NA KỌGBIDINAMẸNU “azán godo tọn lẹ” tọn fọ́n bo to jijideji wutu, omẹ Jehovah tọn lẹ tindo nuhudo homẹfa tọn hugan gbede pọ́n. (2 Tim. 3:1-5) To aihọn ehe mẹ, gbẹtọ he lẹdo mí lẹ nọ saba yin wanyina mẹdetiti tọ́, gbigbọ gbekọndopọ tọn matindotọ po wazẹjlẹgonọ po. Mẹhe tindo jijọ mọnkọtọn lẹ ma nọ fahomẹ paali. Enẹwutu, Klistiani dopodopo dona kanse ede dọmọ: ‘Be aihọn he ma tindo homẹfa ehe ko bẹpla mi wẹ ya? Etẹwẹ e zẹẹmẹdo nado nọ fahomẹ nugbonugbo? Podọ, nawẹ n’sọgan to jẹhẹnu Klistiani tọn titengbe ehe hẹn zun apadewhe gbẹtọ-yinyin ṣie tọn zọnmii gbọn?’

Sọgbe hẹ Biblu, homẹfa bẹ nususu hẹn hú linsinsinyẹn to ninọmẹ he whlemẹpọn de mẹ poun. Mẹhe tindo homẹfa Jiwheyẹwhe tọn nkọ nọ doakọnnanu po lẹndai de po. E nọ mọnú zẹ̀ nuhudo etọn titi lẹ go, bo nọ hò dagbemẹninọ mẹhe to wiwọ́ hẹnwa lọ tọn pọ́n. Enẹwutu, whenue yè dinho kavi do adán nukun na gbẹtọ homẹfatọ de, e nọ magbe ma nado jogbe to nuhe sọgan hẹn haṣinṣan he ko gble de pọnte lẹ wiwà mẹ. Abajọ Biblu slẹ ‘homẹfa’ taidi tintan to jẹhẹnu susu he nọ wá sọn owanyi mẹ lẹ mẹ. * (1 Kọl. 13:4) Ohó Jiwheyẹwhe tọn dlẹnalọdo “homẹfa” taidi adà “sinsẹ́n gbigbọ tọn” de. (Gal. 5:22, 23) Ṣigba, etẹwẹ e nọ biọ to mí si nado wleawuna jẹhẹnu jijọ-di-Jiwheyẹwhe tọn ehe?

Nado wleawuna homẹfa, mí dona hodẹ̀ bo biọ alọgọ gbigbọ Jehovah tọn, ehe ewọ nọ na mẹhe dejidego bo ganjẹ e go lẹ. (Luku 11:13) Ṣigba, mahopọnna dọ gbigbọ Jiwheyẹwhe tọn dohuhlọn, mí dona yí adà mítọn wà bo yinuwa to kọndopọ mẹ hẹ odẹ̀ mítọn lẹ. (Salm. 86:10, 11) Ehe zẹẹmẹdo dọ mí dona wà nuhe go mí pé lẹpo nado nọ wleawuna homẹfa egbesọegbesọ, na jẹhẹnu ehe nido doadọ̀do to ahun mítọn mẹ. Etomọṣo, e sọgan biọ dọ mí ni wà nususu dogọ nado hẹn homẹfa zun adà tẹgbẹ tọn gbẹtọ-yinyin mítọn tọn de. Onú devo tẹlẹ wẹ sọgan gọalọna mí?

Mí sọgan wleawuna homẹfa eyin mí nọ gbadopọnna apajlẹ pipé Jesu tọn bosọ nọ hodo e. To kọndopọ mẹ hẹ apajlẹ enẹ, apọsteli Paulu basi zẹẹmẹ to gbọdo glọ gando “gbẹtọ-yinyin yọyọ lọ” go, ehe bẹ “homẹfa” hẹn, podọ to enẹgodo, e na mí tuli nado ‘dike jijọho Klisti tọn ni nọ deanana mí to ahun mítọn mẹ.’ (Kol. 3:10, 12, 15) Mí sọgan dike jijọho enẹ ni “nọ deanana” ahun mítọn, gbọn apajlẹ yise mawhango Jesu tọn hihodo dali, yèdọ yise lọ dọ Jiwheyẹwhe na hẹn pọngbọ wá na ahunmẹdunamẹnu mítọn lẹ to ojlẹ sisọ Etọn mẹ. Eyin mí hodo apajlẹ Jesu tọn, mí ma na hẹn homẹfa mítọn bu, mahopọnna nudepope he sọgan to jijọ lẹdo mí.—Joh. 14:27; 16:33.

Mahopọnna dọ mí to jejeji nado mọ aihọn yọyọ he Jiwheyẹwhe dopagbe etọn lọ, mí nọ plọn nado do homẹfa hia dogọ, eyin mí lẹnayihamẹpọn do homẹfa he Jehovah nọ dohia mí ji.  Owe-wiwe lẹ hẹn mí deji dọmọ: “Jehovah ma to gbàndọn gando opagbe etọn go, dile mẹdelẹ nọ lẹn gbàndindọn do, ṣigba e to homẹfa na mìtọn wutu, na e ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.” (2 Pita 3:9) Dile mí to nulẹnpọn do homẹfa he Jehovah nọ dohia mí ji, be mí ma nọ yin whinwhàn nado nọ fahomẹ hẹ mẹdevo lẹ dogọ ya? (Lom. 2:4) Po enẹ po to ayiha mẹ, ninọmẹ tẹlẹ mẹ wẹ e sọgan biọ dọ mí ni do homẹfa hia te?

Ninọmẹ egbesọegbesọ tọn susu sọgan tẹ́n homẹfa mítọn pọ́n. Di apajlẹ, eyin mí lẹndọ mí tindo onú titengbe de nado dọ, e sọgan biọ dọ mí ni fahomẹ ma nado gbòhódonù na mẹdevo lẹ. (Jak. 1:19) E sọgan sọ biọ dọ a ni do homẹfa hia to whenue a to nuwadopọ hẹ yisenọ hatọ he walọ yetọn lẹ nọ hẹn homẹgble we lẹ. Kakati nado yinuwa po wazẹjlẹgo po to ninọmẹ mọnkọtọn lẹ mẹ, nuyọnẹnnu wẹ e yin nado lẹnnupọndo lehe Jehovah po Jesu po nọ yinuwa gando awugbopo mítọn lẹ go do ji. Yé ma nọ to awugbopo flinflin mítọn lẹ ṣinyan. Kakatimọ, yé nọ mọ jẹhẹnu dagbe mítọn lẹ, bosọ nọ yí homẹfa do doayi vivẹnu he mí to dido nado hẹn míde pọnte lẹ go.—1 Tim. 1:16; 1 Pita 3:12.

Ninọmẹ devo he sọgan whlé homẹfa mítọn pọ́n wẹ whenue mẹde dọ dọ mí dọ kavi wà nude he ma sọgbe. To whedelẹnu, mí sọgan yawu gblehomẹ bo yiavùnlọna míde. Ṣigba, aliho he gbọnvo pete mẹ wẹ Ohó Jiwheyẹwhe tọn dotuhomẹna mí nado yinuwa te. E dọmọ: “E sọ yọ́n hugan nado fahomẹ hú nado joawuna sakla. A yawu nado gblehomẹ blo, na ohò nulunọ lẹ tọn mẹ wẹ homẹgble gbọṣi.” (Yẹwh. 7:8, 9) Enẹwutu, eyin whẹsadokọnamẹ de tlẹ yin lalo pete, mí dona yí homẹfa do lẹnnupọn whẹpo do yinuwa. Jesu hodo nunọwhinnusẹ́n ehe to whenue mẹdevo lẹ vlẹ ẹ kò matin whẹjijọ.—Mat. 11:19.

Mẹjitọ lẹ na taun tọn dona do homẹfa hia to whenue yé mọdọ e yin dandan nado dọhodo walọyizan, ojlo po ayilinlẹn ylankan he sọgan fọ́n to ahun ovi yetọn lẹ tọn mẹ po ji. Lẹnnupọndo apajlẹ Mattias he to sinsẹ̀n taidi dopo to hagbẹ whẹndo Bẹtẹli Scandinavie tọn lẹ mẹ ji. Taidi jọja aflanmẹ de, Mattias nọ pehẹ mẹṣanko gbọzangbọzan to wehọmẹ na nuyise etọn lẹ wutu. To tintan whenu, mẹjitọ etọn lẹ ma yọnẹn dọ onú mọnkọtọn to jijọ. Yé dona doakọnna nuyiwadomẹji he nukundiọsọmẹ ehe tindo do visunnu yetọn ji, mẹhe jẹ kinkanse ede ji eyin nugbo lọ mẹ janwẹ emi te. Otọ́ Mattias tọn he nọ yin Gillis flin dọmọ: “Ninọmẹ lọ biọ homẹfa taun.” Mattias gán kanse dọ “Mẹnu wẹ Jiwheyẹwhe? Eyin Biblu ma ka yin Ohó Jiwheyẹwhe tọn lo? Nawẹ mí sọgan yọnẹn nugbonugbo gbọn dọ Jiwheyẹwhe wẹ biọ ehe kavi dé-tọn to mí si?” E sọ nọ dọna baba etọn dọ: “Naegbọn n’na do yin whẹdana eyin n’ma tindo pọndohlan kavi yise mìtọn nkọ?”

Gillis dọmọ: “To whedelẹnu, kanbiọ visunnu mítọn tọn nọ do homẹgble hia, e ma yin do yẹn kavi onọ̀ etọn go gba, ṣigba do nugbo lọ go, yèdọ nuhe e lẹndọ e to gbẹninọ hẹn vẹawuna emi.” Nawẹ Gillis didẹ ninọmẹ lọ gbọn? “Yẹn po visunnu ṣie po nọ sinai bo nọ dọho na gànhiho susu. N’nọ saba dotoai bo nọ kàn kanbiọ lẹ sè e to whedelẹnu nado sọgan yọ́n numọtolanmẹ po pọndohlan etọn lẹ po to gigọ́ mẹ. To whedelẹnu, n’nọ basi zẹẹmẹ de na ẹn bo nọ biọ to e si nado lẹnnupọndeji na nudi azán dopo kakajẹ whenue mí na  zindonukọn to hodọdopọ mítọn mẹ. To ojlẹ devo lẹ mẹ, n’nọ dọna ẹn dọ n’do hudo azán delẹ tọn nado lẹnnupọndo nuhe e dọ ji. Gbọn hodọdopọ whẹwhẹ enẹlẹ dali, vudevude Mattias wá mọnukunnujẹ nuplọnmẹ delẹ taidi ofligọ lọ, nupojipetọ-yinyin Jehovah tọn po owanyi Etọn po mẹ dogọ bosọ kẹalọyi yé. Enẹ yí whenu podọ e ma nọ saba bọawu, ṣigba vudevude owanyi etọn na Jehovah wá siso dogọ. E vivi na yẹn po asi ṣie po taun dọ vivẹnu he mí do nado yí homẹfa do gọalọna visunnu mítọn to whenue e to jujugbọn owhe aflanmẹ tọn mẹ lẹ yin ahọsuna bosọ yinuwado ahun etọn ji.”

Gillis po asi etọn po dejido godonọnamẹ Jehovah tọn go dile yé yí homẹfa do to alọgọna ovi yetọn. Gillis dọmọ, eyin n’flinnu hlan godo, “N’nọ saba dọna Mattias dọ owanyi sisosiso he yẹn po onọ̀ etọn po tindo na ẹn nọ whàn mí nado hodẹ̀, etlẹ yin vẹkuvẹku dọ Jehovah ni gọalọna ẹn nado tindo nukunnumọjẹnumẹ.” Lehe mẹjitọ enẹlẹ dopẹ́ do sọ dọ yé do jẹhẹnu titengbe lọ he yin homẹfa hia!

Gbọnvona alọgọ gbigbọmẹ tọn, Klistiani nugbo lẹ dona wleawuna owanyi po homẹfa po to whenue yé to nukunpedo hagbẹ whẹndo tọn kavi họntọn he to azọ̀n jẹmagbọ jẹ lẹ go. Lẹnnupọndo apajlẹ Ellen * tọn ji, mẹhe nọ nọ̀ lẹdo Scandinavie tọn mẹ ga.

To nudi owhe ṣinatọ̀n die, asu Ellen tọn hẹ́nu whla awe, ehe yinuwado apọ̀n etọn ji sinsinyẹn. Taidi kọdetọn de, e masọ nọ tindo numọtolanmẹ awuvẹmẹ, ayajẹ, kavi awubla tọn ba. Ninọmẹ lọ vẹawuna Ellen taun. E dọmọ: “E biọ homẹfa po odẹ̀ susu po.” E yidogọ dọ: “Wefọ he n’yiwanna hugan bọ e nọ miọnhomẹna mi wẹ Filipinu lẹ 4:13, he dọmọ: ‘To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.’” Huhlọn enẹ wẹ gọalọna Ellen nado yí homẹfa do doakọnnanu po jidide mlẹnmlẹn po to godonọnamẹ Jehovah tọn mẹ.—Salm. 62:5, 6.

Na nugbo tọn, to whẹho homẹfa didohia tọn mẹ, Jehovah wẹ yin apajlẹ ayidego tọn hugan lọ he mí na hodo. (2 Pita 3:15) Kandai susu wẹ tin to Ohó Jiwheyẹwhe tọn mẹ he do ninọmẹ he mẹ Jehovah yinuwa po homẹfa ayidego tọn po hia te. (Nẹh. 9:30; Isa. 30:18) Di apajlẹ, nawẹ Jehovah yinuwa gbọn whenue Ablaham kanhose e gando nudide Etọn nado và Sodọmi sudo go? To tintan whenu, Jehovah ma gbòhódonù na Ablaham dile e to hodọ. Kakatimọ, Jehovah yí homẹfa do dotoaina kanbiọ po ahunmẹdunamẹnu Ablaham tọn lẹ dopodopo po. Enẹgodo, Jehovah dohia dọ emi dotoai gbọn ahunmẹdunamẹnu Ablaham tọn lẹ vivọdọ dali, bo hẹn ẹn deji dọ Emi ma na và Sodọmi sudo eyin dodonọ ao poun tlẹ yin mimọ to tòdaho enẹ mẹ. (Jen. 18:22-33) Apajlẹ dagbe homẹfa yíyí do dotoaina mẹ bo ma do wazẹjlẹgo hia tọn nankọ die!

Na nugbo tọn, homẹfa Jiwheyẹwhe tọn yin adà titengbe gbẹtọ-yinyin yọyọ lọ tọn he Klistiani lẹpo dona ze dogo. Eyin mí nọ dovivẹnu vẹkuvẹku nado wleawuna jẹhẹnu họakuẹ he nọ dẹn-to-aimẹ ehe, mí nọ gbògbéna Otọ́ olọn mẹ tọn homẹfatọ mítọn he nọ penukundo mí go, podọ mí na yin hihia dogọ “mẹhe gbọn yise po sọwhiwhe po dali dugu opagbe lọ lẹ tọn lẹ.”—Heb. 6:10-12.