NĨ ŨNDŨ wa ũrĩa kũrĩ na moritũ maingĩ “matukũ-inĩ ma kũrigĩrĩria,” andũ a Jehova nĩ marabatara gũkorũo marĩ na ũkirĩrĩria gũkĩra hĩndĩ ĩngĩ o yothe. (2 Tim. 3:1-5) Tũraikara thĩinĩ wa thĩ ĩrĩ na andũ eyendi, matendaga ũiguano, na mategiragĩrĩria. Andũ acio makoragwo mahaana ũguo matikoragwo na ũkirĩrĩria kana wetereri o na hanini. Nĩ ũndũ ũcio, o Mũkristiano agĩrĩirũo nĩ kwĩyũria ũũ: ‘Hihi nĩ nyambĩtie kwaga wetereri ta andũ arĩa tũikaranagia nao? Gũkorũo na wetereri kana ũkirĩrĩria nĩ kuuga atĩa? Na ingĩka atĩa nĩguo ndũũre ndĩ na wetereri?’

Bibilia ĩkĩaria ũhoro wa ũkirĩrĩria, ndĩkoragwo ĩkĩaria o ũhoro wa kũũmĩrĩria hĩndĩ ĩrĩa mũndũ aragerera thĩna-inĩ. Mũndũ ũrĩ na ũkirĩrĩria etagĩrĩra arĩ na mwĩhoko. Ningĩ ndeciragia o ũhoro wake tu, no eciragia nginya ũhoro wa mũndũ ũrĩa ũratũma agerere maũndũ maritũ. Nĩ ũndũ ũcio, mũndũ ũrĩ na ũkirĩrĩria angĩhĩtĩrio kana arakario nĩ ũrĩa ũngĩ, ndakuaga ngoro, no aikaraga arĩ na mwĩhoko atĩ ũrata wao na mũndũ ũcio wamũhĩtĩria no ũrĩcoka. O na nĩkĩo Bibilia ĩgwetaga ‘ũkirĩrĩria’ ũrĩ ũndũ wa mbere harĩ maũndũ marĩa moimanaga na wendo. * (1 Kor. 13:4) Ningĩ Kiugo kĩa Ngai no kĩgwetaga “gũkirĩrĩria” kũrĩ ũndũ ũmwe wa “maciaro ma roho.” (Gal. 5:22, 23) No rĩrĩ, tũrabatara gwĩka atĩa nĩguo tũkorũo tũrĩ na ũkirĩrĩria?

Nĩguo tũkũrie ũkirĩrĩria no mũhaka tũhoe Jehova atũhe roho wake tondũ aheaga arĩa mamwĩhokaga. (Luk. 11:13) O na gũtuĩka roho wa Ngai nĩ ũrĩ hinya mũno, o na ithuĩ nĩ tũrabatara gwĩka kũringana na mahoya maitũ. (Thab. 86:10, 11) Ũguo nĩ kuuga atĩ no mũhaka o mũthenya tũgeragie ũrĩa wothe tũngĩhota gũkorũo na ũkirĩrĩria nĩgetha wĩkĩre mĩri ngoro-inĩ citũ. No nĩgetha ũkirĩrĩria ũikare ngoro-inĩ citũ, harĩ o maũndũ mangĩ tũrabatara gwĩka. Nĩ kĩĩ kĩngĩ kĩngĩtũteithia?

No tũkũrie ũkirĩrĩria tũngĩthuthuria kĩonereria kĩa Jesu na twĩgerekanie nake. Mũtũmwo Paulo atongoretio nĩ roho nĩ aataarĩirie atĩ “ũkirĩrĩria” nĩ ũndũ ũmwe wa kũgĩa na “ũmũndũ mwerũ,” na agĩtwĩkĩra ngoro ‘tũrekage thayũ wa Kristo wathage ngoro citũ.’ (Kol. 3:10, 12, 15) No tũrekage thayũ ũcio “wathage” ngoro citũ na njĩra ya gũkorũo na wĩtĩkio mũrũmu ta ũrĩa Jesu aarĩ naguo atĩ Ngai nĩ arĩrũnga maũndũ marĩa maratũthumbũra ihinda rĩake rĩakinya. Tũngĩĩgerekania na Jesu, tũtirĩrekaga maũndũ marĩa tũracemania namo matũrakarie nginya tũkaga ũkirĩrĩria kana wetereri.—Joh. 14:27; 16:33.

O na gũtuĩka nĩ twĩriragĩria mũno kũingĩra thĩinĩ wa thĩ njerũ ĩrĩa Ngai atwĩrĩire, no twĩrute kũgĩa na wetereri makĩria tũngĩĩcũrania ũrĩa Jehova akirĩrĩirie nĩ ũndũ witũ. Maandĩko matwĩraga: “Jehova ndekururagia kũhingia ciĩranĩro ciake ta ũrĩa andũ amwe meciragia, no nĩ kũmũkirĩrĩria amũkiragĩrĩria  tondũ ndendaga mũndũ o na ũmwe akaaniinwo no endaga othe merire.” (2 Pet. 3:9) Na githĩ tũtiĩkĩragwo ngoro gũkirĩrĩria andũ arĩa angĩ o na makĩria twecũrania ũrĩa Jehova akirĩrĩirie nĩ ũndũ witũ? (Rom. 2:4) Tũrĩ na ũndũ ũcio meciria-inĩ, reke twĩcirie maũndũ mamwe mangĩbatara tũkorũo na ũkirĩrĩria.

Nĩ harĩ maũndũ mamwe mahaanĩkaga o mũthenya mabataraga tuonanie ũkirĩrĩria. Kwa ngerekano, o na angĩkorũo nĩ ũraigua atĩ ũrĩ na ũndũ wa bata ũrenda kuuga, no ũbatare kwamba gweterera nĩguo ndũgatinie ũrĩa ũngĩ na mĩario. (Jak. 1:19) Ningĩ no ũbatare gũkirĩrĩria rĩrĩa mũrĩ na aarĩ na ariũ a Ithe witũ arĩa mĩkĩre yao ya maũndũ ĩkũrakaragia. Handũ ha kũrakario nĩ maũndũ ta macio gũkĩria njano, wagĩrĩirũo gwĩcũrania ũrĩa Jehova na Jesu makiragĩrĩria maũndũ marĩa twĩkaga nĩ ũndũ wa kwaga gũkinyanĩra. Matitindaga magĩciria ũhoro wa tũmahĩtia tũrĩa twĩkaga. Handũ ha ũguo, maroraga maũndũ marĩa tũreka ũrĩa kwagĩrĩire na magatũkirĩrĩria tũgĩthiĩ na mbere kwĩrutanĩria kwagagĩria.—1 Tim. 1:16; 1 Pet. 3:12.

Ũndũ ũngĩ ũngĩbatara tuonanie ũkirĩrĩria nĩ rĩrĩa mũndũ angĩtwĩra atĩ nĩ tuugĩte kana tũgeka ũndũ mũũru. Kaingĩ no tũhiũhe kũrakara na twambĩrĩrie gwĩtetera. No Kiugo kĩa Ngai gĩtwĩraga twĩke ũndũ ngũrani na ũcio. Kiugaga ũũ: “Nĩ kaba mũndũ wĩ ngoro ĩĩ gĩeterero gũkĩra ũrĩa wĩ ngoro ya mwĩtĩo. Tigaga kũhiũha kũrakara na ngoro yaku; nĩ ũndũ marakara matũũraga ngoro-inĩ cia irimũ.” (Koh. 7:8, 9) Nĩ ũndũ ũcio, o na angĩkorũo nĩ kũigĩrĩrũo tũraigĩrĩrũo kĩgenyo, tũbatiĩ kwamba gweterera nĩguo twambe twĩcirie tũtanacokia. Ũguo nĩguo Jesu eekaga aigĩrĩrũo igenyo nĩ andũ.—Mat. 11:19.

Aciari mabatiĩ gũkorũo na ũkirĩrĩria na wetereri hĩndĩ ĩrĩa marateithia ciana ciao kweheria mĩerekera, mawoni, na merirĩria moru. Ta wĩcirie ũhoro wa Mattias ũrĩa ũtungataga thĩinĩ wa Betheli ya Scandinavia. Arĩ tinĩnja nĩ aanyũrũragio mũno arĩ cukuru nĩ ũndũ wa wĩtĩkio wake. Kĩambĩrĩria-inĩ aciari ake matiamenyaga ũrĩa kũrathiĩ na mbere. O na kũrĩ ũguo, ũndũ ũcio nĩ wahutirie aciari ake tondũ nĩ aambĩrĩirie gwĩkĩrĩra nganja maũndũ marĩa eetĩkĩtie. Gillis ũrĩa nĩwe ithe wa Mattias oigire ũũ: “Ũndũ ũcio nĩ wabataraga ũkirĩrĩria mũnene.” Mattias nĩ angĩoririe: “Ngai nũũ? Ĩ angĩkorũo Bibilia ti Kiugo kĩa Ngai? Tũmenyaga atĩa atĩ na ma nĩ Ngai ũrenda twĩke ũndũ mũna?” Ningĩ nĩ angĩoririe ithe ũũ: “Mũndũ angĩnduĩra nĩkĩ angĩkorũo ndiĩtĩkĩtie maũndũ marĩa mwĩtĩkĩtie?”

Gillis aatarĩirie ũũ: “Rĩmwe Mattias oragia ciũria arakarĩte, no ti niĩ kana mami wao aarakaragĩra, no aarakaragio nĩ ũhoro wa ma tondũ onaga ta ũramũritũhĩria ũtũũro.” Gillis aahiũranirie na ũndũ ũcio atĩa? Oigire ũũ: “Twaikaraga thĩ nake, tũkaria ihinda iraihu. Kaingĩ nĩ kũmũthikĩrĩria ndamũthikagĩrĩria na ngamũria ciũria nĩguo ndaũkĩrũo biũ nĩ ũrĩa araigua na ũrĩa arona maũndũ. Rĩmwe ndaamũtaaragĩria kaũndũ angĩthiĩ gwĩciria ta mũthenya ũmwe kana makĩria, tũgacoka tũgakarĩrĩria thutha-inĩ. Rĩngĩ narĩo  ndamwĩraga ahe thikũ nini ngorũo ndeciria ũhoro wa ũndũ aragwetete. Nĩ ũndũ wa kwaria nake na njĩra ta ĩyo maita maingĩ, kahora kahora nĩ aathire agĩtaũkagĩrũo na agĩtĩkagĩra morutani ma Bibilia ta ũkũũri, ũnene wa Ngai, na wendo wa Jehova. Ũndũ ũcio ndwarĩ mũhũthũ na nĩ woire ihinda, no kahora kahora nĩ eendire Jehova kuuma ngoro. Twĩna mũtumia wakwa nĩ tũkenaga mũno kuona atĩ kĩyo gitũ gĩa gũteithia mwanake witũ arĩ tinĩnja tũrĩ na ũkirĩrĩria nĩ kĩamũteithirie na gĩkĩmũhutia ngoro.”

Gillis na mũtumia wake nĩ meehokire ũteithio wa Jehova ihinda rĩu maateithagia mwanake wao. Aikia maitho thutha oigaga ũũ: “Nĩ ndeeraga Mattias kaingĩ atĩ tondũ twĩna mami wao nĩ twamwendete mũno, nĩ twamũhoyagĩra Jehova amũteithie gũtaũkĩrũo.” Aciari acio nĩ makenaga mũno tondũ nĩ monanirie ngumo ĩno ya bata ya ũkirĩrĩria!

Makĩria ma gũteithia mũndũ kĩĩroho, Akristiano a ma nĩ magĩrĩirũo gũkorũo na ũkirĩrĩria hĩndĩ ĩrĩa marateithia mũndũ wa famĩlĩ yao kana mũrata ũrĩ na mũrimũ wa ihinda iraihu. Ta wĩcirie ũhoro wa Ellen, * ũrĩa o nake ũikaraga Scandinavia.

Mĩaka ta ĩnana mĩhĩtũku, mũthuri wa Ellen nĩ arwarire stroke maita merĩ na ĩkĩhutia tombo wake. Ũndũ ũcio watũmire akorũo ndangĩhota kũigua tha, gũkena, kana kũigua kĩeha. Ũndũ ũcio nĩ ũritũhagĩra Ellen mũno. Oigire ũũ: “Ũndũ ũcio nĩ ũbataraga ũkirĩrĩria mũnene na mahoya maingĩ.” Aacokire akiuga ũũ: “Rĩandĩko rĩrĩa nyendete mũno tondũ nĩ rĩnyũmagĩrĩria nĩ Afilipi 4:13, rĩrĩa riugaga: ‘Nĩ gũkorũo maũndũ-inĩ mothe nĩ ngoragwo na hinya kũgerera ũrĩa ũheaga hinya.’” Nĩ ũndũ wa kũheo hinya ũcio nĩ Jehova, nĩ ahotete gũkirĩrĩria na nĩ amwĩhokete biũ.—Thab. 62:5, 6.

Ma nĩ atĩ, Jehova nĩwe kĩonereria kĩrĩa kĩega biũ gĩa kuonania ũkirĩrĩria. (2 Pet. 3:15) Bibilia nĩ ĩkoragwo na ng’ano nyingĩ cionanagia ũrĩa Jehova anonania ũkirĩrĩria na njĩra nene. (Neh. 9:30; Isa. 30:18) Kwa ngerekano-rĩ, Jehova eekire atĩa rĩrĩa Iburahimu aamũragia ciũria thutha wake gũtua atĩ nĩ ekũniina Sodomu? Aambire akĩmũthikĩrĩria atekũmũtinia. Aathikĩrĩirie arĩ na wetereri ciũria iria ciothe Iburahimu oragia na maũndũ marĩa mothe oigaga. Jehova nĩ aacokire akĩonania atĩ nĩ aathikĩrĩirie tondũ aacokerire maũndũ marĩa Iburahimu oigĩte na akĩmwĩra atĩ Sodomu kũngĩonekire andũ ikũmi tu athingu, ndangĩamĩanangire. (Kĩam. 18:22-33) Na githĩ Jehova ndaigire kĩonereria kĩega mũno gĩa gũthikĩrĩria arĩ na wetereri na kwaga kũhiũkĩrũo!

Hatarĩ nganja, ũkirĩrĩria nĩ ũndũ ũmwe wa bata wa ũmũndũ mwerũ ũrĩa Akristiano othe magĩrĩirũo kwĩhumba. Tũngĩĩrutanĩria gũkorũo na ũkirĩrĩria nĩ tũrĩtĩithagia Jehova Ithe witũ wa igũrũ, ũrĩa ũtũrũmbũyagia na agatũkirĩrĩria na nĩ arĩtuonaga tũrĩ amwe a “arĩa kũgerera wĩtĩkio na wetereri magayaga ciĩranĩro.”—Ahib. 6:10-12.