HEEˈNOOMMOHU lowo geeshsha qarrisannohu “goofimarchu barra” ikkino daafira, Yihowa mannira albinni roore cinca hasiissannonsa. (2 Xim. 3:1-5) Alamete aana rooru manni umonsa baxannoho, sumuu yaa baxannokkihonna insaneeto qeeˈlannokkiho. Togoo mannira cincate yinanniri coˈonta dinonsa. Konni daafira mittu mittunku Kiristaanchi isonooto togo yee xaˈma hasiissannosi: ‘Anino alamete noohu rooru manni gede cinca hoogeemmo? Isi cincate yaa mayyaate? Heeshshoˈya baalantenni konne kaajja akata leellisha dandeemmohu hiittoonniiti?’

Qullaawu Maxaafi giddo cinca yaanno qaale horoonsiˈnoonnihu mitto qarrisanno coye dandee saˈˈa calla xawisate diˈˈikkino. Cincanno manchi togo assannohu hexxotenniiti. Konnira miincinkero woy koffi assininkero nafa koffi assinonke manchi ledo noonke aante woyyaabbara dandiitanno yine hexxineemmo. Cincanno manchi isiniitira calla ikkikkinni koffi assinosi manchira hedanno. Maganu Qaali baxillu giddonni burqitanno akatta giddo mitte ‘cinca’ ikkitinota kulannohu iseraati. * (1 Qor. 13:4) Qoleno Qullaawu Maxaafi kulanno garinni “ayyaanu laalo” giddo mitte “cincate.” (Gal. 5:22, 23) Ikkina konne akata lossiˈra dandiineemmohu hiittoonniiti?

Cincate akatinke lexxanno gede Yihowa ayyaani kaaˈlo afiˈrate huucciˈra hasiissannonke; Yihowa addaxxitannosirira ayyaanasi aannonsa. (Luq. 11:13) Maganu ayyaani lowo wolqa afiˈrinoha ikkirono, ninkeno huuccattonke ledo sumuu yaannore assa hasiissannonke. (Far. 86:10, 11) Hatto yaa kuni akati wodaninke giddo rumuxxanno gede barru baala cincineemmore ikkate sharrama hasiissannonke yaate. Ikkollana heeshshonke woˈmantenni cincineemmore ikkate hakkiinni sainore assa hasiissannonke. Ikkina tennera kaaˈlannonkeri woluri maati?

Yesuusi cinca leellishino gara seekkine xiinxallinummoronna faalesi harunsinummoro, albinni roore cincineemmore ikka dandiineemmo. Soqqamaasinchu Phaawuloosi “haaro mannimma” daafira coyiˈri gedensaanni, “Kiristoosi keeri wodaniˈnera mooho” yiino; “haaro mannimma” giddo mitte cincate. (Qol. 3:10, 12, 15) Yesuusi cincinohu Maganu yannasira baalanka coye biddi assanno yee addaxxino daafiraati; ninkeno Yesuusi lawishsha harunsine isi ‘keeri wodaninkera moohanno’ gede assiˈra dandiineemmo. Yesuusi faale harunsineemmoha ikkiro, baxiri iillinkerono cinca dihoongeemmo.—Yoh. 14:27; 16:33.

Maganu haaro alame abbanno yanna quqquxamme agadhineemmoha ikkirono, Yihowa  ninke cincinonke gara hendeemmo woyite ninkeno cinca ronseemmo. Qullaawa Borro togo yitanno: “Mitu mitu heddanno garinni ikkikkinni, Mootichu uyino hexxo wonshate dikeeshshanno. Ikkollana, baalunku aagintaawe higaranna ayino baˈˈara hasiˈrannokki daafira kiˈnera yee cincanno.” (2 Phe. 3:9) Yihowa cincinonke gara hiincanke, ninkeno woloota cincineemmo gede diassitannonke? (Rom. 2:4) Ikkina cinca hasiissannonkehu hiittoo yannaraati?

Xaa yannara barru baala cincanke fonqolannori iillannonke. Lawishshaho, mittu coyiˈnammora hendoommohu lowo geeshsha hasiisanno coyi heeˈriro, wolootu coyidhanna mereero ea hoogate yine cincineemmo. (Yai. 1:19) Ikkitonsa baxissannohekki roduuwi ledo heeˈratto woyiteno cinca hasiissannoheha ikkara dandaanno. Hatte yannara hanqe fooggala agurre, Yihowanna Yesuusi laanfenke cincitino gara heda hasiissannonke. Yihowanna Yesuusi shiimmaadda laanfe batisse dilaˈanno. Hatteentenni insa dancha akattankenna akattanke woyyeessiˈrate sharrammeemmota laˈanno.—1 Xim. 1:16; 1 Phe. 3:12.

Wolootu coyiˈnoommori woy assinoommori gara ikkinokkita kultannonke woyiteno cinca hasiissannonke. Hattoo yannara, koffi yaa woy soˈronke ammana giwa rakkankera dandiitanno. Qullaawu Maxaafi kayinni kawiinni baxxinore assineemmo gede kulannonke. Togo yaanno: “Booˈnaleessunkunni cincaaleessu woyyate. Koma amada gowwimma ikkitino daafira, ati hanqoho muddantooti.” (Ros. 7:8, 9) Konni daafira, assinoommokkire assitinoonni yininkero nafa, qolleemmo dawaro cincine heda hasiissannonke. Yesuusino wolootu beebbate suˈmasi huntu yannara hatto assino.—Mat. 11:19.

Roorenkanni annuwunna amuuwu oosonsara gara ikkitinokki hedo woy lao noonsata wodanchite tenne biddi assate woˈnaaltanno woyite cinca hasiissannonsa. Hanni mitte Awuroppaho noo Beeteelera soqqamannohu Maatiyaasi lawishsha laˈno. Maatiyaasi wedellichu heeˈreenna rosu mine ooso ammanasinni kainohunni haarintannosi. Umi qara annisinna amasi tenne diafino. Ikkollana gedensoonni qaaqqinsa ammanannore huluullama hanafinota wodanchino. Maatiyaasi anni Yuliisi “Hatte yannara cinca hasiissinonke” yiino. Maatiyaasi togo yee xaˈmanno: “Maganu ayeti? Qullaawu Maxaafi Maganu Qaale ikkalla hoogi? Mitto coye assineemmo gede hajajinonkehu Magano ikkinota mayinni anfeemmo?” Qoleno isi annasi, “Atera noohe gedee lao woy ammana nooekki daafira calla soˈroommo yaa dandiinannini?” yee xaˈmanno.

Yuliisi togo yiino: “Mito woyite qaaqqinke xaˈmo hanqanni xaˈmanno; ikkollana hanqinohu anera woy amasira ikkikkinni halaalehooti; halaalu heeshshosi qarraataame assinoha lawinosi.” Ikkina Yuliisi maa assiyya? Isi togo yiino: “Aninna qaaqqiˈya lowo saate hasaambeemmo. Hedosinna laosi leeltannoe gede duucha woyite sammi yee macciishsheemmo; mito woyite kayinni xaˈmo xaˈmeemmosi. Wole woyite qole xaˈmote dawaro qolummo gedensaanni mitto barra woy haammata barra  hattenne hedanno gede asseemmo. Konni garinni duucha hinge hasaawanke Maatiyaasi wodote, Maganu aliidimmanna Yihowa baxilli daafira kulanno roso sunu sununni wodanchannonna ammane adhanno gede assitinosi. Togo assa shota diˈˈikkitino, qoleno tennera yanna hasiissanno; ikkirono Maatiyaasi gale hose Yihowara noosi baxilli lexxanno gede assiˈrino. Aninna minaamaˈya qaaqqinke anje heeˈreenna halaalu wodanisira qaˈmiranno gede kaaˈla dandiinoommo daafira tashshi yiinonke.”

Yuliisinna minaamasi qaaqqonsa cincite kaaˈlitanno woyite Yihowa irkisannonsata addaxxino. Yuliisi hakkawarita qaage togo yiino: “Aninna amasi halaale seekke huwatanno gede kaaˈlasira Yihowa huuccineemmota Maatiyaasira kuleemmosi; qoleno hatto assineemmohu banxeemmosi daafira ikkinota kuleemmosi.” Kuri anninna ama lowo geeshsha hasiisannoha cincate akata leellishansanni tashshi yiinonsa!

Addu Kiristaani woloota ayyaanaamittetenni kaaˈla agurranna darga assiˈrino dhibbi amadinonsare maatensa miillanna jaallansa kaaˈlanna irkisa hasiissannonsaha ikkara dandaanno. Hanni Awuroppaho heedhannote Elleeni * lawishsha laˈno.

Mitu settu diri albaanni, Elleeni minaannira lame higge surrete giddo mundee duˈnanteenna surresi baasa gawajjantino. Konninni kainohunni isi marara, hagiidhanna dadilla didandiino. Tini qolte, Elleenira shetto ikkitinose. Ise togo yitino: “Cincanna ganye huuccatto assiˈra hasiissinoe. Lowo geeshsha sheshifachishinoehu Filiphisiyusi Sokka 4:13 te nooho ‘Wolqa aannoehunni isinni baalankare assa dandeemmo’ yaanno qummeeshshaati.” * Elleeni, Yihowa wolqanna jawaante uyinose daafira, cincite kaajjitino.—Faarso 62:5, 6.

Cincate baalunkunni roore dancha lawishsha ikkinonkehu Yihowaati. (2 Phe. 3:15) Maganu Qaali giddo Yihowa cincinota leellishshannoti batinye dhagge no. (Neh. 9:30; Isa. 30:18) Yihowa Soddoomu katama huneemmo yiita Abirihaami tenne daafira duucha hige xaˈmino. Ikkina Yihowa maa assiyya? Umo Yihowa Abirihaami coyiˈranna mereero dieino. Hatteentenni Abirihaami xaˈmo xaˈmannanna huluullinosire kuˈlanna Yihowa cince macciishshino. Hakkiinni Yihowa Abirihaami coyiˈrinore qole coyiˈre macciishshanni noosita leellishino; qoleno Soddoomu katamira tonne keeraano heedhuro nafa hunannokkita buuxisinosi. (Kal. 18:22-33) Ee, Yihowa cince macciishshatenninna rahe hanqa hoogatenni dancha lawishsha ikkinonke!

Cinca baalunku Kiristaani uddiˈra hasiissannonsate haaro mannimma kifileeti. Konne muxxe akata lossiˈrate sharrammeemmoha ikkiro, baxillaanchonna cinca ikkinoha iimi Annanke ayirrinseemmota leellinsheemmo; qoleno “Maganu qaale eino coye ammanatenninna cincatenni” ragidhannori wido ikkineemmo.—Ibi. 6:10-12.