ONA ko te gasolo aka ki luga o mea faiga‵ta i “aso fakaoti,” e manakogina malosi nei ne tino o Ieova a te kufaki i lō taimi muamua. (2 Timo. 3:1-5) Ko sikomia tatou ne se lalolagi telā e aofia i ei a tino kolā e a‵lofa fua ki a latou eiloa, e se lotoma‵lie ki so se feagaiga, kae e seai se loto pulea. A latou kolā e fakaasi atu faeloa ne latou a vaegā uiga penā, e seai eiloa se kufaki i a latou. Tela la, e ‵tau mo Kelisiano taki tokotasi o ‵sili ifo ki a ia eiloa penei: ‘E mata, e fakamalosi aka au ne te uiga o te lalolagi ko te seai o se kufaki? Se a te uiga tonu ke kufaki? Kae e mafai pefea o fai ne au a te uiga tu ‵kese tenei faka-Kelisiano e pelā me se vaega o oku uiga totino?’

I te kilokiloga a te Tusi Tapu e uiga ki te kufaki, e lasi atu tena fakauigaga i lō te kufaki fua i se fakalavelave faigata. A te tino telā e maua ne ia te uiga fakaatua tenei e loto mau mo se fakamoemoega. E se saga atu fua a ia ki ana manakoga totino, kae e fakatāua ne ia a te ‵lei o te tino telā e fakamāfua ne ia se fakalavelave. Ona ko te pogai tenei, kafai ko ‵se io me kaitaua a te tino kufaki, e se ‵fiu vave a ia i tena fakamoemoega ke faka‵lei aka a te va sē ‵lei tenā. E se tioa eiloa o fakasolo mai i te Tusi Tapu a te “kufaki” e pelā mo ko te uiga muamua eiloa mai nisi uiga ‵lei e uke kolā e māfua mai i te alofa. * (1 Koli. 13:4) E aofia foki i te Muna a te Atua a te “kufaki” e pelā me se vaega o “fuataga o te agaga tapu.” (Kala. 5:22, 23) Kae se a te mea e ‵tau o fai ne tatou ko te mea ke ati aka ne tatou a te uiga fakaatua tenei?

Ke ati aka te uiga ko te kufaki, e ‵tau o ‵talo atu tatou mō te fesoasoani o te agaga o Ieova, telā e tuku atu ne ia ki a latou kolā e tali‵tonu kae fakalago‵lago ki a ia. (Luka 11:13) E pelā mo te ‵mana o te agaga o te Atua, e ‵tau o fai ‵tou tusaga ke ga‵lue e ‵tusa mo ‵tou ‵talo. (Sala. 86:10, 11) E fakauiga eiloa te mea tenei me e ‵tau mo tatou o fai te ‵toe mea e mafai o fai ke fakagalue aka a te kufaki i aso takitasi ko te mea ke ‵goto ‵tonu a te uiga tenei ki ‵tou loto. Kae e se gata i ei, e mafai o uke atu ‵tou mea e fai ke fai ne tatou a te kufaki e pelā me se vaega tumau o ‵tou uiga totino. Ne a nisi mea e mafai o fesoasoani mai ki a tatou?

E mafai o ati aka ne tatou a te kufaki mai te suke‵suke kae fakaakoako ki te fakaakoakoga ‵lei katoatoa a Iesu. E ‵tusa mo te fakaakoakoga tenā, ne fakamatala mai ne te apositolo ko Paulo a “uiga ‵fou,” telā e aofia i ei a te “kufaki,” kae ne fakamalosi ne ia tatou ke ‘talia ke pule mai te filemu o Keliso ki ‵tou loto.’ (Kolose 3:10, 12, 15) E mafai o talia ne tatou a te vaegā filemu tenā ke “pule” mai ki ‵tou loto mai te fakaakoako atu ki te fakatuanaki ‵mautakitaki o Iesu me ka faka‵tonu aka ne te Atua a mea katoa kolā e manavase tatou ki ei i Tena taimi tonu. Kafai e tau‵tali tatou ki te fakaakoakoga a Iesu, ka se fakamāfua aka ne tatou se mea telā e fai ei ke sē kufaki tatou, faitalia a mea kolā e mafai o ‵tupu i ‵tou tafa.—Ioa. 14:27; 16:33.

E tiga eiloa e olioli tatou ke lavea atu a te lalolagi fou telā ne folafola mai ne te Atua, e tauloto  tatou ke kufaki malosi māfai e fakaakoako tatou ki te auala e kufaki ei a Ieova i a tatou. E fakatalitonu mai te Tusi Tapu ki a tatou, penei: “A Ieova e se tuai e uiga ki ana folafolaga, e pelā mo te manatu o nisi tino me e tuai, kae ko ia e kufaki ona ko koutou me e se manako a ia ke fakaseai se tino e tokotasi kae e manako ke sala‵mo a tino katoa.” (2 Pe. 3:9) I te taimi e mafaufau ‵loto ei tatou ki te kufaki o Ieova, e mata, e se fakamalosi aka i ei tatou ke kufaki malosi i nisi tino? (Loma 2:4) Mai te mafau‵fau ki te mea tenā, ne a nisi fakanofonofoga kolā e manakogina i ei a te kufaki?

E uke a tulaga kolā e mafai o tofotofo aka i ei a ‵tou kufaki. E pelā me se fakaakoakoga, kafai e mafaufau koe me e isi se mea tāua e fia fai atu ne koe, kāti e ‵tau o fakagalue aka ne koe a te kufaki ko te mea ke kalo kea‵tea koe mai te fakalavelave atu ki nisi tino. (Iako. 1:19) Kāti e manakogina foki ke fakaasi atu ne koe a te kufaki māfai e ‵nofo fakatasi mo taina tapuaki kolā e fakaasi atu ne latou a uiga kolā e fai ei ke kaitaua koe. I lō te fakalasi‵lasi ne koe a mea konā, se mea poto ke mafaufau koe ki te auala e ‵saga mai ei a Ieova mo Iesu ki ‵tou vāivāiga. E se kilo‵kilo mai fua lāua ki ‵tou tamā mea ‵se e fai. I lō te fai penā, e lavea ne lāua a ‵tou uiga ‵lei kae e onoono mai lāua mo te kufaki ki ‵tou taumafaiga ke faka‵lei aka a tulaga konā.—1 Timo. 1:16; 1 Pe. 3:12.

A te suā tulaga telā e mafai o tofotofo aka i ei a ‵tou kufaki ko te taimi e fai mai ei se tino me ne fai ne tatou se mea ‵se. Kafai e fai faeloa penā, e mafai eiloa o gasue‵sue fakavave tatou o kaitāua io me taumafai o fai ke ‵sao tatou. Kae e fakamatala mai ne te Muna a te Atua se mea tai ‵kese. E fai mai: “E ‵lei atu ke kufaki i lō te loto fakamaualuga. Ke mo a ma ita vave, me i te ita vave e nofo i fatafata o tino va‵lea.” (Fai. 7:8, 9) Tela la, kafai foki loa e isi se ‵losiga sē tonu, e ‵tau eiloa mo tatou o kufaki a te mea tenā. Ne tautali a Iesu ki te fakatakitakiga tenā i te taimi ne fai ei ne nisi tino a ‵losiga ‵se e uiga ki a ia.—Mata. 11:19.

E ‵tau eiloa mo mātua o fakaasi atu a te kufaki māfai e fesoasoani atu latou ki olotou tama‵liki ke faka‵tonu aka olotou kilokiloga sē ‵lei kae ke ‵kalo kea‵tea mai manakoga ma‵sei. Mafaufau la ki te tala o Mattias, telā e tavini atu e pelā me se sui o te kāiga Peteli i Scandinavia. E pelā me se tamataene, ne kufaki eiloa a Mattias i fakaosoosoga kolā e se mafai o gata i tena akoga ona ko ana talitonuga. Muamua la, ne seki iloa ne ana mātua a te mea tenei. E tiga te feitu tenā, ne ‵tau o fakafesagai atu lāua ki ikuga o te ‵tekemaiga tenei ki luga i te lā tama, telā ne kamata o fakafesili ne ia me e mata, ne maua eiloa ne ia te munatonu io me ikai. “Ne manakogina malosi te kufaki i te tulaga tenei,” ko pati a te tamana o Mattias, ko Gillis. Ne mafai o ‵sili mai a Mattias, penei: “Ko oi te Atua? Kae e a māfai a te Tusi Tapu e se ko te Muna a te Atua? E iloa pefea ne tatou me ko te Atua eiloa e manako ki te mea tenei io me ko te mea tenā mai i a tatou?” Ne mafai foki o fai atu a ia ki tena tamana: “Kaia e ‵tau ei mo au o fakamasino māfai e se talitonu au ki mea kolā e tali‵tonu koulua ki ei?”

“I nisi taimi,” ko te fakamatalaga a Gillis, “ne fakasae aka ne te mā tamaliki a ana fesili i se auala kaitaua, e se ki tena mātua io me ko au, kae ki te munatonu, telā e fakafaigata atu ki tena olaga.” Ne faka‵lei aka pefea ne Gillis a te fakalavelave tenei? “Ne mafai o saga‵saga fakatasi māua mo taku tama kae sau‵tala mō se fia o itula. Ne masani loa au o fakalogologo kae ‵sili atu a fesili i nisi taimi ko te mea ke iloa ne au ana lagonaga mo tena kilokiloga  tonu. I nisi taimi e tuku atu ne au ki a ia se fakamatalaga ke mafaufau ki ei i se aso io me mai mua o faka‵soko te mā sau‵talaga. I nisi taimi, ne fai atu au me e manakogina ne au ne nai aso ke mafaufau faka‵lei ki te manatu telā ne fakasae aka ne ia. E auala i sau‵talaga kolā ne fai faeloa ne māua, ne gasolo ki mua te malamalama o Mattias kae ne kamata foki o talia ne ia a vaegā akoakoga e pelā mo te togiola, te pulega sili a te Atua, mo te alofa o Ieova. Ne manakogina se taimi leva, kae ne faigata faeloa, kae fakamuli loa, ne kamata o ati aka i tena loto a te alofa ki a Ieova. Ne fia‵fia eiloa māua mo taku avaga me i mā taumafaiga ne fai mo te kufaki ke fesoasoani atu ki te mā tama i tausaga konā, ne aoga ‵ki eiloa kae ne ‵goto tonu eiloa ki tena loto.”

Ne tali‵tonu a Gillis mo tena avaga ki te fesoasoani o Ieova i te taimi ne ga‵lue lāua mo te kufaki ki te lā tama. Mai te mafaufau ki te taimi tenā, ne fai mai a Gillis: “Ne fai faeloa au ki a Mattias me ne fakamalosi aka ne te ‵poko o te mā a‵lofa ki a ia ke ‵talo faeloa māua mo tena mātua ki a Ieova ke mafai o fesoasoani atu ki a ia ke malamalama.” Ko oko eiloa i te loto fakafetai o mātua konā me ne fakagalue ne lāua a te uiga tāua ko te kufaki!

E se gata fua i te tuku atu o te fesoasoani faka-te-agaga, e ‵tau o ati aka ne Kelisiano ‵tonu a te kufaki māfai ko tausi atu ki se kāiga io me se taugasoa telā e masaki mō se taimi leva. Ke onoono ki te fakaakoakoga a Ellen, * telā e nofo foki i Scandinavia.

Kāti i se valu tausaga ko ‵teka, ne ‵mate fakalua te avaga a Ellen telā ne seki mafai o galue faka‵lei a tena faiai. Ona ko te mea tenā, ne seki toe maua ne ia a lagonaga fiafia. Ne faigata ‵ki eiloa a te tulaga tenei ki a Ellen. E fai mai tou fafine: “Ne manakogina malosi ne au te kufaki mo ‵talo e uke.” Ne toe fai mai a ia: “A te tusi faitau telā ne fakamafanafana mai faeloa ki a au ko te Filipi 4:13, telā e fai mai: ‘Me e maua ne au a te malosi i mea katoa e auala i a ia telā ne tuku mai ne ia te ‵mana ki a au.’” Fakafetai ki te ‵mana tenā, me ne mafai ne Ellen o kufaki fakatasi mo te loto talitonu ki te fesoasoani o Ieova.—Sala. 62:5, 6.

E tonu, kafai ko manakogina ke fakagalue aka te kufaki, a Ieova ko te ‵toe fakaakoakoga tu ‵kese ke tau‵tali tatou ki ei. (2 Pe. 3:15) E uke a tala i te Muna a te Atua e uiga ki taimi ne fakaasi atu ei ne Ieova te lasi o tena kufaki. (Nee. 9:30; Isa. 30:18) E pelā me se fakaakoakoga, ne saga atu pefea a Ieova i te taimi ne fakafesili ei ne Apelaamo a Tena fakaikuga ke fakaseai atu a Sotoma? Muamua la, ne seki fakalavelave atu a Ieova i te taimi ne faipati ei a Apelaamo. Kae ne fakalogologo eiloa a Ieova mo te kufaki ki fesili takitasi a Apelaamo e penā foki ana manava‵sega. Oti aka, fakaasi atu ei ne Ieova me ne fakalogologo eiloa a ia, mai te fakafoki‵foki atu ne ia a mea ne manavase ki ei a Apelaamo, kae ne fakatalitonu atu ki a ia me ka sē fakaseai ne Ia a Sotoma, faitalia foki loa me e tokosefulu fua a tāgata fakamaoni i te fakai tenā. (Kene. 18:22-33) Mafaga o fakaakoakoga gali e uiga ki te fakalogologo mo te kufaki kae e se taumafai o oso atu mo te kaitaua!

A te kufaki telā ne māfua mai i te Atua se vaega tāua o uiga ‵fou kolā e ‵tau o fakapei ki luga i Kelisiano katoa. Kafai e ga‵lue malosi tatou ke ati aka a te uiga tāua tenei ko te kufaki, e faka‵malu atu eiloa ne tatou a ‵tou Tamana faka-te-lagi telā e atafai kae kufaki, kae ka taku tatou e pelā me ko “tino kolā ne maua ne latou a folafolaga e auala i te fakatuanaki mo te kufaki.”—Epe. 6:10-12.