FIKIRẸ ebẹnbẹn re buẹnphiyọ vwẹ “oba rẹ ẹdẹ” rẹ avwanre hepha na, ihwo rẹ Jihova guọnọ ako echiro enẹna vrẹ obo ri jovwo. (2 Tim. 3:1-5) Vwẹ akpọ rẹ avwanre de yerẹn na, ihwo buebun vwo ẹguọnọ rẹ omobọ rayen ọvo, evo se ruẹ nene ota raye-en, efa vwo omaẹriẹnsuo-on. Ihwo ri vwo uruemu ra ta na che se vwo ako echiro-o. Ọtiọyena, e jẹ Onenikristi ọvuọvo nọ oma rọyen: ‘Me vwẹrokere uruemu rẹ jẹ ako echiro evwo ro rhe ihwo buebun re dia kẹrẹ ovwẹ? Die yen o mudiaphiyọ re vwo vwo ako echiro? Mavọ yen uruemu oyoyovwin nana sa vwọ dia ẹkuruemu mẹ?’

Vwo nene obo ra vwẹ ubiota nana vwo ruiruo vwevunrẹ Baibol na, ako echiro vrẹ ọ re di vwo yerin ghene ebẹnbẹn ro te ohwo oma. O vwo oboresorọ odibo rẹ Ọghẹnẹ vwo chirakon. Ọ tẹnroviẹ erhuvwu rẹ ohwo ro gbere ku, ukperẹ ojevwe romobọ rọyen. Ọtiọyena ohwo re gbeku na se chirakon vẹ ẹwẹn nẹ oyerinkugbe rọyen vẹ ohwo ro gbereku na, che yovwinphiyọ vwẹ obaro obọ. Kọyensorọ Baibol na vwo kere “odiri” yẹrẹ ako echiro vwọba iruemu iyoyovwin buebun rẹ ẹguọnọ nẹrhẹ e vwo. * (1 Kọr. 13:4) Vwọba, Baibol na je tanẹ odiri yẹrẹ “ako echiro” jehẹ ẹbẹre ọvo rẹ “omamọ rẹ [“ẹwẹn ọfuanfon,” NW ] na.”  (Gal. 5:22, 23) Kẹ, die yen a guọnọre e ki se vwo uruemu nana?

Avwanre da guọnọ vwo ako echiro, kẹ avwanre nẹrhovwo rhe Jihova nẹ ọ kẹ avwanre ẹwẹn ọfuanfon rọyen ro siobọnẹ kẹ otu re vwẹrosuọ vwọ kẹ ukẹcha. (Luk 11:13) Ẹwẹn ọfuanfon rọ cha kẹ avwanre na vọnre vẹ ẹgba, ẹkẹvuọvo avwanre je cha wian vwo nene ẹrhovwo rẹ avwanre. (Une 86:10, 11) Ọnana mudiaphiyọ nẹ avwanre cha davwẹngba rẹ avwanre eje vwo dje uruemu nana phia kẹdẹ kẹdẹ, rere uruemu nana sa vwọ tan awọ muotọ vwevunrẹ ubiudu rẹ avwanre. Vwọba, a me je davwẹngba rere ako echiro sa vwọ dia ẹkuruemu rẹ avwanre. Die ọfa yen e se ru?

Avwanre se vwo ako echiro siẹrẹ a da fuẹrẹn udje ọgbagba rẹ Jesu, je vwẹrokere. Ẹwẹn rẹ Ọghẹnẹ mu ọyinkọn Pọl vwo djisẹ rẹ “ohwo ọkpokpọ na” ro churobọ si ako echiro yẹrẹ “odiri,” o de bru avwanre uche nẹ e jẹ a vwẹ uphẹn kẹ “ufuoma ri Kristi” rere o sun “udu rẹ [avwanre].” (Kọl. 3:10, 12, 15) Ufuoma rẹ Kristi na che sun ubiudu rẹ avwanre siẹrẹ a da vwẹrokere esegbuyota rẹ kokoroko rẹ Jesu vwori, nẹ Ọghẹnẹ cha rhuẹrẹ erọnvwọn eje phiyọ vwẹ ọke romobọ rọyen. E de nene udje rẹ Jesu, o toro obo re phiare-e, e rhe che muophu te ẹdia ra da kpare ako echiro avwanre kufia-a.​—Jọn 14:27; 16:33.

 Dede nẹ avwanre hẹrhẹ akpọ kpokpọ na, e se yono ako echiro siẹrẹ e de roro kpahen oborẹ Jihova vwo odirin rẹ avwanre. Baibol na kẹ avwanre imuẹro nana: “Ọrovwohwo sa phiẹn ohwo vwẹ oma rẹ ive ro veri kirobo rẹ otu evo ta na-a, ẹkẹvuọvo o chirako rẹ ovwan, ọ guọnọre nẹ ohwo ọvuọvo ghwru-u, ẹkẹvuọvo nẹ ihwo ejobi kurhẹriẹ.” (2 Pita 3:9) Avwanre vwo roro kpahen oborẹ Jihova vwo odirin rẹ avwanre na, ka sa vwẹrokere vwo ru ọtiọyen kẹ ihwo efa. (Rom 2:4) Avwanre vwọ riẹn ọnana nure na, kẹ erhọ yen ẹdia evo ra da guọnọ ako echiro mie avwanre?

Ẹdia buebun herọ re sa davwen ako echiro rẹ avwanre nẹ. Kerẹ udje, ofori nẹ wo chirakon rere wo vwo jẹ ota egbe phiyọ unu rẹ ihwo efa, ọ da tobọ dianẹ obo wọ guọnọ ta na pha ghanghanre. (Jems 1:19) Ako echiro cha nẹrhẹ wo se yerin kugbe vẹ iniọvo re uruemu rayen ghwe je we-e. Ukperẹ wo vwo muophu kpahen uruemu rayen, aghwanre herọ siẹrẹ wo de roro kpahen oborẹ Jihova vẹ Jesu ruẹ kpahen ovwiẹrẹ rẹ avwanre. Ayen tẹnroviẹ oruchọ rẹ avwanre ri te emuọvo-o. Ukperẹ ọtiọyen, uvi uruemu ro rhe avwanre vẹ ẹgbaẹdavwọn re se vwo ru yovwinphiyọ yen ayen tẹnroviẹ.​—1 Tim. 1:16; 1 Pita 3:12.

Ẹdia ọfa rọ sa davwen ako echiro rẹ avwanre ni yen ọke rẹ ohwo da tanẹ avwanre ta chọ yẹrẹ e ru chọ. Ọke buebun na, e se brokpakpa muopho ji chochọn rẹ oma rẹ ohwo. Jẹ, ọyena dia oborẹ Ota rẹ Ọghẹnẹ jiri kẹ avwanre-e. Baibol na da ta: “Odiri vwẹ erhi yovwi nọ erhi rọ kparoma kpenu. Wọ fobọ mu ophu-u kidie udu rẹ ẹkpa ọye ophu dia.” (Aghwo. 7:8, 9) Ọtiọyena, ofori nẹ avwanre nabọ jomaotọ roro kpahen oborẹ avwanre che ru, ọ da tobọ dianẹ oborẹ ohwo na ta kpahen avwanre gbare-e. Jesu ru ọtiọyen ọke ra vwọ reyọ vwọ jehwẹ.​—Mat. 11:19.

A guọnọ ako echiro mie emiọvwọn mamọ ọke rẹ ayen da guọnọ kpọ uruemu, iroro, yẹrẹ oruchọ rẹ emọ rayen viẹ. Roro kpahen Mattias rọ ga vwẹ Bẹtẹl rọhẹ Scandinavia. Kerẹ eghene, Mattias chirakon rẹ ehwẹjẹ mamọ vwẹ obo isikuru fikirẹ esegbuyota rọyen. Ẹsosuọ, ọsẹ vẹ oni rọyen riẹn obo re phia-a. Ọke vwọ yanran, ayen de rhi vwo oniso rẹ umiovwo rẹ ẹvwọsuọ nana guọnọ sua kẹ ọmọ rayen, kidie Mattias ko rhi vwo ẹwẹn ivivẹ kpahen uyota na. Ọsẹ rọyen Gillis da ta: “Ẹdia na guọnọ ako echiro mie avwanre mamọ.” Mattias me nọ: “Ono yen Ọghẹnẹ? Ọ da rha dianẹ Baibol na dia Ota rẹ Ọghẹnẹ vwo-o? Mavọ yen avwanre ru riẹn nẹ Ọghẹnẹ yen ghini guọnọ ọnana yẹrẹ ọyena mie avwanre?” Vwọba, ọ me ta kẹ ọsẹ rọyen: “Diesorọ wọ vwọ reyọ ovwẹ vwo guẹdjọ kidie nẹ oborẹ mi segbuyota fẹnẹ ọwẹn?”

Gillis da ta: “Ọkiọvo na, ophu yen ọmọshare rẹ avwanre vwọ nọ avwanre enọ na. Ọ dianẹ ko muophu kpahen ovwẹ yẹrẹ oni rọye-en, ẹkẹvuọvo kpahen uyota na, kidie o rorori nẹ uyota na nẹrhẹ akpọ bẹn kẹ.” Kẹ, die yen Gillis ruru? “Mẹ vẹ ọyen chidia, avwanre me ta ota vwẹ inọke buebun. Me  nabọ kerhọ ji nọ enọ vwẹ ọke sansan, rere mi se vwo vwo ẹruọ rẹ obo ro roro vẹ ẹwẹn ro rhe re. Ọkiọvo me da kpahen kẹ nu, ke me vuẹ nẹ ọ gba vwẹ ẹdẹ ibro vwo roro kpahen ota na tavwen a ke rhoma ta ota kpahọn. Vwẹ ọke efa, me vuẹ nẹ ọ kẹ vwẹ ẹdẹ ibro mi vwo roro kpahen obo rọ vuẹ vwẹ. Womarẹ otaẹtakuẹgbe rẹ ọkieje, ememerha na, ẹruọ rẹ Mattias de rhi kodophiyọ, o de rhiabọreyọ iyono ri shekpahen ọtanhirhe na, usuon rẹ Jihova kugbe ẹguọnọ rọyen. Ọ lọhọre-e, ọ reyọ ọke dẹn, jẹ ememerha na, ẹguọnọ ro vwo kpahen Jihova da rhe ganphiyọ. Oma vwerhen ovwẹ vẹ aye mẹ nẹ ako echiro vẹ ẹgba rẹ avwanre davwenre vwọ chọn ọmọ rẹ avwanre uko vwẹ ọke eghene rọyen fierere, o ji te ubiudu rọyen.”

Gillis vẹ aye rọyen vwo imuẹro nẹ Jihova cha chọn ayen uko vwo chirakon kpọ ọmọ rayen vi. Rọ vwọ karophiyọ obo re phiare ọke yena, Gillis da ta: “Ọkieje yen me vwọ vuẹ Mattias nẹ ẹguọnọ okokodo rẹ mẹvwẹ vẹ oni rọyen vwo kpahọn yen muẹ avwanre vwọ nẹrhovwo kọke kọke nẹ Jihova chọn uko vwo vwo ẹruọ.” Oma ghene vwerhen emiọvwọn yena nẹ ayen se dje uruemu rẹ ako echiro phia!

Vwọ vrẹ uchebro rẹ Ota rẹ Ọghẹnẹ, ofori nẹ ẹguọnọ mu Inenikristi rẹ uyota vwo chirakon ọke rẹ ayen da vwẹrote ohwo rẹ orua rayen yẹrẹ ugbeyan rẹ oma rọyen ganre-e. Roro kpahen udje rẹ of Ellen, * rọ dia Scandinavia.

Abọ ivẹ soso yen ọshare rẹ Ellen rioja rẹ ọga rẹ obọ gbe owọ vwẹ uvwre rẹ omarẹ ẹgbukpe ẹrenren re wanre na. Fikirẹ asan rẹ ọga na miovwirin vwẹ afọnrhe rọyen, o rhe se gbe arodọnvwẹ, ghọghọ yẹrẹ muomaphiyọ-ọ. Ẹdia nana so ọkuọrọn rode kẹ Ellen. Ọ da ta: “Ako echiro ọgangan vẹ ẹrhovwo buebun yen chọn vwẹ uko. Ẹkpo rẹ Baibol rọ chọn vwẹ uko yen Filipae 4:13, rọ tare nẹ: ‘Mi se ru emu ejobi vwi Kristi rọ kẹ vwẹ ogangan.’ ” Ogangan yena yen sorọ Ellen se vwo chirakon, je vwẹroso ukẹcha rẹ Jihova.​—Une 62:5, 6.

Vwọrẹ uyota, Jihova yen djudje rẹ ako echiro ro me yovwin kparobọ. (2 Pita 3:15) Baibol na gbikun rẹ ọke sansan rẹ Jihova vwo dje uvi rẹ ako echiro phia. (Neh. 9:30; Aiz. 30:18) Kerẹ udje, die yen Jihova ruru ọke rẹ Ebraham vwọ nọ enọ kpahen Sodọm ro brorhiẹn rẹ oghwọrọ hwe? Baibol na tare nẹ Jihova vwẹ uphẹn kẹ Ebraham rọ vwọ ta ota. Ọ nabọ kerhọ kẹ enọ na eje rẹ Ebraham nọre vẹ ọdavwẹ ro rhe re. Ọ da rhoma vwanriẹn ọdavwẹ rẹ Ebraham kẹ, ro vwo djephia nẹ ọ nabọ kerhọ. O vwo ru nu, ọ da vwẹ imuẹro kẹ nẹ ọ da sa mrẹ evwata ihwe vwevunrẹ orere na, ọ rha ghwọrọ orere na-a. (Jen. 18:22-33) Jihova ghini ohwo rọ nabọ chirakon kerhọ, ọ fobọ muophu-u!

Ako echiro, ọyen ọvo usun rẹ iruemu eghanghanre ra guọnọ mie Inenikristi eje. Avwanre da nabọ davwẹngba vwo vwo uruemu nana, oma cha vwerhen Jihova rọ dia Ọsẹ rẹ avwanre rọhẹ obo odjuvwu, kẹ e ji kere avwanre ba “otu re wan oma rẹ esegbuyota kugbe erhiori reuku rẹ ive na.”​—Hib. 6:10-12.