INI “dina gabedia” ai e varamu hekwakwanaidia e bada e laomu dainai, Iehova ena taunimanima bae haheauka na namo, dia guna heḡereḡerena. (2 Tim. 3:1-5) Taunimanima momo na sibodia e heura hehenimu, e tudagamu eiava asie uramu bae gwauhamata, bona e daḡedaḡemu. Unu kara e hahedinaraimu taudia na nega momo asie haheaukamu. Una dainai, namona na Kristen taudia ta ta na bae henanadai: ‘Lau be tanobada taudia heḡereḡeredia asina haheaukamu, a? Haheauka korikorina anina be dahaka? Bona edena dala ai ina Kristen karana hereadaena na egu mauri ai baina hahedinaraia diba?’

Baibul ai, haheauka anina na dia hekwakwanai ai ba gini tutuka mo. E haheaukamu tauna na e dibamu vaira neganai ḡau iboudiai na be namomu. Ia na sibona ena namo se laloamu, to ia e hahisia tauna ena namo e laloamu. Una badi dainai, e haheaukamu tauna na haida ese e gwauraia dikamu eiava e hahisiamu neganai, ia na se hesikumu to e uramu edia hetura karana na baine hanamoa. Una dainai, Baibul na e gwaumu “haheauka” na lalokau amo e varamu kara namona ta. * (1 Kor. 13:4) Danu, ma e gwaumu “haheauka” na “lauma huahuana” ta. (Gal. 5:22, 23) To, una kara namona baita hahedinaraia totona dahaka baita kara na namo?

Haheauka karana baita hahedinaraia totona, namona na Iehova baita noia ena lauma helaḡa amo baine duruda; una lauma helaḡa na ia e abidadama heniamu bona enai e tabekaumu taudia e henidiamu. (Luka 11:13) To, Dirava ena lauma helaḡa na mai goadana, una dainai eda ḡuriḡuri heḡereḡerena baita kara na namo. (Sal. 86:10, 11) Anina na baita ḡaukara goada dina ta ta ai haheauka karana baita hahedinaraia, unu amo una kara baita manadalaia. To, ḡau ma haida baita kara na namo unu amo haheauka na eda kara ai bainela. Dahaka ese baine duruda diba?

Iesu ena haheitalai hereadaena baita laloa bona baita tohotohoa amo haheauka karana baita hahedinaraia diba. Aposetolo Paulo na lauma helaḡa ena heduru amo “tau matamatana,” “haheauka” danu e herevalaia, bona e hagoadada ‘Keriso ena maino ese laloda baine biagudia.’ (Kol. 3:10, 12, 15) Una maino ese kudouda baine ‘biagua’ totona, Iesu baita tohotohoa bona baita abia dae Dirava ese ena nega korikori ai eda lalohekwarahi ḡaudia baine hamaoromaoro. Iesu baita tohotohoamu neganai, baita haheauka dibamu, herevana dahaka bae vara.​—Ioa. 14:27; 16:33.

Ena be ta ura dikadikamu Dirava ese e gwauhamatalaia tanobada matamatana baita itaia, to Iehova ena haheauka karana baita laloa dobumu neganai, baita haheauka dibamu. Baibul ese e hadibadamu: “Lohiabada na  ena gwauhamata ihamomokanina ai se halahemu, haida e laloamu na heto; to, e haheauka henimuimu, badina be ia na se uramu ta baine mase; e uramu iboumui ai ba helalo kerehai.” (2 Pet. 3:9) Iehova ena haheauka karana baita laloamu neganai, una ese be durudamu ma haida edia kara baita haheaukalai totona. (Roma 2:4) Dahaka hekwakwanai haida daidiai baita haheauka na namo?

Dina ta ta ai e varamu hekwakwanaidia ese eda haheauka karana baine tohoa diba. Heḡereḡere, bema o uramu mai anina bada ḡauna ta ba gwauraia, ba haheauka na namo unu amo ma haida edia hereva na basio utu. (Iak. 1:19) Danu, tadikakamu edia kara ese e habadumumu neganai, ba haheauka na namo. Dia namo ba lalohisihisi, to aonega karana na Iehova bona Iesu ese eda manoka ḡaudia e lalodiamu dalana ba haeroa. Idia ese eda kerere maraḡi-maraḡidia na se tahumu. To, eda kara namodia e lalomu bona mai haheaukadia ida nega e henidamu eda kara baita hanamo totona.​—1 Tim. 1:16; 1 Pet. 3:12.

Eda haheauka baine tohoa ḡauna ma ta na, bema ta ese baine hamaoroda ita na ta hereva kerere eiava kara kererena ta ta karaia. Reana nega momo baita badu haraḡamu bona eda maoro baita gwauraia hedinarai. To, Dirava ena Hereva ese baita karaia ḡauna ta e herevalaia. Eto: “Lalo-manau ese lalo-heaḡi e hereaiamu. Basio badu haraḡa, badina be badu ese kavakava taudia lalodia e noho henidiamu.” (Koh. 7:8, 9) Una dainai, ena be bae habadelaida herevadia na koikoi, to mai eda haheauka ida baita lalo namonamo gabeai kara ta baita karaia. Iesu na ma haida ese e gwauraia dika neganai una hahekau herevana e badinaia.​—Mat. 11:19.

Tama sina ese natudia bae durudia edia kara eiava ura kereredia bae hamaoromaoro neganai, haheauka karana bae hahedinarai na namo. Mani Mattias enai e vara ḡauna aita laloa, ia na Scandinavia Betele ai e ḡaukaramu. Mattias do merona ai, ena abidadama dainai sikuli ai haida ese e kirikirilaiava. Matamanai, tamana sinana na asi dibadia una e varava. To, gabeai ena hekwakwanai e lalopararalaia badina e itaiava natudia ese hereva momokani na e daradaralaia matama. Mattias tamana Gillis na eto: “Ena daradara karana baia haheaukalaia na mai anina bada.” Mattias na e henanadaiva: “Dirava be daika? Bema Baibul na dia Dirava ena Hereva be ede bamona? Ede ta diba tomamu Dirava na mai ena ura ita edai?” Danu tamana e nanadaiava: “Dahaka dainai haida ese e hahemaoro henigumu bema o mamimu eiava o abi daemu ḡaudia na lau ese asina mamimu bona asina abi daemu?”

Gillis na eto: “Nega haida, natumai ena henanadai na mai baduna ida e gwauraiva, dia lau eiava sinana e badu henimaiva, to hereva momokani dainai e baduva, e laloava una ese ena mauri na e ha-aukaiava.” Edena dala ai Gillis ese una hekwakwanai e hamaoromaoroa? “Natugu ida hora momo lalodiai a herevaherevava. Nega momo na kamonaiva bona henanadai haida na heniava, ena hemami bona lalohadai baina lalopararalai totona. Nega haida ḡau ta na herevalaiava neganai na hamaoroava baine lalohadailaia  guna bena gabeai ma baia herevalaia lou. Nega ma haida ai, na hamaoroava e gwauraia lalohadaina na dina haida lalodiai do baina laloa guna. Hanaihanai una herevahereva karana dainai, Mattias na taina ruana ena laloparara e habadaia bona ini hahediba herevadia mauri davana, Dirava ena lohia siahuna, bona Iehova ena lalokau na e abi dae. Nega daudau lalonai una a karaia, bona nega momo na mai hekwarahina, to taina ruana, kudouna ai Iehova ilalokau henina karana e tubu. Lau bona adavagu na a moale dikadika badina mai haheaukamai ida natumai a durua karana ese anina namona e havaraia bona kudouna a hamarerea.”

Gillis bona adavana na mai haheaukadia ida natudia e duruava neganai, Iehova enai e tabekauva. Gillis ese una e laloa lou neganai, eto: “Nega momo Mattias na hamaoroava lau bona sinana ese ia na a lalokau henia badava dainai Iehova a noia goadagoadava baine durua baine laloparara totona.” Unu tama sina na e haheauka dainai e moale!

Danu, Kristen momokanidia ese edia ruma bese taudia eiava turadia e goreremu bona e naridiamu neganai, bae haheauka na namo. Scandinavia ai e nohomu hahinena, Ellen, * aita laloa.

Laḡani 8 gunadiai, Ellen adavana na nega rua stroke e abi bona una ese harana e hadikaia. Una dainai, ia ese hebogahisi, moale, eiava lalohisihisi na se mamiva. Una ese Ellen na e hametaua bada herea. Ia na eto: “Egu haheauka karana baina habadaia bona baina ḡuriḡuri loulou na namo.” Ma eto: “Na ura heniamu bona e hagoadagu sirina na Filipi 4:13, e gwaumu: ‘Goada e henigumu Diravana dainai lau na ḡau iboudiai ikaradia ai na goadamu.’” Dirava ese e heni goadana dainai, Ellen na e haheauka bona e abidadama Iehova ese baine durua.​—Sal. 62:5, 6.

Momokani, haheauka karana ai Iehova ena haheitalai hereadaena baita tohotohoa. (2 Pet. 3:15) Baibul ai, Iehova e haheauka sivaraidia momo e herevalai. (Neh. 9:30; Isa. 30:18) Heḡereḡere, Iehova ese Sodom baine habuaia tari eto dainai Abraham na henanadai haida e heni neganai, Iehova be dahaka e kara? Matamanai, Iehova ese Abraham ena hereva na se utua. To, mai haheaukana ida Abraham ena henanadai ta ta bona lalohekwarahi ḡaudia e kamonai. Bena, Iehova ese e hahedinaraia Abraham ena lalohekwarahi na e kamonai bona e hadibaia Sodom na basine habuaia tari bema kara maoromaoro taudia 10 na una hanua ai baine davaridia. (Gen. 18:22-33) Iehova na hanaihanai mai haheaukana ida e hakalamu bona kara ta se karaia haraḡamu!

Haheauka karana na tau matamatana kahana badana ta bona Kristen taudia ese bae hahedokilaia na namo. Bema baita ḡaukara goadamu una mai anina bada karana baita hahedinaraia, ita ese Tamada guba ai, haheauka bona lalokau Diravana, baita hanamoamu, bona “edia abidadama bona edia haheauka daidiai ahudia vada e abi taudia” bogaraḡidiai baita nohomu.​—Heb. 6:10-12.