PAKUTI masuzgo ghakulutilira kusazgikira mu “mazuŵa ghaumaliro” agha, ŵanthu ŵa Yehova ŵakwenera kuŵa ŵakuzikira chomene kuluska kumanyuma. (2 Tim. 3:1-5) Tili mu charu icho ŵanthu mbakujitemwa ŵekha, mbanonono ndiposo mbambura kujikora. Kanandi ŵanthu awo ŵali na mikhaliro iyi ŵakuzikira yayi. Lekani Mkhristu waliyose wakwenera kujifumba kuti: ‘Kasi nane nili wambura kuzikira nga mbanthu ŵa mu charu ichi? Kasi kuŵa wakuzikira chikung’anamurachi? Ningachita wuli kuti nyengo zose niŵenge wakuzikira pakuŵa Mkhristu?’

Kuyana na umo Baibolo likulongosolera, kuzikira nkhuzizipizga waka chiyezgo yayi. Munthu wakuzikira wakuŵa na chilato pakuzizipizga. Wakujighanaghanira yekha yayi, kweni wakughanaghaniraso ŵanyake, nanga ni awo ŵamukhuŵazga. Ntheura munthu wakuzikira para wakhuŵazgika, wakukhazga kuti vinthu viŵenge makora munthazi na munthu uyo ŵakhuŵazgana. Lekani ntchakuzizika yayi kuti Baibolo likuti “kuzikira” vikwendera lumoza na chitemwa. * (1 Kor. 13:4) Kweniso Mazgu gha Chiuta ghakuti “kuzikira” ntchimoza mwa “vipambi vya mzimu.” (Gal. 5:22, 23) Ipo kasi tingachita wuli kuti tiŵe ŵakuzikira?

Kuti tiŵe ŵakuzikira, tikwenera kulomba Yehova kuti watipe mzimu wake, uwo wakupeleka kwa awo ŵakumugomezga. (Luka 11:13) Nangauli mzimu wa Chiuta ngwankhongono chomene, kweni nase tikwenera kuchitapo kanthu. Tikwenera kuchita kuyana na malurombo ghithu. (Sal. 86:10, 11) Ichi chikung’anamura kuti zuŵa lililose tikwenera kuyezgayezga kuŵa ŵakuzikira mwakuti mukhaliro uwu ujinthe misisi mu mtima withu. Tikwenera kuchitaso vinthu vinyake kuti nyengo zose tiŵenge ŵakuzikira. Ni vichi vinyake ivyo vingatovwira?

Tingaŵa ŵakuzikira usange tingasanda umo Yesu wakachitiranga, na kuchita nga ndiyo. Apo mpositole Paulosi wakalongosoranga za “wunthu uphya,” uwo ukusazgapo “kuzikira,” wakatichiska kuti, “mtende wa Khristu ulongozgenge mitima” yithu. (Kol. 3:10, 12, 15) Kuti mtende uwu ulongozge mitima yithu, tikwenera kuyezga Yesu pa nkhani ya kuŵa na chipulikano mwa Chiuta na kugomezga kuti Chiuta wanozgenge vinthu panyengo yake. Para tikuchita nga ni Yesu, tilekengepo yayi kuŵa ŵakuzikira nanga tingayezgeka wuli.—Yoh. 14:27; 16:33.

Nangauli tikukhumba chomene kuti charu chiphya cha Chiuta chize, kweni tikusambira kuzikira para taghanaghanira umo Yehova wakuzikira nase. Malemba ghakutisimikizgira kuti: “Yehova wakuchedwa yayi na layizgo lake, nga umo ŵanthu ŵanyake ŵakuwonera kuti wakuchedwa. Kweni wakuzikira chifukwa  cha imwe pakuti wakukhumba yayi kuti munyake waparanyike, kweni wakukhumba kuti wose ŵang’anamuke mtima.” (2 Pet. 3:9) Apo tikughanaghanira umo Yehova wakuzikira nase, asi nase tikwenera kuzikira nawo ŵanyithu? (Rom. 2:4) Ipo kasi mphanyengo wuli apo tingakhumbikwira kuŵa ŵakuzikira?

Pali vinthu vinandi ivyo vingatiyezga usange tili ŵakuzikira. Mwachiyelezgero, panyengo iyo muli na fundo yakuzirwa yakuti muyowoye, mukwenera kuzikira kuti muleke kudumulizga ŵanyinu. (Yak. 1:19) Kweniso mukwenera kuŵa ŵakuzikira para muli pamoza na Ŵakhristu ŵanyinu awo nkharo yawo yikumukwiyiskani. M’malo mwa kuŵakwiyira, ntchamahara kukumbukira umo Yehova na Yesu ŵakuchitira na maubudi ghithu. Iwo ŵakulaŵisiska chomene pa tumaubudi twithu yayi. Kweni ŵakuwona mikhaliro yiwemi iyo tili nayo. Kweniso ŵakuzikira na kutipa mwaŵi kuti tisinthe.—1 Tim. 1:16; 1 Pet. 3:12.

Nyengo yinyake iyo tingakhumbikwira kuzikira ni para munthu watiphalira kuti icho tikayowoya panji kuchita chikaŵa chiheni. Para munthu watiphalira nthena, kanandi tikutemwa kujigowokera panji kukwiya. Kweni Baibolo likutiphalira fundo yinyake. Likuti: “Ntchiwemi kuŵa wakuzikira kuluska kuŵa wakujikuzga mu mzimu. Ungakwiyanga luŵiro chara, chifukwa vindere ndivyo vikukaŵa yayi kukwiya.” (Muph. 7:8, 9) Ntheura nanga ni para ivyo watiphalira ni vyaunenesko yayi, kweni tikwenera kuzikira na kughanaghanirapo dankha pambere tindazgore. Ivi ndivyo Yesu wakachita apo ŵanji ŵakamuyowoyera utesi.—Mat. 11:19.

Ŵapapi ndiwo ŵakwenera kuŵa ŵakuzikira chomene para ŵakukhumba kovwira ŵana ŵawo kuti ŵaleke nkharo yiheni, makhumbiro ghaheni, na vigomezgo viheni. Ghanaghanirani za Mattias, uyo wakuteŵetera pa Beteli ku Europe. Apo Mattias wakaŵa na vyaka vya pakati pa 13 na 19, ŵanyake ku sukulu ŵakamunyozanga chomene chifukwa cha vigomezgo vyake. Pakwamba, ŵapapi ŵake ŵakamanyanga yayi ivyo vikamuchitikiranga. Kweni ŵakeneranga kovwira mwana wawo chifukwa wakamba kukayikira unenesko. Dada wa Mattias, Gillis wakuti: “Nkheneranga kuzikira chomene. Nyengo zinyake Mattias wakafumbanga kuti: “Chiuta ni njani? Wuli usange Baibolo ni Mazgu gha Chiuta yayi? Tikumanya wuli usange Chiuta wakukhumba nadi ivi kwa ise?” Nyengo zinyake wakafumbangaso adada ŵake kuti: “Chifukwa wuli nkhwenera kweruzgika para vigomezgo vyane vikupambana na vinu kweniso nkhuwona vinthu mwakupambana na umo imwe mukuviwonera?”

Gillis wakuti: “Nyengo zinyake mwana withu wakafumbanga mwaukali mafumbo ghake. Wakachitanga nthena chifukwa cha kukwiyira ine panji anyina yayi, kweni unenesko, wakawonanga kuti ukumufyenya.” Kasi Gillis wakachita wuli na suzgo ili? Iyo wakuti: “Nyengo zinyake ine na mwana wane tikadumbiskananga nyengo yitali. Kanandi nkhategherezganga waka na kumufumbapo mafumbo apo na apo kuti nimanye maghanoghano ghake na umo wakajipulikiranga. Nyengo zinyake nkhamulongosoleranga fundo zakuti waghanaghanirepo zuŵa lose panji tumazuŵa pambere tindalutilire kudumbiskana. Nyengo zinyake nkhamuphaliranga kuti wanipe nyengo kuti nighanaghanirepo ivyo waniphalira. Chifukwa  chakuti nyengo na nyengo tikadumbiskananga, pachoko na pachoko Mattias wakamba kupulikiska na kukolerana navyo visambizgo nga ni sembe yakuwombora, muwuso wa Chiuta, na chitemwa cha Yehova. Pakatora nyengo, ndipo kanandi chikaŵanga chipusu yayi. Kweni pachoko na pachoko wakamba kutemwa Yehova. Ine na muwoli wane tili ŵakukondwa chomene chifukwa cha kuzikira, tikawovwira mwana withu apo wakaŵa muwukirano kuti wachontheke na ivyo wakasambiranga.”

Gillis na muwoli wake ŵakagomezga Yehova kuti waŵawovwirenge apo ŵakayezgayezganga kovwira mwana wawo mwakuzikira. Gillis wakukumbuka umo vikaŵira kumanyuma ndipo wakuti: “Kanandi nkhaphaliranga Mattias kuti chifukwa chakuti ine na anyina tikumutemwa chomene, kanandi tikamulomberanga chomene kuti Yehova wamovwire kuti wapulikiske vinthu.” Ŵapapi aŵa ŵakuwonga chomene kuti ŵakazikira.

Padera pa kovwira wa mu mbumba yawo mwauzimu, Ŵakhristu ŵaunenesko ŵakweneraso kuzikira para ŵakupwelelera wa mu mbumba yawo panji mubwezi wawo uyo wali na nthenda yambura kukonda munkhwala. Ghanaghanirani za Ellen, * uyo wakukhala ku Europe.

Pafupifupi vyaka 8 ivyo vyajumpha, mfumu wa Ellen wakasangika na nthenda iyo yikananga wongo wake. Chifukwa cha nthenda iyi, mfumu wa Ellen walije lusungu, chimwemwe, panji chitima. Umoyo ngwakusuzga chomene kwa Ellen. Iyo wakuti: “Nkhwenera kuzikira chomene kweniso kulomba mwakuwerezgawerezga.” Iyo wakutiso: “Lemba ilo nkhulitemwa chomene ndiposo ilo likunipembuzga ni Ŵafilipi 4:13. Lemba ili likuti: ‘Mu vinthu vyose, nkhusanga nkhongono mwa uyo wakunipa nkhongono.’” Chifukwa cha nkhongono iyi, Ellen wakuzizipizga mwakuzikira na kugomezga kuti Yehova wamovwirenge.—Sal. 62:5, 6.

Pa nkhani ya kuzikira, Yehova ntchakuwonerapo chiwemi chomene icho tikwenera kulondezga. (2 Pet. 3:15) Mu Baibolo muli nkhani zinandi izo zikulongosora nyengo iyo Yehova wakalongora kuti ngwakuzikira chomene. (Neh. 9:30; Yes. 30:18) Mwachiyelezgero, panyengo iyo Yehova wakati waparanyenge Sodomu, kasi wakachita wuli apo Abrahamu wakamufumbanga mafumbo? Chakwamba, Yehova wakamudumulizga yayi Abrahamu apo wakayowoyanga. Kweni wakategherezga mwakuzikira fumbo lililose ilo Abrahamu wakafumba ndiposo ivyo wakafipanga navyo mtima. Pamanyuma, Yehova wakalongora kuti wakategherezganga nadi chifukwa wakawerezgangapo ivyo Abrahamu wakafipanga navyo mtima, na kumusimikizgira kuti waparanyenge yayi msumba wa Sodomu nanga ni para mungasangika waka ŵarunji 10. (Gen. 18:22-33) Yehova ntchiyelezgero chiwemi pa nkhani ya kutegherezga mwakuzikira na kuleka kukwiya luŵiro.

Kuzikira ntchigaŵa chakuzirwa chomene cha wunthu uphya icho Ŵakhristu wose ŵakwenera kuvwara. Para tikuyezgayezga kuŵa na mukhaliro wakuzirwa uwu, tikuchindika Adada ŵithu a Yehova awo mbalusungu ndiposo ŵakuzikira. Kweniso tiŵenge pakati pa ŵanthu “awo ŵakuhara malayizgo chifukwa ŵali na chipulikano ndiposo mbakuzikira.”—Heb. 6:10-12.