“USHANAN junaqkunachö” kawarninmi imëkata pasantsik, tsëmi Jehoväta sirweqkuna pacienciayoq kanantsik alläpa precisan (2 Tim. 3:1-5). Nunakunaqa kikinkunallamanmi pensayan, manam ima acuerdumampis chëta munayantsu y manam controlakïta yachayantsu. Jina manam pacienciayoqtsu kayan. Tsëmi cristiänukunaqa kënö tapukunantsik: “¿Wakin nunakunanöku noqapis pacienciayoq këta yachätsu? ¿Imataq pacienciayoq këqa? ¿Imataraq ruräman imëpis pacienciayoq kanäpaq?”.

Biblia parlanqan pacienciayoq këqa, manam imapis pasananta jaqillatsu, sinöqa shuyaranqantsikta yarparnin alli tsarakïmi. Pacienciayoq karninqa, manam kikintsikllamantsu pensashun, sinöqa wakinmampis pensashunmi, hasta mana allipa tratamaqnintsikkunamampis. Manam rastsu piwampis amïgu këta jaqirintsik, sinöqa alliyänantam shuyarantsik. Tsëmi Diospa Palabranqa pacienciayoq nunaqa kuyakoq kanqanta nimantsik (1 Cor. 13:4). * Jina pacienciayoq këqa, ‘santu espïritupa wayïninmi’ (Gäl. 5:22, 23). Peru ¿imataq yanapamäshun pacienciayoq kanapaq?

Pëman markäkushqaqa santu espïritunta qomänantsikpaqmi Jehoväqa änimantsik, tsëmi pacienciayoq kanapaqqa, Jehoväta santu espïritunta mañakunantsik (Lüc. 11:13). Jehoväpa santu espïritun alläpa puëdeq kaptimpis, kikintsikpis kallpachakunantsikmi y mañakunqantsiknömi ruranantsik (Sal. 86:10, 11). Juk parlakïchöqa, cada junaqmi mas pacienciayoq kanapaq kallpachakunantsik, tsënöpa pacienciayoq këta yachakunapaq. Tsënö kaptimpis, imëpis pacienciayoq kanapaqqa mastaran ruranantsik. ¿Imata?

Jina pacienciayoq kanapaqqa Jesuspitam yachakunantsik y pënö këtam procuranantsik. ‘Mushoq imanöpis këpaq’ parlarmi apostol Pabluqa ‘pacienciayoq këpaq’ parlarqan, y cristiänu mayinkunatam, “Cristupa yamë kënin shonqïkikunachö gobernatsun” nirqan (Col. 3:10, 12, 15). Cristupa yamë kënin shonquntsikta ‘gobernanampaqqa’, problëmantsikkunata Diosnintsik tiempunchö altsamunampaq kaqmanmi Jesusnö  markäkunantsik. Pënö imëpis kawarninqa, ima cäsuchöpis pacienciayoqmi kashun (Juan 14:27; 16:33).

Diosnintsik änikunqan Shumaq Patsachöna këta munashqapis, noqantsikwan pacienciayoq kanqanta yarpanqantsikmi pacienciayoq kanapaq yanapamäshun. Bibliachöqa kënömi nimantsik: “Jehoväqa manam änikunqanta cumplichö demorantsu, wakin nunakuna demorakoq këta rikäyanqannöqa, sinöqa qamkunarëkurmi pacienciakïkan, porqui manam munantsu pipis ushakänanta; tsëpa rantinqa, llapankuna arrepentikuyänantam munan” (2 Pëd. 3:9). ¿Jehovä noqantsikwan pacienciayoq kanqanqa manaku pënö kanapaq yanapamantsik? (Rom. 2:4). Tsëta cuentaman churar, ima cäsukunachö pacienciayoq kanantsik precisanqanta rikärishun.

Cada junaq pasanqantsikkunam höraqa pacienciantsikta ushakäratsinman. Këllaman yarpärishun: Pipis parlëkaptinqa parlar ushanqanyaqmi pacienciawan shuyärinantsik, imatapis parlakurita munarqa (Sant. 1:19). Jina pacienciayoqmi kanantsik cristiänu mayintsikkunapa costumbrinkuna mana gustamashqapis. Ras piñakurinantsikpa rantinmi, Jehoväwan Jesuspis imallachöpis pishipanqantsikpita pacienciayoq kayanqanman pensanantsik. Pëkunaqa manam imachöpis pantanqantsikta rikartsu këkäyan. Mas bienqa, imachöpis alli këkanqantsikta y alliyänapaq imata rurëkanqantsiktam cuentaman churayan (1 Tim. 1:16; 1 Pëd. 3:12).

Jina pipis “mana allitam parlashqa” o “mana allitam rurashqa” nir tumpamashqapis pacienciayoqmi kanantsik. Tsënö kaptinqa itsa ras piñakurishwan y ruranqantsikta ichikllapaq churashwan. Peru Diospa Palabranqa manam tsënö kanapaqtsu nimantsik: “Imapitapis piñakunapa rantinqa, mana piñakoq këmi mas alliqa. Ama rasllaqa piñakïtsu, tsënö rasllaqa piñakuyan upakunallam” (Ecl. 7:8, 9). Imatapis mana kaqta nimashqaqa pacienciawanmi alleqraq pensanantsik imanö contestanapaqpis. Tsënömi Jesuspis rurarqan mana kaqta niyaptin (Mat. 11:19).

Papäkunapis pacienciayoqmi kayänan wamrankuna imata munayanqanta o imanö portakuyanqanta corregiyänampaq. Escandinavia Betelchö yanapakoq Mattïaspaq parlarishun. Escuëlachö kanqan witsanmi creikunqampita estudiaq mayinkuna alläpa burlakuyaq. Qallananllachöqa manam papäninkuna tsëta musyayarqantsu. Peru tsëta pasarnin Diospa kaqpita dudar qallëkuptinmi cuentata qokuriyarqan. Papänin Gillismi këta nin: “Alläpa pacienciayoqmi kayänä karqan. Mattïasqa, ‘¿Pitaq Dios? ¿Y Biblia Diospa Palabran mana kaptinqa? ¿Imanötaq musyantsik imatapis ruranapaq Dios nikämanqantsikta?’ nirmi tapuyämaq”. Jina, “¿imanirtaq qamkunanö mana kanqäpita jusgayämanki?” neqmi papäninta.

Gillismi kënö willakun: “Höraqa ‘kawë vïdächö imatapis rurakunätam Bibliaqa michäman’ nirmi wamrä piñakoq”. ¿Imanötaq  Gillisqa tsurinta yanaparqan? Pëmi kënö nin: “Atska kutim shumaq tëkurnin alli unë parlayarqä. Masqa parlamunqantam wiyaq kä y höraqa imanö pensanqanta y sientikunqanta musyanäpaqmi tapureq kä. Höraqa, ‘kë ninqaqkunaman juk o ishkë junaqkuna pensari’ neqmi kä. Höranam, ‘kë nimanqëkikunaman juk ishkë junaqkuna pensaramushaq’ neq kä. Tsënö seguïdu parlayanqämi Mattïasta yanaparqan, Jesus noqantsikrëkur wanunqanta, Jehovälla llapanta gobernanampaq derëchuyoq kanqanta y Jehovä kuyamanqantsikta alleq käyinampaq y tsëkunapita següru kanampaq. Tiempupaqmi karqan, y höraqa manam fäciltsu karqan, peru ichikllapayanmi Jehoväta mas kuyar qallëkurqan. Warmïwan noqaqa Mattïaswan pacienciayoq kayanqäpitam alläpa kushikuyä, porqui tsëmi Mattïasta yanapashqa Diospa yachatsikïninta shonqunchö katsinampaq”.

Wamrankunata pacienciawan yanaparninqa, Gilliswan warminqa Jehovä yanapanampaq kaqmanmi markäkuyarqan. Pëmi këta nin: “Atska kutichömi Mattïasta kënö nirqä: ‘Mamëkiwan noqaqa alläpam kuyayaq, y yanapashunëkipaqmi Jehoväta mañakuyä’”. Kananqa, wamrankunawan pacienciayoq kayanqampitam alläpa kushikuyan.

Jina atska watakunapana qeshyaq familiantsikta o amïguntsikta cuidarnimpis pacienciayoqmi kanantsik. Ellenta * pasanqampita parlarishun, pëpis Escandinaviachömi täran.

Ellenpa qowanta atäqui tsarinqampitaqa puwaq watanam pasarishqa, tsëpita patsam qowanqa ankupäkïta yachantsu, y ni kushikïta ni llakikïta sientintsu. Y tsëqa Ellenpaq manam fäciltsu kashqa, pëmi kënö nin: “Alläpa pacienciayoqmi kanä, y seguïdum Diosta mañakü”. Jina kënömi nin: “Filipensis 4:13 textu ninqanmi alläpa shoqaman, kënömi nin: ‘Dios kallpata qomaptinmi imëkapaq kallpä kan’”. Tsë kallpata chaskinqanmi Ellenta yanapan pacienciayoq kanampaq y Jehovä yanapanampaq kaqman markäkunampaq (Sal. 62:5, 6).

Jehovämi wakinkunapitapis masqa pacienciayoq këta yachatsimantsik (2 Pëd. 3:15). Pëqa atska kutichömi alläpa pacienciayoq kanqanta rikätsikushqa (Neh. 9:30; Is. 30:18). Këllaman pensarishun: Sodöma markata ushakätsinampaq decidinqampita Abrahan tapupaqtinqa, tsëpaq imata pensanqampita y yarpakachätsinqampita parlar ushanqanyaqmi pacienciawan wiyarqan. Nïkurnam wiyashqa kanqanta rikätsirnin, “chunka nunallapis alli kaqta rurayaptinqa, manam Sodöma markata ushakäratsishaqtsu” nirqan (Gen. 18:22-33). Tsënö rurarmi Jehoväqa pacienciayoq këta y controlakïta yachatsimantsik.

Yachakurinqantsiknöpis pacienciayoq kanantsikmi cristiänukunapaqqa alläpa precisan. Pacienciayoq kanapaq llapan puëdinqantsikmannö kallpachakurqa, kuyakoq y pacienciayoq Jehovä Diosnintsiktam alabashun. Jina ‘markäkur y pacienciakur änikïta chaskishqa kaqkunapitam’ kashun (Heb. 6:10-12).