NOS ta biba den “e último dianan” di e mal sistema akí i e preshon di e mundu ku ta bira kada bes mas pió ta pone ku e sirbidónan di Yehova tin mester di mas pasenshi ku nunka. (2 Tim. 3:1-5) E mundu ku nos ta biba aden tin hende ku ta egoista, sin dominio propio i ku no ta dispuesto pa sera ningun akuerdo. Hopi bes, hende asina no tin niun tiki pasenshi. P’esei, kada un di nos tin ku puntra nos mes: ‘E falta di pasenshi di e mundu ta influensiá mi? Kiko tene pasenshi ta enserá? I kon mi por hasi e kualidat kristian ekselente akí parti di mi personalidat?’

E palabra pasenshi manera Beibel ta us’é ta nifiká mas ku simplemente soportá òf tolerá un situashon difísil. Un persona ku tin pasenshi ta wanta bou di sirkunstansianan difísil, sin pèrdè speransa ku kosnan lo drecha. E no ta pensa riba su mes nesesidat promé, sino riba nesesidat di otro hende, asta kisas riba nesesidat di e persona ku ta kousa problema. P’esei, ora nan provoká òf maltratá un persona ku tin pasenshi asina, e ta keda tene speransa ku kosnan lo drecha. No ta nada straño anto ku Beibel ta menshoná “pasenshi” komo un di e kualidatnan ku amor ta produsí. * (1 Kor. 13:4) Ademas, e Palabra di Dios ta menshoná “pasenshi” entre e aspektonan di e “fruta di spiritu.” (Gal. 5:22, 23) Pero, kiko nos mester hasi pa kultivá e kualidat ekselente akí?

Pa nos por kultivá pasenshi nos tin ku pidi Yehova yuda nos ku su spiritu santu ku e ta duna na tur hende ku ta konfia den dje i ta dependé riba dje. (Luk. 11:13) Ma aunke e spiritu di Dios ta poderoso, tòg nos tin ku hasi nos parti i aktua di akuerdo ku nos orashon. (Sal. 86:10, 11) Esei ta nifiká ku nos tin ku hasi nos bèst pa demostrá pasenshi kada dia, di manera ku e kualidat akí por kria rais den nos kurason. I asina mes, nos tin ku hasi esfuerso pa e kualidat akí bira un parti permanente di nos personalidat. Kiko por yuda nos logra esei?

Nos por kultivá pasenshi ora nos analisá e ehèmpel di Hesus i imit’é. Papiando di e ehèmpel ei, apòstel Pablo bou di inspirashon a deskribí “e personalidat nobo,” ku ta inkluí “pasenshi,” i despues el a urgi nos pa “laga e pas di Kristu reina den [nos] kurason.” (Kol. 3:10, 12, 15) Nos por laga e pas ei “reina” den nos kurason ora nos ta imitá e fe inkebrantabel di Hesus i konfia ku Dios lo korigí asuntunan ku ta preokupá nos na Su debido tempu. Ora nos ta sigui e ehèmpel di Hesus, nos lo no pèrdè pasenshi fásil, ni maske kiko sosodé rònt di nos.—Huan 14:27; 16:33.

Aunke nos ta ansioso pa mira e mundu nobo ku Dios a primintí, nos a siña pa tene pasenshi segun ku nos ta meditá riba e pasenshi ku Yehova ta tene ku nos. Beibel ta  sigurá nos: “Yehova no ta tarda pa kumpli ku su promesa, manera algun hende ta kere; mas bien, e tin pasenshi ku boso pasobra e no ta deseá pa ningun hende ser destruí, ma e ta deseá pa tur haña chèns di arepentí.” (2 Ped. 3:9) Segun ku nos ta meditá riba e pasenshi ku Yehova ta tene ku nos, nos ta sinti nos motivá pa tene pasenshi ku otro hende. (Rom. 2:4) Ku esei na mente, laga nos analisá algun situashon ku ta rekerí pasenshi.

Tur dia ta surgi situashonnan ku ta rekerí pasenshi. Por ehèmpel, si sosodé ku bo tin algu importante di bisa, bo mester tene pasenshi i warda pa bo no interumpí e otro hende. (Sant. 1:19) Kisas bo tin mester di pasenshi tambe ora bo ta huntu ku rumannan ku tin kustumbernan ku ta iritá bo. En bes di rabia, ta bon pa bo kòrda riba e manera ku Yehova i Hesus ta mira nos debilidatnan. Nan no ta kritiká nos pa motibu di nos fayonan menor. Mas bien, nan ta mira nos bon kualidatnan i ku pasenshi ta opservá nos segun ku nos ta hasi esfuerso pa mehorá.—1 Tim. 1:16; 1 Ped. 3:12.

Un otro situashon ku lo por tèst nos pasenshi ta ora un persona insinuá ku nos a bisa òf a hasi algu robes. Hopi bes nos ta lihé pa sinti nos mes ofendí i ta purba hustifiká nos mes. Sinembargo, e Palabra di Dios ta rekomendá un otro reakshon. E ta bisa: “Pasenshi ta mihó ku orguyo. No sea lihé den bo kurason pa rabia, pasobra rabia ta biba den pechu di hende bobo.” (Ekl. 7:8, 9) Pues, asta si un akusashon ta kompletamente robes, ku pasenshi nos mester pensa nos palabranan promé ku nos papia. Hesus a apliká e prinsipio ei ora otro hende a hasi bofon di dje.—Mat. 11:19.

Spesialmente mayornan mester tene pasenshi ora nan mira ku ta nesesario pa trata ku kualke komportashon, deseo òf tendensia robes ku ta desaroyá den nan yunan. Tuma por ehèmpel e kaso di Mattias, ku ta miembro di e famia di Bètel na Skandinavia. Komo tiner, Mattias a sufri pa motibu ku su koleganan di skol tabata hasi bofon di dje debí na su kreensianan. Na prinsipio su mayornan no tabata sa nada di esei. Sinembargo, nan a haña nan ta trata ku e efekto negativo ku esaki tabatin riba nan yu hòmber ora el a kuminsá kuestioná e bèrdat. Mattias su tata, Gillis, ta kòrda: “Nos mester a tene hopi pasenshi pa trata ku e situashon.” Mattias tabata hasi preguntanan manera: “Ken Dios ta? Kiko si e Beibel no ta e bèrdat? Kon nos por tin sigur ku ta Dios ke pa nos hasi esaki òf esaya?” Tin bes e tabata puntra su tata: “Pakiko hende ta husga mi djis pasobra mi no ta kere den loke boso ta kere?”

Segun Gillis, “tabatin bes ku e preguntanan tabata zona ku rabia, no kontra ami ni su mama, pero kontra e bèrdat ku, segun e, tabata hasi su bida asina difísil.” Kon Gillis a trata ku e situashon? E ta konta: “Tin biaha, ami ku mi yu ta sinta papia pa oranan largu. Mi tabata skucha mas tantu. De bes en kuando mi tabata hasi pregunta djis pa mi haña un idea di kiko e ta papia. Tin biaha mi  ta splik’é algu i e tin kos pa pensa ariba pa algun dia. Otro biahanan mi sa bis’é ku lo mi tin mester di poko tempu pa pensa riba un punto di bista ku el a menshoná. Ku yudansa di e kòmbersashonnan regular ei, gradualmente Mattias a bin komprondé i aseptá siñansanan manera e reskate, e soberania di Dios i Yehova su amor. A tuma tempu, i hopi bes no tabata fásil. Pero, gradualmente amor pa Yehova a krese den su kurason. Ami ku mi kasá ta asina felis ku nos esfuerso i pasenshi a yuda nos yu pasa den su añanan difísil di tiner i a yuda nos yega na su kurason.”

Gillis i su kasá a konfia den Yehova su apoyo segun ku nan a tene pasenshi pa yuda nan yu. Mirando atras Gillis ta bisa: “Hopi bes mi tabata bisa Mattias ku nos amor profundo p’e a konmové ami i su mama pa hasi orashon di kurason pa Yehova yud’é komprondé e kosnan.” E mayornan ei ta masha gradisidu ku nan a demostrá pasenshi, un kualidat asina vital!

Ademas di duna yudansa spiritual, kristiannan berdadero mester tene pasenshi tambe ora nan tin ku yuda miembro di famia òf amigu ku tin malesa króniko. Tuma por ehèmpel e kaso di Ellen, * kende tambe ta biba na Skandinavia.

Mas o ménos ocho aña pasá, Ellen su kasá a sufri dos atake selebral ku a daña e funshon di su selebro. Pa motibu di esei, no ta posibel mas pa e sinti kompashon, felisidat ni duele. Esei a hasi e situashon bira masha difísil pa Ellen. E ta bisa: “Mi tabatin mester di hopi pasenshi i m’a hasi hopi orashon. Mi teksto faborito ku ta konsolá mi ta Filipensenan 4:13, ku ta bisa: ‘Pa tur kos mi tin forsa pa medio di esun ku ta duna mi poder.’” Ku yudansa di e forsa ei, Ellen ta perseverá ku pasenshi i ku konfiansa den e apoyo di Yehova.—Sal. 62:5, 6.

No tin duda, ora nos ta papia di demostrá pasenshi, no tin un mihó ehèmpel ku Yehova pa nos imitá. (2 Ped. 3:15) Tin hopi relato den e Palabra di Dios kaminda Yehova a demostrá gran pasenshi. (Neh. 9:30; Isa. 30:18) Por ehèmpel, kon Yehova a reakshoná ora Abraham a kuestioná Su desishon di destruí Sódoma? Na promé lugá, Yehova no a interumpí Abraham ora el a kuminsá papia, sino a skucha kada un di su pregunta- i preokupashonnan ku masha pasenshi. Anto e ora ei Yehova a mustra ku el a skucha pasobra el a ripití e preguntanan di Abraham i a sigur’é ku lo e no a destruí Sódoma, asta si tin solamente dies hende hustu den e stat ei. (Gén. 18:22-33) Esei ta un bon ehèmpel di skucha ku pasenshi sin bula reakshoná mesora!

Pasenshi manera esun di Dios ta un parti esensial di e personalidat nobo ku tur kristian mester desaroyá. Si nos ta traha duru pa kultivá e kualidat balioso ei, nos ta onra nos amoroso Tata selestial i nos lo ta entre “esnan ku pa medio di fe i pasenshi ta risibí loke Dios a primintí.”—Heb. 6:10-12.