1. Ombepo yokuripurira kweṱe oveni youye mbwi mai yenene okuṱuna vi komerisusuparisiro wetu?

HAPO ongwaye tji i rira ouzeu okutjita imbi mbi tu ri honga mEmbo ra Mukuru? Epu rimwe orondi rokutja ku hepa omerisusuparisiro okutjita imbi mbi vi ri ovisemba, nu okurira overisusuparise kaupupu ndino. “Momayuva omasenina” nga, eṱe tu hupa mu novandu mbe ‘ripahera oveni ouwa, omakorokope, noverihive noveritongamise,’ nu wina “ovanautwe novindandi.” (2 Tim. 3:1-3) Ovakarere va Mukuru mape ya ave nakaura ongaro yokuripurira ku wo oveni ndji tjitwa i ovandu mba, posiya ave utu okukara neruru komuano ovandu mbo mu ve muna ondoṋeno. (Eps. 37:1; 73:3) Mape ya o utu okuripura kutja: ‘Hapo nai omundu mape ya o ripurire kovandu varwe? Indu tji mbe ri tjindi otja ngu mbiri “okaṱiṱi” povandu varwe, hapo ovandu nai kave nokuuta okundjinyengura?’ (Luk. 9:48) Tji matu yandjere kutja ombepo yokuripurira kweṱe oveni i kure mweṱe, ma ku zunḓa ongaro yetu ombwa ndji tu kara na yo mombongo na eṱe oveni otjOvakriste. Nungwari tu muna  ouwa tji matu rihongere kovihorera oviwa mbi ri mOmbeibela nokukuhorera ku vyo.

2. Ongaro yovakarere va Mukuru ovaṱakame mai yenene okutuṱuna vi?

² Tji matu vanga okuhorera ku imba ovaṱakame, matu sokukonḓonona kutja ovikwaye mbi va tjita mbya eta ovihorera oviwa kweṱe. Matu sokutara kutja owo va tunga vi oupanga wawo kuna Mukuru, nu eye we ve yakura vi, nu va muna vi omasa wokuyenenisa ombango ye? Okukonḓonona oviṋa otja imbi orupa oruṋanḓengu rokukurisa oupanga wetu kuna Jehova.

3, 4. (a) Omaronga nomirari vyopopambepo tu vi muna vi? (b) Ongwaye tji matu yenene okutja ovikurya vyombepo vi kamburira mo oviṋa ovingi pendje nokutoora ondjivisiro uriri?

³ Tu muna omaronga omengi omawa nu tu hongwa nawa okupitira mOmbeibela, omambo nga zikamena kOmbeibela, otungovi twetu, o-JW Broadcasting, na pozombongarero zombongo na pomaworonganeno. Posi yokutja, okuisira komambo wa Jesus nge ri mu Johanes 4:34, ovikurya vyombepo vi kamburira mo oviṋa ovingi pendje nokutoora ondjivisiro uriri. Nu vi kamburira mo ovikwaye vyarwe? Jesus wa tja: “Otjikurya tjandje oko ngwi okutjita ombango yaIngwi ngwe Ndji hinda, nokumana otjiungura tje.”

⁴ Ku Jesus, ovikurya vyombepo aavi kamburiremo okuungura mombwaneno na Mukuru. Hapo nu omomuano uṋe imbi tji vi ri ovikurya? Omuano otutu twetu mu tu kowa nokukura tji twa ri eriro ewa, wina tu hara omasa momuinyo nu ongamburiro yetu komuinyo waaruhe i kurirako indu tji matu tjiti ombango ya Mukuru. Ovikando vingapi mbi wa rora okuya pombongarero yokukazuvarisa au hi nokurimuna nawa, nungwari tji wa mana okuzuvarisa outu okurimuna omasa omape nondjoroka?

5. Mokuungura nounongo mu nondjambi ya ye?

⁵ Okuṱakamisa omaronga wa Mukuru mehupo retu ku raisa ounongo watjiri. (Eps. 107:43) Ondjambi ndji matu munu ya kapita ozongondjero nḓu matu tjiti. “Kape notjiṋa tji mo zeri tji matji sasanekwa na wo. . . . Imba mbe wangata ounongo mave kara nomuinyo; nu imba mbe u ṱiza owo ovaṋingandu.” (Omiano 3:13-18) Jesus wa tja: “Nambano eṋe mbu mwa tjiwa otjiṋa hi, oweṋe ovaṋingandu tji mwe tji yenenisa!” (Joh. 13:17) Aa ku hee kutja ouṋingandu wovahongewa va Jesus mbu mave munu maukarerere tji va tjiti oviṋa eye mbye ve raera okutjita. Owo kave ṱakamisire omahongero nokuhorera ku Jesus moruveze noiri ndjo uriri tjazumba ave yandere mbo. Nungwari owo ya rira orupa rwehupo rawo.

6. Ongwaye tji matu sokupanḓera pokuraisa ounongo?

⁶ Ndinondi, tjiri ounanḓengu tjinene okuṱakamisa oviṋa vyouatjiri mbi twe rihongo. Okusasaneka, omundu omakeninga ma yenene okukara noviungurisiwa avihe mbye hepa nounongo. Nungwari tje hi nokuungurisa oviṋa mbi, ovyo ka vi notjiṋa tji ma vi mu vatere. Ndovazu wa ungura oumakeninga rukuru nu wa toora ondjiviro ombwa, eye ma hepa okukayenda komurungu okuungura oviungura vye mbi kutja aha zembi nu me vi tjiwe nawa tjinene kutja ma mune mondjambi ombwa. Momuano tjinge wo, pomautiro mape ya atu kara nongamburiro ndja zikama mena rokutja tu ṱakamisa oviṋa mbi matu rihongo mOmbeibela. Nungwari matu hepa okukongorera omirari nomaronga wa Jehova nomerisusuparisiro eyuva arihe kokutja tu rire ovaṋingandu aruhe.

7. Matu sokuraisa ongaro iṋe kovihorera vyOmbeibela tji matu paha ounongo?

⁷ Indjo tu tare koviṋa tjiva mbi mavi raisa kutja oweṱe overisusuparise poo indee, nokutja ovakarere va Jehova ovaṱakame vorukapitaveze va tuurunga vi ovipwite mbi. Okurira omundu ngu noupanga ouwa kuna Jehova ka tji rekareka  kondjivisiro ndji motjiwa uriri. Okutja ma rire nawa kove otjomundu okuripura kutja mo ṱakamisa vi oviṋa mbi, nu hakahana okuviṱakamisa.

8, 9. Oviungura 14:8-15 ri raisa vi omerisusuparisiro womuapostele Paulus? (Tara kotjiperendero pomautiro worupa ndwi.)

⁸ Ombango ya Mukuru oyo ndji yokutja “ovandu avehe ve ṋingapare nu ve vaze kondjiviro youatjiri.” (1 Tim. 2:4) Hapo ovandu mbe ha karere Jehova ove u ve vara vi? Omuapostele Paulus ke na pa zuvarisa kOvajuda uriri, nungwari aa paha imba mbaa ve tjiwa Mukuru mozondjuwo zomaworonganeno wina. Ongaro ovanavisenginina ndja ve raisa komazuvarisiro we ondja tja i mu rora kutja omurisusuparise pu pe ṱa pi.

⁹ Otjikando tjimwe Paulus tjaari mouyenda we outenga wokuzuvarisa, ovandu va Likaonie aave kondjisa okuyandja ondjozikiro poo ohiviro onene ku ye na Barnabas—nu aave munu kutja owo i vemwe voomukuru wawo wovisenginina oSeus na Hermes. Hapo Paulus na Barnabas va vanga okuriyandja koviṋa mbi? Hapo indjo atja i rira onguturiro ku wo otjovandu mbu va tatumisiwa kovihuro ku va zu? Owo vena pu veri pura kutja okutjiukwa i ovandu ovengi maku vatere kutja ombuze ombwa i ryame komurungu? Kako! Owo va hakahana okuraisa onyengo nokutaura ozombanda zawo na ve hiti mokati kovandu mba ama ve ve tjaere amave tja: “Oviṋa mbi mamu vi tjitire tjike? Eṱe wina oweṱe ovandu uriri otja eṋe!”​—Oviung. 14:8-15.

10. Omomuano uṋe Paulus na Barnabas mu ve ri ṱekisa povandu va Likaonie?

¹⁰ Nandarire kutja va tja owo ovandu uriri tjimuna ovakwao, Paulus na Barnabas kaave hee kutja omerikotameneno wawo yeri tjimuna ingo wovanavisenginina. Hapo ovandu mba aveyevari kava ri ovahindwa mba ve eta ombuze ombwa? (Oviung. 13:2) Nu ka mba zu nokutwirisiwa nombepo ondjapuke nokupewa omaundjiro omawa? Ii, posi yokutja Paulus na Barnabas aave vanga kutja ovandu va Likaonie wina ve mune oviṋa oviwa mbyo, ndovazu va yakura ombuze ombwa.

11. Matu yenene vi okuhorera komerisusuparisiro wa Paulus tji matu zuvarisa?

¹¹ Matu horere vi komerisusuparisiro wa Paulus? Rutenga, atu paha okutangwa poo okuyakura ondjozikiro mena roviṋa mbi twa yenenisa momasa wa Jehova. Ma rire nawa auhe wetu tje ripura kutja: ‘Ovandu ku mbi zuvarisa mbi ve vara vi? Hapo mbi tjinda ovandu tjiva nombangu mokuhinokutjiwa, otja tji ve tjindwa motjiwaṋa tjetu?’ Otjiṋa otjiwa kutja Ovahongonone va Jehova mouparanga wouye auhe, ve tjita ozongondjero zokupaha ovandu varwe mbu mave yakura ombuze ombwa momaturiro wawo. Povikando tjiva, ve hepa okurihonga omaraka nombazu yovandu mbe varwa pondondo yokehi motjiwaṋa. Nu Ovahongonone va Jehova kave sokurivara ovananḓengu povandu mbo. Nungwari, owo ve kondja okutjiwa omundu auhe kourike we kokutja ve pahe omuano wokuṱuna komitima vyawo nombuze yOuhona.

12. Epafras wa raisa vi kutja kee ripurire kuye omuini uriri?

¹² Omuano warwe mu matu yenene okuraisa omerisusuparisiro komirari vya Jehova eendu tji matu kumbire varwe “mba pewa ongamburiro ohuze tjimuna indji oyetu.” (2 Petr. 1:1) Epafras wa tjita nao. Eye wa tamunwa ovikando vitatu uriri mOmbeibela, nu omOmatjangwa wa Paulus uriri. Ngunda aa paterwa mondjuwo mo Roma, Paulus wa tjanga kOvakriste mba ve kara mo Kolose kutja Epafras “aruhe u [ve] kumbira tjinene.” (Kol. 4:12)  Epafras aa tjiwa ovakambure ovakwao nawa, nu ee rikendere wo tjinene. Nandarire kutja eye wa ri puna Paulus “mondeko”, eye ka yandjerere ongaro ndjo kutja i mu tjaere okuripurira kovakwao nokuvekumbira. (Filem. 23) Nu tjiri wa tjita nao. Tjiri otjiṋa tji matji raisa kutja Epafras kee ripurire kuye omuini uriri. Okukumbira ovakarere va Jehova ovakwetu tjiri ku vatera tjinene, tjinenenene tji matu tamuna omana wawo mozongumbiro zetu.​—2 Kor. 1:11; Jak. 5:16.

13. Ove mo horere vi ku Epafras indu tji mokumbu?

¹³ Ripura novandu mbu mo yenene okukumbira. Tjimuna Epafras, ovakambure ovakwetu ovengi ve kumbira imba mbe ri mombongo yawo nomaṱunḓu nge nomerizirira omengi poo nge muna omauzeu wokutoora omerizirira omanene poo nandarire mbu mave sokutoora omukambo omunanḓengu poo mbe ri kehi yomarorero kongamburiro yawo. Nu varwe wina ve yenena okukumbira ovakwao vomana nge pitisiwa korungovi ndwi jw.org morupa ndwi “Jehovah’s Witnesses Imprisoned for Their Faith.” (Tara kehi yo NEWSROOM > LEGAL DEVELOPMENTS.) Nu wina, tu sokuzemburuka imba mba ṱirwa ovasuverwa vawo, imba mba kara moumba na movita, na imba mbe ri mouzeu wotjimariva. Tjiri oukahu kutja, pe novakambure ovengi mbu tu hepa okuveṱizira mozongumbiro zetu nu mbu mave munu ouwa mokuvekumbira. Indu tji matu ve kumbire, tu raisa kutja ka tu nokuripurira kweṱe oveni nungwari wina matu ripurire kozonḓero za varwe. (Fil. 2:4) Jehova u zuvira ozongumbiro otja inḓo.

14. Jehovah wa raisa vi otjihorera otjiwa tjiwa tjokupuratena ku varwe?

¹⁴ Otjiṋa tjarwe tji matji raisa kutja oweṱe overisusuparise pu pe ṱa pi, oupaturuke wetu wokupuratena ku varwe. Jakobus 1:19 ri tja tu ‘sokuhakahana okupuratena.’ Jehova omuini we tu raisira otjihorera otjiwa tjokutjita nao. (Gen. 18:32; Jos. 10:14) Tara kutja matu rihongo tjike kehungi pokati ka Jehova nomukarere we mu Eksodus 32:11-14. (Lesa.) Nandarire kutja Jehova kaa hepa ondunge ya Moses, eye we mu pa oruveze okuraisa oumune we. Omundu uṋe ngu mape ya a puratene nawa komundu ngwaa raisa omeripura omavi orure nao nu okuzambo a tjiti otja omundu ngo pa he? Nungwari, Jehova u puratena nomuretima kovandu mbe mu isana mongamburiro.

15. Me horere vi ku Jehova mokuyandja ombango ku varwe?

¹⁵ Ma rire nawa auhe wetu tje ripura omuini kutja: ‘Tjinangara Jehova ma yenene okurisusuparisa na puratene komundu wa kauriri otja tja puratena ku Abraham, Ragel, Moses, Josua, Manoak, Elia, na Hiskija, hapo ongwaye tji mbi hi nokusokuyandja ombango kovakambure ovakwetu wina, nokuvepa ondengero, nokupuratena koumune wawo, nandarire okuyakura oumune wawo ouwa? Hapo pe nomundu mombongo yetu poo meṱunḓu randje ngu me hepa okuyandja ko ombango nai? Otjikwaye tji me yenene okumutjitira? Nu me u tire pi?’​—Gen. 30:6; Ovapang. 13:9; 1 Ozomb. 17:22; 2 Ekuruh. 30:20.

16. Ombara David wa tjita vi Simi tje mu yamburura?

¹⁶ Omerisusuparisiro wina ye tu vatera kutja tu kare nomeritjaerero indu tjitwa tumbwa navi. (Ef. 4:2) Otjihorera tjapeke ohunga notjiṋa ho matu tji vaza mu 2 Samuel 16:5-13. (Lesa.) David novakarere ve va yambururwa na ve hihimasiwa kotutu i Simi, ngwa ri omuzamumwe wOmbara Saul. David wa tjinda otjiṋa tji nandarire kutja wari nomasa wokumuzepa. Hapo David wa yenena vi okutjaera omazenge we? Matu yenene okutjiwa kutja otjikwaye tji tje mu vatera tji twa lese Epsalme oritjatatu.

17. Otjikwaye tji tja vatera David okutjaera omazenge we, nu matu mu horere vi?

 ¹⁷ Omambo wokombanda poo omambo wopomautiro wEpsalme 3 ye raisa kutja ya uta okutjangwa indu David “Tja za nokutaura komuzandu we Absalom.” Ezeva 1 no 2 ye hitasana novitjitwa mbya tjangwa mekondwa 16 ra Samuel outjavari. Okuzambo Epsalme 3:4 ri raisa ongamburiro ya David: “Tji me ku ombatero ku Muhona, Eye me ndji zuvire kondundu ye ondjapuke.” Okutja eṱe wina matu yenene okukumba tji twa wirwa i ouzeu. Nu Jehova me tu pe ombepo ondjapuke, ndji tu vatera okutjinda tjamwa otjiṋa. Ripura noviṋa tjiva mbi yenena okukupindikisa tjinene nu mu mo sokuritjaera nokuisira ingo ngwe ku tjindi navi. U nongamburiro kutja Jehova ma yenene okutara kondjenda yoye nu e ku sere ondaya po?

18. Matu munu ouwa waye tji twa kayenda komurungu okuṱakamisa omirari nomaronga wa Mukuru?

¹⁸ Okutjita imbi mbi matu tjiwa kutja ombi ri ovisemba ku eta ozondaya ozonene. Okutja kaukumise Omiano 4:7 tji mari tja “ounongo otjo otjiṋa otjinanḓengu.” Nandarire kutja ounongo u zikamena kozondunge, owo tjinene u munika mozondando nḓu matu toora pendje noviṋa mbi matu tjiwa nokurihonga uriri. Nandarire ozombuka ze raisa ounongo. Ozombuka ze raisa ounonga mokupwika ovikurya vyazo moruveze roupyu. (Omiano 30:24, 25) Kristus, ngu uri ‘ounongo wa Ndjambi,’ aruhe u tjita oviṋa imbi mbi vi ri ovisemba ku Ihe. (1 Kor. 1:24; Joh. 8:29) Mukuru u tjiwa ombangu ndji i ri pokati kokukara nondando ombwa nokuitjita. Nu eye u sera ondaya kovandu overisusuparise monḓarorure nu mbe ṱakamisa imbi mbi mave tjiwa kutja ouatjiri. (Lesa Mateus 7:21-23.) Okutja kurisa oupanga woye kuna Jehova kutja aruhe u kare nomerisusuparisiro. Kokutja tu kare nomerisusuparisiro matu hepa okuṱakamisa mbi matu munu kutja ovisemba, nu ku kambura oruveze nomuretima nu matji tu etere ouṋingandu nai nga kongaaruhe.