KEI aganwoundeina lubéi óuchawaguni le úmabei wagagibudagua lidan “lagumuhóun dan” le, wagía keisi lubúeingu Heowá, mégeitimahadiwa lun gaguraasun wamá (2 Tim. 3:1-5). Hiibe-agei gürigia, hounguarügüñein habusenra buiti, magudemehabutiña ani siñati hárügüdagun houngua. Maguraasuntiña burí gürigia ha. Ligía lunti lubéi lálügüdagun kada kristiánu lungua: “Maguraasuntina san kei híbiri gürigia? Ka mini lubéi lun gaguraasun nan? Ani ka lunbei nadügüni lun narufuduni igaburi le súnwandan?”.

Tidan Bíbülia, mámarügüñein lun lawanduni gürigia lénrengunga lílabei gaguraasuni. Lunti giñe lawandun meferidirungalei lemenigin. Dan le gaguraasun wamá, mámarügüñein luagu le wemegeirubei wasaminara, saminatiwa giñe hawagu amu, íbini luagu le lemegeirubei le óuserubaliwa wuriba. Mígiruntiwa lun weferidiruni wamadagua luma ani agurabatiwa lasansiruba lan katei. Ligía maweiridun tubéi wanigi ariñaga tan Bíbülia lídangiñe lan ínsiñeni liabin gaguraasuni (1 Ko. 13:4). * Iridúati giñe gaguraasuni tidan Lererun Bungiu kei aban lídangiñe igaburi le líchugubei sífiri (Gal. 5:22, 23). Kati wemegeirubei lun gagaburi wamani igaburi le?

Lun gaguraasun wamá, mosu wamuriahani lídehan lani Heowá sífiri sandu, le líchugubei houn ha afiñerubaña luagu (Luk. 11:13). Lau sun gabafu lan lani sífiri, mosu úara lan le wadügübei luma le wamuriahabei (Sal. 86:10, 11). Lun ménrengun lan gagaburi wamani igaburi le, mosu wáfaagun saragu lun gaguraasun wamá sagü weyu. Íbini ítara, másiñati mosu lan wadügün lóugiñe lira lun gaguraasun wamá súnwandan. Ka gayaraabei líderaguniwa?

Gayaraati gagaburi wamani igaburi le lau wakutihani luma wáyeihani lubuidun ligaburi Hesusu. Dan le layanuhanbei apostolu Pábulu houn kristiánugu luagu ‘iseri igaburi’, ani gaguraasuni aban lídangiñe, ariñagati: “Arueihalá lidarangilan Kristu tidan hanigi” (Kol. 3:10, 12, 15). Lun gayaraabei lan “larúeihan” darangilaü le tidan wanigi mosu wáyeihani afiñeni le meha luágubei Hesusu luagu laransehabei lanme Bungiu katei lidan dan le buídutimabei. Ánhawa afalarei le ladügübei Hesusu, úabei ni kata adügati lun weferidiruni waguraasun, meberesenga le asusereduti geyegu wau (Huan 14:27; 16:33).

Lau sun memeniha lan wanigi lachülürün iseri ubóu le füramase láalibei Bungiu woun, furendeitiwa lúntima gaguraasun wamá dan le wararamagun asaminara luagu luguraasun wabá. Rútumuti Bíbülia ichouruni le woun: “Mama hamugatia ladüga ladarasarun lagunfuliruni Bungiu le füramase láalibei, keisi haritagun saragu; gaguraasunrügüti habá gürigia ladüga mabusenrunti lun leferidirun ni aban hádangiñe; labusenrun lun hasakürihan sun gürigia” (2 Fe.  3:9). Ma adügati wasaminarun luagu luguraasun Heowá wabá lun gaguraasuntima wamá habá amu? (Rom. 2:4). Lau le lidan wasaminan, ariha wamá fiu burí sügǘ le ídanbei mosu lan warufudun gaguraasuni.

Adügati saragu katei le úmabei wagagibudagua sagü weyu lun louchawagún waguraasun. Kéiburi anhein genege lubéi woun lunti lan wariñagun somu katei súdiniti, másiñati lunti lan gaguraasun wamá lun madüraagun wamani hayanun amu (Sant. 1:19). Gayaraati megei wamá giñe gaguraasun wamá dan le hámañadiwa íbirigu ha gawagubaña igaburi le mínsiñeti woun. Lubaragiñe waweiridagüdüni katei, buídubei lun wasaminarun buidu luagu luguraasun Heowá luma Hesusu lubá wadebilin. Meteniruntiña lun íbini charati ñǘraütimati le wawagubei. Lubaragiñe lira, ténitiña lun lubuidun wagaburi luma lun áfaaguni le wadügübei lun buídutima wamá (1 Tim. 1:16; 1 Fe. 3:12).

Ábanya katei le gayaraabei lóuchaguni waguraasun dan le lariñagun somu gürigia ariñagaadiwa lan o adügaadiwa lan somu katei wuribati. Dan le lasuseredun le, ménrenguti lun wagañidun luma lun wageindagun luagu waricha. Gama lumoun, ariñagatu Lererun Bungiu woun lun wadügün amu katei: “Buítimati gaguraasun ban sügǘ lau ganigi ban. Mígiraguagüdaba bungua lun igañi, lugundun gürigia ibidiougua tau agañidubaña” (Apur. 7:8, 9). Ligíati, íbini anhein iyeeni lubéi le ariñawagúbei wawagu mosu wasaminarun buidu ida luba lan wóunabun. Ligía ladügübei Hesusu dan le hadügünbei amu bula lau mébunouga (Mat. 11:19, TNM).

Mosu gaguraasun hamá agübürigu dántima le lunti lan hererehan houn hasaanigu luagu somu igaburi wuribati, ayumahani o échuni le harihibei hawagu. Samina wamá luagu le asuseredubei lun Mattias, aban hádangiñe íbirigu ha eseriwidubaña Beteli Eskandinabia. Dan meha le nibureingili, súnwandan meha hadügün amu bula lau leskuelarugu luagu lafiñen. Ibidiñeti meha luáguti katei le houn lagübürigu. Gama lumoun, mosu meha hagagibudagun luma le lasandirubei hasaani ladüga aba lebelurun machouruni lun luagu inarüni. Ariñagati Gillis, le lúguchi Mattias: “Mosu meha gaguraasun wamá lubá saragu”. Aba meha lálügüdahan Mattias: “Ka san Búngiubei? Ánheinti mama lubéi Lererun Bungiu Bíbülia? Ida liña wasubudiruni Bungiu lan ariñagubalin le lunbei wadügüni?”. Ariñagati meha giñe lun lúguchi: “Ka uagu wuribabei lubéi hayanuha amu nuagu anhein amu lubéi nafiñen huéi?”.

Ariñagati Gillis: “Anihein meha dan layanuhan wasaani woun lau lanarime igañi, gama lumoun, mama meha tuagu lúguchu o nuagu layanuha wuriba, luagu meha inarüni líchigei duru ladüga saminati inarüni lan adügübei lun hénrengu lan libagari”. Ka ladügübei Gillis? Ariñagati: “Aba meha nañuurun ayanuha luma ani ayanuhatiwa meha luagu saragu oura. Liibe-agei dan, aganbarügü numuti adüga nuguya fiu álügüdahani lun lun gunfuranda nani le lasandirubei luma le lasaminarubei. Anihein meha dan nafuranguagüdün somu katei lun lun lasaminarun luagu kéiburi sun weyu lubaragiñe wasigirun ayanuha. Luagu amu dan, aba meha nariñagun lun megei nan fiu weyu  lun nasaminarun luagu somu katei le lariñagubei. Seremei gabügürügua lan wayanuhan, aba lagumeserun Mattias gunfuranda ánhara ligía lun le warufudahabei luagu lafayeirún lebegi asalbaruni, liricha Heowá lun larúeihani sun ubóu luma línsiñehabu. Barüti katei le saragu dan ani anihein meha dan hénrengu lan, lau sun lira, aba aganwoundeina lan ínsiñeni le lasandirubei luagu Heowá. Wéiriti nugundan tuma nani weiriou ladüga barǘ lan gaguraasuni le warufudubei lun Mattias dan meha le nibureingili buiti lun chülǘ ligía tidoun lanigi”.

Lidan anihán lan meha Gillis tuma lani weiriou áfaagua lun híderaguni hasaani lau gurasu afiñetiña meha líderagubaña lan Heowá. Ariñagati Gillis: “Ariñagatina lun Mattias saragu wéiyaasu weiri lan línsiñe tun lúguchu luma nun ani ayumuragua wamá lun Heowá lun líderaguni gunfurandei katei”. Wéiriti eteingiruni le hasandirubei agübürigu ha luagu gaguraasun hamá meha lubá hasaani.

Mosu giñe gaguraasun hamá kristiánugu inarünitiña dan le hóunigiruniña haduheñu o hamadagu ha lühañabaña lau somu sandi. Ariha waméi le asuseredubei tun Ellen, * aban íbiri to giñe awinwanduboun Eskandinabia.

Kéiburi widü irumu guentó lúmagiñe ladagarun bián estüroku luagu tani Ellen weiriei, le adügübei lun mawadigimaridun lan lisesun buidu, ligía siñaali lubéi gudemehabu lan, gunda lan o lasandirun igarigu. Adügati katei le lun labuchadun tuagu Ellen. Ariñagatu: “Mégeitina saragu gurasu luma lun nafurieidun saragu”. Ariñagamémetu: “Bérusu létima hínsiñebei nun Filipuna 4:13, le ariñagubei: ‘Sun katei gayara numuti lau lídehan le íchugubei erei nun’” (TNM). Seremei lun erei ligía, awandatu Ellen lau gurasu afiñeñu lasigiruba lan Heowá íderaguoun (Sal. 62:5, 6).

Heowá arufudubei gaguraasuni lidan aban igaburi le buídutimati (2 Fe. 3:15, TNM). Ayanuhatu Bíbülia luagu saragu sügǘ le ídanbei larufuda gaguraasuni (Neem. 9:30; Isa. 30:18). Ariha waméi ligaburi lóunabun dan le lálügüdübalin Abüraámü luagu le lasaminarubei ladügün lun Sodoma. Furumiñe, arihatiwa madüraagun lumuti lan Heowá Abüraámü dan le layanuhanbei, aganbarügü lumuti lau gurasu dan le labahüdagunbalin lidiheri lun. Lárigiñe, arufuda lumuti Heowá aganba lani le lariñagubei lun lau láguyuguagüdüni le lariñagubei ani chóurugüda lumuti lun magünrinchagun lubéi lan Sodoma anhein adarira diisi gürigia richaguatiña ñein (Agu. 18:22-33). Ma lubuidun igaburi lánina gurasu luma ragüguaü unguaü le larufudubei Heowá!

Chóuruti gurasu lan ábanbei lídangiñe igaburi súdiniti le lunti gagaburi hamani sun kristiánugu ladüga ligía lan ábanbei lídangiñe ‘iseri igaburi’. Ánhawa áfaagua tau sun wanigi lun gagaburi wamani lubuidun igaburi le, wíchuguba uéiriguni lun Wáguchi hínsiñehabuti ani gaguraasunti le siélubei ani ábanbadiwa hádangiñe ha ‘afiñebaña luagu Bungiu, awanda haméi sun asufuriruni luagu, resibi haméi le füramase lubéi Bungiu houn’ (Ebü. 6:10-12).