BAMBIKO gupai nga raka ima du ni kere kpakarakpakaraha rogo gi “kusa rago” re, si naida ani du na hipai kisusi gu niidu mbata. (2 Tim. 3:1-5) Ani naraka rogo gu zegino nga gu du na agu aboro rogoho nakpinyemu kina tiyo, kidu ni aguaurundika, na ni airazanga rugatise. Hipai ti agu aboro nayugo ngbatunga agi asino re te. Sidu, si naida ai Kristano sana ti ni nga: ‘Ya mo mi ima da ni gu boro adunga na hipai ya wakina agu aboro du patire? Rogo gupai yo nga kadu na hipai nga gine nzunzu? Na ginipai rengbe mi ka mangaha tipa ka sa hipai ni sino re?’

Gu fugo mangiyo sunge na ni rogo Ziazia Kekeapai yo nga hipai, si ima susa gupai gbua nga ka hi asada. Boro hipai nahipai na ndupai berãni yo, naida ka ya, ni na maabangirise nga apai nika ngbaangba. Boro hipai aberãnga kina pa tini te, ono ni naberãpa kura aboro aberã zavura agu aboro imisi ni watadu agu aboro mangi ni gbegberẽ. Mbiko gi ndupai re, ho i amanga gu boro ni du na hipai gbegberẽ watadu ho i asa ni ni ni zingi, ni nadu kindi na maabangirise nga gayo pagume nika ngbaangba. Sidu, si airiwongo ka bi gupai nga Ziazia Kekeapai moi “hipai” ni gu bambata wene sino dagba agu asino naye ti nyemuse te. * (1 Kor. 13:4) Fugo Mbori moi “hipai” a ni papara “zuzu Toro.” (Gara. 5:22, 23) Ginipai si aidaha berani tipa ka sonosa gi sino Mbori re?

Tipa ka sonosa gu sino nga ga hipai, si naida ani kpari tipa gu undo nga ga ga Yekova ziazia toro, nga gu ko afuhe fu agu aboro nakido kutiko. (Rk 11:13) Wa vura duhe vurũ nga ziazia toro na bakere ome ti ni, si naida aida ani mangipai kuti gaani akparakpee. (Tam. 86:10, 11) Si nayugo gupai nga si naida ani mangi asadatise tipa kaa yugo hipai na aˈuru dũ tipa gi sino re zi baha ngbadurani yo. Wa vura duhe wo, si naida gupai nga ani mangi ome amanga tipa ka sa hipai ni nyenye papara sinorani. Gini kurapai berewe rengbe ka undo rani?

Ani rengbe ka sonosa hipai ni wisigo ani gu rengberengbe kpiapai nga ga Yesu na kini pekefuoho. Ringbisihe kuti gu kpiapai re, gu mokedi nangia Pauro afura tipa “gu vovo boro,” nga gu nakoda “hipai,” na ko angarasi rani nga ani mbu “ga Kristo zereda si zogo [kpotorani] yo.” (Koro. 3:10, 12, 15) Ani rengbe ka mbu gu zereda re si “zogo” kpotorani yo ni wirika ani gu nyanyaki idapase Yesu adu na ni nga Mbori nika mbakada agu apai ambakada nabi rani ti Gako regbo. Ka ani apekafuo ga Yesu kpiapai, ani azanganga hipai te, ka kina gini apai vura kaa manga pa tirani vurũ.​—Yo. 14:27; 16:33.

Wa vura duhe nga ani nakpinyemu ka bi gu vovo zegino Mbori nakidohe tipaha, ani nawirika  wai kadu na hipai ho ani aberã ni kurii wai Yekova ahipai furani. Ziazia Kekeapai nakido rani nga: “Gbia narungbura nga pati gako kidohe, wa agu yo naberã pa rungbura, te; ono ko du na gbanga hipai fu roni, ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Pet. 3:9) Ho ani aberã ni kuriipa wai Yekova ahipai furani, ya mo si afõnga ngbaduraniyo ani hipai ni bakerehe fu kura aboro te? (Rom. 2:4) Na gupai re berãrani yo, gini apai si aida ani hipai rogoho?

Badungu agu apai namanga naˈuru dunduko ima rengba ka maa gaani hipai ngba asada. Ni kpiapai, ka si du nga nyanyakipa pai kina ngbaro mo aida ka pehe, mo ima rengba ka yugo hipai ni zanga mo de fugo ngba kura aboro. (Yak. 1:19) Si ima rengba ka ida mo yugu hipai a ho mo akoda tiro ni na agu akuaro nga aidipase gayo mangaapai aimisa ngbadu ro. Kuba gupai nga mo zingi ni ipo, si adu ni patatamana ka wisigo wai aYekova na Yesu amangapai kuti gaani arungbura. I amaanga berãyo tipa kina gu wiri rukutu aingahe du tirani te. Kuba gure, i nabi gaani wene asino abi na kini yugu hipai ni mbuyo regbo furani tipa ani mangi ariapai.​—1 Tim. 1:16; 1 Pet. 3:12.

Gu kurapai rengbe ka maa gaani hipai ngba asada nga ho boro aya ni wẽ ani gumba gupai watadu ani mangi gupai du ni irairaha. Dedede ho pai amanga ni wa gure, ani ima rengba kadu na gberãrago na kini idi ka rugusapai ku bara rani yo. Ono tie, Fugo Mbori naya furani ani mangipai ngba kura gene kia. Si naya: “Du ni irahipai rogo toro yo ngba ti du ni irakiisapatise rogo toro yo. Ka mo gbá nga sa zinga ya; bambiko nye zinga anye ku kpoto airamungo yo.” (Batu. 7:8, 9) Sidu, ka si vura du nga gu kitangbangase re dunduko nga ziree, si naida ani yugu hipai nibipa wai ani ka mangapai kuti ni. Si nga gupai Yesu amangihe ho aboro aakitangbanga ko ni.​—Mt. 11:19.

Si naida avunguagude yugu hipai gbe ho i aida ka rugusa gu iraira sino ni du ti awiriyo na ka undo yo i ne gbegberẽ nyemuapai. Ani makianga gu kpiapai nga ga Mattias, namangasunge rogo gu Betere nga ga Scandinavia. Ho Mattias adu ni ni sosono gude, ko ahi badungu asawiahe sukuru yo mbiko agu apai ko aidi kuti ni. Ti tonatonaha, avunguko aainongo gupai naamanga ko te. Ono i aye ka bi gupai nga ko atona kadu na kapa tipa gako aaida. Ba Mattias nga Gillis natingida gupai nga “gipai re aaida na bakere hipai.” Mattias anaasanahe nga: “Da nga Mbori? Na ka si du nga Ziazia Kekeapai nga Fugo Mbori te? Waigu ani ainoho nga Mbori du nzunzu naida gipai re watadu gupai re berani?” Ko anaasana bako a nga: “Tipagine si aida i sapungbanga re ti ni ka si du nga mi abingo apai watadu kini idi kuti apai wa mo te?”

Gillis aya, “Ti kura aregbo wirani anaafu agi asanahe re rogo zinga yo, angianga kuti nako watadu kuti re ya, ono kuti rengo, nga gu ko abihe nga si naasa raka fuko ni kpakarakpakaraha.” Waigu Gillis aundo wiriko? “Mi anaasungo na wire kini fura tipa dungu asa ti kura aregbo. Dedede mi anaadegature na kini sanako na asanahe tipa ka ino gako abipai gbiati aberãpai. Ti kura aregbo mi aanisakirogopai yo fuko na ki ya fuko ko berẽkuriihe rogo  gu uru re watadu ko berẽkuriihe mbata fu ani fura tipaha. Ti kura aregbo, mi aniya mi naida bete aˈuru tipa ka berãkurii gupai ko anigumba ha. Vurube gi fugodagbase naamanga dedede re, Mattias atona yee kaa ino gupai motumo tumorii ayugoho, na gupai nga Yekova ima kpinyemu rani na ko du na rengo beko tipa ka zoga rani. Gipai re aima dia regbo, na si aanidu ti kura aregbo ni kpakarakpakaraha, ono tooni tooni, nyemuse tipa Yekova asono ngbaduko yo. Ani na diare na ngbarago nga gaani hipai na asadatise ka undo wirani na ka zio ngbaduko yo ti gu regbo ko adu ni sosono gude aima ye na wene sangbanaha.”

AGillis na diako adu na hipai na ki undo wiriyo, i adu na gu kido nga Yekova nika undo yo aundo. Gillis aya: “Mi naape gupai fu Mattias dedede nga gaani dudunguro nyemuse tipa ko asa rani na nako ani kpari kakaka nga Yekova undongo ko aundo ko gi rogopai yo.” Agu avunguagude re na bakere ngbarago nga i adu na hipai na ka omeyo abatanga ti undo wiriyo ya!

Kupati fu gu undo nga ga toro, ndikidi aKristano nayugo gu sino nga ga hipai ho i angera ni fuo gu gayo aborokporo watadu abakureayo du na bangabanga kaza. Ani bingo gu kpiapai nga ga Ellen, * nga gu ri naraka a kina Scandinavia yo.

Agarã wa muambe kusayo, kaza azi kumbaku Ellen nga gu nagbarasi berãko. Nisangbana gipai re, gene berewe beko ka yugo agu asino nga, nunga, ngbarago watadu gberãrago te. Gipai re ima kpakara fu Ellen nikerehe. Ri aya: “Gipai re ima dia bakere hipai gbiati dungu akparakpee.” Ri agbia kurapai kuti ni nga: “Gu veresi ngbaangba tire gbe ni naafu wasa fere nga AFiripoio 4:13, nga gu naya: ‘Mi rengbe na manga apai dunduko rogo gu ko nanyakasa re.’” Mbiko gu ome nga ga Yekova na gako undohe, Ellen namangapai kuti gipai re ni hipai.​—Tam. 62:5, 6.

Rengo ngaha nga, ho daha ni ti yugo hipai, Yekova nga gu bawene boro si aida ani pekefuo gani kpiapai. (2 Pet. 3:15) Badungu apangbanga du rogo Fugo Mbori yo nayugo agu apai Mbori ayugu bakere hipai rogoho. (Nem. 9:30; Yes 30:18) Ni kpiapai, wai gu Yekova amangipai ho Abarayama afu dungu asanahe ni tipa Gako diaberã ka gbarasa Sodomo? Bambatapai nga, Yekova aadenga fugo ngba Abarayama ho ko aafura ni te. Kuba gure, Yekova ayugu hipai ni dega ko tuko kuti agu asanahe ni basasa Abarayama aasanaha gbiati gako abakabangirise. Fuo gure, Yekova aakaragapai kuti ga Abarayama abakabangirise na ki kido ko nga Ko agbarasa nga Sodomo te, ka si vura du vurũ nga ruru akumba gbua bawe du rogo gu bakporo re. (Bam. P. 18:22-33) Nga gu bawene kpiapai nga ga degatue ni hipai na ki zanga zinga!

Hipai nga nyanyakipa papara vovo borose si aida si du ti aKristano dunduko. Ka ani mangi nyanyaki asadatise tipa ka sonosa gi nyanyakipa sino re, ani nika fu taarimo fu gu Barani nga Yekova nga gu ko nangerafuo rani na kini hipai furani, na i nika geda rani ku dagba “agu yo du ni adikumbo akidohe mbiko idapase na hipai.”​—Eb. 6:10-12.