耐心——懷住目標去忍耐
喺“最後嘅日子”，我哋面對嘅壓力越來越大，所以我哋比以往更需要表現耐心。（提摩太後書3:1-5）呢個世界好多人都冇咩耐心，佢哋專愛自己、鍾意爭辯、缺乏自制。所以，每個基督徒都應該問吓自己：“我有冇受世界影響而失去耐心？真正嘅耐心係乜嘢意思？我哋點樣做，就可以使耐心呢種特質成為自己品格嘅一部分？”
耐心係乜嘢意思？
聖經所講嘅耐心，唔係只係忍受逆境。一個效法上帝表現耐心嘅人會懷住某個目標去忍耐。佢唔係只係關心自己，亦都會顧及其他人嘅感受，包括冒犯佢嘅人。因為噉，一個有耐心嘅人就算俾人得罪，都唔會放棄改善彼此關係嘅希望。聖經列出咗好多由愛産生嘅美好特質，而首先提到嘅就係“耐心”。 *（哥林多前書13:4）上帝嘅話語亦都將“耐心”列為聖靈果實嘅其中一種特質。（加拉太書5:22,23）噉我哋可以點樣培養呢種特質？
點樣培養耐心
耶和華會通過聖靈幫助嗰啲信賴佢嘅人，所以，我哋想培養耐心呢種特質，就要祈求佢賜聖靈俾我哋。（路加福音11:13）雖然聖靈好强大，可以幫助我哋，但係我哋自己都要付出努力，採取同禱告一致嘅行動。（詩篇86:10,11）呢個意味住，我哋每日都要盡力表現耐心，使呢種特質成為我哋品格嘅一部分。不過，我哋有時都會失去耐性。仲有乜嘢可以幫助我哋？
沉思同效法耶穌嘅完美榜樣，可以幫助我哋培養耐心呢種特質。保羅所講嘅“新品格”包括耐心，佢鼓勵我哋話：“要俾基督嘅和平支配你哋嘅心”。（歌羅西書3:10,12,15）我哋噉樣做就係跟從耶穌嘅榜樣，深信耶和華會喺佢認為最適當嘅時候為我哋糾正事態。如果我哋對耶和華有信心，就唔會容許身邊所發生嘅事令自己失去耐心。（約翰福音14:27； 16:33）
我哋都好想耶和華應許嘅新世界快啲嚟到，但係我哋都要學識耐心等待。聖經話：“耶和華實現佢嘅應許並唔遲緩，唔似有啲人認為佢遲緩一樣。佢係對你哋有耐心，唔願意有一個人被毁滅，只願人人最終都悔改。”（彼得後書3:9）沉思耶和華對人類幾咁有耐心，我哋就會受到推動，努力向人表現呢種美好特質。（羅馬書2:4）我哋喺乜嘢情況下需要表現耐心？
需要表現耐心嘅情況
我哋每日都會遇到好多考驗我哋耐性嘅情況。例如，人哋講緊話嘅時候，就算我哋有話想講，可能都要表現耐心，唔好打斷對方。（雅各書1:19）如果有啲弟兄姊妹嘅行為令我哋唔舒服，我哋亦都要表現耐心。我哋最好諗吓耶和華同耶穌點樣包容我哋嘅缺點，而唔係作出過激嘅反應。佢哋唔會特登用放大鏡嚟睇我哋小小嘅缺點。相反，佢哋留意我哋嘅好品格，而且耐心等待我哋進步。（提摩太前書1:16；彼得前書3:12）
有人因為我哋講錯話或者做錯事而向我哋提出建議嘅時候，我哋嘅耐心可能就會受到考驗。我哋嘅第一反應可能係，覺得俾人冒犯同埋想為自己辯護。不過，上帝嘅話語教導我哋，應該用另一種方式去回應。經文話：“耐心嘅人勝過心高氣傲之輩。你唔好心裏急躁，輕易動怒，因為怒氣留喺愚昧人嘅懷中。”（傳道書7:8,9）所以，就算對方講得唔啱，我哋仲係要有耐心，諗清楚之後再作出回應。耶穌受到唔公正嘅控告嗰時正係實踐咗呢個原則。（馬太福音11:19）
父母教導或者糾正兒女嘅態度同行為嗰時，特别需要表現耐心。請睇吓馬蒂亞斯嘅例子。佢係斯堪的納維亞嘅伯特利家庭成員。馬蒂亞斯十幾歲嗰時，因為自己嘅信仰，成日俾同學取笑。佢父母起初唔知道呢件事，不過後來，佢哋發現馬蒂亞斯開始懷疑自己嘅信仰。馬蒂亞斯嘅爸爸伊利斯提到，佢同太太當時真係要好有耐心先至得。馬蒂亞斯會問：“上帝係邊個？聖經真係上帝嘅話語？我哋點知道上帝真係想我哋噉樣做？”佢亦都會問爸爸：“如果我信嘅同你哋唔一樣，係咪就錯呢？”
伊利斯話：“有時，阿仔會好嬲噉提出呢啲問題，其實佢針對嘅唔係媽媽同我，而係自己嘅信仰。佢覺得，如果唔係因為呢個信仰，自己就唔會有咁多煩惱。”伊利斯點樣做？佢話：“我會同阿仔一齊坐低傾吓計，有時一傾就幾個鐘。我會細心聽佢講，間中問啲問題去了解佢心入面嘅感受同睇法。有時，我會同佢分析吓啲問題，俾充足嘅時間佢諗一諗，然後再一齊討論。有時我會話，我都需要啲時間認真諗吓佢嘅觀點。我哋經常噉樣交談，過咗一段時間，馬蒂亞斯對贖價、至高統治權同埋耶和華嘅愛等聖經真理就越來越有體會。噉樣做真係需要時間，亦都唔容易，不過馬蒂亞斯就慢慢培養出愛耶和華嘅心。我同太太都覺得好開心，因為我哋表現耐心，努力幫助阿仔渡過青少年時期，最終打動咗佢嘅心。”
伊利斯同太太耐心噉引導佢哋嘅仔，亦都相信耶和華會提供幫助。伊利斯話：“我經常同馬蒂亞斯講，我哋好愛佢，經常會懇切噉為佢禱告，求耶和華幫助佢明白真理。”呢對父母好感激耶和華幫助佢哋表現耐心呢種重要特質！
基督徒照顧長期患病嘅親友嗰時，除咗喺屬靈上幫助佢哋，亦都要向佢哋表現耐心。請睇吓同樣住喺斯堪的納維亞嘅艾倫 *嘅例子。
大約8年前，艾倫嘅丈夫中咗兩次風，結果大腦機能受損。佢感受唔到，亦都唔識得表達開心、悲傷、憐憫呢啲情感。呢個對艾倫嚟講真係好唔容易。佢話：“我要表現好大嘅耐心，亦都要經常禱告。腓立比書4:13係我最鍾意嘅經文，使我得到好大嘅安慰。經文話：‘我靠住賜力量俾我嘅嗰位，凡事都能够應付。’”全靠呢種力量，艾倫得以全心信賴耶和華嘅幫助，繼續耐心噉保持忍耐。（詩篇62:5,6）
效法耶和華嘅耐心
耶和華係表現耐心嘅最高典範，我哋應該效法佢。（彼得後書3:15）聖經有好多記載都表明耶和華對人類表現極大嘅耐心。（尼希米記9:30；以賽亞書30:18）例如，當亞伯拉罕對耶和華毁滅所多瑪呢件事提出疑問嗰陣，耶和華點樣回應？值得留意嘅係，亞伯拉罕講話嘅時候，耶和華冇打斷佢，而係耐心噉聽佢提出問題，表達憂慮。耶和華用心聽完亞伯拉罕提出嘅憂慮，然後向亞伯拉罕保證，只要所多瑪有十個義人，就唔會毁滅呢座城。（創世記18:22-33）耶和華冇唔耐煩，而係耐心聆聽，真係我哋嘅好榜樣！
耐心呢種嚟自上帝嘅特質，係新品格必不可少嘅一部分，所有基督徒必需穿上呢種特質。如果我哋努力培養呢種寶貴、恆久嘅特質，我哋就可以榮耀仁慈同有耐心嘅天父，成為“憑信心同忍耐得着應許嘅人”。（希伯來書6:10-12）
