PWEHKI laudlahn kapwunod “ni imwin rahn akan,” sapwellimen Siohwa aramas akan anahne kasalehda kanengamah laudsang mahs. (2 Tim. 3:1-5) Kitail mi nan sampah ehu me aramas akan kin kalapw poakohng pein irail, sohte men pwungki meteikan, oh sohte kak kaunda pein irail. Irail kan me ahneki soangen irair pwukat sohte kin kalapw kanengamah. Eri, emenemen Kristian anahne pein idek reh: ‘I tepidahier ahneki madamadau en sohte kanengamah me sampah wet kin ahneki? Ia wehwehn en uhdahn kanengamah? Oh ia duwen ei kak wiahkihla irair en Kristian kaselel wet kisehn ei tiahk oh wiewia?’

Wehwehn kanengamah nan Paipel kin pidada laudsang en ihte kanengamahiong irair apwal ehu. Emen me ahneki kanengamah kin dadaurete pwehki eh koapworopwor. E sohte kin medemedewehte eh anahn akan, ahpw e kin medewe irair en memeno me kahrehda kahpwalo. Pwehki met, ma emen wia sapwung de kalingeringerihda aramas kanengamah men, e sohte kin uhdihsang eh koapworopworki me nanpwungara pahn mwahula. Eri e sohte kapwuriamwei me Paipel kilelehdi “kanengamah” nin duwen ehu kisehn tepin irair kaselel kan me poahsoankihda limpoak. * (1 Kor. 13:4) Mahsen en Koht pil kasalehda me “kanengamah” iei ehu kisehn “wahn sapwellimen Koht manaman.” (Kal. 5:22, 23) Ahpw dahme kitail anahne wia pwe kitail en kak kakairada irair kaselel wet?

Pwehn kakairada irair en kanengamah, kitail anahne kapakapki sawas en sapwellimen Siohwa manaman, me e ketikihda ong irail kan me kin likih oh koapworopworki ih. (Luk 11:13) Sapwellimen Koht manaman uhdahn kehlail, ahpw pein kitail anahne wia atail pwukoa oh pil wia mwekid kan me pwung ong atail kapakap. (Mel. 86:10, 11) Met wehwehki me kitail anahne wia uwen atail kak pwehn kasalehda kanengamah rahn koaros pwe irair kaselel wet en kak tengediong nan mohngiongitail. Ahpw ni ahnsowohte, kitail anahne wia laudsang met pwe irair wet en wiahla kisehn atail tiahk. Ahpw ekei pak kitail sohte kak pweida. Dahme kak sewese kitail?

Kitail kak kakairada kanengamah sang ni atail kin kasakasawih oh alasang sapwellimen Sises mehn kahlemeng unsek. Pwehn pahrekiong sapwellimen Sises mehn kahlemeng, wahnpoaron Pohl kawehwehda duwen “mour kapw,” me iangete “kanengamah.” Ih eri kangoange kitail en mweidohng “popohl en Krais en pil kaunda [atail] mohngiong.” (Kol. 3:10, 12, 15) Kitail kak mweidohng soangen popohl wet en “kaunda” mohngiongitail sang ni atail kin alasang pwoson kehlail en Sises me Koht pahn ketin kapwungala soahng kan me kitail kin pwunodki ni ahnsou me E kupwurki. Ni atail kin idawehn sapwellimen Sises mehn kahlemeng, kitail sohte pahn lingeringerda oh sohla kanengamah, sohte lipilipil dahme kakete wiawi.​—Sohn 14:27; 16:33.

Mendahki kitail kin kasikasik en kilang sapwellimen Koht sampah kapw me e ketin inoukihda, kitail kin sukuhlki en kalaudehla atail kanengamah ni atail  doudouloale sapwellimen Siohwa kanengamah ong kitail. Paipel kamehlelehiong kitail: “Siohwa sohte kin ketin pwapwand en kapwaiada sapwellime inou, duwen ekei ar kin lemeleme, ahpw e kin ketin kanengamahiong kumwail pwehki e sohte kin ketin kupwurki emen en kasohrala ahpw e ketin kupwurki aramas koaros en koluhla.” (2 Pit. 3:9) Ni atail medemedewe sapwellimen Siohwa kanengamah ong kitail, met seu kin kamwakid kitail en kalaudehla atail kanengamahiong meteikan? (Rom 2:4) Ia pil ekei irair kan me kitail anahne kasalehda kanengamah?

Mie irair tohto rahn koaros me kin kasonge atail kanengamah. Karasepe, ma ke pehm me mie mehkot kesempwal ke pahn nda, ele ke anahne kasalehda kanengamah pwe ken dehr sopuk meteikan. (Seims 1:19) Ele ke pil anahne kasalehda kanengamah ni omw kin iang de werekiong emen iengomw Kristian me eh tiahk kan kin kalingeringerihuk. Dehr mwadang lingeringerkihda soahng pwukat, ahpw e wia elen loalokong en medewehla ia duwen Siohwa oh Sises ara kin ketin mwekidki atail luwet kan. Ira sohte kin ketin mahmahsanihete atail sapwung tikitik kan. Ahpw ira kin ketin mahsanih duwen atail irair kaselel kan oh ni kanengamah ketin tehk duwen atail kin nannanti en kamwahwihala.​—1 Tim. 1:16; 1 Pit. 3:12.

Pil ehu irair me atail kanengamah kakete lelohng songosong iei ni emen eh nda me kitail koasoia de wia mehkot sapwung. Kitail kin kalapw mwadang lingeringerda oh nantihong kasalehda me kitail me pwung. Ahpw Mahsen en Koht kihda ehu ahl me kitail kak wia me weksang met. E mahsanih: “Kanengamah kin mwahusang aklapalap. Kanengamahiong omw lingeringer; pwe aramas pweipwei me kin mwakar.” (Ekl. 7:8, 9) Eri, mehnda ma emen karaunlikamwih kitail, kitail anahne kanengamah oh medewe mahs atail mwekid. Sises ketin idawehn kaweid wet ni ahnsou me meteikan kapailoke ih.​—Mad. 11:19.

Pahpa nohno kan anahne kasalehda kanengamah ahpw keieu ni ahnsou me re tehkada me mie anahnepen en koasoiong neirail seri kan duwen madamadau de ineng sapwung kan me seri ko kakete kakairada. Medewehla Mattias me kin papah nan Pedel en Scandinavia. Ni ahnsou me Mattias pwulopwul, ienge tohnsukuhl kan kin kapailoke ih pwehki dahme e kamehlele. Nin tapio, eh pahpa nohno sohte ese duwen met. Ahpw ira tehkada me neira pwutako tepidahr peikasalki dahme e kamehlele. En Mattias eh pahpao, Gillis, nda me ih oh eh pwoudo anahne kanengamah laud nan irairo. Mattias kin idek: “Ihs Koht? Ia duwen ma Paipel kaidehn Mahsen en Koht? Ia duwen atail ese me uhdahn Koht me kupwurki soahng wet de soahngo sang kitail?” E pil kin ndaiong eh pahpao: “Ia kahrepen ei pahn pakadeikda ma I sohte kehn de kamehlele duwehte kumwa?”

Gillis nda: “Ekei pak, nait pwutako kin lingeringer ni eh idek peidek pwukat, kaidehn ong kiht ahpw ong padahk mehlel, pwehki e medewe me padahk mehlel kahredahr mour en uhdahn apwal ong ih.” Ia duwen Gillis eh sewese nah pwutako? E nda: “Ngehi oh nei pwutako kin mwohndi oh koasoipene erein awa tohto. Pali laud en ahnsou I kin rong ih oh idek ekeite peidek pwehn uhdahn wehwehki eh pepehm kan oh eh madamadau. Ekei pak I kin kawehwehda ire ehu oh mweidohng ih rahn ehu de tohtohsang en medewe duwen ireo mwohn at pahn pwurehng koasoiapene. Oh ekei  pak, I kin ndaiong me I anahne rahn kei en medewe duwen ireo me e kasalehda. Pwehki at kin kaukaule koasoipene, Mattias ekisekis wehwehkihla oh pil pwungki padahk kan en pweinen pweipwei sapahlo, sapwellimen Koht pwuhng en kaunda lahng oh sampah, oh duwen sapwellimen Siohwa limpoak. Met anahne ahnsou laud, oh pil kin kalapw apwal, ahpw ekisekis, limpoak ong Siohwa tepida kekeirda nan eh mohngiong. Ngehi oh ei pwoudo uhdahn perenki me at nannanti en kanengamah pwehn sewese nait pwutako ahnsou me e pwulopwul uhdahn pweida oh pil sair eh mohngiong.”

Gillis oh eh pwoudo likih sapwellimen Siohwa sawas ni ara kasalehda kanengamah oh sewese neira pwutako. Ni eh medewehla ahnsowo, Gillis nda: “I kin kalapw ndaiong Mattias me at limpoak laud ong ih me kamwakid kiht en kalaudehla at kapakap ong Siohwa pwehn ketin sewese ih wehwehki.” Ia uwen ahn Mattias pahpa oh nohno ara kalahnganki me ira kasalehda irair kesempwal wet en kanengamah!

Patehng sewese emen en kakehlaka eh nanpwungmwahu rehn Siohwa, Kristian mehlel kan anahne kakairada kanengamah ni limpoak ni arail kin apwalih tohn arail peneinei de kompoakparail kan me kohwahki soumwahu. Medewehla duwen Ellen, * me pil kin kousoan Scandinavia.

Mpen sounpar waluh samwalahro, ahn Ellen pwoudo mwoatorala (stroke) pak riau oh eh mwahlielo sohla kak doadoahk. Pwehki met, ohlo sohla kak kehn pepehm en limpoak, peren, de nsensuwed. Irair wet inenen apwal ong Ellen. E nda: “I anahne uhdahn kanengamah oh pil kapakap pak tohto.” E pil nda: “Iren Paipel me I keieu perenki oh me kin kansenamwahwih ie iei Pilipai 4:13, me mahsanih: ‘I kakohng mehkoaros pwehki I ahneki kehl sang rehn me ketikihong ie manaman.’” Pwehki kehl wet, Ellen kin dadaurete ni kanengamah oh uhdahn likih sapwellimen Siohwa sawas.​—Mel. 62:5, 6.

Ei mehlel, Siohwa iei me ketikihda mehn kahlemeng keieu mwahu ong kitail en idawehn pwehn kasalehda kanengamah. (2 Pit. 3:15) Nan Paipel, pak tohto Siohwa kin ketin kasalehda kanengamah laud. (Neh. 9:30; Ais. 30:18) Karasepe, ia duwen Siohwa eh ketin mwekidki ni Eipraam eh patohwan idek reh peidek kan duwen Sapwellime pilipil en ketin kasohrehla Sodom? Nin tapio, Siohwa sohte ketin sopuk Eipraam ni eh pato mwohn silangi. Ahpw Siohwa ketin karonge ni kanengamah ehuehu peidek oh iren kapwunod kan me Eipraam ahneki. Siohwa eri ketin kasalehda me e karonge Eipraam ni eh ketin pwurehng mahsanih ire ko me Eipraam pwunodki. E pil ketin kamehlelehiong Eipraam me E pahn ketin kasohrehla Sodom mehnda ma aramas pwung ehkte me dierek nan kahnimwo. (Sen. 18:22-33) Ia uwen met eh wia mehn kahlemeng mwahu ehu duwen en rong oh sohte mwadang en lingeringerda!

Kanengamah uhdahn wia kisehn mour kapw me kesempwal me Kristian koaros anahne pwuhriong loale. Ma kitail doadoahk laud pwehn kakairada irair kesempwal oh kehlail wet, kitail kin kawauwih Samatailo nanleng me kin ketin limpoak oh kanengamah, oh kitail pil pahn iangete “irail kan me sohsohkiher inou kan sang ni arail pwoson oh kanengamah.”​—Ipru 6:10-12.