FROM laef long “olketa last day” kamap moa worse, pipol bilong Jehovah need for patient winim enitaem bifor. (2 Tim. 3:1-5) Iumi stap insaed world wea pipol lovem olketa seleva, no willing for agree, and no savve kontrolem seleva. Pipol wea garem olketa wei hia no savve patient. So, each Christian shud askem hemseleva: ‘Waswe, wei bilong pipol long world for no patient affectim mi? Wanem nao hem minim for barava patient? Hao nao mi savve mekem disfala nambawan fasin kamap wei bilong mi?’

Insaed Bible, patient no just minim iumi weit nomoa taem iumi deal witim olketa problem. Man wea patient bae gohed hope hao samting bae kamap gud moa. Hem no tingim hemseleva nomoa, bat hem tingim feeling bilong man wea kosim problem. Dastawe, nomata samwan tok spoelem or kros long man wea patient, bae hem no givap and hem garem hope hao tufala bae fren bak moa. Dastawe Bible storyim hao “patient” hem firstfala nambawan fasin wea kamaot from love. * (1 Cor. 13:4) And tu, “patient” hem wanfala wei bilong holy spirit. (Gal. 5:22, 23) So, wanem nao iumi savve duim for mekem grow disfala patient fasin wea God laekem iumi for garem?

Jehovah savve givim spirit long olketa wea trustim and depend long hem, so for kamap gud long wei for patient, iumi mas prea and askem hem for givim datfala spirit. (Luke 11:13) Bat, nomata holy spirit bilong God garem bigfala paoa, iumi tu need for duim samting for followim wanem iumi prea abaotem. (Sams 86:10, 11) So diswan minim evriday iumi mas traem best for patient, mekem disfala fasin savve kamap wei bilong iumi. Nomata olsem, iumi need for duim samfala nara samting sapos iumi laek for mekem patient fasin kamap wei bilong iumi. Wanem nao bae helpem iumi?

Wei for studyim and followim perfect example bilong Jesus savve helpem iumi for patient. Aposol Paul storyim diswan tu taem hem raet abaotem olketa “niufala wei,” wea wanfala nao hem “patient.” And hem sei: “Letem datfala peace wea iufala kasem from iufala followim Christ for rulim heart bilong iufala.” (Col. 3:10, 12, 15) Datfala peace bae rulim heart bilong iumi sapos iumi followim example bilong Jesus for garem strongfala faith hao God bae stretem evri samting long taem wea hem markem. Taem iumi followim example bilong Jesus, iumi bae gohed patient and no letem olketa samting wea happen for mekem iumi feel nogud.—John 14:27; 16:33.

Nomata iumi barava laekem datfala promis niu world for kam kwiktaem, wei wea iumi  gohed for tingim hao Jehovah patient witim iumi savve helpem iumi tu for patient. Bible sei: “Jehovah hem no delay for duim samting wea hem promisim, wea hem nao tingting bilong samfala, bat hem patient witim iufala. Diswan hem bikos hem no laekem eniwan for dae bat hem laekem evriwan for garem chance for repent.” (2 Pet. 3:9) Taem iumi ting raonem wei wea Jehovah patient witim iumi, datwan savve mekem iumi for patient witim olketa narawan. (Rome 2:4) So, long olketa wanem taem nao iumi need for patient?

Evriday, staka samting savve testim wei wea iumi patient. Olsem example, sapos iu laek talem wanfala important samting, maet iu mas patient mekem iu no katem story bilong narawan. (Jas. 1:19) And tu, maet iu need for patient witim olketa brata and sista wea iu no laekem wei bilong olketa. Winim wei for feel nogud, hem wise for tingim hao Jehovah and Jesus ting long wik point bilong iumi. Tufala no lukluk for evri sismol mistek wea iumi duim. Bat, tufala tingim gudfala wei bilong iumi and patient taem iumi trae for mekem wei bilong iumi kamap gud.—1 Tim. 1:16; 1 Pet. 3:12.

Maet iumi need for patient tu taem samwan sei iumi talem or duim samting wea no stret. Staka taem maet iumi kwiktaem feel nogud and laek defendim iumiseleva. Bat, Bible talem difren samting. Hem sei: “Sapos haat blong yu hemi no save kros kuiktaem, hemi gud moa winim wea yu praod tumas. Hemi nogud fo yu kros kuiktaem, bikos hem nao wei blong krangge man.” (Eklesiastes 7:8, 9) So, nomata sapos samting wea olketa talem hem no tru, iumi shud patient and tingting gud bifor iumi talem or duim samting. Jesus followim datfala principle taem olketa narawan talem samting wea no tru abaotem hem.—Matt. 11:19.

Parents tu need for patient taem olketa laek stretem pikinini bilong olketa from maet olketa lukim pikinini start for garem rong tingting, feeling, or nogud wei. Tingim story bilong Mattias, wea waka long Scandinavia Bethel. Taem Mattias teenager, evritaem hem kasem hard taem long skul bikos long biliv bilong hem. Firstaem parents bilong hem no savve long datwan. Bat, samting wea kasem son bilong tufala mekem hem start for daotem truth. Gillis, dadi bilong Mattias, ting bak and sei: “Mitufala need for barava patient taem datfala samting happen.” Mattias savve ask olsem: “Hu nao God? Hao sapos Bible no toktok bilong God? Hao nao iumi savve God nao talem iumi wanem for duim?” Hem savve sei olsem tu long dadi bilong hem: “Why nao eniwan shud judgem mi sapos mi no garem sem biliv and feeling olsem iufala?”

Gillis sei: “Samfala taem son bilong mitufala tok kros taem hem askem olketa kwestin. Hem no kros long mi or mami, bat hem kros bikos hem sei truth mekem laef bilong hem hard tumas.” Hao nao Gillis deal witim datwan? Hem sei: “Mi and son bilong mi savve sidaon and story tugeta for staka hour. Staka taem mi lisin nomoa and samfala taem mi askem kwestin for helpem mi minim gud tingting and feeling bilong hem. Samtaem mi  talem hem for ting raonem wanfala samting for tu-thri day firstaem, then bihaen mifala story moa. And samtaem, mi talem hem mi needim taem for mi ting raonem samting wea hem talem mi. From mitufala story olsem evritaem, datwan helpem Mattias for isisi acceptim olketa teaching olsem ransom, raet bilong God for rul, and love bilong Jehovah. Nomata hem no isi and hem tek taem, love bilong hem for Jehovah hem isisi start for grow. Mi and waef barava hapi bikos gud samting kamaot from wei wea mitufala patient for kasem heart bilong son bilong mitufala taem hem teenager.”

Gillis and waef trustim hao Jehovah sapotim tufala taem tufala patient for teachim son bilong tufala. Gillis ting bak and sei: “Staka taem, mi talem Mattias hao mi and mami barava lovem hem dastawe mitufala savve prea strong for askem Jehovah for helpem hem minim truth.” Dadi and mami hia barava hapi from tufala gohed showimaot disfala barava important wei for patient!

Olketa Christian need for showimaot love and patient tu taem olketa lukaftarem famili member or fren wea sik big. Tingim Ellen, * wea hem tu from Scandinavia.

Samting olsem eitfala year go finis, hasband bilong Ellen kasem tufala stroke wea spoelem samfala part long brain bilong hem. From datwan, feeling bilong hem, olsem wei for feel sorre or hapi, or for tingim narawan, hem no waka nao. Diswan mekem laef barava hard for Ellen. Hem sei: “Mi mas barava patient and prea evritaem.” Hem sei tu: “Favorite scripture wea comfortim mi evritaem hem Philippi 4:13, wea sei: ‘Nomata wanem samting hem kasem mi, paoa wea mi kasem from God nao hem strongim mi for gohed.’” From Ellen kasem datfala paoa, hem fit for gohed patient and trustim wei wea Jehovah bae sapotim hem.—Sams 62:5, 6.

Barava best example for iumi followim, hem nao example bilong Jehovah for patient. (2 Pet. 3:15) Staka story stap insaed Bible abaotem olketa taem wea Jehovah showimaot hem barava patient. (Nehemaea 9:30; Aesaea 30:18) Olsem example, tingim wanem nao Jehovah duim taem Abraham kwestinim disison bilong Hem for distroem Sodom? First samting, Jehovah no katem story bilong Abraham, bat hem patient and lisin taem Abraham askem olketa kwestin and talemaot tingting bilong hem. Then, Jehovah showimaot hao hem lisin long Abraham taem hem repeatim toktok wea Abraham talem and then hem sei bae hem no distroem Sodom nomata sapos tenfala raeteous man nomoa stap long there. (Jenesis 18:22-33) Datwan nambawan example for patient for lisin and no kros kwiktaem!

Patient fasin wea God laekem iumi for garem hem important part long datfala niufala wei wea evri Christian mas garem. Sapos iumi waka hard for garem disfala nambawan fasin, iumi mekhae long Dadi bilong iumi long heven wea patient, and tu, iumi bae insaed datfala grup wea “kasem samting wea God promisim bikos olketa garem faith and olketa patient.”—Heb. 6:10-12.