1. Ano an puwedeng magin epekto sa satong kapakumbabaan kan pagkamakasadiri kan kinaban?

TAANO ta bakong pasil na iaplikar an satong mga nanunudan sa Tataramon nin Diyos? An sarong dahilan iyo na kaipuhan nin kapakumbabaan tanganing magibo an tama, asin may mga nagpapaluya sa satong kakayahan na magdanay na mapakumbaba. Sa “huring mga aldaw” na ini, dakul na tawo an “interesado na sana sa sadiri nindang kapakanan, mamumuton sa kuwarta, mahambog, mapalangkaw,” asin “daing pagpupugol sa sadiri.” (2 Tim. 3:1-3) Pag an sarong makasadiring paggawi ibinabareta asin inuumaw pa ngani, tibaad ikauyam na marhay iyan nin sarong lingkod nin Diyos pero tibaad mauri siya sa marahay na mga resulta kaiyan. (Sal. 37:1; 73:3) Posible pa nganing maghapot an saro: ‘May pakinabang daw an pag-inot ko sa kapakanan kan iba kisa sa kapakanan ko? Kun magawi ako bilang “pinakahababa,” mawawara daw an respeto sa sako kan mga tawo?’ (Luc. 9:48) Kun mapaimpluwensiya kita sa pagkamakasadiri kan kinaban, puwede ining makaraot sa mamumuton na relasyon sa laog kan kongregasyon asin sa satong midbidan bilang Kristiyano. Alagad kun sisiyasaton niyato asin aarugon an marahay na mga halimbawa sa Bibliya, mag-aako kita nin balos.

2. Ano an magigin epekto sa sato kun sisiyasaton ta an dapit sa maimbod na mga lingkod nin Diyos?

 ² Tanganing magin arugan ta an maimbod na mga lingkod nin Diyos, kaipuhan niyatong siyasaton an dapit sa mga ginibo ninda na marahay an nagin mga resulta. Paano sinda nagin amigo nin Diyos, nagkamit kan saiyang pag-uyon, asin nagkaigwa nin kusog tanganing maisagibo an saiyang kabutan? An siring na pagsiyasat mahalagang marhay na kabtang kan pagkakan niyato nin espirituwal na mga kakanon.

3, 4. (a) Paano kita nag-aako nin espirituwal na pagtutukdo? (b) Taano ta masasabi niyato na urog pa sa basta pagkua nin kaaraman an kalabot sa espirituwal na kakanon?

³ Nag-aako kita nin dakul na marahay na sadol asin pagsasanay paagi sa Bibliya, sa satong mga publikasyon, sa satong mga website, JW Broadcasting, asin sa satong mga pagtiripon saka mga asembleya. Pero sigun sa sinabi ni Jesus sa Juan 4:34, urog pa sa basta sana pagkua nin kaaraman an kalabot sa espirituwal na kakanon. Ano pa an kaipuhan? Sinabi ni Jesus: “An sakuyang kakanon iyo na gibuhon an kabutan niya na nagsugo sa sako asin na tapuson an saiyang gibuhon.”

⁴ Para ki Jesus, kalabot sa espirituwal na kakanon an pagsunod sa paggiya nin Diyos. Sa anong paagi ini nakakaagid sa kakanon? Kun paanong an satong hawak napapaniguan asin natatawan nin sustansiya pag nagkakakan kita nin masiram asin masustansiyang mga kakanon, napapakusog man an satong buot asin pagtubod sa buhay na daing katapusan pag nakikikabtang kita sa pagsagibo kan kabutan nin Diyos. Pirang beses mo nang naeksperyensiyahan na kan pasiring ka pa lang sa pagtiripon bago magluwas sa langtad, bakong marahay su pagmati mo, pero pagkatapos maghulit maginhawa na an pagmati mo asin may panibago ka nang kusog?

5. Ano an pakinabang kan pagigin madunong?

⁵ An pagsunod sa mga instruksiyon nin Diyos iyo mismo an buot sabihon nin kadunungan. (Sal. 107:43) An pagmamaigot na magin madunong sulit nanggad huli sa pakinabang kaiyan. ‘An ano man na saimong mawuton dai makakapantay diyan. An kadunungan sarong kahoy nin buhay para sa mga nangangapot [diyan]; an mga higot na nangangapot [diyan] aapudon na maugma.’ (Tal. 3:13-18, BPV *) Sinabi ni Jesus: “Kun aram nindo an mga bagay na ini, maugma kamo kun ginigibo nindo iyan.” (Juan 13:17) Magdadanay na maugma an mga disipulo kun padagos nindang gigibuhon an mga instruksiyon sa sainda ni Jesus. Bako sana sa pagkakataon na iyan sinunod kan mga disipulo an mga katukduan asin halimbawa ni Jesus. Iyan an nagin paagi nin pamumuhay ninda.

6. Taano ta dapat kitang padagos na magpahiling nin kadunungan?

⁶ An padagos na paggibo kan aram niyatong tama importanteng marhay pa man giraray ngunyan. Halimbawa, an sarong mekaniko igwa nin mga kagamitan, materyales, asin kaaraman. Pero dai siya makikinabang sa mga iyan kun dai niya iyan gagamiton. Kun kaidto pa nagmemekaniko na siya asin nagin eksperyensiyado, kaipuhan niyang padagos na iaplikar an saiyang mga nanudan tanganing magdanay na mahusay asin produktibo. Kaagid kaiyan, ngunyan na inako ta na an katotoohan nakikinabang na kita sa pag-aplikar niyato kan mga nanunudan ta sa Bibliya. Alagad makakamtan ta sana an nagdadanay na kaugmahan kun magigin mapakumbaba kita asin mamumuhay kauyon kan mga instruksiyon ni Jehova aroaldaw.

7. Tanganing mapauswag an satong kadunungan, ano an dapat niyatong gibuhon dapit sa pag-uulayan tang mga halimbawa sa Bibliya?

⁷ Pag-ulayan ta an nagkapirang sitwasyon na diyan puwedeng mabalo an satong kapakumbabaan asin hilingon ta kun paano inatubang kan maimbod na mga lingkod kan suanoy an mga sitwasyon na kaagid kaiyan. Tanganing magin makusog  sa espirituwal, bako sanang pagbasa nin impormasyon an kaipuhan niyatong gibuhon. Kaya pag-isipan kun paano mo puwedeng iaplikar sa saimong buhay an kada saro sa mga puntong tutukaron, dangan gibuhon iyan tulos.

8, 9. Ano an ipinapahiling kan pangyayari na nasa Gibo 14:8-15 dapit sa kapakumbabaan ni Pablo? (Hilingon an ritrato sa kapinunan kan artikulo.)

⁸ Kabutan nin Diyos na “an gabos na klase nin tawo maligtas asin makaabot sa tamang kaaraman mapadapit sa katotoohan.” (1 Tim. 2:4) Ano an paghiling mo sa manlain-lain na klase nin tawo na dai pa nakakaaram kan katotoohan? Hinanap ni apostol Pablo sa mga sinagoga an mga tawo na may aram na dapit sa Diyos, pero bako lang siya sa mga Judio naghanap. Mababalo kan reaksiyon kan mga tawong nagsasamba sa ibang mga diyos an saiyang kapakumbabaan.

⁹ Halimbawa, sa inot na pagbiyahe ni Pablo bilang misyonero, namaluan kan mga taga Licaonia na siya saka si Bernabe mga superhero—na sinda daa an palsong mga diyos na si Zeus asin Hermes na nagpakangtawo. Naisip daw ni Pablo asin Bernabe na sakayan na sana an grabeng atensiyon na ini? Inisip daw ninda na pagkakataon na ini para makahingalo sinda sa gabos na persekusyon na inagihan ninda sa huring duwang siyudad na dinumanan ninda? Inisip daw ninda na an kasikatan na iyan makakatabang na mapalakop an maugmang bareta? Dai nanggad! Nagsayuma tulos sinda paagi sa paggisi kan saindang bado, pagdalagan sa tahaw kan mga tawo, asin pagkurahaw na sinasabi: “Ano ta ginigibo nindo an mga bagay na ini? Mga tawo man kami na may mga kaluyahan kapareho nindo.”—Gibo 14:8-15.

10. Sa anong paagi masasabi ni Pablo asin Bernabe na kapantay sinda kan mga taga Licaonia?

¹⁰ Kan sabihon ni Pablo asin Bernabe na bako man sindang perpekto, dai man ninda sinasabi na an pagsamba ninda mayong pagkakaiba sa pagsamba kan mga paganong idto. Bako daw na sindang duwa mga misyonero na isinugo nin Diyos? (Gibo 13:2) Bakong linahidan sinda kan banal na espiritu asin igwa nin mamuraway na paglaom? Iyo, pero aram ni Pablo asin Bernabe na kun aakuon kan mga taga Licaonia an maugmang bareta, puwede man nindang makamtan an mga pribilehiyong iyan.

11. Pag naghuhulit, paano niyato maaarog an marahayon na halimbawa nin kapakumbabaan ni Pablo?

¹¹ Paano niyato maaarog an marahayon na halimbawa nin kapakumbabaan ni Pablo? Inot, dapat tang labanan an tendensiya na mawuton asin akuon an labi-labing paghanga kan iba huli sa mga nagibo ta sa tabang ni Jehova. Marahay na ihapot niyato sa satong sadiri: ‘Ano an paghiling ko sa mga tawong hinuhulitan ko? Posible daw na dai ko naririsa nagpapalain-lain palan ako sa partikular na mga tawo arog kan komun na kaisipan sa lugar mi?’ Angay nanggad na komendaran an mga Saksi ni Jehova sa bilog na kinaban huling padagos nindang hinahanap sa saindang teritoryo an mga tawong tibaad magdangog sa maugmang bareta. Kun minsan tanganing magibo iyan, kaipuhan nindang pag-adalan an lengguwahe asin kultura kan mga tawo na binabaliwala kan komunidad sa pangkagabsan. Pero dai nanggad dapat isipon kan mga Saksing naghuhulit sa siring na mga indibidwal na mas nakakalabi sinda sa mga ini. Imbes, hinihinguwa nindang masabutan an sitwasyon kan lambang indibidwal tanganing maabot kan mensahe kan Kahadian an saiyang puso.

12. Paano ipinahiling ni Epafras an saiyang bakong makasadiring pagmakulog sa iba?

¹² An saro pang paagi na ipinapahiling niyato na mapakumbaba tang sinusunod an paggiya nin Diyos iyo an pagpamibi para sa mga “nag-ako [na] nin pagtubod na kasinghalaga kan [satuyang] pagtubod.” (2 Ped. 1:1) Ginibo iyan ni Epafras. Sa Bibliya tulong beses lang siyang nasambitan—gabos sa ipinasabong na mga surat ni Pablo. Mantang nakapreso sa harong sa Roma, isinurat ni Pablo sa mga Kristiyano sa Colosas na  si Epafras ‘pirming udok na namimibi para sa sainda.’ (Col. 4:12) Midbid na marhay ni Epafras an mga tugang asin udok siyang nagmamakulog sa sainda. ‘Kapwa siya bilanggo’ ni Pablo pero dai iyan nagin dahilan tanganing baliwalaon niya an espirituwal na mga pangangaipo kan iba. (Filem. 23) Asin may ginibo siya para tabangan sinda. Bako daw na pagpahiling iyan nin bakong makasadiring pagmakulog? May dakulang epekto an pagpamibi para sa kapakanan kan mga kapwa niyato lingkod ni Jehova, lalo na kun espesipiko niyatong sasambiton an saindang pangaran.—2 Cor. 1:11; Sant. 5:16.

13. Paano mo maaarog si Epafras kun dapit sa saimong mga pamibi?

¹³ Isipon kun sairisay an puwede mong ipamibi sa pangaran. Arog ni Epafras, dakul sa satong mga tugang an namimibi para sa mga kakongregasyon ninda asin para sa mga pamilya na may dakulang paninimbagan o na may ginigibong dakulang desisyon o napapaatubang sa mga sugot. Dakul an ipinapamibi an mga indibidwal na an pangaran mahihiling sa artikulo sa jw.org na “Jehovah’s Witnesses Imprisoned for Their Faith.” (Hilingon sa NEWSROOM > LEGAL DEVELOPMENTS.) Apuwera kaiyan, marahay man na ipamibi an mga nagadanan nin mahal sa buhay, an mga nakaligtas sa dai pa sana nahahaloy na kalamidad asin giyera, asin an mga napapaatubang sa krisis sa ekonomiya. Malinaw na kaipuhan kan dakul na tugang niyato an satong mga pamibi asin makikinabang sinda diyan. Pag ipinapamibi niyato sinda, ipinapahiling ta na bako sanang kapakanan ta an iniisip ta kundi an kapakanan man kan iba. (Fil. 2:4) Dinadangog ni Jehova an siring na mga pamibi.

14. Taano ta si Jehova an pinakamarahay na halimbawa sa pagigin andam na magdangog?

¹⁴ An saro pang bagay na naghahayag kun gurano kita kamapakumbaba iyo an satong pagigin andam na magdangog. Sinasabi sa Santiago 1:19 na dapat kitang “magin alisto sa pagdangog.” Si Jehova mismo an pinakamarahay na halimbawa mapadapit digdi. (Gen. 18:32; Jos. 10:14) Pag-isipan an manunudan ta sa pag-uulay na nasa Exodo 32:11-14. (Basahon.) Dawa dai man talaga kaipuhan ni Jehova an ideya ni Moises, tinawan Niya ini nin pagkakataon na ipahayag an sabuot kaini. Siisay na tawo an madangog nin haloy sa pangangatanusan kan sarong indibidwal na nagpahiling nin salang kaisipan dangan mahiro kauyon kan sinabi kan sarong iyan? Pero, mapasensiyang nagdangog si Jehova sa mga tawo na may pagtubod na nag-aarang sa saiya.

15. Paano niyato maaarog si Jehova sa pagtaong onra sa iba?

¹⁵ Marahay na ihapot niyato sa satong sadiri: ‘Kun si Jehova ngani nagpapakanghababa sa saiyang pagtratar sa mga tawo asin dinadangog sinda arog kan ginibo niya ki Abraham, Raquel, Moises, Josue, Manoa, Elias, asin Hezekias, bako daw na mas dapat kong hinguwahon na tawan nin onra an gabos kong tugang, na tinatawan sinda nin dignidad, dinadangog an saindang mga ideya, asin minahiro pa ngani kauyon kan saindang marahay na mga ideya? May kakongregasyon daw ako o kapamilya na kaipuhan na ngunyan an sakong atensiyon? Ano an dapat kong gibuhon dapit diyan? Paano ko iyan gigibuhon?’—Gen. 30:6; Hok. 13:9; 1 Ha. 17:22; 2 Cron. 30:20.

16. Ano an ginibo ni David kan probokaron ni Simei?

¹⁶ Makakatabang man sa sato an kapakumbabaan tanganing makapagpugol kita pag pinoprobokar. (Efe. 4:2) An sarong marahayon na halimbawa kaini mababasa sa 2 Samuel 16:5-13. (Basahon.) Tinuya asin kinulgan si David asin an saiyang mga lingkod kan paryente ni Hading Saul na si Simei. Pinabayaan sana iyan ni David dawa may awtoridad siyang papunduhon iyan. Paano si David nagkaigwa kan kusog para makapagpugol? Mahihiling ta an simbag sa pagsiyasat kan ikatulong Salmo.

17. Ano an nakatabang ki David na makapagpugol sa sadiri, asin paano ta siya maaarog?

 ¹⁷ Isinurat ni David an Salmo 3 kan nagdudulag siya sa aki niyang si Absalom. An mga bersikulo 1 asin 2 kaiyan kauyon kan mga pangyayaring nakarekord sa kapitulo 16 kan Ikaduwang Samuel. Dangan itinampok sa Salmo 3:4 an pagtitiwala ni David: ‘Sa sakuyang tingog makurahaw ako ki Jehova, asin siya masimbag sa sako hali sa saiyang banal na bukid.’ Puwede man kitang mamibi kun bakong marahay an pagtrato sa sato. Bilang simbag, itatao ni Jehova an saiyang banal na espiritu na matabang sa sato na makatagal. May naiisip ka daw na sitwasyon na diyan kaipuhan mong magpugol sa sadiri o kaya lubos na patawadon an saro kun bakong marahay an pagtratar niya sa saimo? Nagtitiwala ka daw na nahihiling ni Jehova an saimong grabeng sakit asin na bebendisyunan ka niya?

18. Ano an pakinabang kun padagos niyatong iaaplikar an mga instruksiyon nin Diyos?

¹⁸ Kun ginigibo niyato an aram niyatong tama, maresulta iyan sa dakul na bendisyon. Bako nanggad makangangalas na sinasabi kan Talinhaga 4:7 na ‘an kadunungan iyo an pinakamahalaga’! (BPV) Dawa nakabasar sa kaaraman an kadunungan, partikular nang kalabot diyan an mga ginigibo tang desisyon bako sana an mga impormasyon na nasasabutan ta. Nagpapahiling nin kadunungan maski an mga tánga o sirum. Gamit an saindang natural na kadunungan, an mga tánga nagtitipon nin kakanon pag tig-init. (Tal. 30:24, 25) Si Cristo, “an kadunungan nin Diyos,” pirming ginigibo an nakakapaugma sa Ama. (1 Cor. 1:24; Juan 8:29) Aram nin Diyos an pagkakaiba kan pagpili nin tamang desisyon asin kan paghiro kauyon kan desisyon na iyan. Asin binebendisyunan niya an mga padagos na nagpapahiling nin kapakumbabaan saka an mga isinasabuhay an aram nindang tama. (Basahon an Mateo 7:21-23.) Kaya hinguwahon na mapagdanay an marahay na kamugtakan sa espirituwal kan kongregasyon huling makakatabang iyan na makapahiling kita nin tunay na kapakumbabaan. An paggibo kan aram niyatong tama nangangaipo nin panahon asin pasensiya, pero an kapakumbabaan iyo an makakatabang sa sato na magin maugma ngunyan asin sagkod lamang.