MAMBO a kuba bintu bibena kukatazha bingi mu ano “moba a kupelako,” bantu ba Yehoba bafwainwa kwikala batekanya bingi. (2 Timo. 3:1-5) Twikala mu ntanda muji bantu betemwatu abo bene, babula kukeba kumvwañana, kabiji babula kwikanya. Onkao mambo, mwina Kilishitu yense wafwainwa kwiipuzha’mba: ‘Nanchi ne amiwa njitu nobe bantu ba mu ntanda babula kutekanya nyi? Kutekanya kulumbulula ka? Kabiji nakonsha kuba byepi pa kuba’mba ngikale na kino kyubilo?’

Mu Baibolo, kutekanya kechi kulumbulula kuchinchikatu lukatazho konka ne. Muntu watekanya uchinchika saka aji na luketekelo. Kechi utatu muchima pa bintu byamuwamina ne, bino ulangulukilako ne yewa wamuzhingijisha nangwa wamuba kintu kyatama. Na mambo a kino, muntu watekanya inge bamutamisha nangwa bamufichisha ku muchima, kechi ulanguluka pa kupwisha bulunda na muntu wamutamisha ne, pakuba wikala na luketekelo lwa kuba’mba bintu bikawama. O ene mambo pa mutanchi wa byubilo byawama byaimena pa butemwe byanembwa mu Baibolo, “kutekanya” kyo kyubilo kitanshi kyatongolwa. * (1 Ko. 13:4) Mambo a Lesa aamba ne kuba’mba “kutekanya,” ke kipangwa kimo pa “bipangwa bya mupashi.” (Nga. 5:22, 23) Pano twafwainwa kuba byepi pa kuba’mba twikale na kino kyubilo?

Pa kuba’mba twikale batekanya, twafwainwa kulomba bukwasho bwa mupashi wa Yehoba, ye apana ku boba bamuketekela. (Luka 11:13) Nangwa kya kuba mupashi wa Lesa uji bingi na bulume, bino ne atweba twafwainwa kubanga bintu kwesekana na mwayila milombelo yetu. (Sala. 86:10, 11) Kino kibena kulumbulula’mba twafwainwa kwibikako kumwesha butekanye pa juba pa juba pa kuba’mba twikale na kino kyubilo. Onkao mambo, twafwainwa kwingila na ngovu pa kuba’mba twikale batekanya mu bintu byonse. Ñanyi kintu kikwabo kyakonsha kwitukwasha?

Twakonsha kwikala batekanya inge ketulanguluke ne kulondela butekanye bwa kwa Yesu. Kimye mutumwa Paulo kyo aambilenga pa “bumuntu bupya,” bwavwangamo ne “butekanye,” witutundaikile’mba: “Muleke mutende wa Kilishitu alamenga mu michima yenu.” (Kolo. 3:10, 12, 15) Twakonsha kuswisha uno mutende ‘kulama’ mu michima yetu kupichila kwikala na luketekelo lwajingapo ne Yesu lwa kuba’mba Lesa ukawamisha bintu mu kimye kyanji kyafwainwa. Inge twalondela byajinga Yesu, kechi tukaleka kwikala batekanya nangwatu inge kuji bintu byakatazha byo tubena kupitamo ne.—Yoa. 14:27; 16:33.

Nangwa kya kuba tubena kutengela ntanda ipya yalaya Lesa, twafwainwa  kufunda kwikala batekanya inge ketulanguluke pe Yehoba byo etutekenya. Binembelo bitulaya’mba: “Yehoba kechi wabanda kufikizha mulaye wanji, byonka byo balanguluka bantu bamo ne, pakuba aye wimutekenya mambo kechi usaka muntu nangwa umo amba akafwe ne, bino ukeba’mba bonse balapile.” (2 Pe. 3:9) Inge twalanguluka pe Yehoba byo etutekenya, nanchi ne atweba kechi twafwainwa kutekenyanga bakwetu nenyi? (Loma 2:4) Onkao mambo, mu ñanyi bintu bimo mo twafwainwa kutekanya?

Kuji bintu byavula bimweka bikebewa kutekanya. Nabiji inge kuji kintu kyanema kyo mukeba kwamba, mwakonsha kutekanya pa kuba’mba mubule kuchibikizha bakwenu. (Yako. 1:19) Kabiji mwafwainwa kutekanya inge mubena kupwanañana na bakwenu ba mu lwitabilo baji na byubilo bimufichisha ku muchima. Kechi twafwainwa kuzhingila ne, pakuba twafwainwa kuvulukanga Yehoba ne Yesu byo betutekenya mu bintu byo tulubankanya. Kechi bata muchima ku bintu byo tutamisha ne. Pano bino, bata muchima pa byubilo byetu byawama kabiji betutekenya byo twibikako kuwamisha byubilo byetu.—1 Timo. 1:16; 1 Pe. 3:12.

Kabiji inge muntu waamba’mba twaambile nangwa twaubile kintu kyatama, kikatazha bingi kutekanya. Kino kyakonsha kwituzhingijisha ne kukeba kwibingisha bukiji bukiji. Pano bino, Mambo a Lesa etubuula kuba kintu kyapusanako. Mambo a Lesa aamba’mba: “Kutekanya kwawama kukila kwilundumika. Kechi mwafwainwa kuzhingilanga bukiji ne, mambo bantu bakosama bo bazhingila bukiji.” (Sapwi. 7:8, 9) Onkao mambo, nangwatu inge betubepela, twafwainwa kutekanya ne kulangulukapo bulongo saka tukyangye kukumbula. Yesu walondejile jino jifunde kimye kyo bamwendelekelenga.—Mat. 11:19.

Bansemi nabo bafwainwa kutekanya pa kukwasha baana baano inge bamona’mba batendeka kwikala na byubilo byatama nangwa milanguluko yabula kufwainwa. Akilangulukai pa kyamwekejile ba Mattias ba mu kisemi kya Betele mu Scandinavia. Byo bakijinga banyike, ba Mattias bachinchikile myendeleko yavula bingi pa sukulu na mambo a bintu byo baitabilamo. Patanshi, bansemi babo kechi bayukile kino ne. Nangwa byonkabyo, bamwene kuba’mba mwanabo watendeka kuzhinauka bintu byo baitabilamo. Bashabo ba Mattias abo ba Gillis baambile’mba: “Kyakebewenga kutekanya pa kuba’mba tumukwashe mwanetu.” Kimo kimye ba Mattias baipuzhanga mepuzho nabiji a kuba’mba: “Lesa ye ñanyi? Nanchi Baibolo kine Mambo a Lesa nyi? Twayuka byepi kuba’mba Lesa ye ukeba’mba tubenga bibye?” Kabiji baipuzhanga bashabo amba: “Mambo ka o nafwainwa kuzhatwa inge nakana bintu byo mwaitabilamo?”

Ba Gillis balumbulwile’mba: “Mwanetu waipuzhanga mepuzho saka azhingila, pano bino, kechi wituzhingijilanga atweba bansemi banji ne, wazhingijilanga bukine, mambo bwamulengejilenga kupita mu makatazho pa sukulu.” Ba Gillis baubilepo byepi? Baambile’mba: “Naikalanga nanji kimye kyabaya na kwisamba. Javula natelekanga ne kumwipuzha mepuzho pa kuba’mba ngyuke byo alanguluka.  Bimye bimo namulumbulwilanga bintu bimo ne kumupa juba jimo nangwa avula kuba’mba alangulukepo apa bino twatendeka kwisamba jikwabo. Bimye bimo namubuulanga kuba’mba pakipiteko moba ndangulukepo bulongo pa byo aamba. Na mambo a kwisamba nanji kimye kyonse, Mattias pachepache watendekele kumvwisha ne kuswa mafunjisho nabiji bukuzhi, bumfumu bwa Lesa bwa pa bilengwa byonse ne butemwe bwa Yehoba. Papichile kimye kyabaya, kabiji kechi kyapelele ne, bino watendekele kutemwa Yehoba pachepache. Amiwa ne benakwami tuji bingi na lusekelo, mambo twatekenye ne kukwasha mwanetu saka akiji mwanyike kabiji twamukwashishe kumvwisha bukine.”

Ba Gillis ne benakwabo baketekejile mu bukwasho bwa Yehoba byo bakwashishenga mwanabo saka batekanya. Ba Gillis bavuluka’mba: “Javula nabuulanga Mattias kuba’mba na mambo a kuba’mba twakutemwa bingi amiwa ne bainobe, kyo kyo twalombelanga kwi Yehoba na mukoyo kuba’mba akukwashe kuyuka bukine.” Bano bansemi basanta bingi mambo bamwesheshe kyubilo kyanema bingi kya butekanye.

Kununga pa kukwasha bisemi kwikala na bulunda bwawama ne Lesa, bena Kilishitu ba kine batekanya pa kukwasha ba mu kisemi ne bantu bakwabo baji na bikola bibula kupwa. Akilangulukai kyamwekejile ba Ellen, * nabo bekala mu Scandinavia.

Myaka itanu na isatu yapitapo, bamwatawabo bakolelwe kikola kya kinkanku (stroke) kyalengejile bongo kuleka kwingila bulongo. Na mambo a kino, kechi bomvwina bantu lusa, kwikala na lusekelo nangwa kumvwa bulanda ne. Luno lukatazho lwibabayila bingi ba Ellen. Baambile’mba: “Kutekanya ne kulomba ko kwankwasha bingi. Kinembelo kyo natemwa kintekenesha bingi ke Filipai 4:13, kyaamba’mba: ‘Mambo bintu byonse nji na ngovu ya kwibyuba na mambo a yewa umpa bulume.’” Na bulume bwa Yehoba ne bukwasho bwanji, ba Ellen bachinchika saka batekanya.—Sala. 62:5, 6.

Pano bino, mwine ye twafwainwa kufunjilako butekanye ke Yehoba. (2 Pe. 3:15) Mu Mambo a Lesa muji mashimikila avula bingi alumbulula Yehoba byo amwesheshe butekanye bukatampe. (Ne. 9:30; Isa. 30:18) Nanchi mubena kuvuluka Yehoba byo aubile kimye Abalahama kyo mwipwizhe mepuzho avula kimye kyo afuukwilepo kuzhiya muzhi wa Sodoma nyi? Yehoba kechi wachibikizhe Abalahama ne. Pakuba Yehoba watekenye ne kuteleka byonse byaambilenga Abalahama. Kepo Yehoba amwesheshe kuba’mba watelekelenga byo apitulukilemo mu byambo byaambile Abalahama ne kumulaya’mba kechi ukonauna muzhi wa Sodoma inge mukatanwe bantu jikumi baoloka ne. (Nte. 18:22-33) Yehoba uteleka saka atekanya, kabiji kechi uzhingila bukiji ne.

Butekanye ke lubaji lwanema bingi lwa bumuntu bupya bena Kilishitu bonse bo bafwainwa kuvwala. Inge twaingila na ngovu kwikala na kino kyubilo kyanema bingi, tunemeka Shetu wa mwiulu, kabiji tukekala pa “boba baswana bintu byo alayile Lesa na mambo a lwitabilo ne na butekanye bwabo.”—Hebe. 6:10-12.