KAY nagkalisod ang kahimtang niining “kataposang mga adlaw,” ang katawhan ni Jehova nagkinahanglag dugang pailob kay sukad masukad. (2 Tim. 3:1-5) Gilibotan ta sa mga tawong sagad mahigugmaon sa kaugalingon, dili ikasabot, ug walay pagpugong sa kaugalingon. Kadtong nagpakita sa maong mga kinaiya sagad dili gyod mapailobon. Busa, angayng pangutan-on sa matag Kristohanon ang kaugalingon: ‘Natakdan ba ko sa pagkadili-mapailobon sa kalibotan? Unsay kahulogan sa tinuod nga pagpailob? Ug sa unsang paagi ang pagpailob mahimong bahin sa akong personalidad?’

Sa Bibliya, ang pulong nga pailob wala lang magpasabot ug pag-agwanta sa usa ka lisod nga kahimtang. Ang usa nga may diyosnong pailob molahutay nga may katuyoan. Dili lang kaugalingong panginahanglan ang iyang gihunahuna kondili ang kaayohan pod sa nakapasuko o nakapasakit niya. Tungod niini, kon ang mapailobong tawo gihimoag dili maayo, padayon siyang molaom nga magkauli ang ilang maayong relasyon. Maong dili ikatingala nga sa Bibliya ang “pailob” maoy una sa daghang maayong hiyas nga naggikan sa gugma. * (1 Cor. 13:4) Ang “hataas-nga-pailob” maoy bahin usab sa “bunga sa espiritu.” (Gal. 5:22, 23) Busa, unsay kinahanglan natong buhaton aron makapakitag tinuod nga pailob?

Aron maugmad ang pailob, kinahanglang hangyoon nato si Jehova nga tabangan ta sa iyang espiritu, nga iyang ihatag niadtong mosalig niya. (Luc. 11:13) Pero bisag gamhanan kaayo ang espiritu sa Diyos, kinahanglan tang molihok sumala sa atong pag-ampo. (Sal. 86:10, 11) Nagpasabot ni nga maningkamot ta sa pagpakitag pailob kada adlaw aron mogamot ni sa atong kasingkasing. Pero usahay, kinahanglan tingali tang mohimog labaw pa aron mahimo ning bahin sa atong personalidad. Unsa pay makatabang nato?

Maugmad nato ang pailob pinaagi sa pagtuon ug pagsundog sa hingpit nga ehemplo ni Jesus. Uyon sa maong ehemplo, giinspirar si apostol Pablo sa paghisgot bahin sa “bag-ong pagkatawo,” nga nag-apil sa “hataas-nga-pailob.” Dayon, giawhag ta niya nga ‘paharion ang kalinaw ni Kristo diha sa atong kasingkasing.’ (Col. 3:10, 12, 15) Aron ‘maghari’ ang kalinaw diha sa atong kasingkasing, kinahanglan natong sundogon ang lig-ong pagtuo ni Jesus nga tul-iron sa Diyos sa Iyang gitakdang panahon ang mga butang. Kon sundogon nato si Jesus, dili ta mawad-ag pailob bisag unsa pay mahitabo sa atong palibot.​—Juan 14:27; 16:33.

Bisag naghinamhinam tang makita ang gisaad sa Diyos nga bag-ong kalibotan, makakat-on  ta nga mahimong mas mapailobon kon palandongon nato ang pagpailob ni Jehova kanato. Ang Bibliya nagpasalig nato: “Si Jehova dili langaylangayan mahitungod sa iyang saad, sumala sa pag-isip sa pipila ka tawo nga paglangaylangay, kondili siya mapailobon kaninyo tungod kay siya wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Ped. 3:9) Samtang atong palandongon ang pagpailob ni Jehova kanato, dili ba mapalihok sab ta nga mahimong mas mapailobon sa uban? (Roma 2:4) Busa, unsa ang pipila ka kahimtang nga nagkinahanglag pailob?

Daghang situwasyon kada adlaw ang nagkinahanglag pailob. Pananglitan, kon gibati nimong may importante kang isulti, tingali magkinahanglan kag pailob aron dili mosagbat. (Sant. 1:19) Basin magkinahanglan sab kag pailob dihang makig-uban sa mga igsoon kansang batasan makapalagot nimo. Imbes mawad-ag pailob, maayong hunahunaon nimo kon unsay reaksiyon ni Jehova ug Jesus sa atong mga kahuyangan. Wala sila magpokus sa atong ginagmayng kasaypanan. Hinuon, nagtan-aw sila sa atong maayong mga hiyas ug mapailobong nag-obserbar sa atong paningkamot nga suklan ang atong mga kahuyangan.​—1 Tim. 1:16; 1 Ped. 3:12.

Kinahanglan sab tang magpailob dihang may moingon nga nakasulti o nakahimo tag sayop. Sagad, maglagot dayon ta ug depensahan ang kaugalingon. Pero, lahi ang giingon sa Pulong sa Diyos: “Mas maayo pa ang mapailobon kay sa mapahitas-on sa espiritu. Ayaw pagdalidali sa imong espiritu sa pagkasuko, kay ang pagkasuko nagapuyo sa sabakan sa mga hungog.” (Eccl. 7:8, 9) Busa, bisag dili tinuod ang akusasyon, kinahanglan tang magpailob ug hunahunaon ang atong tubag. Mao nay gihimo ni Jesus dihang ang uban sayop nga nag-akusar niya.​—Mat. 11:19.

Ang mga ginikanan ilabinang nagkinahanglag pailob dihang tabangan nila ang ilang anak sa pagtul-id sa sayop nga mga hunahuna, tinguha, o tendensiya. Tagda ang kahimtang ni Mattias, nga membro sa pamilyang Bethel sa Scandinavia. Sa tin-edyer pa si Mattias, pirme siyang bugalbugalan sa iyang mga eskolmet tungod sa iyang relihiyon. Sa sinugdan, wala mahibalo niini ang iyang ginikanan. Pero namatikdan nila nga ang ilang anak misugod na pagduhaduha sa iyang gituohan. “Nagkinahanglan gyod tog dakong pailob,” nahinumdom si Gillis nga papa ni Mattias. Si Mattias mangutana: “Kinsa ang Diyos? Pulong ba gyod sa Diyos ang Bibliya? Giunsa nato pagkahibalo nga ang Diyos gyod ang nagpabuhat niini o niana kanato?” Moingon pod siya sa iyang papa: “Nganong hukman man ko kon dili parehas ninyo ang akong gibati ug gituohan?”

Si Gillis miingon: “Usahay mangutana ang among anak nga may kasuko, dili batok nako o sa iyang mama, kondili sa kamatuoran, nga paminaw niya maoy nakapalisod sa iyang kinabuhi.” Unsay gibuhat ni Gillis? “Mag-estorya mig dugay sa akong anak. Sagad mamati ko, pero usahay mangutana pod ko aron masabtan ang iyang pagbati ug opinyon. May mga higayon nga may ipatin-aw ko niya unya hatagan nako siyag panahon sa paghunahuna niini, tingali sulod sa  usa ka adlaw, una namo to hisgotan pag-usab. Sa laing mga higayon, moingon ko nga nagkinahanglan kog pipila ka adlaw sa paghunahuna sa iyang gisulti. Pinaagi niining regular nga panag-estoryahay, anam-anam nga nasabtan ug nadawat ni Mattias ang mga pagtulon-an sama sa lukat, pagkasoberano sa Diyos, ug Iyang gugma. Dugaydugay pod ni nakong gihimo, ug sagad lisod ni, pero anam-anam nga miturok sa iyang kasingkasing ang gugma kang Jehova. Lipay kaayo mi sa akong asawa nga tungod sa among pagpailob, natabangan ang among anak panahon sa iyang pagkatin-edyer ug natandog namo ang iyang kasingkasing.”

Si Gillis ug ang iyang asawa misalig kang Jehova samtang mapailobon silang nagtabang sa ilang anak. Sa paghinumdom, si Gillis miingon: “Sagad sultian namo si Mattias nga ang among dakong gugma niya nagpalihok namo nga mas kinasingkasing pang mag-ampo nga tabangan siya ni Jehova nga makasabot.” Mapasalamaton gyod ang maong ginikanan nga nagpailob sila!

Gawas sa pagtaganag espirituwal nga tabang, ang mga Kristohanon nga dugay nang nag-atiman ug masakitong membro sa pamilya o higala nagkinahanglan pod ug pailob. Tagda pananglitan si Ellen, * nga nagpuyo sab sa Scandinavia.

Mga walo ka tuig kanhi, ang bana ni Ellen kaduha naestrok nga nakadaot sa iyang utok. Tungod niana, dili na siya mobatig kaluoy, kalipay, o kaguol. Lisod kaayo ni kang Ellen. Siya miingon: “Nagkinahanglan nig dakong pailob ug daghang pag-ampo.” Siya midugang: “Ang akong paboritong teksto nga makapahupay nako mao ang Filipos 4:13, nga nag-ingon: ‘Sa tanang butang ako adunay kusog pinaagi kaniya nga naghatag ug gahom kanako.’” Tungod sa maong gahom, si Ellen mapailobong milahutay ug bug-os nga masaligon sa tabang ni Jehova.​—Sal. 62:5, 6.

Siyempre, si Jehova ang kinamaayohang ehemplo sa pagpailob. (2 Ped. 3:15) Dunay daghang asoy sa Bibliya diin si Jehova nagpakitag dakong pailob. (Neh. 9:30; Isa. 30:18) Pananglitan, unsay reaksiyon ni Jehova dihang nangutana si Abraham bahin sa Iyang desisyon nga laglagon ang Sodoma? Una, wala mosagbat si Jehova samtang nagsulti si Abraham. Hinunoa, mapailobong namati si Jehova sa matag pangutana ug gikabalak-an ni Abraham. Dayon, gipakita ni Jehova nga siya naminaw dihang iyang gisultig balik ang gikabalak-an ni Abraham ug gipasaligan kini nga dili Niya laglagon ang Sodoma bisan pag 10 lang ka tawong matarong ang anaa sa maong siyudad. (Gen. 18:22-33) Maayo gyod nâ nga ehemplo sa mapailobong pagpaminaw ug dili pagkasuko!

Ang diyosnong pailob maoy hinungdanon gyong bahin sa bag-ong personalidad nga angayng isul-ob sa tanang Kristohanon. Kon maningkamot ta sa pag-ugmad niining bililhon ug malungtarong hiyas, gipasidunggan nato ang atong mahigugmaon ug mapailobong langitnong Amahan, ug mahiapil ta “kanila nga pinaagi sa pagtuo ug pailob nagapanunod sa mga saad.”​—Heb. 6:10-12.