RMA yoj kʼo chik chpan «rukʼisbʼäl taq qʼij» más kʼïy kʼayewal yeqïl pa qakʼaslemal. Rma riʼ, röj, ri rusamajelaʼ Jehová, kʼo chë nqatamaj nqkochʼon (2 Timoteo 3:1-5). Ye kʼïy chkë ri winäq xa xuʼ ryeʼ nkajoʼ qa kiʼ, ma nkiyaʼ ta ruqʼij ri nkiʼij ri nikʼaj chik chqä ma yekowin ta nkiqʼät kiʼ chubʼanik ri itzelal. Ri winäq ri ke riʼ kinaʼoj majun kochʼonïk kikʼë. Rma riʼ, jontir ri rusamajelaʼ Dios ütz nkiʼän qa re kʼutunïk reʼ chkiwäch: «¿Najin nkʼän apü nnaʼoj chkij ri winäq ri majun kochʼonïk kikʼë? ¿Achkë ntel chë tzij ri kochʼonïk? ¿Achkë kʼo chë nbʼan rchë yikochʼon ronojel mul?».

Chpan le Biblia, ri tzij kochʼonïk ma xa xuʼ ta ntel chë tzij naköchʼ jun kʼayewal. Ntel chqä chë tzij chë nayoʼej rchë nsolotäj jun kʼayewal awilon. Taq kʼo kochʼonïk qkʼë ma xa xuʼ ta röj nqachʼöbʼ qa qiʼ, chqä nqachʼöbʼ kij ri nikʼaj chik tapeʼ itzel kinaʼoj qkʼë. Nqaʼän riʼ rma nqajoʼ chë ütz nqakʼwaj qiʼ kikʼë ri winäq riʼ. Rma riʼ le Biblia nuʼij chë ri kochʼonïk rkʼë ri ajowabʼäl ntel wä pä (1 Corintios 13:4; * tatzʼetaʼ ri nota). Chqä nuʼij chë ri kochʼonïk nwachin rkʼë ri loqʼoläj espíritu (Gálatas 5:22, 23). Ye kʼa, ¿achkë kʼo chë nqaʼän rchë nwachin ri naʼoj riʼ qkʼë?

Rchë nwachin ri kochʼonïk qkʼë nkʼatzin nqakʼutuj che rä Jehová chë tuyaʼ ru-espíritu chqë, y ryä xtuyaʼ chqë we xtqakʼuqbʼaʼ qakʼuʼx chrij (Lucas 11:13). Ye kʼa, tapeʼ ri loqʼoläj espíritu janina ruchqʼaʼ, röj chqä kʼo chë yeqasmajij pa qakʼaslemal ri nqakʼutuj che rä Jehová (Salmo 86:10, 11). Ntel chë tzij chë kʼo chë nqatäj qaqʼij chë ronojel mul nqkochʼon, ke riʼ eqal eqal xtkʼuluj chqë xtqasmajij ri naʼoj riʼ. Ye kʼa, ¿achkë chik jun nkʼatzin nqaʼän rchë ma kʼayewal ta xtuʼän chqawäch xtwachin ri kochʼonïk qkʼë?

Nkʼatzin nqatzʼët ri kochʼonïk xjeʼ rkʼë Jesús chqä nqakʼän qanaʼoj chrij. Pablo xuʼij chë ri kochʼonïk ya riʼ jun naʼoj ri kʼo chë njeʼ rkʼë jun cristiano. Chqä xuʼij: «Ye ta ri uxlanibʼäl kʼuʼx ri xjeʼ rkʼë ri Cristo ya riʼ ta xtsamäj pa iwan» (Colosenses 3:10, 12, 15, TNM). Ye kʼa rchë chë ri uxlanibʼäl kʼuʼx «nsamäj» pa qan kʼo chë nqaʼän achiʼel Jesús. Ryä xukʼuqbʼaʼ rukʼuʼx chë Dios xtchojmin ronojel ri kʼayewal qilon. We xtqakʼän qanaʼoj chrij Jesús majun achkë xtbʼanö chë xtkʼis ri kochʼonïk qkʼë (Juan 14:27; 16:33).

 Tapeʼ röj nqajoʼ chë ri kʼakʼakʼ Ruwachʼulew ri rutzujun Dios chqë npë ta yän, ri nqchʼobʼon chrij rukochʼonik Dios xtqrtoʼ rchë ma xtikʼo ta qakʼuʼx. Le Biblia nuʼij chë Jehová majanä tqʼät tzij pa ruwiʼ le Ruwachʼulew rma nrajoʼ chë jontir ta winäq nkïl kolotajïk (2 Pedro 3:9). Taq nqchʼobʼon chrij ri naʼoj rukʼutun Jehová qkʼë röj, xtqrtoʼ rchë xkeqaköchʼ ri nikʼaj chik winäq (Romanos 2:4). Tqatzʼetaʼ akuchï nkʼatzin nqakʼüt ri naʼoj riʼ.

Kʼïy yebʼanö chë nkʼatzin nqakʼüt kochʼonïk. Achiʼel taq nqajoʼ nqaʼij apü jun ri kʼo rejqalen chqawäch röj, rkʼë jubʼaʼ kʼo chë nqayoʼej na chë ma nqaqʼät ta rutzij jun chik (Santiago 1:19). O rkʼë jubʼaʼ nkʼatzin nqakʼüt kochʼonïk taq nqjeʼ kikʼë ri qachʼalal taq kʼo ri ma nqa ta chqawäch ri nkiʼän. Ye kʼa, pa rukʼexel itzel nqtzjon chkij, ütz qchʼobʼon chrij kikochʼonïk Jehová chqä Jesús qkʼë röj. Ryeʼ ma kan ta nkiyaʼ rejqalen ri naʼoj ri ma ye ütz ta ye kʼo qkʼë. Pa rukʼexel riʼ xa xuʼ ri ütz taq naʼoj nkitzʼët chqij chqä janina nkiloqʼoqʼej taq yeqasmajij ri naʼoj yekiyaʼ pä chqë (1 Timoteo 1:16; 1 Pedro 3:12).

Chqä nkʼatzin nqkochʼon taq kʼo jun nbʼin chqë chë kʼo jun ma ütz ta xqaʼän o xqaʼij. Taq nbʼanatäj riʼ, rkʼë jubʼaʼ xtpë qayowal o xtqaʼij chë ma qamak ta röj ri xbʼanatäj. Ye kʼa le Biblia nuʼij achkë naʼoj kʼo chë nqakʼüt. Chriʼ nuʼij: «Más ütz jun winäq ri kʼo kochʼonïk rkʼë chwäch jun winäq ri janina nnimirsaj riʼ. Ma chanin tmeqʼeʼ awkʼë, rma ri winäq ri chanin npë ryowal xa nakanïk» (Eclesiastés 7:8, 9). Rma riʼ, tapeʼ xa tzʼukün tzij xbʼan chqij, kʼo chë nqachʼöbʼ na achkë xtqaʼij apü. Ya riʼ xuʼän Jesús taq ri winäq xkitzʼük tzij chrij (Mateo 11:19).

Ri teʼej tataʼaj nkʼatzin njeʼ kochʼonïk kikʼë taq nkichojmij ri itzel taq naʼoj chqä ri itzel taq raynïk kʼo kikʼë ri kalkʼwal. Jun tzʼetbʼäl. Mattías, jun qachʼalal ri nsamäj pa Betel rchë ri Escandinavia, nuʼij chë taq kʼa kʼajol na ri rachiʼil pa tijobʼäl janina xkinäq rma ru-religión. Ri teʼej tataʼaj ma kitaman ta wä ronojel riʼ, ye kʼa kʼo chë xkitoʼ ri kalkʼwal rma rukʼuqbʼäl kʼuʼx xa najin nkʼis qa. Gillis, ri rutataʼ, nuʼij: «Kʼo chë xjeʼ kochʼonïk qkʼë». Mattías yeruʼän wä kʼutunïk achiʼel reʼ: «¿Achkë riʼ Dios? ¿Kantzij komä chë le Biblia ya riʼ ri Ruchʼaʼäl? ¿Achkë rubʼanik nqatamaj chë Dios nrajoʼ nqaʼän riʼ?». Chqä nuʼij wä che rä rutataʼ: «We rïn ma nnmaj ta ri ninmaj rïx, ¿achkë rma yinkiyöqʼ?».

Gillis nuʼij: «Kʼo mul, Mattías kan rkʼë wä ryowal ntzjon, ye kʼa ma qkʼë ta röj, xa rkʼë qa-religión, rma ri rachiʼil janina xkiyöqʼ xa rma riʼ». ¿Achkë xuʼän Gillis? Ryä nuʼij: «Kʼïy mul, xitzʼuyeʼ rkʼë chqä yalöj xqtzjon. Rïn nyaʼ wä nuxkïn che rä, chqä jujun mul nbʼän wä kʼutunïk che rä rchë ntamaj achkë nunaʼ chqä achkë nuchʼöbʼ. Kʼo mul, nbʼij wä che rä chë tchʼobʼon jun o kaʼiʼ qʼij chrij ri xqatzjoj qa, y taq xuʼän yän riʼ kʼa riʼ nqtzjon chik jmul. Kʼo chik jujun mul, xinbʼij che rä chë  tuyaʼ jun kayoxiʼ qʼij chwä rchë yichʼobʼon chrij ri xuʼij chwä. Rma chaq taqïl xqtzjon, Mattías xqʼax pa rujolon kʼïy naʼoj, achiʼel chrij ri kolotajïk xuyaʼ Jesús, ri Ruqʼatbʼäl Tzij Dios chqä rajowabʼäl Dios chqij. Tapeʼ kʼo mul kʼayewal xuʼän chqawäch chqä xukʼwaj tiempo xqaʼän riʼ, ri rajowabʼäl Mattías chrij Jehová eqal eqal xkʼïy. Ri wixjayil chqä rïn janina kiʼ qakʼuʼx rma ma xikʼo ta qakʼuʼx xqatoʼ Mattías taq kʼa kʼajol na. Riʼ xuʼän chë ütz xbʼä pa rukʼaslemal chqä chë ri naʼoj xeqakʼüt chwäch xeʼapon pa ran».

Gillis chqä rixjayil kikʼuqbʼan wä kikʼuʼx chë Jehová xkerutoʼ rkʼë kalkʼwal, rma riʼ ma xikʼo ta kikʼuʼx rkʼë. Ryä nuʼij: «Kʼïy mul, xinbʼij che rä Mattías che ruteʼ chqä rïn janina nqajoʼ y rma riʼ rkʼë ronojel qan nqakʼutuj wä che rä Jehová chë tutoʼ rchë nqʼax chwäch ri kantzij chrij le Biblia». Ri teʼej tataʼaj riʼ janina kiʼ kikʼuʼx rma xjeʼ kochʼonïk kikʼë rchë xkitoʼ ri kalkʼwal.

Ri rusamajelaʼ Jehová nkʼatzin chqä chë njeʼ kochʼonïk kikʼë taq nkichajij jun kichʼalal o jun kichiʼil ri rilon jun itzel yabʼil. Tqatzʼetaʼ ri xbʼanatäj rkʼë jun qachʼalal aj Escandinavia ri rubʼiniʼan Ellen * (tatzʼetaʼ ri nota).

Pa jun 8 junaʼ qa, ri rachijil ya Ellen xuyaʼ jun itzel yabʼil che rä ri xtzʼilaʼ rujolon. Rma ri yabʼil riʼ, ri rachijil ma nkowin ta chik nunaʼ joyowanïk, kiʼkʼuxlal chqä bʼis. Reʼ xuyaʼ kʼayewal chwäch ya Ellen. Ryä nuʼij: «Ri chʼonïk rkʼë Dios janina yirutoʼon rchë nkochʼon pä». Ryä chqä nuʼij: «Jun texto ri janina nqa chi nwäch chqä janina rukʼuqbʼan pä nkʼuʼx ya riʼ Filipenses 4:13 (TNM), chriʼ nuʼij: ‹Xa bʼa achkë yikowin nbʼän rma ri nyaʼö pä wuchqʼaʼ›». Rma ri uchqʼaʼ rilon, ya Ellen rukʼuqbʼan rukʼuʼx chë Jehová xtutoʼ rchë ma xtikʼo ta rukʼuʼx chwäch ri kʼayewal riʼ (Salmo 62:5, 6).

Kantzij na wä chë ri kochʼonïk nukʼüt Jehová ya riʼ ri más ruqʼij (2 Pedro 3:15). Chpan le Biblia yeqïl kʼïy tzijonem ri nkikʼüt chqawäch achkë rubʼanik xukʼüt kochʼonïk Jehová (Nehemías 9:30; Isaías 30:18). Jun tzʼetbʼäl chrij riʼ, ya riʼ taq Abrahán xchʼojin che rä Jehová rma nchüp ruwäch Sodoma. Taq Abrahán xuʼij che rä Jehová ri nunaʼ, ryä ma xuqʼät ta chqä xuyaʼ ruxkïn che rä. Chrij riʼ, xukʼüt chwäch chë xkʼoxaj taq xuʼij che rä chë ma xtchüp ta ruwäch Sodoma we ye kʼo ta ye lajuj winäq ri jïk kikʼaslemal chriʼ (Génesis 18:22-33). ¡Jun nimaläj tzʼetbʼäl ruyaʼon qa Jehová chqawäch chrij ri kochʼonïk chqä chrij ri naqʼïl awiʼ!

Nqʼalajin kʼa chë ri kochʼonïk jun naʼoj ri janina ruqʼij ri kʼo chë njeʼ kikʼë jontir rusamajelaʼ Jehová. We xtqatäj qaqʼij rchë nwachin ri jun naʼoj riʼ qkʼë, xtqayaʼ ruqʼij Jehová, ri Dios ri kʼo ajowabʼäl chqä kochʼonïk rkʼë. Chqä Dios xtuyaʼ utzil pa qawiʼ rma xtqjeʼ chkikojöl ri winäq ri kʼo kikʼuqbʼäl kʼuʼx chqä kochʼonïk kikʼë (Hebreos 6:10-12).