1. O misatekeday harateng no hekal, wa samaan mifiyor kitaanan hani?

MISAKA DADEMAK kita to Kimad no Kawas, hano o sapalifet konini? O cecay lalangian i, ano matatodong ko demak no tamdaw, misaaliay to misapoeneray a capeling, kawra sapaihkalaw to misapoeneray, cowa ko madoloay. Itini ‘saikoray romiˈad’, i taliyokay ita a tamdaw paihkalay to “o mamalamisatekeday ko tamdaw, o maˈanofay to payso, o pasenengay, o misatakaraway ko falocoˈ. . . [cowa pakaˈmet to tireng],” mahaenay tatiihay a harateng. (2 Timoti 3:1-3) Matenakay ko safanaˈato miowingay ko tamdaw to misatekeday a waywayan, o papotal no Krisciyang cowa pihai to hatiniay waywayan alatek, kawra i falocoˈmasemeray cangraanan. (ˈOlic 37:1; 73:3) Wasaan ko harateng no cecay tamdaw alatek: “Isalakat miharateng to sakangaˈay no tao, o masakalimlaan han? Ano mahaen ‘o sasafaay’ ko demak ako, wa mikangodo ko tao takowanan han?” (Luka 9:48) Ano mafiyor no misatekeday harateng no hekal kita i, wa mipalak to kalalaˈed ita to salikaka ato saaroˈan ita malo Krisciyang alatek. Kawra, ano micekiw kita to ngaˈayay taˈarawan no madimadiay sikawdan i Fangcalay Cudad, ato mitodong cangranan, wa milifok to sapalemed no Kawas.

2. Minanam to taˈarawan no madimadiay sikawdan no Kawas, wa samaan ko pilingat kitaanan hani?

 ² Ano ciharateng kita malo taˈarawan ko cecay madimadiay sikawdan, kalimlaan ko saka cipinangaw to midemakay cingra to maanan ato milifokay to maanan ngaˈayay minaroˈan. Oniya madimadiay sikawdan samaanay malo widang no Kawas, samaanay malo kahemekan no Kawas, samaanay milifok to sadama a midoedo to araaw no Kawas. Mihaen ko picalep a micekiw, wa padama kitaanan tanektek ko pakasoˈlinay falocoˈ.

3, 4. (1) Mikicowa kita milayap to noˈadingoan a sapasifanaˈhani? (2) O noˈadingoan a kakaenen hano cowa ko picada aca to sifanaˈhani?

³ Mikitini kita i Fangcalay Cudad, mitepangan cudad, wangcan no Misawacayay Tamdaw ni Yihofa, kamok no JW Tilifi, saˈopo, taykay malifokay ko adihayay a limoˈot ato sapasifanaˈ. Kawraan, noˈadingoan a kakaenen cowa ko picada aca to sifanaˈ, itini Yohani 4:34, sanay ko sowal ni Yis: “O nipidoedo to [araaw] no miocoray i takowanan ato nipilaheci to tayal Ningra ko malo kakaenen ako.”

⁴ Pakaynien ci Yisan ko sowal, noˈadingoan kakaenen mahawpay ko pidoedo to araaw no Kawas. Mahecad o kakomaen to dafong ngaˈayay marenec ato milifok to haled, midoedo to araaw no Kawas wa ngaˈay paˈicel kitaanan, matongal ko pakasoˈlin to tahadaˈoc maˈorip a hatokel. Soˈlin malotay ko roma tamdaw, kamayan mirienang to ˈayaw no mitosilay a saˈopo, mahererek cangra mitosil​—patikolay fanekfek ko harateng, na iraay ko mahaenay malifetay iso han?

5. Paihkal to taneng mamalifok ko maanan haepoc hani?

⁵ O citanengay tamdaw misaka dademakay to sapasifanaˈno Kawas. (ˈOlic 107:43) Pairaay to taˈangayay epoc ko taneng, o sasaˈicelen ita a micangacang. Sowal no Fangcalay Cudad, o kihcod kaolahan no tamdaw awaay ko pakaliniay to taneng, samanen “o citanengay a tamdaw i, mafanaˈto soˈlinay a tatodong no ˈorip ningra . . . O citanengayto, o mafanaˈayto a tamdaw i, o malemeday.” (Taneng 3:13-18) Somowalay ci Yis: “Mafanaˈkamo tonini a demak. Saka, ano milaheci kamo tonini i, o malemeday kamo.” (Yohani 13:17) Ano padadotoc ko nisawawaan ni Yis mitoor to sapasifanaˈningra a midemak, wa milifok to tahaceremay a lipahak, wa padotoc cangra midoedo to sapasifanaˈni Yis, halo mitodong to taˈarawan ningra.

6. Pisaka dademak to kimad no Fangcalay Cudad, hano o kalimlaan ko padadotocay hani? Tinakoen.

⁶ Anini, padadotoc a misaka dademak to kimad no Fangcalay Cudad tada o kalimlaan. Haratengen hena, o cecay inanengay to kikay a tamdaw iraay ko sapisangaˈa lalosidan, lalakaw, sifanaˈ, kawra saka dademaken ningra ko lalosidan ato inaneng ngaˈ, ano eca i, awa ko malaˈosiay a demak. Alatek adihayay ko milifetan ningra a misangaˈ, kawra wa micerid cingra mihatatanam ngaˈkamayan mananam to inaneng, mihaen wa ira ko ngaˈayay minaroˈan no demak. Mahecaday, saka dademaken ita ko mananamay a kimad isalakat, wa ira ko ngaˈayay minaroˈan a lipahak, kawra ano sakairaaw no tahaceremay a lipahak, wa misapoener to falocoˈto romiˈamiˈad mitoor to sapasifanaˈni Yihofa a maˈorip.

7. Maherek kita minanam to Fangcalay Cudad i, sasamaan ko hademak hani?

⁷ Dotoc wa minengneng kita, o maanan pakayraan pasangaray paihkal to misapoeneray falocoˈ, o litengan a madimadiay sikawdan, samaanay misiˈayaw tohatiniay a pakayraan. Sapaˈicelaw kita i noˈadingoan, cowa ko kalimlaan aca no lalakaw ko sinanoten, o mamiharateng to sasamaan misaka dademak toniya kalimlaan, halo tangsolen a misaka dademak.

8, 9. Mikitini maˈoningay i Dmak 14:8-15, wa samaan kita mihapinang to misapoeneray a capeling ni Pawlo hani? (Nengnengen ko satapangan coka.)

⁸ O araaw no Kawas “mangalay to sakafanaˈaw no polong no tamdaw to soˈlinay a [kimad]. Ta mapaˈorip Ningra cangra.” (1 Timoti 2:4) Mihaenay, pakayra i cowaho pinanam to soˈlinay kimad a tamdaw, samaanay ko pinengneng iso hani? O tarokos ci Pawlo itini sefi no Yutaya, soˈlin padamaay to mimingay ko kafanaˈto Kawas a tamdaw, kawra cowa ko Yutaya aca a tamdaw ko padamaan ningra. Padamaan ni Pawlo ko midokoay to makaniway kawas a tamdaw, kawra o pakayraan nangra micada ci Pawloan, pasangaray cingra a mitafo to misapoeneray falocoˈ. Misamaanay hani?

⁹ Sakinacecay ni Pawlo miliwko a mitosil, o mitaypiyaway ci Pawlo aci Parnapas to makaniway kawas ci Cius aci Hirmis, sanay ko pinengneng no Likaoniya a tamdaw, palo tadamaanay a tamdaw ko picada cangranan. Ci Pawlo aci Parnapas makalimay sapicadaaw to kaolah no tamdaw hokira? Itini iˈayaway milisoˈan nangra a niyaroˈtahacadaay to sapalak, harateng nangra o ngaˈayay a toki misaidahidahi sanay han? Anca ngaˈayay saka dademaken koniya kacingangan a toki, patenak to ngaˈayay lihaf sanay han? Cowa ka pihaen ko harateng nangra! Tangsolay ci Pawlo aci Parnapas paihkal to cowa pihai cangra to harateng no ˈalomanay, micicih han nangra ko rikoˈ, tayra ilalomaˈno tamdamdaw, taˈangay ko piowaw: “Nawiro matini ko demak namo saw? Malecadayto kita ao tamdaw, [malecad tamowanan malonay].”​—Dmak 14:8-15.

10. Ci Pawlo aci Parnapas hano pasowal to mahecaday ko niyah to Likaoniya tamdaw hani?

¹⁰ Sowal ni Pawlo aci Parnapas ‘mahecaday’ cangra to Likaoniya tamdaw, o mitoroˈan cowa ko mahecaday ko pihakelongan, o mahecaday ko niyah to Likaoniya tamdaw cowa ko malefotay. Ci Pawlo aci Parnapas o mikiriwiˈan a mipiliˈto tatalacowacowa pala a mitosil. (Dmak 13:2) O mapasimalay no fangcalay saocor cangra, hanaca iraay ko tatodong tayra i kakarayan mala hongti. Kawra, mafanaˈay ci Pawlo aci Parnapas, ano makahi ko Likaoniya tamdaw micada to ngaˈayay lihaf, wa ira ko mahecaday a hatokel.

11. Ano mitosil kita i, sasamaan mitodong to misapoeneray ni Pawlo hani?

¹¹ Wa samaan kita a mitodong to misapoeneray a taˈarawan ni Pawlo aci Parnapas hani? Isalakat, laliyasen ita ko sapipatakalaw no tamdaw a harateng, samanen mitadiˈecay kita to sadama ni Yihofa ngaˈmalaˈosiay ko tayal Ningra. Haharatengen ita samaanay ko pinengneng no niyah to mitosilan a tamdaw. Wa mahecad kita to i kilacay a tamdaw, misakakinih ko pinengneng to romaroma finacadan han? Masaka hemekan i, ano milimasmas ko icowacowaay pala a Misawacayay Tamdaw ni Yihofa to mitosilay i, miharatengay to icowaay a tamdaw, cowaho ka tahatengil to ngaˈayay lihaf. Sapadamaaw to tamdaw mafanaˈto ngaˈayay lihaf, o roma salikaka minanamay to sowal ato nanaman no cecay finacadan, soˈlin oniya finacadan cowa ka saaretengen no tamdaw, kamayan mihaen ko demak nangra. Ano mitosil ko Misawacayay Tamdaw ni Yihofa to hatiniay a tamdaw i, cowa pisatakaraw to niyah, misaˈicelay a cipinang cangranan, padama cangranan minanam to soˈlinay kimad.

12. Samaanay ci Ipafras eca pisateked a ciharateng to salikaka hani?

¹² Wa ngaˈayho kita samaan misapoener to falocoˈa mitengil to sapasifanaˈno Kawas hani? Patado mitolon to ‘mahecaday kitaanan milifok toniya pitooran a tamdaw.’ (2 Pitiro 1:1) O ngaˈayay taˈarawan ci Ipafras. Kina toloay ko Fangcalay Cudad milengo cingranan, masadakay i tikami ni Pawlo. Tiya mapalit ci Pawlo i Loma, itini  sapatikami ningra to Kolosay kasakopang masowalay ci Ipafras ‘marariday malalok a patado to salikaka a mitolon’. (Kolosay 4:12) Cipinangay ato ciharatengay ci Ipafras to salikaka. Mapalit ci Pawlo kalacafayay cingranan, kawra kamayan a misinanot to saali no salikaka i noˈadingoan. (Filimon 23) Soˈliˈlinay a ciharateng cingra to salikaka, paihkal to cowa pisateked a harateng. Patado kita to roma salikaka a mitolon iraay ko epoc, mangalef ano ihkalen ita a misadak ko ngangan nangra.—2 Korinto 1:11; Yakop 5:16.

13. Ano mitolon kita samaanen mitodong to taˈarawan ni Ipafras hani?

¹³ Itini satolon wa ngaˈay hadaken iso ko ngangan no nima hani? Mahecad ci Ipafrasan, ˈalomanay Krisciyang patadoay to salikaka a mitolon, o roma patadoay to tahapadesay a paro no lomaˈmitolon, o roma patadoay to tahasiˈayaway to sakayhid, anca mamisaˈosi to kalimlaan demak a tamdaw mitolon, mitolon ko roma tamdaw milengoay to masowalay i jw.org a wangcan “Pakayniay Pihakelongan ko Sakapalit no Misawacayay Tamdaw ni Yihofa” a salikaka. (Piliˈen ko SINPONG > MAAEKO TO HOLIC.) Ano mitolon kita ngaˈayay haratengen ko mapatayay ko salawina a tamdaw, tahalifaay to lalood anca pasangaray ko sakaˈorip a tamdaw. Soˈlinay, ˈalomanay salikaka misaaliay to patado ita cangranan a mitolon, wa mikitini cangra i hatiniay satolon milifok to haepoc. Patado kita to salikaka a mitolon, paihkalay to ciharatengay to tao, cowa ko niyah aca a sakangaˈay ko miharatengan. (Filipi 2:4) Wa tengilen ni Yihofa ko pipatado ita to tao a satolon.

14. Pakayni ‘misongilaˈa mitengil’, patirengay ci Yihofa to maanan mikiriwiˈay a taˈarawan hani?

¹⁴ Makahi kita misongilaˈmitengil to sowal no tao, o paihkalay to misapoeneray a pakayraan. Yakop 1:19 sanay ko sowal, ‘misongilaˈa mitengil’ kita, ci Yihofa patirengay to mikiriwiˈay a taˈarawan no mita. (Satapangan 18:32; Yosuwa 10:14) Haratengen ita mikitini Kasadakan 32:11-14, (ˈOsien.) wa mananam ko maanan. Toniya maˈoningay, soˈlin cowa pisaali ci Yihofa to sapaini ni Mosi, kawra papisadakan Ningra ci Mosi to maharatengay no niyah. Haratengen hena, ano namararaway ko cecay tamdaw, cowa ko mamakahi ko tao mitengil to harateng ningra, halo mitoor to harateng ningra a midemak alatek. Kawra mihadidiay ci Yihofa a mitengil to picangacang no madimadiay sikawdan Ningra.

15. Wa samaan kita a mitodong ci Yihofaan a mikangodo to tao hani?

¹⁵ Ngaˈay licayen ita ko niyah: “Ci Yihofa makahiay micawmaˈto sasafaay a tamdaw, mitengil to harateng nangra, matiya o picada Ningra ci Aprahaman, Mosi, Yosuwa, Manowa, Iliya, Hicikiya. Ano hatiraay i, coko mamangalef ko pikangodo ako to salikaka, mitengil to sapaini nangra, anca mitoor to harateng nangra a midemak han? Itini kasakopang anca paro no lomaˈ, iraay ko misaaliay to sadama ako a tamdaw han? Wa midemak kako to maanan hani? Wa misamaan ko demak ako hani?’—Satapangan 30:6; Kakitaan 13:9; 1 Hongti 17:22; 2 Rayray 30:20.

16. Tiya pakangolawen ci Tafiti i, samaanay ko harateng ningra hani?

¹⁶ Ano mapakangolaw kita i, o misapoeneray capeling wa ngaˈay padama kitaanan pakaˈmet to tireng. (Ifiso 4:2) Itini saka 2 Samuil 16:5-13, (ˈOsien.) iraay ko ngaˈayay a tinakoan. Kinacecayay, ci Tafiti ato sikawdan ningra tahacadaay to sacoˈay no salawina ni Sawlo ci Simi. Soˈlin iraay ko ˈicel ni Tafiti a miconged to waywayan no tao, kawra mihadidiay cingra. Hano ngaˈay ci Tafiti pakaˈmet to falocoˈno niyah hani? Mikitini i ˈOlic saka 3 fedengan wa ngaˈay mahela ita ko sapacaˈof.

17. (1) Hano ngaˈay ci Tafiti pakaˈmet to falocoˈno niyah hani? (2) Samaan kita mitodong ci Tafitian hani?

¹⁷ Tooren ko lalangian no ˈOlic saka 3 fedengan,  oniya ˈOlic itiniay ‘piliyas ni Tafiti to wawa ci Apsaloman’ a tiliden. O misowalan no ˈOlic 3:1, 2 sinael oyaan matiliday i saka 16 fedengan no saka 2 Samuil a demak. Itini ˈOlic 3:4 somowalay to pakasoˈlin no falocoˈni Tafiti, sanay ko sinael: “Pasayra kako [ci Yihofaan] a milongoc to pipadama Ningra i, pacaˈof Cingra i takowanan nai fangcalay a lotok Ningra.” Ano tahacada kita to saˈodis i, wa ngaˈay mitolon, o pakayraan ni Yihofa pacaˈof kitaanan i, o papafeli to fangcalay saocor kitaanan, padama kitaanan a mihadidi. Ngaˈay haratengen iso itini masamaanay pakayraan, papaihkal ko niyah to pakaˈmetay, anca misodod to tatiihay a picada no tamdaw. Wa pakasoˈlin kiso ano maˈaraw ni Yihofa ko malifaay iso wa makahi palemed tisowanan han?

18. Ano padadotoc kita misaka dademak to soˈlinay kimad no Fangcalay Cudad wa milifok to maanan a haepoc hani?

¹⁸ Saka dademaken ita ko mananamay a soˈlinay kimad, papalemeden ni Yihofa kita. Itini Taneng 4:7 sanay ko sowal: ‘Sakakaay ko taneng.’ O sifanaˈko kola no taneng, kawra o taneng milingatay to misaˈosian no mita. Sowal no Fangcalay Cudad citanengay ko kakonah sanay, samanen mafanaˈay cara itini i kaciherangan, mihoped to kakaenen. (Taneng 30:24, 25) ‘O taneng no Kawas’ ci Kristo, samanen sahtoay o kahemekan no Wama ko midemakan ningra. (1 Korinto 1:24; Yohani 8:29) Mitafo kita to misapoeneray ato misaka dademak to mananamay a soˈlinay kimad, o papalifonen no Kawas kita. (ˈOsien ko Matay 7:21-23.) Mihaenay, wa misaˈicel kita palo pisapoeneran no tamdamdaw a mihodop ci Yihofaan a kitiraan ko kasakopang. Ano sapi saka dademakaw to mananamay ita i, misaaliay to toki ato mihadidiay, kawra ano makahi kita mihaen to demak, paihkalay to iraay ko misapoeneray a capeling no niyah, hanaca o misapoeneray ko falocoˈa tamdaw aninito noikorto, mamilifok to sapalemed.