1. Timo mi ng’om maeni ma ng’atuman dieng’ ko pire gire copo bedo ku matoke ma kani iwi jwigiri mwa?

PIRANG’O ebed ebedo tek iwa nitio ku gin ma wabeponjo i Lembe pa Mungu? Thelembene acel utie nia, kara watim lembe m’atira, ubekwayu wanyuth jwigiri. I nindo maeni mi “kajik rundi,” etie yot ungo ninyutho jwigiri, pilembe dhanu ma pol ma wabekwo kugi ‘gimariri gigi, gitie jumar sente, jukulula, ju ma gidodri wi juwagi’ man “ju ma kweri gigi ngo.” (2 Tim. 3:1-3) Wa jurutic pa Mungu, wang’eyo nia eno gitie timo ma reco; re wacopo neno nia ju ma gitie ku kit timo maeno ma ng’atuman dieng’ ko pire gire, gibekwo ma ber man gitie kud anyong’a. (Zab. 37:1; 73:3) Waromo kadok nipenjara kumae: ‘Nyo pire tie tek nia atim kero niketho yeny mi jumange i wang’ para? Kan anyutho jwigiri, nyo asu dhanu biwora?’ (Lk. 9:48) Ka waweko timo mi ng’om maeni uwing wiwa, waromo nyotho mer m’i kindwa kud umego, man edoko tek ni jumange ning’eyo nia watie Jukristu. Re ka wabeng’io i lapor mi jurutic pa Yehova ma gigam ginyutho  jwigiri, man wabelubo lapor migine, wabinwang’u adwogi ma ber.

2. Lapor mi jurutic pa Mungu mi rundi ma con copo mio iwa ponji ma kani?

² Ang’o m’ugam ukonyo jurutic pa Mungu mi rundi ma con nibedo jurimbe? Gitimang’o pi ninyayu mutoro i ie? Ginwang’u tego mi timo lembe m’atira kani? Ka wabesomo lapor migi i Biblia, man wabenyamu i lembe ma wabesomone, yioyic mwa bidoko tek.

3, 4. (a) Yehova ponjowa nikadhu kud i yo ma tung’ tung’ ma kani? (b) M’uweko ng’eyong’ec, ubekwayu watim ang’o kara wabed ku yioyic ma tek?

³ Yehova ubemio iwa piny ceke ma romo konyowa nibedo ku yioyic ma tek. Wabenwang’u juk ma beco man ponji nikadhu kud i Biblia, girasoma mwa ma tung’ tung’, kusika mir Internet, Televizio mi JW, coko, man coko mwa ma dongo. Re Yesu unyutho nia nibedo ku ng’eyong’ec kende uromo ngo. Eyero kumae: “Cemo para en e timo yeny ma i ng’atu m’uora yenyo, ku daru tic pare bende.”​—Yoh. 4:34.

⁴ Timo yeny pa Mungu ubino ve cam ni Yesu. Ka wabecamu cam ma beco, wanwang’ara ma ber man camne giero kumwa; kumeno bende, ka wabetimo yeny pa Mungu, wanwang’ara ma ber, man yioyic mwa doko tek. Ku lapor, ecicopere nia nindo moko idaru cidho i coko mi lembanyong’a m’ava lembe mbe i kumi, re kinde m’idwogo kud i lembanyong’a inwang’u nia itie ku mutoro, man itie ma ber.

5. Ka wabeii nibedo ku rieko, wabinwang’u bero ma kani?

⁵ Wanyutho nia wariek ka wabetimo lembe ma Yehova ubekwayu i bang’wa. (Zab. 107:43) Tek wabeii nibedo ku rieko, wabinwang’u bero dupa. Biblia uyero nia, “gin moko mbe m’iyenyo ma copo pore kude. . . . En e yen mi kwo ni ju m’umaku kume: ku ba dhanu ceke m’ucere i bang’e en e jamutoro.” (Rie. 3:13-18) Yesu bende uwacu kumae: ‘Tek wung’eyo gin maeni, mutoro iwu tek wutimogi.’ (Yoh. 13:17) Yesu umito nyutho nia julubne gibibedo ku mutoro, tek gibemediri nitimo lembe m’ekwayu i bang’gi. I ng’eye, gitio ku ponji pare man gilubo lapor m’eweko igi i kwo migi ma kubang’ ceng’.

6. Pirang’o ubekwayu wamedara nitio ku lembe ma wabeponjo?

⁶ Tin, wan de ubekwayu wamedara nitio ku lembe ma wabeponjo. Ku lapor, kepar pi fundi moko mi mutukari kunoke mi moto, ma tie ku ng’eyong’ec man bende jamtic mi yiko piny. Ng’eyong’ec man jamtic m’etie ko copo konye nibedo fundi ma cuu, kende kende tek ebetio kugi. Copere nyo edaru timo tic maeno pi oro ma dupa, re kara ebed fundi ma cuu, ubekwayu emedere nitio ku ng’eyong’ecne. Kumeno bende, kinde ma fodi waponjo lemandha aponja, wabino ku mutoro pilembe watio ku lembe ma wasomo i Biblia. Re kara mutoro mwa urii, ubekwayu wamedara asu nitio ku lembe ma Yehova ubeponjo kowa, i kwo mwa ma kubang’ ceng’.

7. Wacikara nitimo ang’o kara wanwang’ ponji niai kud i lapor mi Biblia?

⁷ Lembe moko nuti ma copo ketho ebedo iwa tek ninyutho jwigiri. I thiwiwec maeni, wabing’eyo nia ang’o m’ukonyo jurutic pa Mungu mi rundi ma con ninyutho jwigiri. Wabineno bende ayi moko ma waromo nyutho ko jwigiri. Re kud wajik ku somo lembene asoma  kende, ento wanyam igi man wanen kite ma waromo tio ko kugi i kwo mwa.

8, 9. Tic mi Jukwenda 14:8-15 ubeponjo iwa lembang’o iwi jwigiri pa Paulo? (Nen cal mir acaki.)

⁸ Mungu ubemito dhanu mi kwonde ceke “bothi, ku bino ba ng’eyong’ec mi lemandha.” (1 Tim. 2:4) Ibed ineno dhanu ceke ma fodi giponjo ngo lemandha nenedi? Jakwenda Paulo urweyo ni Juyahudi ma nwang’u dong’ ging’eyo lembe moko iwi Yehova. Re erweyo bende ni ju ma woro mungu m’araga. Lembanyong’a ma Paulo urweyo igi uketho jwigiri pare i amulaic. Nenedi?

⁹ I wotho ma kwong’a pi tic mi misioner, Paulo giku Barnaba gicidho i adhura mi Lustra. Re dhanu mir adhurane ma weco dhu Lukaonia ginwang’u nia Paulo giku Barnaba gisagu jumange ceke, uketho gilwong’ogi ku nying’ mungu migi m’araga ma Zeu man Herme. Nyo Paulo giku Barnaba ginwang’u nia yung maeno tie ber? Nyo ginwang’u nia eno tie alokaloka ma ber mandha i ng’ei ragedo ma junyayu i kumgi i adhura ario ma gilar gibino i igi? Nyo giparu nia yung maeno biketho dhanu dupa uwinj lembanyong’a? Nyanok de ngo. Lembene utimogi rac mandha, uketho gikok kumae: “Paco, wutimo gin maeni nedi? Wan wa dhanu ma ku kum calu wun.”​—Tic. 14:8-15.

10. Pirang’o Paulo giku Barnaba ginwang’iri ngo nia gikadhu Julukaonia?

¹⁰ Kinde ma Paulo giku Barnaba giwacu nia gin de gi dhanu, gimito yero nia gitie bende ku dubo alaga, ento ungo nia ayi ma giworo ko Mungu urombo ku mi Julukaonia. I andha, Mungu re m’uoro Paulo giku Barnaba i tic mi misioner. (Tic. 13:2) M’umedo maeno, Mungu uwirogi ku tipo maleng’, man gibino ku genogen ma ber akeca mi cikwo i polo. Re kadok kumeno de, ginwang’iri ngo nia gikadhu Julukaonia. Ento ginyang’ nia ka dhanu maeno gijolo lembanyong’a, gin de gicopo nwang’u genogen mi cikwo i polo.

11. Waromo nyutho kit jwigiri pa Paulo nenedi i tic mi lembanyong’a?

¹¹ Wakenen ayi acel ma waromo nyutho ko jwigiri calu Paulo. Wabed wanwang’u ngo nyanok de nia tic mwa mi rweyo lembanyong’a, kunoke lembe mange ma Yehova ubekonyowa nitimo uketho waloyo jumange. Dong’ kepenjiri kumae: ‘Atie ku nen ma kani iwi dhanu mi teritwar para? Nyo atie kud akoyakoya i kum dhanu mi thek moko?’ I ng’om zoo, Jumulembe pa Yehova gitimo kero ninwang’u dhanu ma gitie ayika niwinjo lembanyong’a. Jumoko gitimo kero niponjo kadok dhok kunoke ning’eyo kura mi thek ma dhanu ma pol neno nia tijgi mbe. Ginwang’u ngo nia giloyo ju ma giberweyo igi lembanyong’a. Ento giii nineno ng’atuman nia pire tek; eno ketho ging’eyo kite ma gicopo konyo ko dhanu dupa kara giwinj rwonglembe mi Ker yot yot.

12. Epafra utimo ang’o pi ninyutho nia ebedieng’ akeca pi jumange?

¹² Yo mange ma wanyutho ko jwigiri utie nirwo pir umego ku nyimego mwa ma gidaru “nwang’u yioyic ma calacel ma pire tek karacelo kudwa.” (2 Pet. 1:1) Epafra ubed utimo tap kumeno. Biblia uweco pire wang’ adek kende. I barua ma jakwenda Paulo ukiewo ni Jukristu mi Kolosai kinde m’ebino i kol  i Roma, eyero nia Epafra ‘ubeii aiia thiri thiri pigi i rwo pare.’ (Kol. 4:12) Epafra ung’eyo umego cuu dit man ebed edieng’ akeca pigi. Paulo ulwong’e nia “jakol wada,” pilembe en de ebino nwang’ere ku ragedo. (Flm 23) Re asu ebed edieng’ pi yeny mi jumange, man etimo lembe moko pi nikonyogi. Epafra ubed urwo pir umego ku nyimego. Wan de wacopo timo ve en, man wacopo lwong’o kadok nying’ umego i rwo mwa. Rwo ma kumeno copo bedo ku matoke ma ber akeca.​—2 Kor. 1:11; Yak. 5:16.

13. Kinde m’iberwo, icopo lubo lapor pa Epafra nenedi?

¹³ Kepar pi ng’atu moko m’icopo rwo pire ku nyinge. Ecopo bedo jurimbi mi cokiri kunoke wedi peri ma gibenwang’iri ku peko. Saa moko nyo ubekwayu gimak yub ma dongo, kunoke ubekwayu giceriri ni abidhe moko. M’umedo maeno, icopo rwo pir umego ma nying’gi nwang’ere i jw.org, i the thiwiwec “Jumulembe pa Yehova ma jutwio pi yioyic migi.” (Yab thiwiwec ODLEMBANG’EYA > LEMB KESI.) Icopo rwo bende pi ju ma wedi migi tho, ju ma giai gikadhu kud i peko ma wok rek kunoke kud i lwiny, man ju ma gini can sente. Umego ku nyimego dupa gitie ku yeny mi rwo mwa. Ka waberwo pigi, nwang’u wabedieng’ pi yeny mwa kende ngo, ento pi yeny mi jumange bende. (Flp. 2:4) Yehova winjo rwo ma kumeno.

14. Yehova nyutho nenedi nia ewinjo jumange cuu mandha?

¹⁴ Yo mange ma wanyutho ko jwigiri utie niwinjo jumange cuu. Yakobo 1:19 uyero nia “ng’atuman ubed m’ewinjo pio.” Yehova winjo jumange cuu mandha. (Tha. 18:32; Yoc. 10:14) Ku lapor, kenen wec ma nwang’ere i Ai 32:11-14. (Som.) Kadok nwang’u Yehova ubino mbe ku yeny mi paru pa Musa de, re ewinjo Musa nitundo ekoro lembe ceke m’ebino paru. Nyo ibiciro niwinjo ng’atu moko ma i wang’e ular uwodho paru ma vii, man ibitio ku paru m’ebemio iri? Yehova winjo kilili, rwo mi dhanu ceke ma gibekwaye ku yioyic.

15. Calu Yehova, wacopo mio yung ni jumange nenedi?

¹⁵ Kepenjiri kumae: ‘Ka fodi Yehova ngi de jwigere man ewinjo dhanu calu m’egam ewinjo ko Abraham, Rahel, Musa, Yocuwa, Manoa, Elia, man Hezekia, nyo an ke acikara ngo nitimo kumeno? Nyo acopo winjo paru mir umego para ceke pi ninyutho igi yung, man nyo acopo lubo paru migine kan ucopere? Nyo ng’atu moko tie i cokiri kunoke i kind wedi para m’acopo dieng’ pire nisagu? Acopo konye nenedi?’​—Tha. 30:6; Pok. 13:9; 1 Ub. 17:22; 2 Kei. 30:20.

16. Daudi utimo ang’o kinde ma Cimei uyanye?

¹⁶ Jwigiri konyowa bende nikwerara giwa kinde ma jumange ubetimowa rac. (Ef. 4:2) Lapor ma cuu mi lembe maeno nwang’ere i 2 Samwil 16:5-13. (Som.) Nindo moko, Cimei ma tie wat p’Ubimo Saul ucaku yanyu Daudi, man enyayu ali i wie ku jurutic pare. Nwang’u Daudi copo kwero Cimei, ento etwio cwinye man eciro ayany pa Cimei ceke. Ang’o m’ukonyo Daudi ninyutho kwerigijo ma rukeno? Wacopo nyang’ i lembe m’ukonye, ka wabeng’io i Zaburi mir adek.

17. Ang’o m’ukonyo Daudi ninyutho kwerigijo, man wacopo lubo lapor pare nenedi?

 ¹⁷ Daudi ukiewo Zaburi mir adek i saa ma Absalom ma wode umito nege. Kud i kind saa maeno re ma Cimei ucaku roko Daudi, ento Daudi utundo nikwio kume. Ang’o m’ukonye? I Zaburi 3:4, eyero kumae: “Alwong’o Yehova ku dwanda, man edwoko ira lembe kud i got pare ma leng’.” Saa ma dhanu mange ubetimowa rac, wacikara nirwo calu Daudi utimo. E Yehova bimio iwa tipo pare maleng’ kara watund niciro. Nyo icopo kweriri giri nisagu, kunoke nitimo kisa kinde ma jubetimi rac? Nyo iyio andhandha nia Yehova ubeneno masendi peri man nia ebikonyi, man ebimio iri mugisa?

18. Ka wabetio ku telowic pa Yehova, bero ang’o ma wabinwang’u?

¹⁸ Ka wabetimo lembe m’atira, wabibedo riek, man Yehova bimio iwa mugisa. I Lembrieko 4:7, Biblia uyero kumae: “Rieko en e gin m’usagu.” Kadok nwang’u rieko ujengere iwi ng’eyong’ec de, re ejik ungo kende kende i ng’eyo lembe. Ento enen asagane nikadhu kud i yub ma wabemaku. Kadok ukok de ginyutho nia giriek: gicoko cam ma gidok gicamu i kind nindo ma ng’ico umondo i ie. (Rie. 30:24, 25) Kristu ma Biblia ulwong’e nia “rieko pa Mungu” timo kwa lembe ma foyo i Won. (1 Kor. 1:24; Yoh. 8:29) Ka wabejwigara man wabenyutho nia wariek nikadhu kud i yub ma wabemaku pi timo lembe m’atira, Mungu bimio iwa mugisa. (Som Matayo 7:21-23.) Pieno, tim kero ninyutho jwigiri ma lee kara jumange mi cokiri bende gimediri nitimo ni Yehova ku jwigiri. Pi nitio ku lembe ma wang’eyo nia tie atira, ubekwayu nindo man saa ma lee. Re ka wabetimo kumeno, nwang’u wabenyutho jwigiri; eno ke bimio iwa mutoro kawoni man nja ku nja.