PA MWANDA wa kuvula kwa makambakano mu ano “mafuku a mfulo,” bantu ba Yehova basakilwa kutamija bininge kitūkijetyima kupita mafuku kunyuma. (2 Temote 3:1-5) Tudi mu ntanda mudi bantu bavule besenswe abo bene, bapela kumvwañana ko-konso, ne bampikwa kwīfula. Boba badi na ino ngikadila kebavudilepo kwikala na kitūkijetyima. O mwanda mwine Kidishitu ense ufwaninwe kwiipangula’mba: ‘Lelo kubulwa kitūkijetyima kwa mu ino ntanda ke kunsambukile? Le kwikala na kitūkijetyima kya binebine kushintulula bika? Ne i muswelo’ka ombwanya kumwekeja nyeke ino ngikadila ya bwine Kidishitu ya kutendelwa mu būmi bwami?’

Mungya Bible, kishima kitūkijetyima kekifunkilangapo’nka pa kutyumwina mu manwi ngikadilo kampanda. Ino muntu wa kitūkijetyima kya bwine Leza ūmininanga na kitungo. Welanga milafwe kulampe ne kusakila biyampe yewa ulengeje makambakano’a. O mwanda muntu udi na kitūkijetyima shi abamulonga kibi nansha kumusomba, kajimijangapo kikulupiji kyandi kya amba myanda isa kulumbuluka. Langa’po bidi bityetye, Bible utela “kitūkijetyima” bu ngikadila mibajinji mu ngikadila mivule ishiluka ku buswe. * (1 Kodinda 13:4) Kadi Kinenwa kya Leza kibadila “kitūkijetyima” mu ngikadila ya “kipa kya mushipiditu.” (Ngalatea 5:22, 23) Le i bika byotufwaninwe kulonga pa kutamija ino ngikadila ya bwine Leza?

Pa kutamija ngikadila ya kitūkijetyima, tufwaninwe kulomba bukwashi bwa mushipiditu wa Yehova, mwine wapānanga ku boba bamukulupile. (Luka 11:13) Nansha mushipiditu wa Leza byoudi na bukomo, inoko netu tufwaninwe kwielela’ko na kulonga bintu mungya milombelo yetu. (Ñimbo ya Mitōto 86:10, 11) Kino kishintulula’mba tufwaninwe kulonga bukomo bwa kumwekeja kitūkijetyima difuku ne difuku mwanda wa ino ngikadila yāle miji mu mutyima wetu. Kutentekela pa bino, tusakilwa kadi kulonga bivule pa kumwekeja nyeke kitūkijetyima mu būmi bwetu. Le i bika bikwabo bibwanya kwitukwasha?

Tubwanya kutamija kitūkijetyima na kubandaula ne kwiula kimfwa kibwaninine kya Yesu. Kukwatañana na kino kimfwa, mutumibwa Polo wāpelwe mushipiditu ujila esambile pa “bumuntu bupya,” mwine mubadilwa ne “kitūkijetyima,” kupwa wētusoñanya tuleke ‘ndoe ya Kidishitu ibikale mu mityima yetu.’ (Kolose 3:10, 12, 15) Tubwanya kuleka ino ndoe ‘ibikale’ mu mityima yetu na kwiula lwitabijo lukomo lwa Yesu lwa amba Leza uketulongolwela bintu mu kitatyi kyandi kifwaninwe. Shi tulonde kimfwa kya Yesu, nabya ketukajimijapo kitūkijetyima kyetu, nansha shi tubatanwa na bintu bya muswelo’ka.​—Yoano 14:27; 16:33.

Nansha byotudi na kipyupyu kya kutwela mu ntanda mipya ilaile Leza, twifundanga kwikala na kitūkijetyima potulangulukila pa kitūkijetyima  kilombwele Yehova kotudi. Bisonekwa bitukulupija’mba: “Yehova kejengapo pa mwanda wa mulao wandi, na mumwena bamobamo amba waije, ino aye wimutūkijije mutyima mwanda kasakilepo muntu nansha umo oneke, ino usaka bonso bafikile pa kwisāsa.” (2 Petelo 3:9) Potulangulukila pa kitūkijetyima kilombwele Yehova kotudi, le kino kekitutononangapo netu tutūkijije bakwetu mutyima bininge? (Loma 2:4) Na kino mu ñeni, le i myanda’ka imoimo ilomba kitūkijetyima?

Myanda mivule itutana difuku ne difuku ibwanya kutūla kitūkijetyima kyetu pa ditompo. Kimfwa, shi umona’mba udi na myanda kampanda ya mvubu yosaka kunena, ufwaninwe kwikala na kitūkijetyima kutyina wakatyiba bakwenu pobesamba. (Yakoba 1:19) Kadi usakilwa kulombola kitūkijetyima pomwitana na banabenu mu lwitabijo badi na bibidiji bikulobejanga. Pa kyaba kya kuloba, i biyampe ulangulukile pa muswelo umonanga ba Yehova ne Yesu bukōkekōke bwetu. Kebatengapo mutyima pa kutupatupa kwetu. Inoko, bamonanga ngikadila yetu miyampe ne kwitutūkijija mutyima potulonga bukomo bwa kwilumbulula.​—1 Temote 1:16; 1 Petelo 3:12.

Kintu kikwabo kibwanya kutūla kitūkijetyima kyetu pa ditompo i shi muntu wetunena’mba twanenene nansha kulonga kintu kibi. Divule batwe bonso tupejanga kuloba ne kwibingija. Inoko, Kinenwa kya Leza kitusoñanya tulonge kintu kishile na kino. Kinena’mba: “Kutūkija mutyima i kupite buya kwizunzula mu mushipiditu. Kokapēlakana kuloba, mwanda bulobo budi mu kyadi kya balembakane.” (Musapudi 7:8, 9) O mwanda nansha shi myanda yobetunenena’ya i ya bubela, tufwaninwe kwishisa na kitūkijetyima kumeso kwa kulondolola. Yesu wālondele uno musoñanya pāmufutulwile bantu pampikwa mwanda.​—Mateo 11:19.

Kupityidila bambutwile bafwaninwe kulombola kitūkijetyima pobalemununa babo bana shi abamone amba kudi mwikadilo nansha bya kusakasaka bibi byobashilula kutamija. Tala kimfwa kya Mattias, wingila ku Betele ya mu Skandinavi. Mattias paadi ukidi nkasampe, wadi ūminina lonji lobadi bamusomba kyaba kyonso ku masomo pa mwanda wa nkulupilo yandi. Dibajinji, bambutwile bandi kebadipo bayukile uno mwanda. Nansha nankyo, balwile na byobya byalupukile ku luno lonji lobadi basomba wabo mwana, mwine washilwile kutatana bubine. Gillis, shandya Mattias uvuluka’mba, “Uno mwanda wadi ulomba bininge kitūkijetyima.” Mattias wadi wipangula’mba: “Lelo Leza mwine i ani? Le bikekala namani shi Bible ke Kinenwapo kya Leza? Le tubayuka namani amba Leza ye witusakila kino nansha kyoki?” Kadi wadi ulombola shandi amba: “Le i kibi’ka kyonalonga shi nkikulupilepo byomukulupile’byo?”

Gillis unena’mba, “Kyaba kimo wetu mwana wadi wipangula bino bipangujo na bulobo, ke amipo waadi ulobela nansha inandi, ino kyadi kimulobeja i bubine, bwine bwalengeje būmi bwandi bwikale mu makambakano.” Le Gillis walongele namani pa kupwija uno mwanda? Unena’mba, “Ami ne wami mwana twadi tushikata ne kwisamba mansá mavule. Divule nadi muteja ne kumwipangula bipangujo mwanda wa ndyuke kine kilengeje eivwane namino ne kumona bintu uno muswelo. Kyaba kimo nadi mushintulwila myanda ya kulangulukila’po difuku dituntulu kumeso kwa kufudija mīsambo yetu. Kyaba kikwabo, nadi mona’mba binomba  mafuku kampanda mwanda wa kulangulukila pa mumweno wandi. Kupityila ku ino mīsambo ya kyaba ne kyaba, Mattias watamine bityebitye mu kwivwanija ne kwitabija bufundiji bumobumo pamo bwa bobwa butala pa kinkūlwa, bubikadi bwa Leza, ne buswe bwa Yehova. Byalombele kitatyi, kadi divule kebyadipo bipēla, inoko buswe bwaswele Yehova bwatamine bityebitye mu mutyima wandi. Ami ne wami mukaji twi basangale bininge, mwanda bukomo botwalongele na kitūkijetyima pa kukwasha wetu mwana paakidi nkasampe bwadi na mvubu kadi bwatengele mutyima wandi.”

Gillis ne wandi mukaji badi bakulupila mu bukwashi bwa Yehova pobadi balonga bukomo bwa kukwasha wabo mwana na kitūkijetyima. Gillis uvuluka’mba: “Divule nadi nsapwila Mattias amba buswe bwa binebine botumusenswe ami ne inandi bwitulengejanga tulombele bininge mwanda wa Yehova amukwashe evwanije.” Langa’po nsangaji yaikele na bano bambutwile pa kumwekeja ngikadila ya mvubu ya kitūkijetyima!

Kutentekela pa bukwashi bwa ku mushipiditu, bene Kidishitu ba bine bafwaninwe kutamija kitūkijetyima pobalela babutule nansha balunda nabo babela misongo ya zenzeka. Tala kimfwa kya Ellen, * nandi ushikatanga mu Skandinavi.

Kepadi kintu kya myaka mwānda, mulumya Ellen waponenwe misunsa ibidi na misongo ya mu bongolo itwa bu AVC, ne kino kyaletele makambakano pa mwingidilo wa bongolo bwandi. Mfulo mfulō, kakibwanyangapo kwivwanina bantu lusa, kwivwana nsangaji, nansha njia. Ellen udi mu ngikadilo mikomo bininge. Unena’mba: “Binombanga kitūkijetyima ne milombelo mivule.” Ubweja’ko amba: “Kisonekwa kinseñanga bininge i Fidipai 4:13, mwine unena’mba: ‘Mu byonsololo ngidi na bukomo kupityila kudi yewa unkomeja.’” Kupityila ku buno bukomo, Ellen ūmininanga na kitūkijetyima koku ukulupile ne pa mfulo mu bukwashi bwa Yehova.​—Ñimbo ya Mitōto 62:5, 6.

Na bubine, mu mwanda utala kulombola kitūkijetyima, Yehova i kimfwa kikatampe kyotufwaninwe kulonda. (2 Petelo 3:15) Mu Kinenwa kya Leza mudi nsekununi mivule ilombola bitatyi byāmwekeje Yehova kitūkijetyima kya binebine. (Nehemia 9:30; Isaya 30:18) Kimfwa, le Yehova wālongele namani pādi pamwipangula Abalahama butyibi bwandi butala konakanya Sodoma? Dibajinji, Yehova kākankejepo Abalahama kwisamba. Inoko, Yehova wātejeje na kitūkijetyima ku kipangujo ne kipangujo kya Abalahama ne kuta mutyima ku milangwe yandi. Kupwa, Yehova wālombwele amba utejanga Abalahama kitatyi kyaādi upituluka mu binenwa byandi ne kumukulupija’mba kakonakanyapo Sodoma shi mubatanwa’tu nansha bantu boloke dikumi. (Ngalwilo 18:22-33) Bine kino i kimfwa kiyampe kya kuteja na kitūkijetyima ne kuleka kuloba bukidibukidi!

Na bubine kitūkijetyima kya bwine Leza i kipindi kya mvubu kya bumuntu bupya bufwaninwe kuvwala bene Kidishitu bonso. Shi tulonga bukomo bwa kutamija ino ngikadila ya mvubu kadi ya kūminina na kitungo, nabya tukatumbija Tata wetu wa mūlu, mwine witutele mutyima kadi wa kitūkijetyima, ne kadi tukabadilwa mu “boba bakapyana milao kupityila ku lwitabijo ne kitūkijetyima.”​—Bahebelu 6:10-12.