IPAN itlamia tonali nojua tijpixtiasej miak tlaouijkayotl, yeka Jehová itlajtoltemakauaj tlauel moneki tijnextisej tijpiaj toyolo (2 Tim. 3:1-5). Maseualmej moikneliaj ininseltsitsij, amo kinekij kichiuasej se keski tlamantli uan amo monauatiaj. Katli kichiuaj ni tlamantli kinextiaj amo kipiaj ininyolo. Yeka, nochi moneki timotlajtlanisej: “¿Nojkia nijchiua kej maseualmej katli amo kipiaj ininyolo? ¿Tlake kiijtosneki tijpiasej toyolo? ¿Uan tlake moneki nijchiuas tlaj nijneki nochipa nijnextis ni kuali tlamantli?”.

Kema ipan Biblia kiijtoua tijpiasej toyolo, amo san kiijtosneki tikijiyouisej se kuesoli. Kiijtosneki timotemachiaj nopa kuesoli mosenkauas. Kema tijpiaj toyolo, amo san timoiljuiaj ipan tlen tojuantij techpaleuis, timoiljuiaj ipan tlen sekinok kinpaleuis, uan nojkia ipan maseualmej katli techchiuiliaj tlen amo kuali. Yeka, kema se akajya techchiuilia se tlamantli tlen amo kuali, amo timoiljuiaj ayokmo kuali timouikasej iuaya, tojuantij tijpiaj toyolo uan timotemachiaj uelis sampa kuali timouikasej iuaya. Uan yeka ipan Biblia kiijtoua katli teiknelia nojkia kinextia kipia iyolo (1 Cor. 13:4). * Nojkia kiijtoua “itonal toTeko” techpaleuia ma tijnextikaj ni kuali tlamantli ipan tonemilis (Gál. 5:22, 23). Uajka, ¿tlake moneki tijchiuasej tlaj tijnekij tijpiasej toyolo?

Tlaj tijnekij tijpiasej toyolo, moneki tikiljuisej Jehová ma techmaka itonal, pampa ya kinmaka katli motemachiaj ipan ya (Luc. 11:13). Maske toTeotsij itonal kipia miak chikaualistli, moneki tijchiuasej kampeka uan tijnextisej nelia tijnekij tlen tijtlajtlaniaj (Sal. 86:10, 11). Uajka, moneki tijchiuasej kampeka mojmostla tijnextisej tijpiaj toyolo, kiampa nopa kuali tlamantli kejuak moskaltis ipan toyolo. Maske nopa uelis techpaleuis, ¿tlake seyok tlamantli uelis tijchiuasej uan kiampa nochipa tijnextisej tijpiaj toyolo?

Tlaj timomachtisej uan tijchiuasej tlen Jesús kichijki techpaleuis ma tijpiakaj toyolo. Kema apóstol Pablo kiijtok ma timokentikaj toyoyo tlen yankuik, kiijtosnejki ma tijnextikaj kuajkuali tlamantli ipan tonemilis, kej tijpiasej toyolo. Ya kiniljuik nochi tlaneltokanij: ‘Cristo ma inmechmaka tlaseuilistli ipan inmoyoloʼ (Col. 3:10, 12, 15). Tlaj tijnekij tlaseuilistli ma kiyakana toyolo, kej Jesús, moneki kuali titlaneltokasej uan timotemachisej toTeotsij kuali kimati kema kitlamiltis tlamantli tlen techtekipachoua. Tlaj tijchiuaj kej Jesús, nochipa tijnextisej tijpiaj toyolo, maske panos tlamantli tlen tlauel ouij (Juan 14:27; 16:33).

 Maske ya tijnekij tiitstosej ipan yankuik Tlaltipaktli tlen Jehová techtenkauilijtok, tijyekouaj kenijkatsa nojua tlauel tijpiasej toyolo kema timoyoliljuiaj kenijkatsa Jehová kinextia ni kuali tlamantli ika tojuantij. Ipan Biblia kiijtoua: “ToTeko axkiilkajtok tlen kiijtojtok keja sekij moiljuiaj. Techtenkauilijtok para sampa ualas, uan temachtli ualas. Pero ama yajaya kichia pampa nelia kipia iyolo ika tojuantij uan kineki nochi ma timoyolpatlakaj uan tijkauasej totlajtlakoljuaj. Axkineki niyon se ma poliui para nochipa” (2 Ped. 3:9). Kema timoyoliljuiaj kenijkatsa Jehová kinextia kipia iyolo, techpaleuia nojkia ma tijpiakaj toyolo ika sekinok (Rom. 2:4). Uajka, ¿kema monekis tijnextisej tijpiaj toyolo?

Mojmostla techpano miak tlamantli tlen kichiua ma tijnextikaj tlaj nelia tijpiaj toyolo. Kema tijnekisej tikijtosej se tlamantli, uelis monekis ma tijnextikaj tijpiaj toyolo uan kiampa tijkauasej achtoui sekinok ma kamanaltikaj (Sant. 1:19). Uelis nojkia monekis tijnextisej tijpiaj toyolo kema tiitstosej ininuaya toikniuaj katli momajtokej kichiuaj tlamantli tlen tojuantij amo techpaktia. Kema kiampa panos, ma timoiljuikaj kenijkatsa Jehová uan Jesús kipiaj ininyolo kema tojuantij timokuapolouaj, yeka tojuantij nojkia amo nimantsi ma tikualanikaj. Inijuantij amo san kitlachilijtokej tlen ika timokuapolouaj. Inijuantij kitlachiliaj kuajkuali tlamantli tlen tijnextiaj uan kenijkatsa tijchiuaj kampeka tijpatlatiasej se keski tlamantli ipan tonemilis (1 Tim. 1:16; 1 Ped. 3:12).

Nojkia moneki tijnextisej nelia tijpiaj toyolo kema sekinok kiijtouaj tikijtojkej o tijchijkej tlamantli tlen amo kuali. Kema kiampa pano, uelis nimantsi tikualanij uan san timotechtiaj uan tikijtouaj amo tijchijkej nopa tlamantli. Maske uelis kiampa tijchiuaj, toTeotsij iTlajtol techiljuia ma tijchiuakaj seyok tlamantli: “Más kuali tijpias ueyi moyolo uan axtimoueyimatis. Amo xikualani nimantsi, pampa ya nopa tlen kichiuaj uiuitlakamej” (Ecl. 7:8, 9). Uajka, tlaj sekinok kiijtouaj tijchijtokej tlamantli tlen amo nelia, moneki kuali timoiljuisej tlake titlanankilisej. Ya nopa kichijki Jesús kema sekinok kitlaijiljuijkej pampa kinekiyayaj kipinaualtisej (Mat. 11:19).

Kema tetajmej kiitasej ininkoneuaj moiljuiaj, kinyoltilana o kinekij kichiuasej tlen amo kuali, moneki kinextisej kipiaj ininyolo kema kintlajtolmakasej. Ma tikitakaj tlen kipanok Mattias, se toikni katli tlatekipanoua ipan kali Betel, ipan se altepetl tlen itoka Escandinavia. Kema eliyaya telpokatl, ipan escuela nochipa kipinajtiyayayaj pampa ya kineltokayaya toTeotsij. Maske achtouia itatauaj amo kimatiyayaj tlen kipanoyaya, monejki kichiuasej se ueyi kampeka uan kiampa kipaleuisej ininkone pampa pejki ayokmo kineltoka tlen melauak. Itata Gillis kiijtoua: “Monejki tijnextisej tijpiaj toyolo”. Mattias techtlajtlaniyaya: “¿Ajkia toTeotsij? ¿Uan tlaj Biblia amo eli toTeotsij iTlajtol? ¿Kenijkatsa tijmatij eli toTeotsij katli techiljuia ma tijchiuakaj se keski tlamantli?”. Nojkia kiiljuiyaya itata: “¿Kenke se akajya moneki nechtlaijiljuis pampa amo nijneltoka tlen inmojuantij inkineltokaj?”.

Gillis kiijtoua: “Kemantika tokone kualaniyaya uan amo ika na o ika inana, ya kualaniyayaj pampa kiijtouayaya tlamachtili tlen melauak kichiuayaya tlauel ma tlaijiyoui”. ¿Tlake kichijki Gillis? “Miakpa nimokamanaljuik iuaya miak horas. Na  san nijtlakakiliyaya uan kemantika nijchiuiliyaya se keski tlajtlanili pampa nijnekiyaya kuali nijkuamachilis tlen kiyolmatiyaya uan tlen moiljuiyaya. Se tonali, nikixtomilik se tlamachtili uan nikiljuik se keski tonali ma moyoliljuijto nopa uan teipa sampa timokamanaljuiskiaj. Pampa nochipa iuaya nimokamanaljuiyaya, Mattias pejki kikuamachilia uan kineltoka nopa tlamachtili tlen tlamakixtili, kenijkatsa san Jehová kinamiki kiyekanas nochi uan kenijkatsa toTeotsij tlauel techiknelia. Maske monejki panos miak tonali uan kemantika tijmatiyayaj ouij, teipa nojua pejki kiiknelia Jehová. Nosiua uan na tlauel tiyolpakij pampa Mattias tlauel kipaleuik kema tijpixkej toyolo iuaya uan nopa tlamachtili asik ipan iyolo”.

Gillis uan isiua kinextiyayaj kipiaj ininyolo kema kipaleuiyayaj ininkone uan motemachiyayaj Jehová kinpaleuiskia. Gillis kiijtoua: “Miakpa nikiljuik Mattias inana uan na tlauel tikikneliyayaj uan ika nochi toyolo tikiljuiyayaj Jehová ma kipaleui kikuamachilis tlen tikixtomiliyayaj”. Tlauel kuali kiyolmatij Gillis uan isiua pampa kipixkej ininyolo iuaya ininkone.

Jehová itlajtoltemakauaj nojkia moneki kipiasej ininyolo kema kinmokuitlauisej ininchampoyouaj o ininuampoyouaj katli mokokouaj. Ma tikitakaj tlen kipano Ellen, * katli nojkia itstok ipan Escandinavia.

Kipano chikueyi xiuitl, Ellen iueue kipixki se kokolistli tlen kiijtlakok itsontekuich yeka iueue ayokmo kintlasojtla sekinok, ayokmo yolpaki uan ayokmo kiyolkokoua se tlamantli. Tlen pano kichiua Ellen tlauel ma siaui. Ya kiijtoua: “Nochipa moneki nijnextijtos nijpia noyolo uan tlauel nimomaijtos”. Nojkia kiijtoua: “Tlauel nechpaktia uan nechyolchikaua Filipenses 4:13, nopaya kiijtoua: ‘Nochi niueli nijchiua ika nopa chikaualistli tlen Cristo nechmaka’”. Pampa Jehová kimaka chikaualistli, Ellen ueli kinextia kipia iyolo uan nojkia motemachia Jehová nochipa kipaleuis (Sal. 62:5, 6).

Kej tijmatij, san Jehová nochipa kinextijtok tlauel kipia iyolo (2 Ped. 3:15). Ipan Biblia, tikitaj kenijkatsa Jehová miakpa kinextijtok kipia iyolo (Neh. 9:30; Is. 30:18). Ma tikitakaj tlake kichijki Jehová kema Abraham kiiljuik kenke kinekiyaya kitsontlamiltis Sodoma. Achtoui, Jehová kinextik kipixtoya iyolo kema kikajki Abraham ma kiijto tlen kikuesouayaya uan tlen kinekiyaya kimatis. Teipa, Jehová kinextik kuali kitlakakilijtoya Abraham kema sampa kiijtok tlen kiiljuijtoya kikuesouayaya uan nojkia kiiljuik amo kitsontlamiltiskia Sodoma tlaj ipan nopa altepetl itstoskiaj matlaktli maseualmej tlen kuajkualmej (Gén. 18:22-33). ¡Nelia Jehová kinextia kipia iyolo uan monauatia!

Kej ya tikitakej, tlaj tijpiasej toyolo tijnextisej kejuak timokentijtokej toyoyo tlen yankuik, se kuali tlamantli tlen nochi toTeotsij itekipanojkauaj moneki tijnextisej. Tlaj tijchijtosej kampeka tijnextisej ni kuali tlamantli, tijueyichiuasej toTata Jehová, katli tlauel teiknelia uan kipia iyolo, uan nojkia tiitstosej ininuaya “tlaneltokanij tlen ika nochi ininyolo kineltokaj nochi tlen toTeko techiljuijtok uan kipiaj ininyolo para kichiasej hasta kiselisej nochi tlen toTeko techtenkauilijtok para techmakas” (Heb. 6:10-12).