1. Anni i efekto na makasarili nga espiritu na mundo ta kinapakalinno tam?

NGATTA marigatattam nga iyaplika i nagigiammu tam ta Uvovug na Dios? Tadday nga rason ay kawagattam i kinapakalinno tapenu makua nu anni i fustu, anna mapurueban i pattalupaddiattam nga mapakalinno. Taw nga “pangurianan ira nga aggaw,” aru nga totolay ta pallevu tam i ‘ayatadda i baggi da laman, anna kuartu laman i agga-nono da, palagopog, minappakatannang’ anna “ariad-da nga matangngallan i baggi anna nono da.” (2 Tim. 3:1-3) Nu egga nangngua tu makasarili, ngem nepoppoddu, puede nga ikalussaw yatun na tolay nga massesserbi ta Dios ngem baka passilanna i resulta ira natun. (Sal. 37:1; 73:3) Baka manono na tadday: ‘Egga kari serbina nu pagolluakku i pammakapianan na tanakuan? Nu ipè i baggì ta “kalinnakkan tu paddian,” mawanan kari nu kua tu respeto niakan i totolay?’ (Luc. 9:48) Mappeligro i makasta nga relasiottam ta kongregasion anna i panakkilalattam nga Cristiano nu ipamavuluttam nga influwensian ittam na makasarili nga espiritu na mundo. Ngem mabendisionan ittam nu gigiammuattam i makasta ira nga ehemplo ta Biblia anna parigan danatun.

2. Anni i efekto na matalo ira nga aripan na Dios nittam?

² Nu kayà tam nga mabbalin tu apparigattam i matalo ira, mawag tam nga gigiammuan nu anni i kingnguada nga makasta i  resultana. Kunnasi ira napeggan tu pakikkofun ta Dios, nakala tu fabor, anna napeggan tu sikan tapenu matuppal i urena? Importante i kunnaw nga klase na paggigiammu ta espiritual nga pakkakattam.

3, 4. (a) Kunnasi ittam makalawa tu espiritual nga instruksion? (b) Ngatta makagi tam nga ari laman tu basta pangà tu pakannammu i nelavu ta pakkakan ta espiritual?

³ Aru nga makasta nga tabarang anna passanay i malawà tam ta Biblia, ta Cristiano ira nga publikasiottam, ta website tam, ta JW Broadcasting, anna ta study anna asembli tam ira. Ngem segun ta kinagi ni Jesus nga mabibbig ta Juan 4:34, ari laman tu basta pangà tu pakannammu i espiritual nga pakkakan. Anni paga i nelavu? Turi ta niyavu na disipulos ni Jesus nu egga i nangiyangay sa tu kananna, nitabbagna: “I pakkatolè ay i pamarulo ku ta uray na Dios nga naddog niakan anna i pangituppal ta ipakua na.”

⁴ Para kani Jesus, nelavu ta espiritual nga pakkakan i pagguyu segun ta direksion na Dios. Kunnasi nga megitta yatun ta makan? Nu kunnasi nga mabattug anna masustini i baggi tam nu kuman tu masustansia nga makan, mapasikan i futu tam anna malladda i pangurug tam ta mannanayun nga inango nu makiparte ittam ta pangngua ta uray na Dios. Namippiga ka ngana nga minay ta miting para ta tana na serbisio nga ari tu makasta i urem—tapus milibbe ka nga narefreskowan anna napasikan kabalimmu nallayyagayya?

5. Anni i bendision ta pabbalin tu masirib?

⁵ I pattuppal ta instruksion nga naggafu ta Dios i mismu nga kebalinan na sirib. (Sal. 107:43) Sulit i bendision na kinasirib. “Awan tu kekumparanna ta ngamin nga karagatammu. . . . Yaw ay kayu na inango turi ira ta manammi tatun, anna danuri maggafù tu mapia tatun ay magalan tu magayayya.” (Prov. 3:13-18) Kunni Jesus: “Sangoye ta ammu nu ngana ngamin danaw, mapalag kamu nu kuan nu ira.” (Juan 13:17) Mannanayun i pagayayya na disipulos nu kanayudda kuan i ipakua ni Jesus nira. Ariadda basta inalawa ngana laman i tuttudduna anna ehemplona tatun laman nga aggaw. Nabbalin yatun tu parte na pattoleda.

6. Ngatta kattam nakuan magimmang nga iyaplika i nagigiammu tam?

⁶ Importante maski ta maddaggun i ari pagimmang ta pangiyaplika ta nammuattam nga fustu. Tapenu meyilustra, awayyana nga egga i rimienta, materiales, anna pakannammu na tadday nga mekaniko. Ngem arianna pammakapianan danatun nu kanna usan. Nu nammekaniko ngana yayya ta nappasa anna nabbalin ngana tu ekspiriensadu, mawag tu tulu-tuloy nga iyaplikana i nagigiammuna tapenu kanayun yayya nga malalaki anna produktibo. Kunnatun gapa, baka magayayya tam ta gafu megafu ta iyap-aplika tam i nabibbig tam ta Biblia. Ngem mannanayun i pagayayya nu sigga-pakalinno nga mattolay ittam segun ta instruksion ni Jehova kadaggaw.

7. Anni i magigiammu tam ta ehemplo ira ta Biblia?

⁷ Ikonsidera tam i karuan nga situasion nga kapurueban na kinapakalinno anna innattam nu kunnasi inarubang na matalo ira nga aripan gari i kuddanatun nga kapurueba. Massikan ittam ta espiritual nu ari laman nga basta pangà tu informasion i kuattam. Yari tu nonopan nu kunnasim personal nga meyaplika i kada punto, anna ari italattan nga kuan yatun.

8, 9. Anni i magigiammu tam ta kinapakalinno ni apostol Pablo ta rekord na Kingngua 14:8-15? (Innan i letratu ta gafu na artikulo.)

⁸ Uray na Dios nga “mapaliag ngamin i totolay anna kannammuad-da i kurug.”  (1 Tim. 2:4) Kunnasim imammatan i nadduruma nga klase na totolay nga ari paga makannammu ta kinakurug? Maski inaleg ni apostol Pablo ta sinagoga ira danuri makannammu ta Dios, siguradu nga arianna naffokus nga layyagayyan danuri laman Judio. Napurueban i pagaddetan na kinapakalinnona ta reaksion danuri na maddayaw ta appe ira nga dios.

⁹ Angngariganna, ta ollu nga pammisionero ni Pablo, abbo na taga-Licaonia nga ira dua ni Bernabe i falsu nga diosda​—da Zeus anni Hermes​—nga nabbalin tu extraordinario nga tolay. Natenta kari da Pablo anni Bernabe nga makidansa tatun nga popularidad? Ari kari nga makapabannay nakuan yatun ta ngamin nga pameppersigi nga naekspiriensada ta dua nga siudad nga kababalidda nga binisita? Nanonoda kari nga makoffun yatun nga nesimmu ta pangiwara ta mapia nga dumug? Ari vuluvuga! Insigida nga finugaddadda ira gukaban na pamisil ta sinnudda anna pakkarela ta nattarangngan na totolay, nga nikukkulleda: “Ngatta ta kuan nu i kunnaw? Tolay kami laggapa tu kagitta nu!”​—King. 14:8-15.

10. Ngatta ikonsidera da Pablo anna Bernabe nga kapantayda i taga-Licaonia ira?

¹⁰ Narekunnisi da Pablo anni Bernabe nga tolay lagapa ira, nga imperfekto ira. Ngem ari kayà kagian natun nga parehu i klase na paddayawda ta pagano ira. Ari kari nga misionero ira nga egga i espesial nga annungadda? (King. 13:2) Ari kari nga zinelugan ira na masanto nga espiritu anna nabaruasian tu kappabbaw nga iddanama? Wan, ngem nalippawa da Pablo anni Bernabe nga makalawa gapa i taga-Licaonia tu parehu nga pribilehio nu magginna ira ta mapia nga dumug.

11. Nu mallayyagayya, kunnasi tam maparigan i kinapakalinno ni Pablo?

¹¹ Kunnasi tam maparigan i ehemplo ni Pablo ta kinapakalinno? Ollu, mawag tam lillitan i tentasion nga magekspekta onu mangalawa tu sobra nga kedayaw megafu ta netuppal tam ta uffun ni Jehova. Iyavu nakuan na kada tadday ta baggina: ‘Kunnasì kari imammatan i totolay nga layyagayyakku? Posible kari nga ariakku mataga-tageno nga egga i faborakku nga partikular nga tolay ta lugar ku?’ Makomendan i organisasion na Saksi ira ni Jehova ta gigiammuadda i teritoriada ta interu mundo tapenu ammuan nu egga paga danuri magginna ta mapia nga dumug. Nu mittan, mawag nga gigiammuadda i lengguahe anna kultura danuri totolay nga imammatan na magaru nga mapaga-pagurayan. Ari vuluvuga nga ikonsidera danuri Saksi nga magangngua tu kunnatun nga mas atannang ira. Mappursigi lallagu ira nga alippawatan i kada indibidual tapenu madde i futuna gukaban na mensahe na Pappatulan.

12. Kunnasi nipasingan ni Epafras i ari makasarili nga pangikavurung ta tanakuan?

¹² I tadday paga nga makua tam tapenu mapakalinno nga tuttulattam i instruksion na Dios ay gukaban na pangipakimallo turi ira ta dana nga ‘neddan tu angngurug nga kunne ta angngurug nga neyawa nittam.’ (2 Ped. 1:1) Kunnatun i kingngua ni Epafras. Namittallu laman yayya nga natukoy ta Biblia​—ngamin ta nainspiran nga tura ni Pablo. Durante nga agga-fuku si Pablo ta mismu nga balena ta Roma, nattura yayya ta Cristiano ira nga taga-Colosas nga ‘kanayun nga idasa-dasal ira ta napafutu’ ni Epafras. (Col. 4:12) Ammammu ni Epafras i wawwaragi, anna talaga ikavurunganna ira. Ari nga megafu ta ‘kavulu nga nefuku’ yayya ni Pablo ay arianna ngana nga masingan i espiritual nga pakawagan na tanakuan. (Flm. 23) Yayya nga egga i kingnguana. Ari kari nga seniales yatun na ari makasarili  nga pangikavurung? Dakal i pakawayya na pangipakimallo tam ta kapangngurug tam, netallugaring nu espesipiko nga tukuyattam i ngagadda.​—2 Cor. 1:11; Sant. 5:16.

13. Kunnasim maparigan i ehemplo ni Epafras ta pakimallo mu?

¹³ Nonopan i ngagan danuri puedem ipakimallo. Kagitta ni Epafras, aru ta wawwaragi tam i mangipakimallo ta kakongregasiodda anna ta familia ira nga mangiyabaga ta madammo ira nga responsibilidad onu meparubang ta serioso ira nga desision onu tentasion. Aru i mangipakimallo ta nakalista ira nga ngagan ta artikulo ta jw.org nga “Jehovah’s Witnesses Imprisoned for Their Faith.” (Innan i NEWSROOM > LEGAL DEVELOPMENTS.) Daddammattam nakuan gapa danuri natayan tu iddeddukan, danuri nafektan ta nappasa ira nga kalamidad anna gerra, anna danuri magatta-attam ta ziga na pattolay. Manawag nga egga danuri wawwaragi nga magawag tu pakimallo tam anna mabenefisiowan tatun. Nu ipakimallo tam ira, mepasingattam nga ari laman tu i pammakapianattam i nonopattam, nu ari, pammakapianan gapa na tanakuan. (Fil. 2:4) Gigginnan ni Jehova i kunnatun ira nga pakimallo.

14. Kunnasi nangipasingan si Jehova tu kapianan nga ehemplo na pagginna?

¹⁴ Tadday paga nga aspeto nga maggukug ta kinapakalinno tam ay i sigga-paran nga pagginna tam ta totolay. Kagian na Santiago 1:19 nga mawag tu ‘sigga-paran ittam nga magginna.’ Si Jehova i kapianan nga ehemplo taw nga gannug. (Gen. 18:32; Jos. 10:14) Innattam nu anni i magigiammu tam ta pakkatabba-tabbag nga nerekord ta Exodo 32:11-14. (Bibbigan.) Maski ari mawag ni Jehova i makagi ni Moises, niddanna lagapa si Moises tu tiansa tapenu kagian i mataga-tagenona. Sinni nga tolay i mapasensia nga magginna ta arrason na tadday nga nakaliwa dati ta pagimamma, kabalinna kuanna paga i kagian natun nga tolay? Ngem, mapasensia lagapa nga magginna si Jehova ta totolay nga sigga-angngurug nga makiyuffun sa.

15. Kunnasi tam maparigan si Jehova ta pangikakua ta tanakuan?

¹⁵ Iyavu tam gafu ta baggi tam: ‘Nu maddukag si Jehova tapenu makilallang ta totolay anna ginnan ira gitta na kingnguana kada Abraham, Rachel, Moises, Josue, Manoa, Elias, anni Hezekias, ari kari nga mapaguyu ngà nga mas ikakua i ngamin nga kapangngurug ku, iddan ira tu dignidad, ginnan i ideyada ira, anna tuttulan paga lagu i makasta ira nga ideyada? Egga kari ta kakongregasiokku onu ta familià i mepangngo ta atensiokku ta maddaggun? Anni nakuan i kuakku meyannung tatun? Anni ngana gafu i kuakku tatun?’​—Gen. 30:6; Uk. 13:9; 1 Pat. 17:22; 2 Cro. 30:20.

16. Anni i reaksion ni Patul David turi ta pinappatu ni Simei i uluna?

¹⁶ Makoffun gapa i kinapakalinno tapenu mafugaddattam i baggi tam nu egga i mamappatu ta ulu tam. (Efe. 4:2) Mabibbig i makasta nga ehemplo meyannung tatun ta 2 Samuel 16:5-13. (Bibbigan.) Inattamman ni David anna na aripanna ira i panguyu-uyaw anna pisikal nga pangatake ni Simei, tadday nga parientes ni Patul Saul. Pinagurayanna yatun maski nu egga i pakawayyana nga pagimmangan yatun. Kunnasi nakonnug tu sikan si David tapenu kontrolan i espirituna? Makagigiammu ittam taw gukaban na pangusito ta mekatallu nga Salmo.

17. Anni i nakoffun kani David tapenu makontrol i espirituna, anna kunnasi tam maparigan yayya?

¹⁷ Binuu ni David i Salmo 3 turi ta sinammangnganna  si Absalom nga anana. Metonos i bersikulo 1 anna 2 natun ta nesimmu ira nga mabibbig ta kapitulo 16 na Mekadua nga Samuel. Tapus ta Salmo 3:4, mabibbig i pakkomfiansa ni David: “Magagal ngà nga makiyoffun ta YAFU ay tabbagan nà ta vukig na nga masanto.” Puede ittam gapa makimallo nu maatake ittam. Tabbagan ittam ni Jehova gukaban na pangiyawa tu masanto nga espirituna tapenu makapagattam ittam. Egga kari i manono mu nga situasion nga mawag mu i pangifugag ta baggi onu napafutuan nga pakoman i ari patas nga pangikalussaw nikaw? Komfiansa ka kari nga masingi-singan ni Jehova i ziga mu anna bendisionan naka?

18. Kunnasi tam mabenefisiowan nu kanayuttam nga iyaplika i instruksion nga naggafu ta Dios?

¹⁸ Mangirattal tu aru nga bendision i pangngua tam ta ammu tam nga fustu. Yari tu kunna Proverbio 4:7 nga “i kinasirib i pinaka-importante nga gannug”! Maski naggafu i sirib ta pakannammu, mas egga i koneksion natun ta desisiottam ira anne ta informasion laman ira nga malippawa tam. Maski paga i taggang ira ay mangipasingan tu sirib. Mangipasingan ira tu negagangay nga sirib gukaban na papprepara tu makan durante nga ari paga agguroran. (Prov. 30:24, 25) Kanayun nga kuan na Cristo, i “ka-uto na Dios,” i gannug ira nga mamagayayya ta Yama. (1 Cor. 1:24; Juan 8:29) Ammu na Dios i pakkaduman na pappili tu fustu anna pangiyaplika ta napili. Anna bala-balattanna danuri mangipasingan tu kinapakalinno durante nga magatta-attam anna danuri iyap-aplikada i nammuadda nga fustu. (Bibbigan i Mateo 7:21-23.) Ikagumammu nga pattalupaddianan i makapagaram nga espiritual nga pakkaravulu nu sitaw posible nga makepasingan tu kurug nga kinapakalinno. Mawag i tiempo anna pasensia tapenu meyaplika i ammu tam nga fustu, ngem seniales yatun na kinapakalinno nga mangirattal tu pagayayya ta maddaggun anna ta mannanayun.