BÍBLIA dja flaba ma na ‘ténpu di fin’ vida ta fikaba kada bês más difísil. Pur isu nu meste ten paxénxa. (2 Tim. 3:1-5) Nu sta ta vive na meiu di algen ki ka ten paxénxa. Es ta ama sô ses kabésa, es gosta di diskuti i es ka ta kontrola ses kabésa. Nton é inportanti nu para i nu pergunta nos kabésa: ‘Dja N bira un algen ki ka ten paxénxa sima algen di mundu? Kuzê ki siginifika ten paxénxa di verdadi? Kuzê ki N pode faze pa N ser un algen ki sénpri ta ten paxénxa?’

Na Bíblia, palavra paxénxa é más di ki aguenta un situason difísil. Un algen ki ten paxénxa ta aguenta un prubléma, pamodi el ten speransa ma kuzas ta midjora. El ka ta preokupa sô ku se kabésa, má el ta preokupa ku kel algen ki es tene prubléma. Pur isu, mésmu óras ki el sta xatiadu ku un algen, el ta kontinua ku speransa ma ses amizadi ta midjora. É pur isu, ki nu ka ta fika dimiradu óras ki Bíblia ta fla, ma ‘paxénxa’ ta ben di amor. * (1 Cor. 13:4) Tanbê, paxénxa ta faze párti di ‘frutu di spritu’. (Gál. 5:22, 23) Kuzê ki nu meste faze pa nu ten paxénxa di verdadi?

Pa nu ten paxénxa, nu meste ora pa Jeová i pidi se spritu santu. Si nu kúnfia na el di tudu nos korason, el ta djuda-nu. (Lucas 11:13 ) Má sô pidi ka ta txiga, nu meste faze nos párti i faze sima nu pidi na orason. (Sal. 86:10, 11) Kel-li krê fla ma nu meste faze tudu ki nu pode pa nu mostra paxénxa tudu dia. Óras ki nu faze si, paxénxa ta bira ta faze párti di nos manera di ser. Má alvês nu pode perde paxénxa. Kuzê ki pode djuda-nu?

Nu meste studa i imita izénplu perfetu di Jizus. Apóstlu Polu fla ma paxénxa ta faze párti di kel ‘novu manera di ser’. Pur isu, el fla-nu pa nu dexa ‘pas di Kristu reina na nos korason’. (Col. 3:10, 12, 15) Jizus tinha tudu kunfiansa ma Deus ta rezolveba prublémas na ténpu sértu. Si nu ten kel kunfiansa li, nu ta dexa pas di Kristu ‘reina’ na nos korason. Asi nu ka ta perde paxénxa, ka ta nporta kuzê ki kontise na nos vólta. — João 14:27; 16:33.

Nos tudu nu tene gana pa mundu novu di Deus ben. Má nu ta prende ma nu meste ten más paxénxa, óras ki nu pensa na paxénxa ki Jeová ten ku nos. Bíblia ta fla-nu: ‘Jeová é ka léntu ku se promésa, sima alguns algen ta pensa,  má el ten paxénxa ku nhos, pamodi el ka krê pa ningen ser distruídu, má el krê pa tudu algen rapende.’ (2 Ped. 3:9) Nton, óras ki nu ta pensa ma Jeová ten txeu paxénxa ku nos, ta djuda-nu ten más paxénxa ku otus. (Rom. 2:4) Nton, na ki situason nu meste ten paxénxa?

Ten txeu kuza ki nu ta pasa na vida ki nu ta meste ten paxénxa. Pur izénplu, alvês nu ten un kuza inportanti pa fla, má nu meste ten paxénxa pa nu ka korta konbérsu di otus. (Tia. 1:19) Tanbê nu meste ten paxénxa óras ki un algen faze un kuza ki ta xatia-nu. Nton, envês di perde paxénxa ku el, é bon nu lenbra modi ki Jeová ku Jizus ta lida ku nos frakéza. Es ka ta konsentra na kes fadja pikinoti ki nu ta faze. Má, es ta odja kes bon kualidadi ki nu ten i ku paxénxa es ta da-nu ténpu pa nu midjora. — 1 Tim. 1:16; 1 Ped. 3:12.

Tanbê nu meste ten paxénxa óras ki algen ta fla ma nu faze ô ma nu fla algun kuza mariadu. Talvês nos tendénsia é fika xatiadu i lógu ranja diskulpa. Má Bíblia ta inxina-nu diferenti. El ta fla: ‘É más midjór ten paxénxa di ki ten un spritu orgulhozu. Ka bu ofende faxi, pamodi é korason di algen tolu ki ta fika ofendidu.’ (Ecl. 7:8, 9) Pur isu, mésmu ki otu algen fla ma nu faze algun kuza ki nu sabe ma nu ka faze, nu meste ten paxénxa, i pensa dretu antis di nu faze algun kuza. É si ki Jizus ta fazeba óras ki otus ta papiaba mal di el pa un kuza ki el ka fazeba. — Mat. 11:19.

Pai ku mai meste ten más paxénxa inda. Alvês es meste djuda ses fidju muda ses manera di ser i ivita dizejus mariadu. Odja izénplu di Matias ki oji ta sirbi na Betel di Europa. Kantu Matias éra jóven se kolégas di skóla ta fazeba el trósa pamodi el é Tistimunha di Jeová. Na komésu se pai ku se mai ka sabeba kuzê ki sta kontiseba. Má es da kónta ma Matias staba ta duvida di verdadi. Gillis, pai di Matias fla: “Kel ténpu foi un próva pa nos paxénxa.” Matias ta perguntaba: “Ken ki é Deus? I si Bíblia é ka Palavra di Deus? Modi ki nu sabe si é Deus ki krê pa nu faze kel-li?” Tanbê el fla se pai: “Ningen ka ten direitu di julga-m si N ka ta kridita na mésmu kuza ki nhos.”

Gillis splika: “Alvês Matias ta fazeba perguntas ku raiba, é ka éra raiba di mi nen di se mai, má éra raiba di verdadi. El ta atxaba ma verdadi ta poba se vida más difísil.” Kuzê ki el faze pa el djuda se fidju? Gillis fla: “N ta xintaba ku Matias i N ta fikaba txeu óra ta papiaba ku el. Txeu bês N ta fikaba sô ta obi-l i N ta fazeba el alguns pergunta pa N odja kuzê ki el ta pensaba i kuzê ki el ta xintiba. Alvês N ta splikaba el un asuntu i N ta flaba el: ‘Pensa na kel-li duránti alguns dia  dipôs nu ta pâpia.’ Tanbê ten dia ki N ta flaba el ma N meste di alguns dia pa N pensa na kuza ki el fla-m. Sénpri N ta papiaba ku el, nton poku-poku Matias ba ta ntende i el ba ta seta asuntus sima resgati, direitu di Deus governa i amor di Jeová. Leba ténpu pa konsigi kel-li i ka foi faxi. Má se amor pa Jeová ba ta kria na se korason. Mi ku nha mudjer gósi nu sta txeu kontenti. Bale péna tudu kel sforsu i paxénxa ki nu tinha ku el kantu el staba jóven.”

Kantu Gillis ku se mudjer mostra paxénxa na djuda ses fidju es kúnfia ma Jeová ta djudaba es. Gillis fla: “Txeu bês N ta flaba Matias ma nos grandi amor pa el, ta poba nos ta fazeba txeu orason ta pidi pa Jeová djuda-l ntende verdadi.” Di sertéza se pai ku se mai fika txeu kontenti di mostra paxénxa i es ka dizisti di ses fidju.

Tanbê nu meste ten paxénxa óras ki nu ta kuida di un família ô di un amigu ki tene un duénsa ki ka ten kura. Odja izénplu di Ellen  * ki ta mora na Europa.

Dja ten uns 8 anu ki maridu di Ellen panha un duénsa ki prujudika se sérbru. Pur isu, el ka ta konsigi xinti alegria, tristéza i nen péna di otus. Kel situason é txeu difísil pa Ellen. Ellen fla: “N meste ten txeu paxénxa i faze txeu orason.” Tanbê el fla: “Testu di Bíblia ki más ta konsola-m é Filipenses 4:13 ki ta fla: ‘Pa tudu kuza N ten forsa pamodi kel ki ta da-m puder.’” Ku puder di Jeová Ellen ta aguenta se situason ku paxénxa i ku kunfiansa ma Jeová sénpri ta djuda-l. — Sal. 62:5, 6.

Nu ka ten dúvida ma óras ki nu ta pâpia di paxénxa, Jeová é kel midjór izénplu di algen ki ten paxénxa. (2 Ped. 3:15) Na Bíblia nu ta atxa txeu situason ki ta mostra ma Jeová ten txeu paxénxa. (Nee. 9:30; Isa. 30:18) Pur izénplu, bu ta lenbra modi ki Jeová reaji kantu Abraon pergunta-l sobri se disizon di distrui Sudoma? Primeru, Jeová dexa-l pâpia. El obi ku paxénxa tudu kes pergunta ki Abraon faze. Dipôs, pa el mostra ma el obi ku atenson, el ripiti kes preokupason ki Abraon tinha. Nton Jeová da-l sertéza ma el ka ta distruíba Sudoma si el atxaba 10 ómi justu na sidadi. (Gén. 18:22-33) Kel-li ta mostra ma Jeová sénpri ta obi-nu ku paxénxa i nunka el ka ta izajera.

Paxénxa é un kualidadi txeu inportanti ki ta faze párti di kel novu manera di ser, ki nos tudu debe ten. Si nu faze nos midjór pa nu ten paxénxa di verdadi, nu ta onra Jeová ki é un Deus ki ten paxénxa i ki ta ama-nu txeu. Tanbê nu ta sta na meiu di ‘kes ki ta resebe promésas pamodi ses fé i ses paxénxa.’ — Heb. 6:10-12.