PAMPA ipan yejuin itlamiyan tonaltin melak ouijtika tlen tikixnamiktiuej, itekipanojkauan Jehová melak noneki tikpiyaskej ijyouilistli (2 Tim. 3:1-5). Tlaltikpakchanejkej sa no yejuamej melak notlasojtlaj, xkinekij notlajtolnamikiskej iuan oksekimej niman xuelij noteltiaj. Yejuin tlaltikpakchanejkej xkipiyaj ijyouilistli. Ika yejon, nochimej akin kichiuaj ken Cristo noneki notlajtoltiskej: “¿Noijki yopeuj nikchiua ken akin xkipiyaj ijyouilistli? ¿Tlenon kijtosneki tikpiyas ijyouilistli? ¿Tlenon uelis nikchiuas niman ijkon nochipa nikpiyas yejuin kualneskayotl?”.

Ipan Biblia, ijyouilistli xsan kijtosneki tikxikos itlaj tlen tikixnamiktika. Kijtosneki titlaxikos ika tlamachialistli. Ijkuak tikpiyaj ijyouilistli, xsan tiknemiliaj itech tlen techpoloua tejuamej, titlanemiliaj itech tlen kinpoloua oksekimej, niman noijki itech tlen kinpoloua akin techtlauelitaj. Xtiknemiliaj ika xkeman touikaskej iuan yakaj akin techtlauelita, tikchiaj ika mayejko tonajli ijkuak uelis kuajli iuan touikaskej. Kuakon, xtechmojkatlachialtia ika Biblia kijtoua ika ijyouilistli ualeua itech tlasojtlalistli (1 Cor. 13:4). * Ijyouilistli noijki noteneua itech “itlakilyo espíritu santo” (Gál. 5:22, 23, TNM). Kuakon, ¿kenon uelis tikiskaltiskej ijyouilistli?

Tla tiknekij tikiskaltiskej ijyouilistli noneki tiktlajtlaniliskej Jehová matechpaleui ika iespíritu santo. ToTajtsin kinpaleuiya akin tlaneltokaj itech (Luc. 11:13). Maski iespíritu melak kojtik, noneki tejuamej noijki tokojtiliskej niman tikchiuaskej ken tiktlajtlaniliaj ipan teoyotl (Sal. 86:10, 11). Yejuin kijtosneki ika noneki tochikauaskej niman ijkon mojmostla tikteititiskej ijyouilistli, yejuin kichiuas ika yejuin kualneskayotl manoneluayoti ipan toyojlo. Maski ijkon, noneki tikchiuaskej okse itlaj niman ijkon nochipa tikpiyaskej ijyouilistli. ¿Tlenon yejon tlen noneki tikchiuaskej?

Uelis tikiskaltiskej ijyouilistli tla kuajli tikitaj niman tikchiuaj tlen okichiuj Jesús. Yejua melak kuajli okiteititi yejon kualneskayotl. Ijkuak Pablo, itlatitlankauj Cristo, otlajto itech “nemilistli yejuan yenkuik”, kampa noijki kalaki “ijyouilistli”, okimijli akin kichiuaj ken Cristo: “Xkauilikan on yolseuilistli yejuan Cristo mechmaka ma mechyekana ipan nemoyojlo” (Col. 3:10, 12, 15). Tla tiknekij ika yejon yolseuilistli makiyekana toyojlo, noneki tikchiuaskej ijkon ken Jesús. Yejua melak kuajli kineltoka ika toTajtsin kiyektlalis nochi yejuin tlajtlamach tlen techajmana ijkuak yejua kitas ika kinamiki. Tla tikchiuaj ken Cristo, xitlaj kichiuas matikpolokan toijyouilis, maski san tlenon panos toyeualiyan (Juan 14:27; 16:33).

Maski melak tiknekij mayejko yenkuik tlaltikpaktli tlen toTajtsin yotechijli techmakas,  tiuelij tikpiyaj ijyouilistli ijkuak titlanemiliaj itech kenon toTajtsin techijyouiya. ITlajtol toTajtsin kuajli techijlia: “ToTeko xkokotona itekiu ken sekimej kinemiliaj, yej nochi kichijtiu ijkuak kontocarojtiu. Ipan in tonaltin techpialia ijyouilistli, pampa nion se tlakatl xkineki ma poliui, yej kineki para nochimej ma noyolpatlakan” (2 Ped. 3:9). ¿Xmelak ika ijkuak titlanemiliaj itech kenon Jehová techijyouiya, techpaleuiya noijki matikimijyouikan oksekimej? (Rom. 2:4). Maka matikilkauakan yejuin niman matikitakan kanon nonekis tikteititiskej ijyouilistli.

Melak miyek tlen mojmostla topan nochiua kampa noneki tikteititiskej ijyouilistli. Se neskayotl, kemantika tikitaj ika itlaj noneki nimantsin tikijtoskej, san ika, uelis titlamachiaskej niman ijkon xtitetlajtolkotonaskej (Sant. 1:19). Niman kanaj noijki nonekis titeijyouiskej ijkuak tinemiskej imiuan tokniuan akin oksekan ualeuaj niman xkichiuaj ken tejuamej. Xtikteititiaj ika melak techmojkatlachialtia tlen kichiuaj, tontlanemiliaj itech kenon Jehová niman Jesús techijyouiyaj maski miyekpa topopolouaj. Yejuamej xsan kitstokej kenon topopolouaj. Yejuamej kitaj tokualneskayouan niman kenon tokojtiliaj niman ijkon toyektlaliskej (1 Tim. 1:16; 1 Ped. 3:12).

Noijki melak noneki tikteititiskej ijyouilistli ijkuak yakaj kijtoua ika yotikijtokej noso yotikchiujkej itlaj tlen xkuajli. Ijkuak ijkon panoua, nimantsin uelis tikualaniskej niman itlaj tikijtotiuetsiskej tlen ika topaleuiskej. San ika, iTlajtol toTajtsin kijtoua matikchiuakan yejuin: “Melak kuajli tla titlamachia xken timoueyimatis. Maka nimantsin xkualani, pampa akin kualani yejon tlen onka intech akin xtlamachilisejkej” (Ecl. 7:8, 9). Kuakon, maski techtlajtolchijchiuiliskej, noneki titlamachiaskej niman ijkon tikmatiskej kenon titenankiliskej. Yejon tlen Jesús okichiuj ijkuak okipijpinaujtikej (Mat. 11:19).

Tajtin melak noneki kiteititiskej ijyouilistli ijkuak kitaskej ika noneki kinnonotsaskej inkoneuan pampa xkuajli tlen kichiujtokej, noso xkuajli tlen kinekij noso pampa xkuajli tlen yonomatkej kichiuaj. Matitlanemilikan itech Mattias, se tokniuj akin tlapaleuiya ipan Betel tlen onka Europa. Ijkuak telpochtli katka, kampa nomachtiaya nochipa kipijpinaujtiayaj ipampa tlen kineltokaya. Kachtopa, itajuan xtlaj kimatiyaj ika ijkon kichiuiliayaj. San ika, ononek kipaleuiskej pampa Mattias opeuj miyek tetlajtoltia itech tlen melauak. Itaj, akin itoka Gillis, kilnamiki: “Ononek melak tikteititiskej ijyouilistli”. Tokoneuj, techtlajtoltiaya: “¿Akinon toTajtsin? ¿Niman tla Biblia xmelauak iTlajtol toTajtsin? ¿Kenon tikmatij tla toTajtsin yejua akin techijlia matikchiuakan yejuin noso yejon?”. Mattias noijki kitlajtoltiaya itaj: “¿Tleka kipiya ika nechtejteneuaskej san pampa xnikneltoka tlen nemejuamej nenkineltokaj?”.

Gillis kijtoua: “Kemantika, tokoneuj techtlauelnotsaya, san ika, xtouan kualaniya. Yejua kualaniya pampa kimachiliaya ika tlajyouiaya pampa nomachtiaya Biblia”. ¿Tlenon okichiuj Gillis? “Miyekpa iuan oninotlali niman tiuejkauiyaj titlajtouayaj. Nikyejyekouaya nochipa  kuajli nijkakis, niktlajtoltiaya tlen nechpaleuiaya nikasikamatis tlenon kinemiliaya niman tlenon kimachiliaya. Kemantika, itlaj niktomiliaya, niman nikijliaya itech matlanemili ipan yejon tonajli niman ika sakin oksejpa titlajtoskiaj. Niman kemantika, nikijliaya manechmaka seki tonaltin niman ijkon kuajli nitlanemilis itech tlen onechijlika. Pampa miyekpa ijkon titlajtlatouayaj, Mattias opeuj kasikamati tlenon kijtosneki tlaxtlauijli, niman okasikamat ika toTajtsin techtlasojtla niman ika san yejua kinamiki tlayekanas. Ouejkauj, niman kemantika melak ouijtika katka, san ika, ika yolik onoskaltijtia itlasojtlalis itech Jehová. Nosiuatsin niman nejua melak techyolpaktia ika otikijyouijkej Mattias ijkuak telpochtli katka. Aman yejua kipiya ipan iyojlo tlen melauak”.

Ijkuak Gillis niman isiuauj kipaleuijtoyaj inkoneuj, yejuamej kineltokayaj ika Jehová kinpaleuiskia. Yejua kijtoua: “Miyekpa onikijli Mattias ika inan niman nejua melak tiktlasojtlayaj, niman tikijliayaj ika melak tiktlajtlaniliayaj Jehová makipaleui makasikamati nochi yejon”. Yejuin tajtin melak pakij pampa xonosiaujkaujkej.

Akin melauak kichiuaj ken Cristo noijki noneki kiskaltiskej ijyouilistli ijkuak kintlajpiyaskej inchanejkauan noso akin imiuan nouikaj akin melak kualoj. Matitlajtokan itech Ellen, * akin noijki chanti Europa.

Ikipiya chikueyi xiuitl, iueuentsin Ellen okipix ome ataques cerebrales, niman yejon melak okijtlako. Iueuentsin aman xok ueli teiknelia, xok paki nion xtlaj kimachilia. Yejuin melak kisiauitia Ellen. Yejua kijtoua: “Melak yononek nikpiyas ijyouilistli niman yononek miyekpa nikchiuas teoyotl”. Noijki kijtoua: “Melak nikuelita tlen kijtoua Filipenses 4:13, ompa kijtoua ika Jehová yejua akin techmaka kojtilistli”. Ipampa yejon kojtilistli tlen techmaka Jehová, Ellen ueli kiteititia ijyouilistli niman melak kuajli kimatstika ika Jehová kipaleuis (Sal. 62:5, 6).

Melauak, Jehová yejua akin melak teijyouiya (2 Ped. 3:15). Ipan Biblia, miyekan nesi kenon Jehová melak okiteititi ijyouilistli (Neh. 9:30; Is. 30:18). Se neskayotl, matikitakan kenon okinankili Abrahán ijkuak okitlajtolti tleka yokijtoka kipopolos Sodoma. Jehová xokitlajtolkoton Abrahán, yejua kuajli okikak ijkuak kijlitoya tlenon kajmanaya niman tlenon kinekiya kimatis. Sakin, Jehová okititi Abrahán ika kema okikak pampa oksejpa okiteneuili tlen okijlika, niman kuajli okasikamachilti ika xkipopoloskia Sodoma tla ompa nemiskiaj majtlaktli tlakamej yolmelaujkej (Gen. 18:22-33). ¡Kuajli okiteititi ika yejua teijyouiya niman ika xnimantsin kualani!

Kuajli nestika ika noneki matiteijyouikan, tinochimej akin tikchiuaj ken Cristo noneki matikpiyakan yejuin kualneskayotl. Tla tokojtiliaj titeijyouiskej, tikueyichiujtoskej toTajtsin iluikakchane akin melak techtlasojtla niman akin melak kipiya ijyouilistli, niman tinemiskej iuan “on yejuan itechkopa intlaneltok niman inijyouilis kiselijtokej on herencia yejuan Dios okitlalij ipan ipromesa” (Heb. 6:10-12).