TANIHI vanhu va Yehovha hi fanele hi lehisa mbilu ku tlula rini na rini, tanihi leswi hi langutanaka ni swiyimo swo tika ‘emasikwini lawa yo hetelela.’ (2 Tim. 3:1-5) Hi hanya ni vanhu vo tala lava tirhandzaka, lava nga laviki ntwanano hambi wu ri wihi ni lava nga tikhomiki. Vanhu vo tano hakanyingi a va swi koti ku lehisa mbilu. Hikwalaho, Mukreste un’wana ni un’wana u fanele a tivutisa leswi: ‘Xana ndzi hela mbilu ku fana ni vanhu lava nga chaviki Yehovha? Kahlekahle swi vula yini ku lehisa mbilu? Xana ndzi nga endla yini leswaku ndzi hanya hi mfanelo leyi ya nkoka eka Vakreste?’

EBibeleni rito leri nge, ku lehisa mbilu, a ri vuli ku kota ku tiyisela swiphiqo ntsena. Munhu loyi a lehisaka mbilu u tiyisela a ri ni xikongomelo lexinene. A nga na vutianakanyi kambe wa khathala hi munhu loyi a n’wi twisaka ku vava. Hikwalaho, loko munhu la nga ni mbilu yo leha a khomiwa hi ndlela yo biha, u va ni ntshembo wa leswaku xiyimo xi ta antswa. A swi hlamarisi leswi Bibele yi boxaka ku “lehisa mbilu” tanihi mfanelo yo sungula eka timfanelo letinene leti munhu a tikombisaka loko a ri ni rirhandzu. * (1 Kor. 13:4) Rito ra Xikwembu ri tlhela ri katsa ku “lehisa mbilu” tanihi yin’wana ya timfanelo ta “mihandzu ya moya.” (Gal. 5:22, 23) Xana hi fanele hi endla yini leswaku hi kota ku hlakulela mfanelo leyi ya ku lehisa mbilu?

Leswaku hi va ni mfanelo yo lehisa mbilu, hi fanele hi khongela Yehovha hi kombela moya lowo kwetsima, lowu a wu nyikaka lava n’wi tshembaka ni lava titshegaka hi yena. (Luka 11:13) Hambileswi moya wa Xikwembu wu nga hi nyikaka matimba, hi fanele hi hanya hi ku pfumelelana ni swikhongelo swa hina. (Ps. 86:10, 11) Leswi swi vula leswaku hi fanele hi tikarhatela ku lehisa mbilu siku ni siku leswaku mfanelo leyi yi dzika etimbilwini ta hina. Hambiswiritano, hi fanele hi endla leswi engetelekeke leswaku hi hanya hi mfanelo leyi ya nkoka yo lehisa mbilu. I yini xin’wana lexi nga hi pfunaka?

Hi nga swi kota ku va ni mfanelo yo lehisa mbilu loko hi dyondza ni ku tekelela xikombiso lexi hetisekeke xa Yesu. Loko muapostola Pawulo a vulavula mayelana ni “vumunhu lebyintshwa” lebyi katsaka ‘ku lehisa mbilu,’ u hi khutaze leswaku hi pfumelela ‘ku rhula ka Kreste ku lawula timbilu ta hina.’ (Kol. 3:10, 12, 15) Hi nga pfumelela ku rhula koloko ku ‘lawula’ timbilu ta hina, hi ku tekelela xikombiso xa Yesu loyi a a ri ni ripfumelo leri tiyeke eka Xikwembu ra leswaku xi ta lulamisa timhaka leti khumbaka hina hi nkarhi lowu faneleke. Loko hi landzela xikombiso xa Yesu, a hi nge tshiki ku lehisa mbilu ku nga khathariseki swilo leswi humelelaka.—Yoh. 14:27; 16:33.

Hambileswi hi swi languteleke hi mahlongati ku vona misava leyintshwa ya Xikwembu, hi dyondza ku lehisa mbilu loko hi anakanyisisa hi ndlela leyi  Yehovha a hi lehiselaka mbilu ha yona. Matsalwa ma ri: “Yehovha a nga nonoki malunghana ni xitshembiso xa yena, hilaha vanhu van’wana va ehleketaka hakona leswaku i ku nonoka, kambe u mi lehisela mbilu hikuva a nga naveli leswaku ku lova ni un’we kambe u navela leswaku hinkwenu mi hundzuka.” (2 Pet. 3:9) Loko hi anakanya hi ndlela leyi Yehovha a hi lehiselaka mbilu ha yona, xana sweswo a swi hi endli leswaku hi lehisela van’wana mbilu? (Rhom. 2:4) Kambe hi swihi swiyimo swin’wana leswi lavaka leswaku hi lehisa mbilu?

Ku ni swiyimo swo tala evuton’wini leswi lavaka leswaku hi lehisa mbilu. Hi xikombiso, a hi nge u ni swo karhi swa nkoka leswi u lavaka ku swi vula, swi nga ha lava u lehisa mbilu leswaku u papalata ku kavanyeta van’wana. (Yak. 1:19) Swi nga ha tlhela swi lava leswaku u lehisa mbilu loko u ri ni vamakwerhu lava nga ni mikhuva leyi ku nyenyetsaka. Ematshan’wini yo hundzeleta swilo, i vutlhari ku anakanya hi ndlela leyi Yehovha na Yesu, a va ta angula ha yona eka ku tsana ka hina. A va karhateki hi swihoxo leswi nga nyawuriki leswi hi swi endlaka. Kambe va vona leswinene eka hina naswona va hi lehisela mbilu loko hi ri karhi hi endla matshalatshala yo antswisa.—1 Tim. 1:16; 1 Pet. 3:12.

Xiyimo xin’wana lexi nga ringaka ku lehisa mbilu ka hina hi loko un’wana a hi hehla leswaku hi vule kumbe ku endla swo biha. Hi ntolovelo hi nga ha hatla hi hlundzuka kutani hi sungula ku tiyimelela. Hambiswiritano, Rito ra Xikwembu ri hi khutaza leswaku hi angula hi ndlela yin’wana. Ri ri: “Wa antswa loyi a lehisaka mbilu ku ri ni loyi moya wakwe wu titlakusaka. U nga hatliseli ku hlundzukisiwa emoyeni wa wena, hikuva ku khunguvanyisiwa ku tshama exifuveni xa swihunguki.” (Ekl. 7:8, 9) Hambiloko hi hehliwa hi mavunwa, hi fanele hi lehisa mbilu naswona hi anakanya hi nga si hlamula. Yesu u tirhise nsinya wolowo wa nawu loko a hlekuriwa.—Mat. 11:19.

Vatswari va fanele va lehisa mbilu loko va pfuna vana va vona va lulamisa langutelo leri hoxeke ni ku navela ko biha loku va nga ha vaka na kona. Xiya xikombiso xa Mattias, loyi a nga xirho xa ndyangu wa Bethele ya le Scandinavia. Loko Mattias a ha ri muntshwa, u tiyisele ku hlekuriwa exikolweni hikwalaho ka ripfumelo rakwe. Eku sunguleni, vatswari vakwe a va nga swi tivi sweswo. Nilokoswiritano, a va boheka ku endla swo karhi leswaku va pfuna jaha ra vona leri a ri sungula ku kanakana tidyondzo ta Bibele hikwalaho ka nkaneto wolowo. Tata wakwe Gillis, u ri: “Mhaka leyi a yi lava leswaku hi lehisa mbilu swinene.” Mattias a a va vutisa a ku: “Xikwembu i mani? Hi swi tivisa ku yini leswaku Bibele i rito ra Xikwembu? Hi swi tivisa ku yini leswaku Xikwembu hi xona lexi lavaka leswaku hi hanya hi ndlela leyi kumbe liya?” Mattias u tlhele a vutisa tata wakwe a ku: “Hikwalaho ka yini ndzi fanele ndzi soriwa loko ndzi nga pfumeli eka leswi u swi pfumelaka?”

Gillis u ri: “Mikarhi yin’wana, n’wana wa hina a hi vutisa swivutiso a hlundzukile kambe a va a nga hlundzukelanga mina ni mana wakwe kambe a hlundzukele tidyondzo ta Bibele hikuva a twa onge ti n’wi tikisela vutomi.” Xana Gillis u endle yini? Gillis u ri: “Nkarhi wun’wana a ndzi tshama ni jaha ra mina hi vulavula nkarhi wo leha. Hakanyingi a ndzi rhiya ndleve ni ku n’wi vutisa swivutiso leswaku ndzi twisisa ndlela leyi a a titwa ha yona. Mikarhi yin’wana a ndzi n’wi byela swo karhi  leswaku a anakanyisisa hi swona kutani hi tlhela hi bula ha swona mundzuku wa kona kumbe siku rin’wana. Mikarhi yin’wana a ndzi n’wi byela leswaku a ndzi nyika masikunyana leswaku ndzi anakanyisisa hi leswi a swi vuleke. Hi ku tshamela ku burisana na yena, Mattias u hetelele a twisise tidyondzo to tanihi nkutsulo, vulawuri bya Xikwembu ni rirhandzu ra Yehovha. Swi teke nkarhi naswona a swi nga olovi, kambe hakatsongotsongo u sungule ku rhandza Yehovha. Mina ni nkatanga ha tsaka leswi matshalatshala ya hina yo pfuna jaha ra hina emalembeni ya rona ya vuntshwa, ma nga vangiki nyuku wa mbyana.”

Gillis ni nsati a va titshege hi Yehovha leswaku va kota ku lehisa mbilu loko va ri karhi va pfuna jaha ra vona. Sweswi Gillis u ri: “A ndzi tshamela ku byela Mattias leswaku leswi hi n’wi rhandzisaka xiswona hi swona swi endleke leswaku hi hambeta hi khongela Yehovha hi mbilu hinkwayo leswaku a n’wi pfuna ku twisisa.” Anakanya ndlela leyi vatswari volavo va tsakeke ha yona leswi va koteke ku kombisa mfanelo ya nkoka yo lehisa mbilu!

Vakreste va ntiyiso va fanele va hlakulela mfanelo yo lehisa mbilu loko va khathalela swirho swa ndyangu kumbe vanghana lava nga ni vuvabyi lebyi nga tshungulekiki. A hi xiyeni xikombiso xa Ellen, * loyi na yena a tshamaka eScandinavia.

Emalembeni ya nhungu lama hundzeke nuna wa Ellen u biwe hi xitroku kambirhi, leswi endleke leswaku byongo byakwe byi nga ha tirhi kahle. Leswi, swi endle leswaku a fa mintlhaveko yo va ni ntwelavusiwana, ntsako kumbe ku va ni gome. Phela Ellen u khome nyarhi hi timhondzo. U ri: “A ndzi fanele ndzi lehisa mbilu ni ku tshamela ku khongela.” U tlhele a ku: “Tsalwa leri ndzi ri rhandzaka ngopfu, leri ndzi chavelelaka i Vafilipiya 4:13 leri nge: ‘Eka swilo hinkwaswo ndzi ni ntamu hikwalaho ka loyi a ndzi nyikaka matimba.’” Hi nseketelo ni hi matimba lama humaka eka Yehovha, Ellen u kote ku lehisa mbilu a tiyisela xiyimo xexo.—Ps. 62:5, 6.

Hakunene, loko swi ta emhakeni yo lehisa mbilu, Yehovha i xikombiso lexinene ngopfu lexi hi nga xi tekelelaka. (2 Pet. 3:15) Ku ni rungula ro tala eRitweni ra Xikwembu laha Yehovha a kombiseke ku lehisa mbilu hi ndlela leyi hlamarisaka. (Neh. 9:30; Esa. 30:18) Hi xikombiso, xana Yehovha u angule njhani loko Abrahama a n’wi vutisa mayelana ni xiboho xakwe xo lovisa Sodoma? Yehovha a nga n’wi kavanyetanga Abrahama loko a ri karhi a vulavula. U lehise mbilu a yingisela xivutiso ni xirilo xin’wana ni xin’wana xa Abrahama. Yehovha u kombise leswaku u swi twile swirilo swa Abrahama, hikwalaho u rhange hi ku tlhela a swi vula ivi a n’wi tiyisekisa leswaku a a nga ta wu lovisa muti wa Sodoma loko o kuma vanhu va khume vo lulama eka wona. (Gen. 18:22-33) Mawaku xikombiso lexinene xo yingisela hi ku lehisa mbilu handle ko nghena munhu enon’wini!

Ku lehisa mbilu, i mfanelo ya nkoka leyi Vakreste hinkwavo va faneleke va va na yona loko va ambala vumunhu lebyintshwa. Loko hi tikarhatela ku va ni mfanelo leyi ya nkoka, hi ta tsakisa Tata wa hina wa le tilweni la nga ni rirhandzu ni mbilu yo leha naswona hi ta va exikarhi ka “lava dyaka ndzhaka ya switshembiso hikwalaho ka ripfumelo ni ku lehisa mbilu.”—Hev. 6:10-12.