XA̱ʼA ña̱ íyoyó “tiempo nu̱ú ndíʼi” ku̱a̱ʼání tu̱ndóʼo íyo nu̱úyó, ña̱kán xíniñúʼu kúee koo iniyó (2 Tim. 3:1-5). Na̱ yiví na̱ íyo ñuyǐví yóʼo kúʼvi̱-inina xínina miína, ta ni kǒo kándíxa táʼanna ta kǒo tavána ki̱ʼva xíʼin miína. Na̱ yiví na̱ kéʼé ña̱yóʼo va̱ása kúee íyo inina. Xa̱ʼa ña̱yóʼo iin tá iinyó xíniñúʼu nda̱ka̱tu̱ʼun xíʼin miíyó: “¿Á nda̱a̱ tá kéʼé na̱ ñuyǐví yóʼo saá kéʼíi̱, ña̱ va̱ása kúee íyo inii̱? ¿Ndáaña kúni̱ kachiña ña̱ kúee koo iniyó? ¿Ndáaña kivi keʼíi̱ ña̱ va̱ʼa xa̱a̱i̱ kúee koo inii̱?”.

Nu̱ú Biblia ña̱ kúee koo iniyó va̱ása kúni̱ kachi kuitíña ña̱ ndakuniyó ña̱ íyo tu̱ndóʼo ta xa̱a̱ va̱ʼaví. Chi ña̱ kúni̱ kachiña kúú ña̱ nda̱kú ná koo iniyó ta ná kǒo ndakava-iniyó. Tá kúee íyo iniyó su̱ví kuití ndakanixi̱níyó xa̱ʼa ña̱ xíniñúʼu miíyó chi xíniñúʼutu ndakanixi̱níyó xa̱ʼa inkana, saátu xíniñúʼu keʼéyó xa̱ʼa na̱ keʼé ña̱ va̱ása va̱ʼa xíʼinyó. Va̱ása ndákanixi̱níyó ña̱ kǒo kutáʼankayó xíʼinna chi ndátuyó ña̱ tuku ndakutáʼanyó xíʼinna. Xa̱ʼa ña̱yóʼo ña̱ Biblia káchiña ña̱ kúee íyo iniyó va̱xiña ti̱xin ña̱ kúʼvi̱-iniyó xíniyó inkana (1 Cor. 13:4). * Ta va̱xituña nu̱ú ña̱ káʼa̱n xa̱ʼa “ña̱ va̱ʼa ña̱ kúúmií espíritu” (Gál. 5:22, 23). Soo, ¿ndáaña xíniñúʼu keʼéyó ña̱ va̱ʼa kúee koo iniyó?

Ña̱ va̱ʼa xa̱a̱yó kúee koo iniyó xíniñúʼu ndukúyó nu̱ú Ndióxi̱ espíritu yi̱i̱ ña̱ táxira ndaʼa̱ na̱ kándíxa miíra (Luc. 11:13). Soo ni xa̱a̱ xíni̱yó ña̱ íyoní ndée ña̱ espíritu yóʼo. Xíniñúʼu chika̱a̱yó ndée ta keʼéyó táki̱ʼva íyo ña̱ ndúkúyó nu̱ú Ndióxi̱ (Sal. 86:10, 11). Ña̱yóʼo kúni̱ kachiña, ña̱ xíniñúʼu chika̱a̱yó ndée ña̱ va̱ʼa kúee koo iniyó ndiʼi ki̱vi̱, tasaá keʼéyó ña̱yóʼo xíʼin ndiʼi níma̱yó. Soo ni saá xíniñúʼu keʼéyó inka ña̱ʼa ña̱ va̱ʼa xa̱a̱yó kúee koo iniyó. ¿Ndáaña kúú ña̱yóʼo?

Kivi xa̱a̱yó kúee koo iniyó tá ná sakuaʼayó xa̱ʼa ña̱ ke̱ʼé ta̱ Jesús, ta kundiku̱nyó yichi̱ra. Tá ni̱ka̱ʼa̱n ta̱ apóstol Pablo xa̱ʼa ña̱ va̱ʼa ña̱ xíniñúʼu keʼéyó, ni̱ka̱ʼa̱nra xa̱ʼa ña̱ xíniñúʼu kúee koo iniyó, ta ni̱ka̱ʼa̱nra xíʼin na̱ hermano ña̱ táxin ná koo níma̱na xíʼin ña̱ táxi ta̱ Jesús ndaʼa̱na (Col. 3:10, 12, 15). Ña̱ va̱ʼa táxin koo níma̱yó xíniñúʼu kundiku̱nyó yichi̱ ta̱ Jesús chi ta̱yóʼo va̱ʼaní ka̱ndíxara ña̱ ndatavá Ndióxi̱ miíyó nu̱ú ña̱ sándi̱ʼi̱-iniyó. Tá ndíku̱nyó yichi̱ ta̱ Jesús, kúee koo iniyó ni inkana va̱ása kéʼénaña (Juan 14:27; 16:33).

 Ni xa̱a̱ ndátuyó ña̱ kixa̱a̱ ñuyǐví xa̱á ña̱ káʼa̱n Ndióxi̱ taxira ndaʼa̱yó, kivi sakuaʼakayó ña̱ kúee koo iniyó tá ná ndakanixi̱níyó xa̱ʼa ña̱ kúee íyo ini Jehová xíʼinyó. Nu̱ú Biblia káʼa̱nña xíʼinyó: “Su̱ví ta̱ xáá-ini kúú Jehová saxínura ña̱ káʼa̱nra, táki̱ʼva ndákanixi̱ní sava na̱ yiví, chi ña̱ kúni̱ra kúúña ni iinna ná kǒo kuvi; ña̱ kúni̱ra kúúña, ná ndikó-inina xa̱ʼa ku̱a̱china” (2 Ped. 3:9). ¿Á su̱ví ña̱ ndixa kúúña tá ndakanixi̱níyó xa̱ʼa ña̱ kúee íyo ini Jehová nda̱a̱ miíyó kúni̱ koo saá? (Rom. 2:4). Tá ndákanixi̱níyó xa̱ʼa ña̱yóʼo, ná kotoyó sava ña̱ yáʼayó nu̱ú ta ndáaña kivi keʼéyó ña̱ va̱ʼa kúee koo iniyó.

Xíʼin ña̱ kéʼéyó ndiʼi ki̱vi̱ náʼa̱yó á kúee íyo iniyó. Ná ka̱ʼa̱nyó xa̱ʼa iin ejemplo, sava yichi̱ tá kúni̱níyó ka̱ʼa̱nyó iin ña̱ʼa ña̱ ndáyáʼvíní nu̱ú miíyó, xíniñúʼu kúee koo iniyó ta kundatuyó nda̱a̱ ná sandiʼi inkana ka̱ʼa̱nna (Sant. 1:19). Saátu xíniñúʼu kúee koo iniyó tá íyoyó xíʼin na̱ hermano na̱ kúúmií inka costumbre ña̱ va̱ása kútóoyó. Nu̱úka ña̱ sa̱a̱yó xíʼinna, xíniñúʼu ndakanixi̱níyó xa̱ʼa yichi̱ Jehová xíʼin ta̱ Jesús, chi kúee íyo inina xíʼinyó. Ta kǒo xítona ña̱ va̱ása va̱ʼa kúúmiíyó. Ña̱ xítona kúú ña̱ va̱ʼa kúúmiíyó, ta saátu xítona ña̱ chíka̱a̱yó ndée ña̱ kéʼéyó ña̱ va̱ʼa (1 Tim. 1:16; 1 Ped. 3:12).

Saátu kivi na̱ʼa̱yó á kúee íyo iniyó tá chíka̱a̱ ku̱a̱china miíyó ña̱ ke̱ʼéyó á ni̱ka̱ʼa̱nyó iin ña̱ va̱ása va̱ʼa. Xa̱ʼa ña̱yóʼo kamaní sáa̱yó ta nda̱a̱ kíxaʼá káʼa̱nyó ña̱ su̱ví ku̱a̱chiyó kúúña. Soo Biblia káʼa̱nña xíʼinyó ña̱ xíniñúʼu keʼéyó ña̱yóʼo: “Va̱ʼaníka tá kúee íyo iniyó nu̱úka ña̱ ni̱nuní kuniyó. Va̱ása sa̱a̱ kamaún chi na̱ kíʼvi kúú na̱ kamaní sáa̱” (Ecl. 7:8, 9). Ni ña̱ vatá kúú ña̱ káʼa̱nna xa̱ʼayó, xíniñúʼu va̱ʼaní ndakanixi̱níyó xa̱ʼa ña̱ ndakuiinyó. Ña̱yóʼo kúú ña̱ ke̱ʼé ta̱ Jesús tá ke̱ʼéna ña̱ va̱ása va̱ʼa xíʼinra (Mat. 11:19).

Na̱ íyo se̱ʼe xíniñúʼu kúee koo inina xíʼin se̱ʼena tá xítona ña̱ kéʼéna ña̱ va̱ása va̱ʼa. Ná ndakanixi̱níyó xa̱ʼa iin ta̱ káchíñu Betel chí ñuu Escandinavia ta̱yóʼo naníra Mattias. Tá ni̱xi̱yo loʼora, escuela nu̱ú xi̱kaʼvira xi̱xaku̱ndaanara xa̱ʼa ña̱ xi̱kandíxara. Tá xa̱ʼa na̱ yivára va̱ása níkunda̱a̱-inina xa̱ʼa ña̱yóʼo. Soo kixaʼá íxayo̱ʼvi̱ña xíʼinna tá ki̱xaʼá ta̱ loʼo yóʼo xíka-inira xa̱ʼa ña̱ sa̱kuaʼara xa̱ʼa Ndióxi̱. Yivára ta̱ Gillis káchira: “Xi̱niñúʼu kúeení koo inindi̱”. Ta̱ Mattias xi̱nda̱ka̱tu̱ʼunra ndi̱ʼi̱: “¿Yukú kúú Ndióxi̱? ¿Á ña̱ ndixa kúú Biblia tu̱ʼunra? ¿Nda̱chun xíniyó ña̱ Ndióxi̱ kúú ta̱ káʼa̱n xíʼinyó ña̱ keʼéyó iin ña̱ʼa á va̱ása keʼéyóña?”. Saátu xi̱ka̱ʼa̱nra: “¿Nda̱chun káʼa̱nndó xíʼi̱n ndáaña keʼíi̱ tá su̱ví inkáchi íyo ña̱ kándíxayó?”.

Ta̱ Gillis káchira: “Sava yichi̱ xi̱sa̱a̱ní se̱ʼendi̱ tá xi̱ka̱ʼa̱nra xíʼindi̱, soo su̱ví ndi̱ʼi̱ xi̱sa̱a̱ra xíʼin chi xa̱ʼa ña̱ sa̱kuaʼara xa̱ʼa Ndióxi̱ xi̱sa̱a̱ra chi ni̱xo̱ʼvi̱ra xa̱ʼa ña̱ xi̱kandíxara”. ¿Ndáaña ke̱ʼé ta̱ Gillis? Káchira: “Sava yichi̱, ni̱xi̱yoi̱ xíʼinra ta ku̱a̱ʼání hora xi̱natúʼi̱n xíʼinra. Ña̱ xi̱keʼíi̱ kúú ña̱ xi̱xiniso̱ʼi̱ ña̱ xi̱ka̱ʼa̱nra, ta savatu xi̱keʼíi̱ pregunta xíʼinra ña̱ va̱ʼa kunda̱a̱-inii̱ ndáaña xi̱ndoʼora á ndáaña xi̱ndakanixi̱níra. Savatu xi̱ka̱ʼi̱n xíʼinra xa̱ʼa iin ña̱ʼa ña̱ kivi ndakanixi̱níra  xa̱ʼa ta saáví xi̱ndatúʼun tukui̱ xíʼinra. Inkatu yichi̱ xi̱ka̱ʼi̱n xíʼinra ña̱ xíniñúʼu ndakanixi̱níra sava ki̱vi̱ xa̱ʼa sava ña̱ kúni̱ra kunda̱a̱-inira. Xa̱ʼa ña̱ na̱túʼi̱n ku̱a̱ʼání yichi̱ xíʼinra ki̱xaʼá kúnda̱a̱-inira ta ki̱xaʼá kándíxara ña̱ sa̱náʼa̱ndi̱ra xa̱ʼa ña̱ ni̱xi̱ʼi̱ ta̱ Jesús xa̱ʼayó, ta saátu ña̱ iinlá Ndióxi̱ kúú ta̱ xíniñúʼu kaʼndachíñu nu̱úyó, xíʼin xa̱ʼa ña̱ kúʼvi̱-inira xínira miíyó. Ku̱a̱ʼá tiempo xi̱niñúʼura, ta ku̱a̱ʼá yichi̱ i̱xayo̱ʼvi̱ña xíʼinra, soo loʼo tá loʼo ki̱xaʼá xa̱ʼnu ña̱ kúʼvi̱-inira xínira Jehová. Yi̱ʼi̱ xíʼin ñá síʼíi̱ kúsi̱íní-inindi̱, chi xa̱ʼa ña̱ kúee ni̱xi̱yo inindi̱ xíʼin ta̱ Mattias chi̱ndeétaʼanña xíʼinra, tasaá ña̱ sa̱kuaʼara ni̱xa̱a̱ña nda̱a̱ níma̱ra”.

Tá chi̱ndeétáʼanna xíʼin se̱ʼena, ta̱ Gillis xíʼin ñá síʼíra ka̱ndíxana ña̱ kivi chindeé Jehová miína. Ta̱ Gillis káchira: “Ku̱a̱ʼání yichi̱ ni̱ka̱ʼi̱n xíʼin ta̱ Mattias ña̱ kúni̱níndira, ta xa̱ʼa ña̱yóʼo, xíʼin ndiʼi ndéendi̱ xi̱ka̱ʼa̱nndi̱ xíʼin Jehová ña̱ ná chindeérara ña̱ va̱ʼa kunda̱a̱ va̱ʼa inira xa̱ʼa ña̱ sákuaʼara xa̱ʼara”. Kúsi̱íní-ini na̱yóʼo xa̱ʼa ña̱ kúee ni̱xi̱yo inina xíʼin se̱ʼena.

Ndiʼi na̱ ndásakáʼnu Jehová, xíniñúʼu kúee koo inina tá ndáana iin na̱ veʼena á iin na̱ migona na̱ kúúmií kue̱ʼe̱. Ná sakuaʼayó xa̱ʼa ñá Ellen, * saátu ñáyóʼo íyoñá chí ñuu Escandinavia.

Xa̱a̱ íyo u̱na̱ ku̱i̱ya̱, yiíñá ndo̱ʼora u̱vi̱ ataque cerebral ta yo̱ʼvi̱ní ña̱ ndo̱ʼora chi va̱ása kívika kundáʼvi-inira kunira inkana, va̱ása kúsi̱íka-inira ni va̱ása xóʼvi̱ka inira. Kúnaaní ñá Ellen xíʼin ña̱yóʼo. Ñáyóʼo káchiñá: “Xíniñúʼu kúeení koo inii̱, ta keʼíi̱ ku̱a̱ʼání oración”. Káchituñá: “Iin texto ña̱ kútooní ña̱ sándi̱ko-inii̱ kúú ña̱ káʼa̱n Filipenses 4:13, ña̱ káchi: ‘Ndiʼi ña̱ʼa va̱ʼa kéʼíi̱ña chi Ndióxi̱ táxi ndée ndaʼíi̱ʼ”. Xa̱ʼa ndée ña̱ táxi Jehová ndaʼa̱ ñá Ellen, va̱ʼa kúndeé-iniñá, ta kúee íyo iniñá, chi kándíxañá ña̱ va̱ása sandákoo Jehová ña̱ chindeétáʼanra xíʼinñá (Sal. 62:5, 6).

Ta̱ va̱ʼaní táxi yichi̱ nu̱úyó ña̱ kúee koo iniyó kúú Jehová (2 Ped. 3:15). Ku̱a̱ʼání yichi̱ ndáni̱ʼíyó nu̱ú Biblia ña̱ kúee ni̱xi̱yo ini Jehová (Neh. 9:30; Is. 30:18). Ná kotoyó ndáaña ke̱ʼéra tá ni̱ka̱ʼa̱nra xíʼin ta̱ Abrahán ña̱ sandiʼi-xa̱ʼara ñuu Sodoma. Kúee ni̱xi̱yo inira, ta xi̱niso̱ʼora ndiʼi ña̱ ni̱ka̱ʼa̱n ta̱ Abrahán xíʼinra. Tándi̱ʼi ni̱na̱ʼa̱ra ña̱ xi̱niso̱ʼora ña̱ ni̱ka̱ʼa̱n ta̱ Abrahán xíʼinra, chi ku̱a̱ʼá yichi̱ ni̱ka̱ʼa̱nra xíʼinra xa̱ʼa ña̱ xi̱sándi̱ʼi̱-inira, ta ni̱ka̱ʼa̱nra xíʼinra ña̱ va̱ása sandiʼi-xa̱ʼara na̱ ñuu Sodoma, tá ná ndani̱ʼíra u̱xu̱ na̱ ta̱a na̱ kándíxa-ñaʼá (Gén. 18:22-33). Va̱ʼaní yichi̱ sa̱ndákoora nu̱úyó ña̱ kúee koo iniyó ta saátu ña̱ ná ka̱ʼnu̱-iniyó.

Ndáyáʼvíní ña̱ kúee koo iniyó, saáchi saá náʼa̱yó ña̱ ndixa ndásakáʼnuyó Ndióxi̱ ta kéʼéyó ña̱ va̱ʼa. Tá ná chika̱a̱yó ndée ña̱ kúee koo iniyó saá xa̱a̱yó ndasakáʼnuyó Jehová, ta xa̱a̱yó kooyó na̱ kándíxa miíra, tasaá kundatuyó ndiʼi ña̱ taxira ndaʼa̱yó chí nu̱únínu (Heb. 6:10-12).