NIM toklen tuʼn tten kypasens tmajen Jehová tuʼnju kukx in chʼiy mas nya bʼaʼn kyoj «mankbʼil tqʼijlalil» (2 Tim. 3:1-5). Aʼyeju xjal mintiʼ in che ajbʼen te Dios oʼkx in che ximen kyiʼjx, mintiʼ in japun twi kyyol tiʼj jun tiʼ ex mintiʼ in kyjakʼun kyibʼ. Mintiʼ in ten kypasens xjal lu. Tuʼntzunju, nim toklen tuʼn tkubʼ kyxjelin kykyaqil qeju in che ajbʼen te Jehová jlu: «¿Ope tzʼel nkanoʼne kymod xjal mintiʼ kypasens? ¿Tiʼ t-xilen aju tuʼn tten qpasens? ¿Ex tiʼ jaku bʼant wuʼne tuʼn kukx tten npasense ex tuʼn miʼn tnaj?».

Toj Tyol Dios, aju tuʼn tten qpasens nya oʼkx a t-xilen tuʼn qex kywitz nya bʼaʼn. Ax ikx in yolin tiʼj tuʼn tikʼx quʼn ex tuʼn miʼn tnaj qʼuqbʼil qkʼuʼj. Qa at qpasens nya oʼkx in qo ximen qiʼjx, sino ax ikx in qo ximen kyiʼj txqantl, axpe ikx in qo ximen kyiʼj qeju in nok kybʼinchaʼn nya bʼaʼn qiʼj. Mintiʼ in xi qqʼoʼn ambʼil tuʼn tnaj mujbʼabʼil at qxol ex in qo ayon tuʼn kykyaj tiʼchaq toj ttxolil. Tuʼntzunju, mintiʼ in qo jaw labʼin tiʼj aj ttzaj tqʼamaʼn Tyol Dios qa aju tuʼn tten qpasens atz tzajni tiʼj kʼujlabʼil (1 Cor. 13:4). * Ax ikx aju mod lu, atzun jun kyxolx qeju in «tqʼoʼn Xewbʼaj Xjan» (Gál. 5:22, 23). Noqtzun tuʼnj, ¿tiʼ il tiʼj tuʼn tten qe tuʼntzun tten qpasens?

Tuʼn tten qpasens, nim toklen tuʼn t-xi qqanin te Jehová tuʼn qtzaj tonin tuʼn xewbʼaj xjan, tuʼnju in tzaj tqʼoʼn kye qeju qʼuqli kykʼuʼj tiʼj (Luc. 11:13). Ax tok, at nim tipumal xewbʼaj xjan, pero il tiʼj tuʼn tok tilil quʼn ex tuʼn tkubʼ qbʼinchaʼn aju in xi qqanin toj qnaʼj Dios (Sal. 86:10, 11). Toj juntl yol, tuʼn tten tbʼanel mod lu toj qanmi, kʼokel tilil quʼn tuʼn tten qpasens tkyaqil qʼij. Ex qa ya in bʼant jlu quʼn, bʼalo il tiʼj tuʼn tbʼant juntl tiʼ quʼn tuʼntzun kukx tkubʼ qyekʼin qpasens. ¿Tiʼ kbʼantel quʼn?

Jaku ten qpasens qa ma qo xnaqʼtzan ex qa ma tzʼel qkanoʼn aju techel tzʼaqli kyaj tqʼoʼn Jesús. Tej tyolin apóstol Pablo tiʼj tuʼn qok te «akʼaj», ax ikx at toklen jlu tukʼilju tuʼn tten qpasens, ex tqʼama jlu kye okslal: «Awt Dios kawin tuj kyanmiye tuʼn tten kymojbʼabʼl kyibʼe» (Col. 3:10, 12, 15). Tuʼn tkawin mujbʼabʼil lu toj qanmi, il tiʼj tuʼn tel qkanoʼn qʼuqbʼil tkʼuʼj Jesús qa kxel tbʼinchaʼn Jehová kyiʼj nya bʼaʼn in tzaj bʼaj qkʼuʼj kyuʼn toj ambʼil jaʼlo. Qa ma tzʼel qkanoʼn tiʼj Cristo, mlay txi qqʼoʼn ambʼil te ni jun tiʼ tuʼn tnaj qpasens ex noq tiʼxku in bʼaj qtxlaj (Juan 14:27; 16:33, TNM).

 Ax tok, qaj tuʼn tul Tbʼanel Najbʼil o tzaj ttziyen Jehová, pero mas jaku ten qpasens qa ma qo ximen tiʼj tpasens at qiʼj. In tzaj tqʼuqbʼaʼn Xjan Uʼj qkʼuʼj kyuʼn yol lu: «Ate Qajaw mlay tzikʼx tiʼj tyol aju tziyimaj tuʼn ik tzaʼn in kymaʼn junjun: Ma tzikʼx tiʼj tyol, che chitzun. Mya ma tzikʼx tiʼj tuʼn, noq oʼkx tuʼnju at tpasens qiʼj, porke miʼn tajbʼil Qajaw tuʼn tnaj jun xjal, noq oʼkx tajbʼil tuʼn tajtz tiʼj kyanmi kykyaqil» (2 Ped. 3:9). Qa ma qo ximen tiʼj tpasens Jehová, kʼonil qiʼj tuʼn tten qpasens kyiʼj txqantl (Rom. 2:4). Atzun jaʼlo, qo xnaqʼtzan kyiʼj junjun tiʼchaq jatumel nim toklen tuʼn tten qpasens ex bʼaʼn tuʼn ttzaj qnaʼn aju ma tzʼel qnikʼ tiʼj.

Tkyaqil qʼij in nok qpasens toj malbʼil. Jun techel, qa in kubʼ qximen qa at jun tiʼ nim toklen tuʼn t-xi qqʼamaʼn akux in che yolin kabʼe xjal, il-lo tiʼj tuʼn tten qpasens tuʼntzun miʼn tel qiʼn ambʼil kye tuʼn kyyolin (Sant. 1:19). Bʼalo ax ikx il tiʼj tuʼn tten qpasens aj qten kyukʼil erman junxitl kykostumbr qwitz. Twitzju tuʼn ttzaj qqʼoj kyiʼj, mas bʼaʼn qa ma qo ximen tiʼjju tmod Jehová ex Jesús in kubʼ kyyekʼin qiʼj aj qel txalpaj. Mintiʼ in nok kyqʼoʼn kywitz kyiʼj qpaltil junjun qʼij qa nya nim toklen. Sino in nok kyqʼoʼn kywitz tiʼjju tbʼanel in bʼant quʼn ex kyiʼj chʼixpubʼil in kubʼ qbʼinchaʼn (1 Tim. 1:16; 1 Ped. 3:12).

Ax ikx jaku tzʼok qpasens toj malbʼil aj t-xi tqʼamaʼn juntl qa o txi qqʼamaʼn jun nya bʼaʼn yol moqa o kubʼ qbʼinchaʼn jun nya bʼaʼn. Kyoj ambʼil lu, jakulo tzaj qqʼoj ex jaku txi qqʼamaʼn qa mintiʼ qil. Pero in tzaj tqʼamaʼn Tyol Dios tuʼn tkubʼ qyekʼin junxitl qmod: «Mas bʼaʼn tuʼn tten qpasens twitzju tuʼn qok jawni qwitz. Miʼn taqʼa ambʼil tuʼn ttzaj naj tqʼoja, porke aju qʼoj atzun in kybʼinchan xjal mintiʼ kynabʼl» (Ecl. 7:8, 9). Axpe ikx qa nya ax tok aju otoq qʼamanjtz qiʼj, il tiʼj tuʼn tten qpasens ex tuʼn qximen tiʼj tiʼ kxel qtzaqʼweʼn. Atzun jlu bʼant tuʼn Jesús tej tkubʼ qʼoʼn tchʼixwi kyuʼn xjal maske mintiʼ til (Mat. 11:19).

Nim toklen tuʼn tten kypasens tatbʼaj, mas aj t-xi kykawin kykʼwaʼl qa at jun nya bʼaʼn kymod ex qa at jun nya bʼaʼn kyajbʼil. Qo ximen tiʼjju bʼaj tiʼj jun ermano at toj Betel te Escandinavia, aju Mattias tbʼi. Tej tzmatoq kuʼxun, e ok ten qe tukʼil toj tja xnaqʼtzbʼil xmayil tiʼj toj tkyaqil ambʼil noq tuʼnju nimen tuʼn. Tnejel, mintiʼ ojtzqiʼn jlu kyuʼn ttat. Pero ok tilil kyuʼn tuʼn kyex twitz nya bʼaʼn tzaj tiʼj kykʼwaʼl, tuʼnju ya mintiʼ ok qeʼ tkʼuʼj tiʼj axix tok. Naʼnx jlu tuʼn Gillis aju ttat Mattias: «Ten nim qpasense tiʼj». Xi tqanin Mattias junjun xjel ik tzeʼn jlu: «¿Alkye Dios? ¿Yajtzun qa nya tyol Dios aju tkuʼx toj Xjan Uʼj? ¿Tzeʼn ojtzqiʼn quʼn qa a Dios in tzaj qʼamante tuʼn kykubʼ qbʼinchaʼn junjun tiʼchaq?». Ax ikx xi tqanin jlu te ttat: «¿Tiquʼn in che ok tene yolil nya bʼaʼn wiʼje qa mintiʼ ma txi nnimane aju okslan kyuʼne?».

Tzaj tchikʼbʼaʼn Gillis jlu: «At maj in qʼojin qkʼwaʼle tej tzaj yolin, pero nya wiʼje at tqʼoj nix tiʼj ttxuʼ, sino tiʼjju axix tok, tuʼnju kubʼ t-ximen qa tuʼn jlu otoq tzaj nya bʼaʼn tiʼj». ¿Tiʼ bʼant tuʼn Gillis? «Nim maj in kubʼ qeʼye  tukʼil, ex kyoj ambʼil lu o yoline nim or. Chʼixme tkyaqil maj oʼkx ok nbʼiʼne te ex at maj xi nqanine junjun xjel te tuʼntzun tel nnikʼe tiʼj tiʼ t-xim ex tiʼ in kubʼ tnaʼn. Junjuntl maj, xi nchikʼbʼaʼne junjun tiʼchaq te tuʼntzun t-ximen tij toj jun qʼij naʼmxtoq qyoline juntl maj. Ax ikx xi nqʼamaʼne te qa wajtoqe tuʼn tel npaʼne junjun qʼij tuʼn nximane tiʼjju otoq tzaj tqʼamaʼn. Noq tuʼnju ok tilil quʼne tuʼn qyoline tukʼil, el tnikʼ ex xi tnimen Mattias aju axix tok tiʼj chojbʼil, tiʼj toklen Jehová tuʼn tkawin tibʼaj tkyaqil ex tiʼj tkʼujlabʼil. Xi tiʼn ambʼil ex at mas kwest ok, noqtzun tuʼnj chebʼe chebʼe chʼiy tkʼujlabʼil tiʼj Jehová. Nim in qo tzalaje tukʼil nxuʼjile tuʼnju o tzaj tiʼn tbʼanel tej ten qpasense tiʼj Mattias toj tkuʼxumal ex kuʼpin toj tanmi».

Akux in nonintoq Gillis tukʼil t-xuʼjil tiʼj Mattias, ok qeʼ kykʼuʼj tiʼj qa oktoq kʼonil Jehová kyiʼj. In tzaj tqʼamaʼn Gillis jlu: «Nim maj xi nqʼamaʼne te Mattias qa nimtoq kʼujlaʼn quʼne, ax ikx xi qqanine te Jehová tuʼn tkyaqil qkʼuʼje tuʼn tonin tiʼj Mattias tuʼn tel tnikʼ kyiʼj tiʼchaq». Nim in che tzalaj tatbʼaj lu tuʼnju ten kypasens tiʼj kykʼwaʼl.

Nim toklen tuʼn tok tilil kyuʼn axix tok okslal tuʼn tten kypasens ik tzeʼn aj kyxqʼuqin kyiʼj toj kyja moqa kyiʼj kyamiw yabʼ ateʼ. Qo yolin tiʼjju bʼaj tiʼj Ellen, ax ikx in nanqʼin atz Escandinavia. *

Malo tzikʼ wajxaq abʼqʼi ttzajlen kabʼe derrame toj twiʼ tchmil Ellen, tuʼn jlu ya mintiʼ in tzaj qʼaqʼen tkʼuʼj, ya mintiʼ in tzalaj ex mintiʼtl in kux chyoʼn toj tanmi tiʼj jun tiʼ. Kwest ok jlu te Ellen: In tzaj tqʼamaʼn jlu: «O ten nim npasense ex nim maj o chin naʼne Dios». Tqʼamaʼntl jlu: «Aju taqikʼ Tyol Dios mas ngane ex mas in tzaj tqʼuqbʼaʼn nkʼuʼje, a Filipenses 4:13, jatumel in tzaj tqʼamaʼn jlu: ‹Tkyaqil tiʼchaq in nikʼx wuʼne noq tuʼn wipumale in tzaj tqʼoʼn aju qʼolte ipumalj›». * Noq tuʼn ipumalj lu, kukx in nok tilil tuʼn Ellen tuʼn tten tpasens ex qʼuqli tkʼuʼj tiʼj onbʼil in tzaj tqʼoʼn Jehová te (Sal. 62:5, 6).

Aju mas tbʼanel techel tiʼjju tuʼn tten qpasens a Jehová (2 Ped. 3:15). Toj Tyol Dios, nim maj in kanet quʼn toj alkye ambʼil kubʼ tyekʼin Jehová tpasens (Neh. 9:30; Is. 30:18). Jun techel, qo ximen tiʼj tmod Jehová kubʼ tyekʼin tej t-xi tqʼamaʼn Abrahán aju in tzajtoq bʼaj tkʼuʼj tiʼj, tuʼnju kbʼeltoq t-xiten Jehová tnam Sodoma. Ok tbʼiʼn Jehová te Abrahán tukʼil tpasens. Yajxitl kubʼ tyekʼin Jehová qa otoq tzʼok tbʼiʼn te tej t-xi tqʼamaʼn juntl maj qe tyol Abrahán ex xi tqʼamaʼn te qa mlaytoq kubʼ t-xiten tnam Sodoma qa ma che kanet lajaj xinaq tzʼaqli tuʼn toj tnam (Gén. 18:22-33). ¡Jun tbʼanelxix techel qwitz tiʼjju tuʼn tten qpasens ex tuʼn qjakʼunte qibʼ!

Aju qpasens, atzun jun kyxol qeju qmod il tiʼj tuʼn tten tuʼn qok te akʼaj. Qa ma tzʼok tilil quʼn tuʼn kukx tten qpasens, kjawil qnimsaʼn Jehová, aju Qtat at toj kyaʼj ex iktzun tten qo tel kyxol qeju o «kykʼam aju yol tzaj ttziyan Dios, [...] tuʼnju at kyokslabʼl ex at kypasens» (Heb. 6:10-12).