ƝƐNAMAYA ka gwɛlɛ kosɔbɛ “laban tuma” nunu na. O kama, an mako be muɲuli la bi ka tɛmɛ sanga ni wagati bɛɛ kan (2 Tim. 3:1-5). An sigiɲɔgɔnw fanba muɲunin tɛ. U be miiri u yɛrɛ dɔrɔn lo koo la, sɔsɔli ka di u ye ani u tɛ se u dusu kɔrɔ. O la, kerecɛn kelen kelen bɛɛ ka ɲi k’a yɛrɛ ɲininga ko: “Yala ne fana muɲunin tɛ i ko n’ sigiɲɔgɔnw wa? Ka muɲuli kɛ sɔbɛ la, o kɔrɔ ye mun ye? Ne be se ka mun lo kɛ walisa muɲuli ka kɛ n’ jogo dɔ ye?”

Bibulu kɔnɔ, muɲuli kɔrɔ tɛ dɔrɔn ka gwɛlɛyaw sɔminɛ. Mɔgɔ muɲunin be muɲuli kɛ kuun dɔ lo kama. A jigi b’a la ko koow bena fisaya. A tɛ miiri a yɛrɛ dɔrɔn koo la. Nka, a b’a janto mɔgɔ wɛrɛw dusukunnakow la, hali minw donna a gasi la wala u ye tilenbaliyako dɔ kɛ a la. A jigi bele b’a la ko a n’o mɔgɔw ka jɛnɲɔgɔnya bena fisaya. O la, a tɛ bari an na k’a ye ko Bibulu b’a fɔ ko kanuya * be mɔgɔ min dusu la, o tigi be muɲuli kɛ (1 Kor. 13:4). Ala ka Kuma b’a yira fana ko “muɲuli” ye ‘hakili senu deen’ faan dɔ ye (Gal. 5:22, 23, ABM). Muɲuli ye Ala ka jogo dɔ ye. An ka ɲi ka mun lo kɛ walisa ka kɛ n’o jogo ye?

Walisa ka kɛ ni muɲuli ye, an ka ɲi ka Jehova deli a ka hakili senu di an ma. Mɔgɔ minw b’u jigi la Jehova kan, a b’o di olu ma (Luka 11:13). Tiɲɛn lo ko hakili senu ye fanga kabakoman ye. Nka, an ka ɲi ka koow kɛ ka kɛɲɛ n’an ka deliliw ye (Zab. 86:10, 11). O kɔrɔ ko an ka ɲi k’an seko kɛ k’a yira loon o loon ko an muɲunin lo ani k’an jija walisa muɲuli ka kɛ an jogo dɔ ye. Nka tuma dɔw la, o dama tɛ bɔri kɛ. Mun lo be se k’an dɛmɛ do?

Yezu ye ɲɛyirali ɲuman di an ma muɲuli koo la. An be se k’o ɲɛyirali lajɛ walisa ka Yezu ladegi. Muɲuli ye jogokura faan dɔ ye. Tuma min na ciden Pol kumana “jogokura” koo la, a y’an jija ko: “Krista ka hɛrɛ ka kɛ n’aw ye.” (Kɔlɔs. 3:10, 12, 15). O hɛɛrɛ be se ka kɛ n’an ye n’an be tugu Yezu ka ɲɛyirali kɔ ani k’an jigi bɛɛ la Ala kan. Tilenbaliyako minw be kɛra an na, an ka la a la ko Ala bena u latilen wagati bɛnnin na. Koow mana kɛ cogo o cogo, an bena o muɲu n’an jigi lanin be Ala kan.—Zan 14:27; 16:33.

An bɛɛ b’a fɛ duniɲa kura ka na joona joona. Nka Jehova be muɲu an kɔrɔ cogo min na, n’an be miiri o la, an bena a ɲini ka muɲuli kɛ. Bibulu b’an hakili sigi ko: “[Jehova] y’a daa di koo min na, dɔw ko a ka  suma o kɛko la. K’a sɔrɔ a man suma. Nga a be muɲu aw le kɔrɔ, a t’a fɛ mɔgɔ si ka halaki, a b’a fɛ bɛɛ ka se ka nimisa ka faran a ka kojuguw la.” (2 Piyɛri 3:9). Jehova be muɲu an kɔrɔ cogo min na, n’an be miiri o la, o b’an lasun fana ka muɲu tɔɔw kɔrɔ (Ɔrɔm. 2:4). An ka ɲi ka muɲu koo jumanw lo la do?

Koo caaman be se k’an ka muɲuli kɔrɔbɔ loon o loon. Ɲɛyirali fɛ, n’i b’a miiri ko kuma dɔ b’i fɛ k’a fɔ min kɔrɔtanin lo, fɔɔ i ka muɲu walisa i kana kuma tigɛ tɔɔw daa (Zaki 1:19). N’an be n’an kerecɛnɲɔgɔn dɔw ye minw ka kokɛcogow b’an kɔnɔ gwan, an ka ɲi ka muɲu fana. Sanni an k’a to o koo k’an dusu gwan, a ka ɲi an k’a to an hakili la Jehova ni Yezu Krista be min miiri an ka fiɲɛw koo la. Olu tɛ sinsin an ka fili den-denninw kan. Nka, jogo ɲuman minw b’an na ani an be jijali minw kɛ walisa k’an sɔɔn fisaya, u be muɲu k’o lo filɛ.—1 Tim. 1:16; 1 Piyɛri 3:12.

Koo wɛrɛ min be se k’an ka muɲuli kɔrɔbɔ, o ye ni mɔgɔ dɔ y’a fɔ ko an ye kuma dɔ fɔ wala ka koo dɔ kɛ min man ɲi. Tuma caaman na, o koo ɲɔgɔn ka teli k’an dusu gwan ani an b’a ɲini ka joo di an yɛrɛ ma. Nka, Ala ka Kuma b’an jija an ka koow kɛ cogo wɛrɛ la. A b’a fɔ ko: “Muɲuli ka fisa ni yɛrɛboɲa ye. Kana kɔn k’i dusu gwan, bari dusugwan ye nalomanw ta ye.” (Waaj. 7:8, 9). O kama, hali ni mɔgɔ dɔ ye ngalon la an kan, an ka ɲi ka muɲu ani ka miiri fɔlɔ ka sɔrɔ k’a tigi jaabi. Yezu y’o lo kɛ tuma min na mɔgɔw ye ngalon la a kan.—Mat. 11:19.

Bangebagaw mako be muɲuli la kosɔbɛ n’u b’u deenw dɛmɛna u k’u sɔɔn yɛlɛma ani ka miiriya jugu dɔw bɔ u kɔnɔ. An ka Mattias ka koo lajɛ. A be baara kɛ Betɛli dɔ la Erɔpu. A kanbele tuma, a filankuruw tun be to k’a lɔgɔbɔ tuma o tuma lakɔliso la a ka diinan kosɔn. A daminɛ na, a bangebagaw tun t’o kala ma. Nka, u y’a ye ko a y’a daminɛ ka sigasiga a ka lannakow la. Mattias facɛ Gillis y’a fɔ ko ale n’a muso mako tun b’a la ka muɲu kosɔbɛ o koo la. Mattias tun be ɲiningali nunu ɲɔgɔn kɛ: “Ala ye jɔn ye? N’a y’a sɔrɔ ko Bibulu tɛ Ala ka Kuma ye do? An be se k’a lɔn cogo di ko Ala lo b’a fɛ an ka koo dɔ kɛ?” A yɛrɛ y’a facɛ ɲininga ko: “Ni n’ ka lannakow ani n’ ka miiriyaw be dan na n’i ta ye, mun na mɔgɔw be n’ jalaki o kosɔn?”

Gillis y’a ɲɛfɔ ko: “Tuma dɔw la, an dencɛ tun b’an ɲininga ni dusu ye. A tɛ komi a tun diminin b’a bamuso wala ne le kɔrɔ dɛ! Nka tiɲɛn batoli lo tun b’a kɔnɔ gwan sabu a b’a miiri k’o lo be gwɛlɛya lasera a ma.” Gillis y’a dencɛ dɛmɛ cogo di? A ko: “Tuma dɔw la, ne ni n’ dencɛ tun be sigi ka baro kɛ lɛri caaman kɔnɔ. Tuma caaman na n’ tun b’a lamɛn ani k’a ɲininga tuma kelen kelen walisa k’a ka miiriya, n’a ka koow filɛcogo faamu. Tuma dɔw la, n’ tun be koo dɔ ɲɛfɔ a ye ani k’a ɲini a fɛ a ka tile kelen wala tile fila ta ka miiri o la. O kɔ, an tun be baro kɛ o koo la. Wagati dɔw la, a tun mana a ka miiriya fɔ n’ ye, n’ b’a fɔ a ye ko n’ mako be tile damanin na ka miiri o koo la. Komi  an tora ka baro kɛ o cogo la, Mattias tora ka faamuyali sɔrɔ dɔɔni dɔɔni kunmabɔsara, Ala ka Masabaya ani Jehova ka kanuya koo la. O ye wagati ta ani tuma caaman na, a tun man nɔgɔ. Nka dɔɔni dɔɔni, Jehova ka kanuya tora ka bonya a dusukun na. Ne ni n’ muso dusu ka di kosɔbɛ sabu an muɲuna ka jijali minw kɛ walisa k’an dencɛ dɛmɛ a kanbele tuma na, nafa sɔrɔla o la ani o y’a dusukun sɔrɔ.”

Gillis n’a muso muɲuna k’u dencɛ dɛmɛ ani u tun lanin b’a la ko Jehova bena u dɛmɛ. Gillis ko: “Tuma caaman na, n’ y’a fɔ Mattias ye ko ne n’a bamuso b’a kanu kosɔbɛ minkɛ, o y’an lasun ka Jehova deli siɲɛ caaman walisa a k’a dɛmɛ ka faamuyali kɛ.” Mattias bangebagaw dusu ka di kosɔbɛ sabu u muɲuna ani u m’u fari faga!

Tiɲɛn na, n’an b’a fɛ ka mɔgɔ dɔ dɛmɛ Alako ta fan fɛ, fɔɔ an ka muɲu. An mako be muɲuli la fana n’an b’an somɔgɔ dɔ wala an teri dɔ ladonna min man kɛnɛ kabi wagatijan. An ka Elɛni ka koo lajɛ. * Ale fana be Erɔpu jamana dɔ la.

A saan seegi ɲɔgɔn ye nin ye, bana dɔ tun ye Elɛni furucɛ minɛ ani k’a to a kunsɛmɛ tun tɛ baara kɛ ka ɲɛ tugun. O y’a to a tun tɛ hinɛ tugun ani a tun tɛ ninsɔndiya ni dusukasi lɔn tugun. O koo tun man nɔgɔ Elɛni ma fewu. A y’a fɔ ko: “N’ muɲuna kosɔbɛ ani n’ ye delili caaman kɛ.” A y’a fɔ fana ko: “N’ tun be dususalo sɔrɔ bibulusen min na, o ye Filipikaw 4:13 ye. A fɔra o yɔrɔ la ko: ‘Min be see di ne ma, ale barika la ne be se ka o koow bɛɛ kɛ.’” Elɛni sera k’o koo muɲu Jehova ka setigiya n’a ka dɛmɛ sababu fɛ.—Zab. 62:6, 7.

Tiɲɛn na, mɔgɔ min ka ɲɛyirali ɲɔgɔn tɛ yen muɲuli koo la, o ye Jehova yɛrɛ lo ye (2 Piyɛri 3:15). Koo caaman lakalila Bibulu kɔnɔ o minw na Jehova y’a yira ko a muɲunin lo kosɔbɛ (Neemi 9:30; Ezayi 30:18). Ɲɛyirali fɛ, tuma min na Jehova y’a latigɛ ka Sodɔmɛ dugu halaki, Ibrayima y’a ɲininga siɲɛ caaman o koo la. I hakili b’a la Jehova ye min kɛ wa? A ma kuma tigɛ Ibrayima daa. Nka, a muɲuna ka Ibrayima ka haminankow n’a ka ɲiningali kelen kelen bɛɛ lamɛn. O kɔ, Jehova segira Ibrayima ka kuma kelen kelen bɛɛ kan k’a yira ko a y’a lamɛn. A ye Ibrayima hakili sigi ko a tɛna Sodɔmɛ halaki ni mɔgɔ tilennin tan dɔrɔn sɔrɔla yen (Zɛnɛzi 18:22-33). Jehova be muɲu ka lamɛnni kɛ tuma bɛɛ ani a tɛ dimi joona. O ye ɲɛyirali ɲuman yɛrɛ lo ye!

Muɲuli ye jogo kura faan dɔ ye min kɔrɔtanin lo kosɔbɛ. Kerecɛnw bɛɛ ka ɲi k’a ɲini ka kɛ n’o jogo ye. N’an b’an seko bɛɛ kɛ walisa ka kɛ ni muɲuli ye, an be nɔɔrɔ la an Faa Jehova kan, ale min muɲunin lo ani a b’a janto an na. Minw be la Ala ka layiduw la, ka “muɲu fɔɔ k’o sɔrɔ,” an bena kɛ olu dɔw ye fana.—Eburuw 6:10-12.