KA GE re phela “mehleng ya bofelo,” bophelo bo boima kudu. Ka gona re swanetše go leka ka thata gore re se fele pelo. (2 Tim. 3:1-5) Batho bao re phelago le bona ke baithati, ke bao ba sa ikemišetšago go amogela tumelelano le ge e le efe goba ba na le manganga, e bile ga ba na boitshwaro. Batho bao ba nago le mekgwa yeo gantši ba rata go felafela pelo. Ka gona, re swanetše go ipotšiša gore: ‘Na ke na le mokgwa wa batho ba lefase wa go fela pelo? Ge e le gabotse go se fele pelo go bolela’ng? Nka thušwa ke’ng gore ke se fele pelo?’

Beibele ge e bolela ka go se fele pelo, ga e bolela ka go no kgotlelela bothata bjo itšego. E bolela ka motho yo a kgotlelelago ka gobane a na le kholofelo ya gore dilo di tla kaonefala. Motho wa go se fele pelo ga a tshwenyege kudu ka maikwelo a gagwe, eupša o leka go naganela maikwelo a batho ba bangwe, gaešita le bao ba mo kgopišitšego. Ka baka leo, ge motho a mo kgopišitše o lwela go lokiša bothata go e na le go ngala. Ga go makatše ge Beibele e bontšha “go se fele pelo” e le seka sa mathomo go dika tšeo di hlalosago lerato. * (1 Bakor. 13:4) E bile seka sa go se fele pelo se gare ga “dika tšeo di enywago ke moya.” (Bagal. 5:22, 23) Re ka thušwa ke’ng go ba le seka se?

E le gore re be le seka sa go se fele pelo, re swanetše go kgopela Jehofa moya o mokgethwa, woo a o neago bao ba mo tshepago le bao ba ithekgago ka yena. (Luka 11:13) Ke nnete gore moya wa Modimo o ka re thuša, eupša le rena re swanetše go šoma ka thata gore re phelele seo re se rapeletšego. (Ps. 86:10, 11) Se se ra gore re swanetše go lwela gore letšatši le lengwe le le lengwe re bontšhe seka se sa go se fele pelo. Eupša ga go felele moo, re swanetše go dula re šoma ka thata gore re bontšhe seka se bophelo bja rena ka moka. Ke’ng se sengwe seo se ka re thušago?

Re swanetše go ithuta go se fele pelo go swana le Jesu. Le gona moapostola Paulo ge a be a hlalosa “semelo se sefsa” seo se akaretšago “go se fele pelo,” o ile a re “anke khutšo ya Kriste e buše dipelong tša lena.” (Bakol. 3:10, 12, 15) Re ka dumelela gore khutšo yeo e “buše” dipelong tša rena ka go ekiša Jesu, ka ge a be a na le tumelo ya gore Modimo o tla lokiša mathata ka nako ya Gagwe. Le rena re ka  kgodišega gore Modimo o tla fediša mathata a rena ka nako ya gagwe. Ge re ekiša Jesu, re ka se hlwe re felafela pelo, go sa šetšwe gore go direga eng.​—Joh. 14:27; 16:33.

Ka moka ga rena re fela pelo ya gore lefase le lefsa le fihla neng. Eupša go se fele pelo ga Jehofa go re thuša gore le rena re se ke ra fela pelo. Beibele e re: “Jehofa ga a diege mabapi le kholofetšo ya gagwe, go etša ge batho ba bangwe ba go tšea e le go diega, eupša ga a le felele pelo ka gobane ga a rate gore go fedišwe le ge e le mang, eupša o rata gore bohle ba fihlelele boitsholo.” (2 Pet. 3:9) Ge re ka naganišiša kamoo Jehofa a sa re felelego pelo, le rena re tla leka go se felele ba bangwe pelo. (Baroma 2:4) Ke maemong afe moo go nyakegago gore re se fele pelo?

Letšatši le letšatši go direga dilo tšeo di nyakago gore re se fele pelo. Ka mohlala, ge e ba go na le selo se itšego se bohlokwa seo o nyakago go se bolela, go nyakega go se fele pelo e le gore o se ke wa tsena motho ganong. (Jak. 1:19) Le gona go nyakega go se fele pelo gore o dule o phela gabotse le bana babo rena le ge ba na le mekgwa ya go go tena. Go e na le gore o fele pelo, ipotšiše gore Jehofa le Jesu ba lebelela bjang mafokodi a gago. Re a tseba gore ga ba šetše mafokodi a rena. Eupša ba šetša dika tša rena tše dibotse e bile ga ba re felele pelo ge re dutše re elwa le mafokodi a rena.​—1 Tim. 1:16; 1 Pet. 3:12.

Le gona re swanetše go se fele pelo ge motho a re botša gore re mo kgopišitše ka selo seo re se boletšego goba re se dirilego. Gantši re a galefa gomme ra leka go fa mabaka. Eupša Beibele e re botša gore re se ke ra dira bjalo. E re: “Motho wa go se fele pelo o phala wa go ikgogomoša. O se ke wa akgofela go kgopišega moyeng, gobane go kgopišega go agile sehubeng sa ditlaela.” (Mmo. 7:8, 9) Le ge motho yoo a ka ba a sa bolele nnete, re swanetše go se fele pelo gomme re nagane pele re bolela. Jesu le yena o ile a dira bjalo ge batho ba be ba mo latofatša.​—Mat. 11:19.

Batswadi le bona ba swanetše go leka ka thata gore ba se fele pelo ge ba nyaka go thuša ngwana wa bona go tlogela mekgwa, dikganyogo le dikgopolo tše di sa lokago. Nagana ka seo se ilego sa diragalela Mattias yo a hlankelago legaeng la Bethele kua Scandinavia. Ge e be e sa le yo mofsa, sekolong ba be ba mo kwera ka ge e le Hlatse ya Jehofa. Mathomong batswadi ba gagwe ba be ba sa tsebe. Eupša ba ile ba swanelwa ke go se fele pelo ge Mattias a thoma go belaela gore o bodumeding bja therešo. Gillis e lego tatago Mattias o re go be go nyakega gore ba se fele pelo. O re Mattias o be a fela a re botšiša gore: “Modimo ke mang? Re tseba bjang gore Beibele ke Lentšu la Modimo? Re tseba bjang gore ka nnete melao yeo re phelago ka yona e tšwa go Modimo?” E bile o be a botšiša tatagwe gore: “Go re’ng le sa nkamogele ge ke sa nyake go dumela dilo tšeo lena le di dumelago?”

Gillis o re: “Ka dinako tše dingwe Mattias o be a botšiša a galefile, eupša a sa galefišwe ke rena. O be a galefišwa ke therešo ya ka Beibeleng ka ge a be a nagana gore e dira gore bophelo bja gagwe bo be thata.” Gillis o ile a thuša Mattias bjang? O re: “Ka dinako tše dingwe  nna le morwa wa ka re be re boledišana nako e telele. Ke be ke mo theetša e bile ke fela ke mmotšiša dipotšišo gore ke mo kwešiše. Ke be ke mo hlalosetša taba e itšego, ke mmotša gore a naganišiše ka yona kutšwanyana go fihlela re tlo bolela gape. Le nna ke be ke mmotša gore ke tla naganišiša ka seo a se boletšego. Ganyenyane-ganyenyane Mattias o ile a thoma go kwešiša dithuto tše bohlokwa tše bjalo ka topollo, gore Modimo o a re rata le gore o na le tshwanelo ya go buša. Go be go se bonolo go mo thuša, go ile gwa tšea nako, eupša mafelelong Mattias o ile a thoma go rata Jehofa go tšwa pelong.” Gillis o re: “Nna le mosadi wa ka re thabile kudu gore maiteko ao re a dirilego go thuša morwa wa rena ka go se fele pelo ga se a ba a lefeela.”

Gillis le mosadi wa gagwe ba ile ba ithekga ka Jehofa ge ba dutše ba thuša morwa wa bona ba sa mo felele pelo. Gillis o re: “Ke be ke phela ke botša Mattias gore ka ge nna le mmagwe re mo rata kudu, re be re rapela Jehofa gore a mo thuše go kwešiša therešo.” Ruri batswadi ba ba ile ba iteboga gore ga se ba ka ba fela pelo.

Bakriste ba swanetše go bontšha seka se le maemong a mangwe, a bjalo ka go hlokomela setho sa lapa goba mogwera yo a babjago kudu. A re kweng ka mohlala wa Ellen, * yoo le yena a dulago Scandinavia.

Mengwaga e ka bago e seswai e fetilego, monna wa Ellen o ile a bethwa ke stroke gabedi. Ka morago ga moo bjoko bja gagwe bja se sa šoma gabotse. Ka gona, seo se dira gore a se sa thaba, a dule a nyamile e bile a se sa kwela batho bohloko. Boemo bjo bo imela Ellen kudu. O re: “Ke thušwa ke go rapela Jehofa kudu le go se fele pelo. Ke kgothatšwa ke lengwalo leo ke le ratago kudu la Bafilipi 4:13 leo le rego: ‘Dilong tšohle ke na le matla ka baka la yo a mphago matla.’” Matla a a Jehofa a thuša Ellen go kgotlelela boemo bjo a sa fele pelo.​—Ps. 62:5, 6.

Jehofa ke Modimo yo a sa felego pelo, ka gona re swanetše go mo ekiša. (2 Pet. 3:15) Go na le dipego tše dintši ka Beibeleng tšeo di bontšhago kamoo Jehofa a ilego a se fele pelo. (Neh. 9:30; Jes. 30:18) Ka mohlala, na o sa gopola kamoo Jehofa a ilego a arabela ka gona ge Aborahama a be a mo kgopela gore a se fediše motse wa Sodoma? Sa pele, Jehofa ga se a ka a tsena Aborahama ganong. Eupša o ile a theetša ka go se fele pelo ge Aborahama a be a bolela. Jehofa o ile a bontšha gore o be a theeditše Aborahama e bile o ile a mo kgonthišetša gore a ka se fediše motse wa Sodoma le ge go ka ba le baloki ba lesome feela motseng woo. (Gen. 18:22-33) Ruri Jehofa ke mohlala o mobotse wa go theetša ka go se fele pelo le go se kitimele go kgopišega.

Go se fele pelo ke seka se bohlokwa kudu e bile Bakriste ka moka ba swanetše go leka ka thata go ba le sona. Ge re ka dira sohle seo re ka se kgonago gore re se fele pelo, re tla ba re bontšha gore re hlompha tatago rena wa legodimong gomme re tlo ba gare ga “bao ka tumelo le go se fele pelo ba jago bohwa bja dikholofetšo.”​—Baheb. 6:10-12.