QHEPA pʼunchaykunapi kausakusqanchejrayku, runasqa diamanta día astawan sajra imasta ruwanapaj tanqawanchej. Chayrayku mayta kallpachakunanchej tiyan astawan pacienciakunapaj (2 Tim. 3:1-5). Kay mundomanta runasqa kay jina kanku: paykunallata munakojkuna, mana uj yuyayllaman chayayta munajkuna, munayninkuwan atipachikojkuna ima. Chayrayku tukuy cristianos qhawarikunanchej tiyan mana kay mundomanta runas jina kanapaj. Astawanpis piensarinanchej tiyan imaynachus pacienciayoj runa kasqanpi, pacienciayojllapuni kanapajtaj imatachus ruwananchejpi.

Biblia nisqanman jina pacienciayoj runaqa, mana suyallanchu llakiykunasnin chinkananta. Manachayqa llakiykunasnin allinchakunanta suyaspa kusiywan aguantan. Pacienciayoj kaspaqa mana allinnillanchejtachu maskʼasun, manaqa tratarpawarqanchej chay runaj allinnintapis maskʼasun. Jinamantataj mana chay runawan phiñasqallapunichu kasunchej, astawanqa allinyakuyta maskʼasunchej. Chayrayku Bibliaqa nin: “Munakuyniyoj runaqa pacienciayoj”, nispa (1 Cor. 13:4). * Chantapis nillantaj pacienciayoj kayqa Diospa atiyninpa poqoyninmanta ujnin kasqanta (Gál. 5:22, 23). Kunantaj qhawarisunchej pacienciayoj kanapaj imatachus ruwananchej kasqanta.

Pacienciayoj kanapajqa Jehová Diospa atiyninta mañakuna. Jehová Diosqa atiyninwan yanapawasunchej astawan pacienciakunapaj (Luc. 11:13). Chaywanpis Jehová Dios atiyninwan yanapanawanchejpajqa, sapa día kallpachakunanchej tiyan pacienciayoj kanapaj (Sal. 86:10, 11). Kunantaj qhawarinachej imatawanchus ruwananchej kasqanta pacienciayoj kanapaj.

Chantapis pacienciayoj kanapajqa Jesusmanta yachakunanchej tiyan, pay jinataj kausakunanchej tiyan. Apóstol Pabloqa mosoj kausaywan pʼachallikunamanta parlashaspa, nerqa: “Cristomanta jamoj sonqo tiyaykoyqa, sonqoykichejpi kamachichun”, nispa (Col. 3:10, 12, 15). Cristomanta jamoj sonqo tiyaykuy sonqonchejpi kamachinanpajqa, Cristo jina creenanchej tiyan Diosninchej tiemponpi llakiykunasninchejta allinchananta. Jesuspa purisqanta sumajta qhatejtinchejqa, imapi rikukuspapis mana llakiyninchejwan atipachikusunchu (Juan 14:27; 16:33).

Ichapis unaytaña suyakushanchej Jehová Dios sumaj kausayta apamunanta. Mana usqhayta  chayamusqanraykutaj ichapis saykʼupushanchej. Chaywanpis Bibliaqa nin: “Jehová Diosqa imatachus nisqanta juntʼananpaj mana latʼuchu, imaynatachus wakin runas yuyanku ajina. Astawanpis payqa qankunawan pacienciakun. Imaraykuchus mana munanchu ni pi chinkachisqa kananta. Astawanqa munan tukuy pesachikunankuta”, nispa (2 Ped. 3:9). Jehová Dios noqanchejwan mayta pacienciakusqanta yachayqa, yanapawanchej wajkunawan pacienciakunapaj (Rom. 2:4). Kunantaj qhawarinachej imaspi rikukuspachus pacienciayoj kanata.

Sapa día imamantapis pacienciakunanchejpuni tiyan. Por ejemplo, imallatapis wajman willarinanchej kashajtenqa pacienciawan suyakunanchej tiyan parlayta tukunankama (Sant. 1:19). Ichapis pacienciakunallanchejtaj kanqa waj costumbresniyoj hermanoswan kashajtinchej. Ichá paykunaqa phiñachinawanchejpaj jina imatapis ruwankuman. Paykunapaj phiñakunamantaqa, piensarisunman pantaykojtinchej Jehová Dioswan Jesuswan mayta pacienciakuwasqanchejpi. Jehová Dioswan Jesuswanqa, mana pantasqasninchejtachu qhawanku. Manaqa allin imasta ruwananchejpaj kallpachakushasqanchejta qhawanku (1 Tim. 1:16; 1 Ped. 3:12).

Pacienciakuyta yachanallanchejtaj tiyan wajkuna qhasimanta tumpawajtinchej. Imajtinchus pillapis qhasimanta tumpawajtinchejqa ichá phiñarikusunmanpacha. Nisunmantaj: “Chay jinata llullakunaykiri”, nispa. Chaywanpis Bibliaqa niwanchej: “Pacienciayoj kayqa aswan allin machu machu kanamanta nisqaqa. Ama imamantapis usqhayllata phiñakuychu, imaraykuchus phiñakoyqa wampu runasllapaj allin”, nispa (Ecl. 7:8, 9). Chayrayku pillapis qhasimanta juchachawajtinchejqa, ama usqhayllata imatapis kutichikunachu. Astawanqa allintaraj tantearina. Jesuspis qhasimanta juchachasqa kashaspa sumajtaraj tantearispa allillanwan kutichikorqa (Mat. 11:19).

Tataspis wawasninkuwan pacienciakuyta yachananku tiyan. Astawanraj wawasninkuta kʼamirinanku kajtin chayri cheqanchananku kajtin. Hermanonchej Mattiasmanta parlarina. Payqa Europamanta ujnin Betelpi sirvishan. Jovenllaraj kashajtenqa, Jehová Diosta yupaychasqanrayku escuelamanta compañerosnin mayta asikoj kasqanku. Chaytataj qallariypi tatasnin mana yachasqankuchu. Tiemponmantaj Mattiasqa Bibliaj nisqasninmanta iskaychakuyta qallarisqa. Chaymanta parlaspa Mattiaspa tatan nin: “Mattiaswanqa mayta pacienciakunayku karqa. Imajtinchus payqa niwaj kayku: ‘¿Pitaj Diosri? ¿Biblia Diospa Palabranpunichu kanman? ¿Imaynapitaj yachasunman Diospuni Biblianejta yuyaychawasqanchejta? ¿Imaraykutaj ñawillaykichejpi purichiwankichejri?’”, nispa.

Mattiaspa tatan nillanpuni: “Wakin kuti Mattiasqa rabiasqa parlapayawaj kayku. Payqa rabiakoj Jehová Diosta yupaychasqanrayku wajkuna asikusqankumanta. Chayrayku yanapanaypajqa unayta paywan parlarej kani, sumajtataj uyarej kani. Wakin kutistaj waturej kani  imaynachus kashasqanta. Wakin kutispitaj imallatapis sutʼinchaspa chaypi diantinta piensarinanta nej kani. Wakin kutistaj imatapis waturiwajtin kutichinaypaj uj diata chayri iskay diata suyarinawanta nej kani. Ajinata parlarisqaykuraykutaj Mattiasqa Bibliaj nisqasninta sumajta entiendeyta qallarerqa. Manañataj iskaychakorqachu Jesuspa wañuynin juchamanta kacharichiwasqanchejmanta, Jehová Dioslla sumaj kamachej kasqanmanta, maytataj munakuwasqanchejmanta. Chaykunapi creenanpajqa mayta kallpachakorqani. Jinamantataj pisimanta pisi astawan Jehová Diosta munakorqa. Señoraywanqa mayta kusikuyku wawayku ñauparisqanmanta, paywan pacienciakusqaykutaj mana qhasichu kasqanmantapis”, nispa.

Mattiaspa tatanwan mamanwanqa, Jehová Dios yanapananpi atienekorqanku wawankuta cheqan ñanman kutirichinankupaj. Mattiaspa tatan nin: “Sapa kuti Mattiasman nej kayku mayta munakusqaykuta, Jehová Diosmantapis mañapusqaykuta Diospa Palabranta sumajta entiendenanpaj”, nispa. Mattiaspa tatasnenqa may kusisqa kashanku wawankuwan pacienciakusqanku mana qhasichu kasqanmanta.

Cristianosqa pacienciakunallanchejtaj tiyan onqosqa familianchejta chayri amigonchejta qhawananchej kajtin. Kunantaj hermananchej Ellenmanta parlarina. * Payqa Europapi tiyakun.

Hermananchej Ellenpa qosanqa casi 8 watasña manchay onqosqa kashan. Iskay kutita umanpi yawarnin sayarpasqa. Chayrayku manaña imatapis sientenchu, nitaj wajkunatapis khuyakuyta, munakuyta atinchu, manaqa tʼukulla. Hermana Ellenqa mayta kallpachakun qosanta qhawananpaj. Ellen nin: “Qosayta qhawanaypajqa mayta pacienciakuni, mana saykʼuspataj Diospa yanapanta mañakuni. Filipenses capítulo 4 versículo 13 mayta kallpachawan. Chay versículo nin: ‘Tukuy imapaj kallpayoj kani, Dios atiyta qowasqanrayku’”, nispa. Hermananchej Ellenqa Diospa yanapayninwan qosanta mana saykʼuspa qhawashallanpuni (Sal. 62:5, 6).

Mana pipis Jehová Dios jina pacienciayojqa kanchu. Chayrayku Jehová Diosmanta mayta yachakusunman (2 Ped. 3:15). Bibliapi niwanchej Jehová Dios ashkha kutispi pacienciakusqanta (Neh. 9:30; Isa. 30:18). Por ejemplo, Jehová Diosqa mayta pacienciakorqa Abrahanman Sodoma llajtata chinkachinanta nishajtin. Chay kutipi Abrahanqa manchayta Jehová Diosta tapuykorqa cheqan runasta khuyakunantachus manachus. Jehová Diostaj parlashajtin mana pantacherqachu, astawanpis sumajta uyarerqa. Nerqataj chunka cheqan runas kajtin Sodoma llajtata mana chinkarparichinanta (Gén. 18:22-33). Jehová Diosqa maytapuni Abrahanwan pacienciakorqa.

Chayrayku tukuypis mosoj kausaywan pʼachallikunapajqa pacienciayoj kananchej tiyan. Imallatapis ruwashaspa pacienciakojtinchejqa Jehová Diosta jatunchanchej. “Astawanpis pikunachus creeynejta, paciencianejtataj Diospa nisqasninta herenciata jina japʼerqanku, chaykuna jina” kasunchej (Heb. 6:10-12).