1. Kijan mantalité égoyis a mond-la pé aji asi nou ?

POUKWA byensouvan sa rèd dè apliké sa nou ka aprann adan Pawòl a Bondyé ? On rézon, sé kè fò-nou ni imilité pou fè sa ki byen, é mond-la nou adan-y la pa ka ankourajé-nou kiltivé kalité-lasa. Pannan « dènyé jou » a sistèm-lasa, nou lantouré èvè moun ki « égoyis, [ki] enmé lajan, [ki] blagè, [ki] ni òwgèy » é ki « [pa] ni métriz » (2 Tim. 3:1-3). Antankè sèwvitè a Bondyé, nou sav kè sé kalté konpòwtèman-lasa pa bon, men défwa nou pé ni lenprésyon kè sé moun-la ki ka aji konsa la ka réyisi adan lavi é nou pé rivé a jalou-yo (Sòm 37:1 ; 73:3). Nou pé jous rivé a mandé-nou : « Èskè sa vo vréman lèkou dè fè entéré a lézòt pasé avan tan mwen ? Si an ka konpòwté-mwen “kon on toupiti”, èskè lézòt ké kontinyé rèspèkté-mwen ? » (Lik 9:48). Si nou ka lésé mantalité égoyis a mond-lasa détenn asi nou, sa pé rivé a gaté bèl lanmityé kè nou ni èvè frè é sè an nou é lézòt pé ni dimal a rèkonnèt ké nou sé dé krétyen. Pawkont, si nou pran tan  réfléchi asi bèl ègzanp ki an Bib-la é si nou ka imité-yo, nou ké ni onlo bénédisyon.

2. Ki éfé ègzanp a sèwvitè fidèl a Bondyé pé ni asi nou ?

² An tan lontan, ka ki édé sèwvitè fidèl a Bondyé vin zanmi a-y ? Ka yo fè pou fè-y plézi ? Ola yo pran fòs pou yo té fè sa ki byen ? Lè nou ka li an Bib-la sa yo fè, é lè nou ka pran tan réfléchi asi sa, fwa an nou ka vin pli fò.

3, 4. a) Èvè ki biten Jéova ka sèvi pou i anségné-nou ? b) Poukwa apatoudi plen tèt an nou èvè konésans pou fwa an nou rété fò ?

³ Jéova ka ban-nou tousa nou bizwen pou fwa an nou rété fò. I ka ban-nou onlo bon konsèy é on bèl fòwmasyon, grasa Labib, grasa piblikasyon an nou, sit Entèwnèt an nou, JW Télédifizyon, grasa réinyon an nou é lasanblé an nou. Men Jézi èspliké kè apatoudi plen tèt an nou èvè konésans. Nou bizwen fè ondòt biten ankò. I di : « Nouriti an mwen, sé fè volonté a sila ki voyé-mwen la é fin travay a-y » (Jan 4:34).

⁴ Pou Jézi, lè i té ka fè volonté a Bondyé sé konsi sé manjé i té ka manjé. Lè nou ka manjé on bon timanjé, sa ka fè-nou plézi é sa ka ban-nou fòs. Menmjan-la, lè nou ka fè volonté a Bondyé, sa ka rann fwa an nou pli fò. Pa ègzanp, ès sa ja rivé-w dè ay préché alòskè ou té ka santi-w las ? Sèten lèwvwè ou viré akaz a-w, ou té kontan é ou woupran fòs.

5. Lè ou ka aji èvè sajès, ka sa ka pòté dè bon ba-w ?

⁵ Lè nou ka fè sa Jéova ka mandé-nou èvè onlo imilité, nou ka aji èvè sajès (Sòm 107:43). É onlo bon biten ka rivé moun ki ni sajès. « Pa ni ayen ou anvi ni ki ni otan valè. [...] Sé on pyébwa ki ka ba moun ki ka kenbé-y lavi, é moun ki ka kenbé-y fò ké kontan » (Pwov. 3:13-18). Jézi di disip a-y : « Si zò konnèt sé biten-lasa, tchè a zòt kontan si zò ka fè-yo » (Jan 13:17). Sé disip-la té ké kontan toutotan yo té ké kontinyé fè sa Jézi té mandé-yo fè. Fò-yo té pran labitid fè sa i mandé-yo é pran ègzanp asi-y touléjou.

6. Poukwa fò-nou kontinyé mété an pratik sa nou ka aprann ?

⁶ Nou osi, fò-nou kontinyé mété an pratik sa nou ka aprann. Pou nou konprann sa byen, imajiné on mékanisyen ki plen zouti, ki ni sé pyès-la pou i chanjé la, é ki konnèt travay a-y byen. Tout sé biten-lasa ké itil yenki si i ka sèvi èvè yo. Pétèt kè sa ka fè lanné é lanné i ka fè mékanik, men si i vlé rété on zouti-filé an domenn-lasa, fò i kontinyé sèvi èvè sa i aprann. Menmjan-la, lè nou vin konnèt lavérité, nou té kontan pas nou té ka apliké sa nou aprann an Bib-la. Sèlman, pou nou kontinyé ni lakontantman, fò-nou mèt an pratik sa Jéova ka aprann-nou chak jou.

7. Ka pou nou fè pou ègzanp a sèwvitè fidèl ki an Bib-la itil pou nou ?

⁷ Konnyéla, nou kay palé dè déotwa sitiyasyon ki pé mété imilité an nou a léprèv. É nou ké vwè kijan, antan lontan, sèwvitè fidèl a Bondyé pa pèd imilité a yo adan dé sitiyasyon kon séla. Men pou fwa an nou rété fò, fo pa nou kontanté-nou dè li sa yo fè. Anplisdisa, fò-nou réfléchi asi ègzanp-la yo ka ban-nou la, é sa nou aprann, fò-nou mété-y an pratik vitman.

8, 9. Lè nou ka réfléchi asi sa ki maké adan Akt 14:8-15, ka sa ka aprann-nou asi imilité a Pòl ? (gadé prèmyé imaj a awtik-la).

⁸ Bondyé vlé kè « tout kalté moun sové é kè yotout rivé ni on konésans ègzak a lavérité » (1 Tim. 2:4). Kijan ou ka vwè moun ki pòkò konnèt lavérité ? Adan sé sinagòg-la, lapòt Pòl préché ba moun ki té ja konnèt sèwten biten asi Bondyé, men nou sèten kè i pa kontanté-y dè préché yenki ba sé Juif-la. I préché ba moun ki té ka adoré fo-dyé osi, é pawfwa sa mété imilité a-y a léprèv. Ankijan ?

⁹ Pannan prèmyé vwayaj a-y antankè misyonè, Pòl ay èvè Barnabé a Lis, on vil ki té adan on réjyon yo té ka kriyé Likaoni. Sé moun-la ki té ka rété an vil-lasa pran-yo pou dé chanpyon ki té ni onpakèt pouvwa é yo ba-yo non a dyé a yo, Zés é Èrmès. Èskè Pòl é Barnabé mété-yo ka akwè-yo pas sé moun-la té ka pòté-yo anlè ? Èskè yo vwè sa kon on soulajman parapòt a kantité pèwsékisyon yo sibi adan dòt vil ? Èskè, antèt a yo, tibwen piblisité té ké pèwmèt plis moun tann palé dè bon nouvèl-la ? Awa ! Yo pa té dakò èvè sa ditou-ditou é tousuit yo di : « Poukwa zò ka fè sa ? Nou sé dé nonm ki ni menm féblès ki zòt » (Akt 14:8-15).

10. An ki sans Pòl é Barnabé té ka ba moun-Likaoni menm valè ki yo ?

¹⁰ Lè Pòl é Barnabé di kè yo sé dé nonm, yo té vlé di pa la kè yo enpawfè. Yo pa té vlé di kè yo té ka adoré Bondyé menmjan ki sé moun-Likaoni la. Sé Bondyé limenm ki té voyé Pòl é Barnabé antankè misyonè (Akt 13:2). Anplisdisa, Jéova té mété lèspri sen a-y asi yo, é yo té ni on èspérans èkstraòwdinè menm. Men a pa té on rézon pou yo té santi-yo sipéryè. Yo byen konprann kè moun-Likaoni osi té pé ni menm èspérans ki yo, si yo té ka aksèpté bon nouvèl-la.

11. Lè nou ka préché, kijan nou pé pran ègzanp asi imilité a Pòl ?

¹¹ Kijan nou pé pran ègzanp asi imilité a Pòl ? Ni dé biten Jéova ka pèwmèt-nou fè èvè fòs a-y. Fo pa nou jen sèvi èvè sa pou fè moun pòté-nou anlè. Nou pé mandé-nou : « Kijan an ka vwè sé moun-la ki an téritwa-la ? Ès an ka fè préférans pou sèwten katégori moun ? » Toupatou si latè, Témwen a Jéova ka chèché moun ki vlé tann bon nouvèl-la. Ni dé Témwen ki ka jous fè on éfò pou aprann palé lang a sèwten moun kè lézòt ka méprizé. Yo ka aprann konnèt mès é labitid a yo osi. Men yo pa jen ka santi-yo sipéryè a sé moun-lasa. Yo plito ka chèché a konprann chakmoun, pou pé sa touché kè a yo èvè mésaj a Wayòm-la.

12. Kijan Épafras montré kè i té ka pran penn a frè é sè a-y poudèbon ?

¹² Ondòt jan nou ka montré kè nou ni imilité, sé lè nou ka priyé pou frè é sè an nou ki ja « rivé a ni on fwa ki ni onlo valè kon tan nou » (2 Pyè 1:1). Sé sa Épafras té ka fè. Pannan Pòl té fèmé adan on kaz a Wòm, i voyé on lèt ba krétyen ki té ka rété Kolòs. I di-yo kè Épafras « toujou [té] ka lité pou [yo] adan priyè a-y » (Kol. 4:12). Épafras té konnèt frè é sè a-y byen, é i té ka pran penn a yo onlo menm. Pannan on tan, i té « konpangn [a Pòl], ki té fèmé ansanm èvè-y » ; nou ka tou konprann kè limenm a-y té ni  pwoblèm osi (Filém. 23). Men magrésa i toujou té ka sousyé-y dè sa lézòt té bizwen é ni on biten i té ka fè pou édé-yo. Épafras té ka priyé pou frè é sè a-y, é lè i té ka fè sa, i té ka nonmé non a yo. Nou pé fè menm biten ki-y. Dé priyè konsa ni onlo fòs toubònman (2 Kor. 1:11 ; Jak 5:16).

13. Lè ou ka priyé, kijan ou pé imité Épafras ?

¹³ Dè kimoun ou pé palé adan priyè a-w ? Pétèt ou pé palé dè moun, an kongrégasyon a-w oben an fanmi a-w, ki ni onpakèt rèsponsabilité si do a yo. Pétèt ou sav kè yo ka jwenn tantasyon oben kè yo ni dé désizyon enpòwtan a pran. Ou pé priyé osi pou frè é sè a-w, ki ni non a yo maké adan on awtik ou ka touvé si jw.org : « Témoins de Jéhovah emprisonnés en raison de leur foi » (ou pé touvé sa adan SALLE DE PRESSE > VEILLE JURIDIQUE). Anplisdisa, pa oubliyé sa ki pèd on moun yo té enmé, sa ki ka soufè lè ni on katastròf natirèl oben lè ni on lagè, é sa zafè a yo mélé. Ni tèlman frè é sè ki bizwen nou priyé pou yo. Lè nou ka priyé pou yo, nou ka montré kè a pa yenki pwoblèm an nou nou ka sonjé, men nou ka sonjé ta lézòt osi (Fil. 2:4). Jéova ka kouté sé priyè-lasa !

14. Poukwa nou pé di kè pa ni ponmoun ki ka kouté kon Jéova ?

¹⁴ Ondòt jan ankò nou ka montré nou ni imilité sé lè nou ka pran tan kouté sa lézòt ka di. Jak 1:19 ka di kè fò-nou « toujou paré pou kouté ». Adan domenn-lasa, Jéova sé méyè ègzanp ki tini (Jén. 18:32 ; Joz. 10:14). Pa ègzanp, li konvèwsasyon-la nou ka touvé la an Ègzòd 32:11-14 (li-y). Menmsi Jéova pa té bizwen avi a Moyiz, i lésé-y di sa i té ka rèsanti. Si on moun ja tronpé-y, é i ka èspliké-w on biten, ès ou ké pran tan kouté-y jistan i fin palé, é ès ou ké suiv konsèy a-y ? Li, Jéova, i ka pran tan kouté toutmoun ki ka priyé-y é ki ni konfyans kè i ka kouté-yo.

15. Kijan an pé imité jan Jéova ka onoré lézòt ?

¹⁵ Pozé-w sé kèsyon-lasa : « Si Jéova limenm pran tan kouté dé moun kon Abraam, Rachèl, Moyiz, Joziyé, Manoa, Éli é Ézékyas, ès an pa dwèt fè on éfò pou ni imilité menmjan ki-y ? Ès an pé ba frè an mwen plis valè, pa ègzanp, lè an ka kouté-yo é lè an ka suiv konsèy a yo chakfwa sa posib ? Ès ni on moun an kongrégasyon an mwen, oben an fanmi an mwen, ki mérité an okipé dè-y konnyéla la ? Ka an dwèt fè ba-y ? Ka an ké fè ba-y ? » (Jén. 30:6 ; Jij 13:9 ; 1 Wa 17:22 ; 2 Kron. 30:20).

16. Kijan Wa David réyaji lè Chiméyi chèché-y tren ?

¹⁶ Ondòt jan ankò nou pé montré nou ni imilité, sé si nou ka métrizé-nou lè on moun ka tigonné-nou (Éf. 4:2). Sa ki maké an 2 Samiyèl 16:5-13 ka ban-nou on bèl ègzanp anrapò èvè sa (li-y). Chiméyi, on fanmi a Sayil, jiré David é sèwvitè a-y é i jous voyé wòch dèyè do a yo. David té pé fin bat èvè Chiméyi, men olyé i té fè sa, i rété la ka sipòté. Ola David pran fòs pou i métrizé-y konsa ? Pou nou réponn, an-nou ègzaminé Sòm 3 la.

17. Ka ki édé David métrizé-y, é kijan nou pé imité-y ?

¹⁷ Sé lè gason a-y Absalon té ka éséyé tchouyé-y kè David konpozé twazyèm Sòm-la. Sé adan moman difisil  lasa Chiméyi ataké David. Men magrésa, David touvé fòs pou i rété kalm kanmenm. Kijan i rivé fè sa ? Sa nou ka li an Sòm 3:4 ka montré kè David té ka fè Jéova konfyans toubònman. Mi sa David di : « An ké kriyé Jéova tout fòs an mwen, é étan anlè montangn a-y ki sen i ké réponn-mwen. » Lè yo ka mal aji èvè nou, nou osi fò-nou priyé Jéova, kon David. Alò, i ké ban-nou lèspri sen a-y. Ès ou ka vwè on sitiyasyon ki té ké mandé kè ou ni métriz oben kè ou padonné volontyé ? Èskè ou ni konfyans kè Jéova ké vwè jan ou ka soufè é kè i ké béni-w ?

18. Si ou ka kontinyé fè sa Jéova ka di-w, ka sa ké pòté ba-w ?

¹⁸ Lè nou konnèt sa ki byen é kè nou ka fè-y, sa ka pwokiré-nou onlo bénédisyon. Kon Pwovèb 4:7 ka di, « sajès, sé biten-la ki pli enpòwtan la » ! Sé vré lasajès bazé si lakonésans, men a pa pas ou ka konprann onlo biten kè ou ni sajès. Sé sèlon désizyon on moun ka pran ou ka vwè si i ni sajès. Menm sé foumi-la ka aji èvè sajès. Ou ka vwè sajès a yo lè yo ka sanblé manjé toupannan ni botan (Pwov. 30:24, 25). Jézikri, kè yo ka kriyé « sajès a Bondyé », toujou ka fè sa ki ka fè Papa-y plézi (1 Kor. 1:24 ; Jan 8:29). Si nou osi, nou ka kontinyé montré kè nou ni imilité é si nou ka fè lèbyen, Bondyé ké rékonpansé-nou (li Matyé 7:21-23). Alò, kontinyé travay pou toutmoun adan pèp a Bondyé rivé sèvi-y èvè imilité. Pou nou mèt an pratik sa nou aprann, sa ka mandé tan é pasyans. Men lè nou ka fè sa, nou ka montré kè nou ni imilité. É imilité-lasa ké pwokiré-nou lakontantman dépi konnyéla é pou touttan !