TA SWENTA te tulanxan te wokolil ya jsitintaytik ta jujun kʼajkʼal ta «slajibal cʼahcʼal» ayotike, te j-abatotik yuʼun Jehová ya skʼan te jich jtaleltik te mero ya xkujch kuʼuntike (2 Tim. 3:1-5). Te ants winiketik ta balumilal jaʼnix kʼux ya yaʼiy sbaik ta stukelik, ma skʼan ya schap skʼopik sok te yantik sok ma snaʼ skomel sbaik. Te machʼatik jich stalelik jaʼnix jich ma xkujch yuʼunik. Jaʼ yuʼun te j-abatotik yuʼun Dios ya skʼan jich ya jojkʼoybey jbatik: «¿Labal jkʼayinbeyix stalel te ants winiketik ta balumilal te ma jichuk stalelik te ya xkujch yuʼunike? ¿Bin ya skʼan ya yal te ya xkujch kuʼuntike? ¿Bin ya xjuʼ ya jpas swenta spisil-ora ya kakʼ ta ilel te lekil talelil ini?».

Kʼalal te Biblia ya yalbey skʼoplal te talelil ini, ma jaʼuknax ya skʼan ya yal te ay bin ya xkujch kuʼuntik ta skajnax te maʼyuk bin ya xjuʼ ta pasel. Jaʼ ya skʼan ya yal te ya xkujch kuʼuntik yuʼun te ay bin yakotik ta smaliyele. Kʼalal ay kuʼuntik te talelil ini ma jaʼuknax ya xbajtʼ ta koʼtantik te bin ya jkʼantike, jaʼnix jich ya jnoptik bin ya skʼanik te yantik, jichnix ya jpastik ta stojol te machʼatik ma lek ya yilotike. Manchukme jiche ma jkʼantik te ya x-ilinotik soke, jaʼ ya jkʼantik te lek ya kil jbatik sok yan bueltae. Jaʼ yuʼun maba yan ya kaʼiytik te ya yal te Biblia te jaʼ ya stijotik te kʼuxul oʼtanil yuʼun ya xkujch kuʼuntik (1 Cor. 13:4). * Jaʼnix jich ya yal te jaʼ jchajp «te sit ya yacʼ te Espíritu» (Gál. 5:22, 23). Pero, ¿bin ya skʼan ya jpastik swenta ya xkujch kuʼuntik?

Swenta ya jchʼijtes ta koʼtantik te talelil te ya xkujch kuʼuntik, ya skʼan ya jkʼanbeytik schʼul espiritu te Jehová te ya yakʼbey te machʼatik ay smukʼul yoʼtanik ta stojole (Luc. 11:13). Jaʼukmeto, manchukme ay yuʼel te schʼul espiritu yame skʼan te ay bin ya jpastik-euk, jaʼ te ya kakʼtik ta ilel ta jkuxlejaltik te yuʼun-nix jich-a te bin la jkʼanbeytike (Sal. 86:10, 11). Jaʼ-abi ya skʼan ya yal te ya jpastik tulan jujun kʼajkʼal ta yakʼel ta ilel te ya xkujch kuʼuntik swenta jich ya stsak yip ta koʼtantik-a. Manchukme ya jpastik-abi, aytoniwan bin ya skʼan ya jpastik swenta spisiluk-ora ya xchiknaj ta ilel ta jkuxlejaltik. ¿Bin-a?

Ya xjuʼ ya jchʼijtestik ta koʼtantik te talelil te ya xkujch kuʼuntik teme ya jnopbeytik skʼoplal te lekil ejemplo yuʼun te Jesús sok teme ya jkʼayintike. Kʼalal te jpuk-kʼop Pablo la yalbey skʼoplal te achʼ kuxlejalil te tey ochem skʼoplal-a te ya xkujch kuʼuntike, jich la yal ta stojol te jchʼuunjeletik: «Acʼa scuentahimbeyex awoʼtanic te lamal qʼuinal yuʼun Cristo» (Col. 3:10, 12, 15). Yuʼun ya swentain koʼtantik te lamalkʼinal yuʼun te Cristo ya skʼan te ya jkʼayintik te bitʼil jaʼ schʼuunej sok spisil yoʼtan te jaʼ ay ta skʼab Dios schajpanel ta yorail spisil te bin ya jmel koʼtantik yuʼune. Teme ya jtʼunbeytik te stalele, maba ya xlujbotik ta malab chikan bin ya xkʼot ta pasel (Juan 14:27; 16:33).

 Melelnix-a te koʼtan ya kiltikix te achʼ balumilal te yaloj ta jamal te Diose, pero yame jnaʼtikxan malab teme ya jnopilan ta koʼtantik te mero ya xmaliywan stukele. Te sKʼop Dios jich ya yal ta jamal: «Ma ba hal ya xcʼoht ta pasel te bin yaloj te Cajwaltic [Jehová], hich te bin utʼil ay ya scuyic te ya xhalaje, pero yac smahliybelex, ma scʼan te ay machʼa chʼayel ya xbaht, ha ya scʼan te yacuc suhtes yoʼtanic spisilic» (2 Ped. 3:9). ¿Mabal jichuk te ya stij koʼtantik te ya jnaʼtikxan malab ta stojol yantik kʼalal ya jnopilan ta koʼtantik te mero ya snaʼ malab te Jehová? (Rom. 2:4). Ta ora ini yame kiltik bin-ora ya skʼan te ya xkujch kuʼuntik o te ya jnaʼtik malab.

Ta jujun kʼajkʼal ay bintik ya xkʼot ta pasel te ya yakʼ ta ilel teme yuʼun-nix ya xkujch kuʼuntik o te ya jnaʼtik malabe. Kʼalal koʼtan ya kaltik bin mukʼ skʼoplal ya kaʼiytik yaniwan skʼan ya xmaliywanotik yuʼun maba ya jtuchʼbeytik skʼop te yantike (Sant. 1:19). Jaʼnix jich yaniwan skʼan te ya xkujch kuʼuntik kʼalal ya jokintik hermanoetik te ay bin kʼayemik ta spasel te ma jmulantike. Kʼalal jich ya xkʼot ta pasel ma lekuk te ya xyanaj koʼtantik ta swenta te bin ya spasike, jaʼ lek te ya xtal ta koʼtantik snopel bin-utʼil te Jehová sok te Jesús maba ya x-ilinik yuʼun te ay banti ya xchʼayotike. Te Jehová sok te Jesús ma xbajtʼ yoʼtanik ta yilel te bin ma lek ta jtaleltik teme maʼyuk swentaile. Jaʼ ya xbajtʼ ta yoʼtanik yilel te lekil taleliletik kuʼuntik sok te ya jpastik tulan ta slekubtesel jtaleltik (1 Tim. 1:16; 1 Ped. 3:12).

Jaʼnix jich ya xchiknaj ta ilel teme yuʼun-nix ya xkujch kuʼuntik-a kʼalal ay machʼa ya yal ta jamal ta jtojoltik te ay bin ma lek kalojtik o jpasojtik. Teme jich ya xkʼot ta pasel, ya xjuʼ ora ya x-ilinotik sok te ya x-och jkoltay jkʼoplaltik. Pero te sKʼop Dios jich ya yalbotik stukel: «Ha lec xan te ya xcʼax yuʼun swocol te bin utʼil te toybahile. Ma me orahuc ya xʼilinat, como te ilimba ay ta yoʼtan te machʼa ma snaʼ qʼuinal» (Ecl. 7:8, 9). Jich yuʼun, manchukme jkʼaxel ma jichuk te bin la yichʼ alel ta jtojoltik, yame skʼan ya jtsajtaytik ta lek bin sujtib ya kakʼtik. Jichme la spas te Jesús te kʼalal akʼot ta kʼexlale (Mat. 11:19).

Te meʼil tatiletik jaʼnix jich ya skʼan te ma x-ilinik sok te yal snichʼnabik kʼalal ya stojobtesik yuʼun ma lek stalelik, ay bin chopol ya skʼan yoʼtanik o kʼalal ay bin ma lekuk ya smulanik spasel. Jnop kaʼiytik bin kʼot ta stojol jtul hermano te ay ta aʼtel ta Betel yuʼun Escandinavia te Mattias sbiil. Kʼalal jchʼiel keremto-a, spisil-ora ya xlabanot ta eskuela ta skaj te bin schʼuuneje. Ta sjajchibal te smeʼ state jkʼaxel maba snaʼojik-a te bin yak ta kʼaxel ta stojole. Tulan la yilik te utsʼinbot yoʼtan te Mattias, melel jajch snop teme melelnix-a te bin schʼuuneje. Te Gillis te jaʼ spapa te kerem jich ya yal: «La skʼan kujch kuʼuntik te ma ilinotik soke». Te Mattias jajch spas jojkʼoyeletik jich bitʼil ini: «¿Machʼa-a te Diose? ¿Jaxan teme manix jaʼuk sKʼop-a te Bibliae? ¿Bin-utʼil ya jnaʼtik te jaʼnix-a te Dios te machʼa ya yalbotik te bin ya skʼan ya jpastik?». Jaʼnix jich ya yalbey te spapa: «¿Bin yuʼun ay bin ya awalbonik teme ma jchʼuun te bin ya achʼuunik te jaʼexe?».

Te Gillis jich ya schol kaʼiytik: «Ay baeltik sok slab yoʼtan ya xkʼopoj te jkeremtike, pero ma ta jtojoltik, jaʼ ta stojol te smelelil kʼope, melel ya yal te jaʼ ta smul te yak ta kʼaxel swokole». Te Gillis ya yal kaʼiytik bin la spas yuʼun: «Bayal buelta jal la jujkan jba ta kʼop sok. Te binxan ya jpase jaʼ te ya kaʼiy bin ya yalbon, ay baeltik ya jpasbey jojkʼoyeletik yuʼun ya xkʼot ta koʼtan bin-utʼil ya yaʼiy sba sok bin  ya snop. Ta jun buelta ay bin la jcholbey yaʼiy yuʼun ya snaʼulan ta sjunal kʼajkʼal sok te patil ya xchaʼkʼopojotike. Ay baeltik ya kalbey te yakuk yakʼbon cheʼoxeb kʼajkʼal yuʼun ya jnop ta lek te bin la yalbon kaʼiye. Ta swenta te bayal buelta kʼopojotike, te Mattias jajch ta kʼoel ta yoʼtan sok jajch schʼuun te bin ya kakʼtik ta nopel yuʼun te stojol kolel, te jaʼnax stukel ya xmantalteswan te Jehová sok te skʼuxul yoʼtan ta jtojoltik. Ma orauk jich kʼot ta pasel, ay mero wokol la kaʼiytik, pero kʼunkʼun la yichʼ yip te skʼuxul yoʼtan ta stojol Jehová. Joʼon sok te kinam mero tseʼel koʼtantik te ma ilinotik sok te Mattias kʼalal jchʼiel kerem-a, melel lekub te stalele sok juʼ kuʼuntik stijbeyel yoʼtan».

Kʼalal te Gillis sok te yinam yak skoltaybelik sok slamalil yoʼtanik te skeremike smukʼulinej yoʼtanik te ya xkoltayotik yuʼun te Jehová. Jich ya yal te Gillis: «Bayal buelta la kalbey te Mattias te mero kʼux ta koʼtantik te ya jkʼanbeytik sok spisil koʼtantik te Jehová te yakuk skoltay swenta ya xkʼot ta yoʼtan te bin ay ta naʼetel yuʼune». Ta melel, te meʼil tatiletik ini kʼax lek ya yaʼiy sbaik yuʼun te ma ilinik sok te yal snichʼanike.

Te smelelil j-abatotik yuʼun Dios jaʼnix jich ya skʼan ya xkujch kuʼuntik kʼalal ya jkanantaytik machʼa ay kuʼuntik o kamigotik te tsakbil ta chamel te maʼyuk spoxil. Kiltik bin kʼoem ta pasel ta stojol te Ellen * te jaʼnix jich nainem ta Escandinavia.

Ayniwan waxakeb jaʼbil te chebto buelta mal chʼichʼ ta yutil sjol te smamlal te Ellen te mero utsʼinot jilel yuʼun, ma xjuʼix yuʼun te ya snaʼbey yoʼbolil sba yantik, ma xyaʼiy tseʼel-oʼtanil sok maʼyukix bin ya yaʼiy ta jkʼaxel ta yoʼtan. Kʼax wokol ya xkʼax yuʼun ya yaʼiy te Ellen. Jich ya yal: «Ya skʼan te mero ya xkujch kuʼun sok te bayal buelta ya jkʼopon Dios». Jaʼnix jich ya yal te texto te ya smulanxan sok te ya x-akʼbotxan smukʼul yoʼtan yuʼun, jaʼ te Filipenses 4:13 te ya yal te spisil ya xjuʼ kuʼuntik ta swenta te machʼa ya yakʼbotik yip koʼtantik. Ta swenta te koltayel yuʼun te Jehová te Ellen yak ta spasel tulan, yak ta kujchel yuʼun sok smukʼulinej yoʼtan te ya xkoltayot yuʼun te Jehová (Sal. 62:5, 6).

Ta melel, te machʼa ya yakʼ ta ilel ta tsʼakal te ya xkujch yuʼune, jaʼ te Jehová (2 Ped. 3:15). Ta Biblia ya jtatik bayal ejemploetik te banti la yakʼ ta ilel te mero ya xkujch yuʼun o te ma x-iline (Neh. 9:30; Is. 30:18). Kiltik bin la spas kʼalal albot yuʼun Abraham te ma lekuk te ya slajin te Sodoma. Te Jehová ma la schʼuybey skʼop, lamal yoʼtan la yaʼiy kʼalal albot yuʼun te Abraham te bin ma mero ya xkʼot ta yoʼtan sok te bin smeloj yoʼtan yuʼune. Ta patil, la yakʼ ta ilel te la schʼam yaʼiy te bin albot yuʼun, melel la schaʼyal te bin smeloj yoʼtan yuʼun te Abraham sok la yalbey ta jamal te maba ya slajin te Sodoma teme ya sta lajuntul winiketik tey-a te toj yoʼtanike (Gén. 18:22-33). ¡Kʼax lekil ejemplo te Jehová, melel ma x-ilin sok ya xjuʼ yuʼun skomel sba!

Ta melel, te ya xkujch kuʼuntik jaʼ jchajp talelil te tulan skʼoplal te ochem skʼoplal ta achʼ kuxlejalil, ya skʼan te spisil te j-abatotik yuʼun Dios ya kakʼtik ta ilel te talelil-abi. Teme ya jpastik tulan yuʼun ya jchʼijtes ta koʼtantik te lekil talelil ini yame kichʼtik ta mukʼ te jkʼuxul-oʼtanil jTatik ta chʼulchan sok te mero ya xkujch yuʼune sok ya kichʼtik ajtayel sok «te machʼatic te ta scuenta schʼuhunel yoʼtanic soc te jun yoʼtanic yaquic ta mahlab, ya yichʼic te bintic yaloj ta jamal te Diose» (Heb. 6:10-12).