôjibi wongane meve’ele été. Bi tame jô na wo buni na jam wo kômbô jô é ne mfi; e ne sili na ô jibi asu na ô bo teke tyi’i môte mfe nkobô. (Jc. 1:19) E ne fe sili na ô bo ôjibi éyoñ bobenyoñ be bili mefulu wo vini. A lôte na ô bo ôjeja’a ya yaa be, wo yiane tu’a fas avale Yéhôva ba Yésus be ba bo éyoñ wo kop. Be nji dañe fombô bone bikobe biangan. Ve ba dañe fombô mbamba mefulu bi bili, ba jibi fe bia nté bia bibane na bi jô’é mbia mefulu mangan.​—1 Tim. 1:16; 1 P. 3:12.

Jam afe é ne bo na bi jañele fulu ôjibi é ne éyoñ môt a ve bia bijô. E wô’ô kui avale biyoñ ete na bi jeñe na bi kamane biabebien. Ve Bible a liti bia aval afe bi ne bo. A jô na: “Ôjibi ô ne mvaé a dañe mebun. A nji bo mvaé ya ji’a wô’ ôlun amu mekute me bôte mme ma ji’a wô’ ôlun.” (Ec. 7:8, 9, Mfefé Nkôñelan) Ajô te, to’o ba te bia bôt ajô, bia yiane kôme tobe bifia bia belane bie na bi yalan. Yésus émiene fe a nga tôñe melebe mete éyoñ a nga tôban ékpwe’ele.​—Mt. 11:19.

Bebiaé fe ba yiane bi fulu ôjibi asu na be volô bone bap éyoñe be bili mbia mefulu, mbia minkômban, nge ke éyoñ ba kômbô bi mbia abo dulu. Jam é nga kui Mattias, mojañ a saé Béthel ya Scandinavie da yemete de. Éyoñ a mbe mongô, bongô besikôlô bevo’o be mbe be kpwe’ele’ nye amu a mbe Ngaa Yéhôva. Bebiaé bé be nji taté yeme de. Ve mone wop a mbe a za’a sôé be ôlune wé nyul éyoñ ése, a mbe a nga bi bi fe biyebe. Gillis, ésaa Mattias, a jô na: “E mbe e sili’i na bi bo nya ôjibii.” Mattias a mbe a sili’i be bitua minsili : “Za a ne Zambe? Nge a bo ke na Bible a laane minsos? Jé ja kate fo’o bia na Zambe nnye a yi na bi bo jame si jame ka?” A nga jô jô fe ésaa na: “Ye mia yiane ve ma bijô nge me nji yene mam ane mia?”

Gillis a ke ôsu a jô’ô na: “A mbe a sili’i bia minsili mite a wô’ô ôlun; ve sa ke bia mbe a mbe a wô’ô ôlun, a mbe a wô’ô ôlun amu a tôban étibela’a sikôlô.” Gillis a nga volô mon aya? A jô na: “Bia mone wom bi mbe bi tabe’e mewolo bi la’an. Me mbe me kôme’ vô’ôlô nye a sili nye bone minsili na me tu’a yem ôsimesane wé a aval a wô’ôtan nleme wé été.  Biyoñ biziñ me mbe me jô’ô nye na, a ve ma môse wua na me tu’a fase mam bia te laan. Biyoñ bivo’o ki, me mbe me jô’ô nye na a ve ma ôbe’ebe’e melu. Mbôle bia mone wom bi mbe bi la’an éyoñ ése, nalé a nga bo na a tu’a wôk a kañese miñye’elane miziñ aval ane ntañ, éto njôane Yéhôva, a nye’ane Yéhôva. E nji be tyi’ibi, ve ôte’ete’ ôte’etek, nye’ane Yéhôva ô nga yaé nye nlem. Bia minga wom bi ne mengo’o do amu ôjibi wongan ô nga volô mone wongane na a kabetane Yéhôva.”

Gillis ba ngal be nga futi ndi jabe be Yéhôva nté be mbe be volô’ô mone wop. Gillis a simesane jam ete a jô’ô na: “Me mbe me kate’e Mattias na bia nyia bia nye’e nye abui, ajô te bia ye’elane Yéhôva éyoñ ése na a tu’a wô’ô mam a yé’é.” Den, bebiaé be Mattias ba wô’ô mvaé amu be nga bi fulu ôjibi.

Benya Bekristene ba yiane fe liti fulu ôjibi éyoñ ba nyoñe ngap a beta minkôkon. Bi tame zu kobô ajô Ellen, * nye’e fe a nyiñe Scandinavie.

Den a nto mimbu 8, nnôm Ellen a nga fame mbia ôkon, ane boo a nga ndamane nye. Ôkon ôte wo bo na, a bo te beta mvamane bôt, nge woé, nge ke wô’ô ôlun. Jam ete da telé Ellen avale meve’ele é ne na! a jô na: “Da sili ma abui ôjibi, ma yiane fe ye’elane Yéhôva mban. Ma nye’e éfuse ya kalate Bephilippien 4:13 ja jô na: ‘Me ne ngule ya bo mam mese [amu] nyô a ve ma ngu.’” Ngul éte ja bo na Ellen a ke ôsu a jibi, a too ndi a mvolane Yéhôva.​—Bs. 62:5, 6.

Yéhôva a ne éve’ela ja dañe mfa’a ya liti fulu ôjibi. (2 P. 3:15) Abui minkañete ya Bible da bo’olô de. (Néh. 9:30; És. 30:18) Yéhôva a nga bo aya éyoñ Abraham a nga yene na ntyi’ane Wé ya jiane Sodome ô ne abé? Yéhôva a nji tyi’i nye nkobô. Ve a nga nyoñ éyoñe ya vô’ôlô nye nté a mbe a yoo’é nye nleme wé, a sili’i fe nye minsili. Éyoñ ete Yéhôva a nga liti fe nye na a wô’ô nye; A nga yalane minsili mié mise a bela’ane bifia bi Abraham bibien, A nga kate fe nye na nge A koone ve bezôzôô be bôt awôme Sodome, A ye ke beta jiane tison éte. (Met. 18:22-33) Yéhôva a liti bia mbamba éve’ela valé mfa’a ya vô’ôlô, teke bo avôle ya yaa.

Ôjibi ô ne beta fulu wua ya mfefé môt bebo bisaé be Yéhôva bese ba yiane jaé. Nge bia jeñ a ngul ése na bi bi mbamba fulu ate, bia ye ve Zambe wongane duma, a bia ye lañeban a “ba be anyoñ ngape ya mintiñetan, amu mbunan a mbane ya jibi.”​—Beh. 6:10-12.