1. Ka gayaraabei lasuseredun lun ǘnabuguni le warufudubei ánhawa áyeihei luriban hagaburi gürigia ha ubouagubaña?

KA UAGU hénrengu lubéi wawinwanduni le wafurendeirubei tídangiñe Lererun Bungiu? Aban resun le uágubei hénrengu lan, ladüga mosu ǘnabugu wamá lun wadügüni le buídubei ani kei wawinwanduña lan lidan lagumuhóun dan geyegu hau gürigia ha hóunguarügüñein habusenra buiti, hínsiñeti seinsu houn, pántatiña, barüguatiña houngua ani siñati hárügüdagun houngua, gayaraati ladügün katei burí le lun marufudun wamá ǘnabuguni (2 Tim. 3:1-3). Gayaraati mánharun hamá fiu lubúeingu Bungiu lun luriban hagaburi gürigia le wéiribei larihín lidan ubóu le ani hínsiñe ligía houn saragu, gama lumoun, gimugatiña houn ha óuserubaña ítara ladüga genege lan buidu lan lidin houn (Sal. 37:1; 73:3). Gayaraati íbini hálügüdagun houngua anhein mosuméme lubéi hasigirun áluahei le buídubei houn amu lubaragiñe le buídutimabei houn ani anhein inebebaña lubéi houn gürigia ánhaña óusera kei aban hádangiñe ha ǘnabugutimabaña (Luk. 9:48). Ánhawa ígira lun gagaburi wamani luriban hagaburi lílana ubóu le, lagadeirubei wamadagua hama wíbirigu luma lubuidun wagaburi keisi kristiánugu. Ligíati, lanügüba buiti woun waturiahani  luma wáyeihani lubuidun hagaburi fiu gürigia ha uágubaña tayanuha Bíbülia.

2. Ida liña gayara lan líderaguniwa le hadügübei lubúeingu Bungiu ha úaraguabaña?

² Lun wafalaruni lubuidun hagaburi lubúeingu Bungiu ha meha úaraguabaña, lunti wakutihani le hadügübei. Ida liña gamadagua hamá luma Heowá? Ida liña hagundaaragüdüni? Halíagiñe hasagarei erei le hemegeirubei lun hadügüni lugundan? Súdiniti lun wadügüni álügüdahani burí le dan le waturiahan lun wederebudagüdüni wamadagua luma Bungiu.

3, 4. a) Halíagiñe wibiha adundehani lúmagiñeti Bungiu? b) Ka uagu gayara lubéi wariñagun mámarügüñein lan lunti waturiahanu Bíbülia lun wederebudagüdüni wamadagua luma Bungiu?

³ Ibihatiwa saragu adundehani arufudahóua ligía woun tau Bíbülia, agumeiraguagüdüni, páhina jw.org, programa JW Broadcasting, adamuridaguni luma adamurini. Gama lumoun, según lariñaguni Hesusu lidan Huan 4:34 mámarügüñein lunti ‘weigin’ o waturiahanu Bíbülia lun wederebudagüdüni wamadagua luma Bungiu. Ka amu katei lunbei wadügüni? Ariñagati Hesusu: “Nadügüni lugundan le óunahabalina, luma nagumuchuni luadigimari, ligía néiginbei”.

⁴ Éigini le uágubei layanuha Hesusu layanuhaña giñe luagu lunti lan gaganbadi wamá lun Bungiu lun wederebudagüdüni wamadagua luma. Ka uagu ítara liña lubéi katei le kei éigini? Dan le weigin aban éigini semeeti buiti wasandiragun woungua ani gúndaatiwa. Ítarameme, dan le wadügüni lugundan Bungiu aba lederebugudun wafiñen ani buídutimati wamadagua luma Heowá. Ma ñǘdünhadiwa apurichiha maguraasunga ani lárigiñe, giributiwa wábiñoun gúndaañu ani buin lau erei?

5. Ka buiti wibihubei anhein chu lubéi wau?

⁵ Dan le wawinwanduni le larufudahabei Bungiu aba lachuudun wau (Sant. 3:13). Ani barüti wadügüni le buiti woun. Ariñagatu Bíbülia buídutimati lan lichú aau sügǘ lau le wabusenrubei ani ‘ibagari lan houn ha gámabalin ani gúndaatiña lan ha árügüdübaña luagu’ (Ari. 3:13-18). Ariñagati Hesusu houn lani disipulugu: “Anhein gunfuranda humá burí katei le ani adüga humeime, gúndaabadün” (Huan 13:17). Gundaamémebaña meha lani Hesusu disipulugu ánhaña meha gaganbadiméme lun. Ani ítara liña hadügüni. Gaganbaditiña meha lun falá haméi le ladügübei mámarügü dan meha le ladagaragun hawagu. Súnwandan meha hadügüni.

6. Ka uagu lunti lubéi gaganbadiméme wamá lun le tarufudahabei Bíbülia?

⁶ Súdinimemegili lun gaganbadiméme wamá lun le tarufudahabei Bíbülia. Samina wamá luagu aban gürigia le subudihabúti luáguti laransehóun somu máhina, subuditi luáguti luadigimari lun ani másiñati anuhein lan tulu to lemegeiruboun lun lawadigimaridun luma. Mahuuduboun lun anhein mayusurun lan. Ani eibu lásügürün dan adügei luadigimari aba buídutimahali lan ladügüni. Ánheinti busén lubéi lun buiduméme lan lawadigimaridun lunti lasigirun adügei le furendei laalibei. Ítarameme, dan le wagumeserunbei aturiahoun Bíbülia winwan waméi le wafurendeirubei ibihatiwa giñe buiti. Lunti gúndaameme wamá, mosu ǘnabugu wamá lun gaganbadi wamá sagü weyu lun le larufudahabei Heowá woun.

7. Lun lachuudun wau, ka lunbei wadügüni lau le wafurendeirubei lídangiñe le hadügübei ha uágubaña tayanuha Bíbülia?

⁷ Akutiha wamá fiu sügǘ le gayaraati ladügün lun marufudun wamá ǘnabuguni ani ariha waméi ligaburi hagagibudagun lubúeingu Bungiu úaraguatiña ha lánina binadu dan luma burí katei genegeguati luma le. Anhein busén wabéi wederebudagüdüni wamadagua luma Bungiu úati buídurügü lan waturiahani  ariñahani le. Mosu wasaminarun ida luba lan wawinwanduni le lunbei wafurendeiruni adüga wameime lau lóufudagun.

8, 9. Ka larufudahabei sügǘ burí le abahüdawagúbei lidan Adügaü 14:8-15 woun luagu ǘnabuguni le larufudubei apostolu Pábulu? (Ariha huméi dibuhu le lídanbei lagumeseha arütíkulu).

⁸ Busenti Heowá lun “hasalbarun sun gürigia, lun giñe hayabin lun hasubudiruni inarüni” (1 Tim. 2:4). Ida liña warihiniña gürigia ha ibidiñegili inarüni houn? Lau sun áluaha lan meha apostolu Pábulu gürigia ha subudihaña murusun luagu Bungiu tidan haligilisin huríu, mámarügüñein houn huríu lapurichiha. Apurichihati giñe houn ha áhuduragubaña houn amu búngiugu. Adügati ligaburi hóunabun gürigia ha lun meha gayara lan marufudun lan ǘnabuguni.

⁹ Lidan furumiñeti wéiyaasu le ladügübei Pábulu kei misioneru, saminatiña meha lílana Likaónia bungiu lan Húpiter Pábulu ani bungiu lan Merükúriu Berünawé lau hágubu gürigia. Ígiraguagüdati san Pábulu luma Berünawé houngua lun subudiwa hamá luma lun weiri lan laganbahóun hawagu? Ariha hamuti san katei le kei aban emeraaguni lárigiñe héibaahoun lidan bián lagumuhóun uburugu le ídanbei hapurichiha? Saminatiña san gayara lan lídehan subudiwa hamá lúntima haganbuni gürigia uganu buiti? Uá, mítaranti. Lau lóufudagun, aba haheiridagunu hadaüragun ani aba hagumeserun agúaraha hadan gürigia: “Kame san habusenra hadügüni katei le? Wügüriña giñe wagía kei huguya” (Adü. 14:8-15).

10. Ida liña meha gunfuranda lani Pábulu luma Berünawé ítara haña lan kei likaóniana?

¹⁰ Subudi lumuti meha Pábulu luma Berünawé gafigoun hamá kei gürigia hagía. Íbini ítara, mama meha hariñaguña ítara liña lan ligaburi háhuduragun lun Bungiu kei hadügüni gürigia hagía. Anuadirúaaña meha lun aban wadagimanu súdiniti kei misionerugu (Adü. 13:2). Ani anuadirúaaña meha lau sífiri sandu ani hemenigitiña meha lun houdin sielun. Lau sun lira, gunfuranda hamuti meha gayara lan giñe hibihini likaóniana emenigini lun houdin sielun ánhaña meha ánhara lun uganu le hapurichihabei.

11. Ida luba gayara lan wáyeihani ǘnabuguni le larufudubei Pábulu dan le wapurichihan?

¹¹ Ida luba wáyeihani lubuidun ligaburi larufudun Pábulu ǘnabugu lan? Furumiñe, lunti mígiraguagüdün wamá woungua lun furumiñeguarügü ayumahani lun wibihin uéiriguni luagu somu katei le wadügübei lau lídehan Heowá. Buídubei lun lálügüdagun kada aban wádangiñe lungua: “Ida liña narihiniña gürigia ha únbaña napurichiha? Gumeseedina san asaminara somu katei wuribati hawagu amu ítara kei hechun lílana fulasu le ñein nubéi?”. Furanguti larihíniwa sigí hamá gefentiña luagu Heowá áluahaña gürigia ha lúnbaña hánharun lun inarüni. Anihein dan, mosu hafurendeiruni fiu kristiánugu hañeñe luma hechun gürigia ha aubei meberesenwa lan. Masaminaruntiña íbirigu ha buídutima hamá hawéi gürigia ha. Lubaragiñe lira, áfaaguatiña lun gunfuranda hamaniña kada gürigia gayara láamuga lachülürün inarüni tidoun hanigi.

12. Ida liña larufudun Epafürasi ínsiñehabuni berese ligía hau amu?

¹² Ábanya igaburi le ídanbei gayara lan warufudun ǘnabugu wamá ani gaganbadi wamá lun Heowá, lau wafurieidun hawagu wíbirigu (2 Fe. 1:1). Ítara liña ladügüni aban kristiánu gíriti Epafürasi. Ǘrüwarügüñein wéiyaasu tayanuha Bíbülia luagu tidan burí gárada to labürühaboun Pábulu. Dan meha le ladaürǘña lan Pábulu lúbiñe, uburugu Roma, abürühati houn kristiánugu ha Kolosabaña súnwandan lan meha lafurieidun Epafürasi hawagu (Kol. 4:12). Subudi lumutiña meha Epafürasi  íbirigu buidu ani bereseti meha hau. Ani lau sun meha gaturobulin lan, ladüga ariñagati Pábulu luagu “le nouba furisunrugu”, gabaroun lumuti meha megei hamá amu íbirigu ídemuei lidan hamadagua luma Bungiu (Fil. 23). Íderagua lumutiña meha ani ítara liña meha larufuduni línsiñehabu luma berese lan hau. Ídehati saragu dan le wafurieidun hawagu wíbirigu, dántima le wíriduni hiri (2 Ko. 1:11; Sant. 5:16).

13. Ida liña gayara lan wáyeihani le ladügübei Epafürasi dan le wafurieidun?

¹³ Samina wamá hawagu ha gayaraabei wíriduniña lidan wafurieidun. Ítara kei Epafürasi, ayumuraguatiña saragu íbirigu hawagu lílana hani damuriguaü luma hawagu iduheñu ha wéiriti hani buligasion o mosu lan hanúadirun kaba lan hadüga lidan aban katei súdiniti o hagagibudaguña lan luma óuchawaguni. Añahein amu, írida hamuti hiri íbirigu ha áfuachubaña lidan arütíkulu “Testigos de Jehová presos por sus creencias” lidan páhina jw.org (seksióun PRENSA > ASUNTOS LEGALES). Moun lumuti giñe wabulieiduniña ha eferidirubaña somu haduhe lidan óunweni, ha esefurubaña lídangiñe wuribu o liñawan dan le málügili lúmagiñe lasuseredun, hama ha agagibudagubaña luma turobuli luagu lilouguan seinsu. Furanguti larihíniwa gibe hamá wíbirigu ha mégeitiña lun wafurieidun hawagu. Dan le wadügüni lira, warufuduña máluahan wamani lérügü buídubei woun, áluaha wamuti giñe le buídubei houn amu (Fili. 2:4). Aganba lumuti Heowá furíei burí le.

14. Ida liña líchuguni Heowá hénpulu le buídutimabei dan le laganbuniña amu?

¹⁴ Ámuya igaburi le ídanbei gayara lan warufudun ǘnabuguni lau aranseñu wamá lun waganbuniña amu. Ariñagati Santiagu 1:19 lunti lan aranseñu wamá lun waganbuniña amu. Heowátima arufudubalin igaburi le buidu (Agu. 18:32; Hos. 10:14). Ariha waméi le gayaraabei wafurendeiruni lídangiñe yanu le lídanbei Áfuriduni 32:11-14 (aliiha huméi). Memegeirunti yebe Heowá laganbuni le lasaminarubei Moisesi, lau sun lira, ígira lumuti lun lariñaguni le lídanbei lisaminan. Kaba hamuga wádangiñe aganba lau gaguraasuni ani falá waméi ladundehan somu gürigia le achararubei? Aganba lumutiña Heowá gürigia ha afurieidubaña lun lau afiñeni lau gaguraasuni.

15. Ida luba wáyeihani Heowá?

¹⁵ Lunti lálügüdagun kada aban wádangiñe: “Anhein aganba lubaliña Heowá gürigia lau ǘnabuguni kei ladüga luma Abüraámü, Moisesi, Hosué, Manóa, Elíasi, Esekiéli tuma Rakeli, ma lunti giñe nadügüni ligiaméme? Gayaraati san inebetima hamá íbirigu nun lau nóuseruniña buidu aganbanei le hasaminarubei ani íbini lun nafalaruni lubuidun hadundehan? Anihein san somu íbiri lidan damuriguaü o somu niduhe le mégeiti lun naganbuni? Ka gayaraabei nadügüni?” (Agu. 30:6; Ali. 13:9; 1 Uru. 17:22; 2 Kro. 30:20).

16. Ka ladügübei Dawidi dan le lagagibudagunbei Simí luma?

¹⁶ Íderagua lumutiwa giñe warufudun ǘnabuguni lun wárügüdagun woungua dan háluahan amu hageindagun wama (Efe. 4:2). Daritiwa aban sügǘ le arufudubalin igaburi le buidu lidan 2 Samueli 16:5-13 (aliiha huméi). Awandati Dawidi hama lani úfisigu lóuseruniña Simí, aban liduhe urúei Saulu, lau marichaü. Gabafuti meha Dawidi lun yebe lararamuni Simí, lau sun lira, aba lanúadirun lawanduni. Halíagiñe lasagarei erei le lemegeirubei lun lárügüdagun lungua? Darí wamuti óunabagülei lau wakutihani Sálumu 3.

17. a) Ka adügübei lun lárügüdagun Dawidi lungua? b) Ida luba wáyeihani Dawidi?

¹⁷ Abürüha lumuti Dawidi Sálumu 3 dan le láluahaña lan meha Abüsalón, le liráü,  láfaruni hilagubei. Úarati le ariñawagúbei lidan burí ” bérusu 1 luma 2 luma le abahüdawagúbei lidan 2 Samueli kapítulu 16. Arufuda lumuti Sálumu 3:4 lemenigin Dawidi. Ariñagati: “Wáguatina amuriaha ídemuei luma Aburemei, óunaba lumutina lídangiñe fulasu le ñein lubéi”. Gayaraati giñe wafurieidun dan le hábürühan amu wawagun. Ábameti líchuguni Heowá lani sífiri sandu woun lun wawandun. Gayaraati san wasaminarun luagu somu sügǘ le ídanbei megei wamá wárügüdagun woungua o feruduna wamá somu gürigia le óuserubaliwa wuriba mébunouga? Afiñetiwa san ariha lumuti lan Heowá wasufurirun ani líderagubadiwa lan?

18. Kaba buiti wasagara ánhawa asigira afalarei ladundehan Bungiu?

¹⁸ Ánhawa adügei le buídubei, wibihiba saragu abiniruni. Ligía ariñaga lubéi Ariñawagúni 4:7: “Lubaragiñe furumiñeguarügü katei, ibihabá lichú aau”. Íbini adüga lan subudi lun lachuudun lau gürigia, gama lumoun le arufudubalin chu lan lau aban gürigia katei burí le lanúadirubei, mama lisubudin. Ariñagatu Bíbülia íbini lan haü chuti hau. Arufudatiña haü lichú aau lau hareiduni heigin lidan lidaani lubachouga (Ari. 30:24, 25). Arihúati lichú lau Bungiu lidan Kristu ani súnwandan ladügüni lugundan Lúguchi (1 Ko. 1:24; Huan 8:29). Subudi lumuti Bungiu mama lan ligiaméme lasubudiruni gürigia le lunbei ladügüni luma ladügüni katei ligía. Ruti afayeiruahaü houn ha ǘnabugubaña, awanda hagía ani adüga hawéi le buídubei (aliiha huméi Matéu 7:21-23). Ligíati, áfaagua wamá lun wídehan lun heseriwidun sun lílana damuriguaü lun Heowá lau ǘnabuguni. Mégeiwati dan luma gurasu lun wadügüni le buídubei lidan wabagari. Ánhawati adügei warufuduba ǘnabugu wamá ani gúndaabadiwa guentó luma lun súnwandan.