1. Ngapi nkareso zokukondjera tupu uwa wanyamwetu na zi tu kundama?

MORWASINKE ya karera udigu kusikisa mo eyi atu lirongo moBibeli? Morwa pwa hepa elinunupiko mokurugana youhunga, nye kapi ya kara ureru kulinunupika. Pomazuva aga gopouhura vantu wovanzi ‘kwa lihara tupu vene, kwa dowokera yimaliva, kwa lifumadeka tupu vene, kwa linenepeka, awo hena vankenye omu.’ (2 Tim. 3:1-3) Ngovakareli vaJehova, ose twa yidiva asi nonkareso odo nondona, nye poyiruwo yimwe kuvhura yi moneke asi vantu ava ava rugana yininke oyo kuna kuvatompoka meparu. (Epis. 37:1; 73:3) Kuvhura tu lipure asi: ‘Hepero kukondjera uwa wovakwetu mevango lyokukondjera wanyamwange ndi? Nsene ni linunupika, vantu kuvhura va fumadeke nge ndi?’ (Ruk. 9:48) Nsene tu kara nonkareso zokukondjera tupu uwa wanyamwetu, mombungakriste kapi nga mu kara uumwe ntani ngayi digopera wopeke mokutudimburura asi ose Vakriste. Nye  nsene tu lironga yihonena yoyiwa eyi va tumbura moBibeli nokuyikwama, ngatu gwana matungiko.

2. Mauwa musinke ngatu gwana nsene tu lironga yihonena yovakareli vaJehova wovalimburukwi?

² Nsene tuna hara kuhonena vakareli vaJehova wovalimburukwi, twa hepa kukonakona omu va hafesere Jehova. Yisinke va rugene yipo va kare vakaume vaKarunga ntani va gwane nonkondo dokumulimburukwa? Nsene tu resa nokuteda ko koyihonena oyo, epuro lyetu nga li nkondopara.

3, 4. (a) Kupi atu gwana nondya dopampepo? (b) Morwasinke natu uyungira asi yinzi ya hamena mo monondya dopampepo?

³ Ose kugwana mapukururo gomawa moBibeli nomoyimbapiratjangwa yetu nokoIntaneta zetu nokoJW Broadcasting nokomapongo ntani koyigongi. Kuliza neyi ga tente Jesus mwaJohanesa 4:34 kulikida asi yinzi ya hamena mo monondya dopampepo kupitakana tupu kukara nediwo. Yisinke ya hamena mo? Jesus kwa tente asi: ‘Nondya dange dedi dokurugana mpango zogu ga tuma nge nedi dokusikisa mo sirugana sendi.’

⁴ Jesus kapi tupu ga divire Nonkango daKarunga nye hena nga di sikisa mo. Ngapi omu Nonkango daKarunga da kara ngwendi nondya? Ngwendi moomu marutu getu aga pama apa atu li nondya doukanguki, epuro lyetu nalyo kupama apa atu sikisa mo mpango zaKarunga. Poyiruwo yimwe ose kulisininika apa atu zi mokuzuvhisa, nye apa atu ka tengura ose kunkondopara nokulizuvha epwizumuko.

5. Mauwa musinke atu gwanene mo pokukara nounongo?

⁵ Nsene tu tura pasirugana nompango daKarunga, ngatu kara vanongo. (Epis. 107:43) Kukondjera unongo mulyo unene. Bibeli kutanta asi: ‘Kutupu eyi wa hara yokuvhura kuheteka po. Ava vana kukara vanongo vanerago; unongo ngau va pa mwenyo.’ (Yis. 3:13-18) Jesus kwa tente asi: “One vanerago ntene mu diva yininke eyi, nye mu yi rugane.” (Joh. 13:17) Varongwa vaJesus va hepere kukwama mapukururo gendi yipo va kare noruhafo. Eparu lyawo nalinye awo kwa kweme mapukururo gena.

6. Morwasinke natu twikilira kutura pasirugana eyi tuna kulironga?

⁶ Nampili naina, ayo mulyo kutura pasirugana eyi tuna kulironga. Mokuyifanekesa, makeninga kuvhura a kare noyiruganeso nediwo. Nye kapi ta gwanene mo uwa nsene kapi ana kuyiruganesa. Nampili yi kare asi ga kara noudivi woyirugana youmakeninga, simpe ga hepa kutwikira kutura pasirugana udivi owo yipo a kare makeninga gomuwa. Mokulifana, ose kugwanena mo mauwa apa atu tura pasirugana eyi atu resa moBibeli. Nye mokutwikira kukara noruhafo, twa hepa kutura pasirugana mavyukiso gaJehova nkenye ezuva.

7. Yisinke natu ka lironga kuhamena vakareli vaJehova?

⁷ Tu konakoneni maukaro gamwe aga naga tu ninkisa yi tu karere udigu kulinunupika nomu vakareli vaJehova vanare ya va tompokere kukara nelinunupiko momaukaro ogo. Mokupama pampepo kapi ya gwanena po tupu kudiva mauzera. Ngomu natu ka konakona eyi va rugene, gazadara  ko omu no yi tura pasirugana wa hana kulikatakata.

8, 9. Ngapi omu Paurusa ga likidire elinunupiko kuliza neyi va tjanga moYirugana 14:8-15? (Tara efano pepenuno 3.)

⁸ Karunga kwa hara asi: “Vantu navenye va paruke, awo hena va ka sike kediwo lyousili.” (1 Tim. 2:4) Ngapi o tara vantu ava va dira simpe kudiva usili? Nampili ngomu mupositoli Paurusa ga zuvhisilire Vajuda ava va divire nare Karunga, age simpe nga zuvhisire ko vantu wopeke. Monkedi ezi va mu tambwire ava ngava karere yikarunga nayopeke ngano ya mu ninkisire a linenepeke.

⁹ Morugendo rwawo rokuhova ngovatumwa, Vasilikoyoniya kwa here kukarera Paurusa naBaranabasa. Ngoso ya va ninkisire va hare kufumana ndi? Awo ngoso kwa yi tere asi azo mpito zongwa mokupwizumuka ko komahepeko aga va pitire moyitata eyi va hovere kudingura ndi? Awo ngoso kwa gazarere asi vantu nava tambura mbudi zongwa morwa yeeyi va va tambwire monkedi zongwa ndi? Hawe. Awo kwa tawire yikoverero yawo nokudukira mombunga zovantu oku tava zigire asi: ‘Yinke muna kurugana one? Ani nose tu vantu ngwendi nyone.’—Yirug. 14:8-15.

10. Morwasinke Paurusa naBaranabasa va dilire kulizuvha asi awo mulyo kupitakana Vasilikoyoniya?

¹⁰ Apa Paurusa naBaranabasa va uyungire asi nawo vantu tupu, kapi va tembe asi ukarelikarunga wawo kwa lifene nou wovapagani vena. Awo kwa kere vatumwa. (Yirug. 13:2) Awo hena kwa va gwavekere ntani va kere nehuguvaro lyokukaparukira meguru. Paurusa naBaranabasa va yi divire asi Vasilikoyoniya nawo ngava gwana mauwa gokulifana nsene va tambura mbudi zongwa.

11. Ngapi natu kwama sihonena saPaurusa selinunupiko mokuzuvhisa?

¹¹ Ngapi natu kwama sihonena saPaurusa selinunupiko? Pomuhowo, twa hepa kunyokera po kuliharera mfumwa kweyi twa tompora mononkondo daJehova. Twa hepa kulipura asi: ‘Ngapi omu ani tara vantu ava ani zuvhisire? Name kulikida mpongo ngwendi vantu vamwe womomukunda gwetu ndi?’ Nombangi daJehova uzuni mudima kutwikira kuzuvhisira monomukunda dawo yipo va dive nsene poveli simpe ava nava tambura mbudi zongwa. Poyiruwo yimwe, awo kuhetekera ko kulironga maraka nonompo dovantu ava ava tara momukunda asi kwato mulyo. Kapi ya wapa koNombangi edi adi zuvhisire vantu owo di lizuvhe asi ado mulyo unene. Nye da hepa kuvakwata egano nokuvavatera va tambure mbudi zoUhompa.

12. Ngapi omu Epafurasa ga yi likidire asi ga kere nosinka kovakwawo?

¹² Nkedi zauvali omu natu linunupika kuna kara pokukanderera po ava va kara ‘nepurozuni ngwendi lyetu.’ (2 Pet. 1:1) Oyo yiyo ga rugene Epafurasa. Age kwa mu tumbura yikando yitatu tupu monombilive daPaurusa. Apa Paurusa ga kere monomango membo lyendi moRoma, age kwa tjangerere Vakriste womoKorosi asi Epafurasa ‘kuvakondjera nkenye apa momakanderero.’ (Koros. 4:12) Epafurasa kwa divire nawa vapuli vakwawo ntani ga  va here unene. Nampili ngomu ga kere ‘modorongo’ naPaurusa, age simpe ga kere nosinka koyihepwa yopampepo yava wopeke. (Fir. 23) Age kwa rugene ko yuma. Oyo kulikida asi kapi ga ligazarere tupu mwene. Kukanderera po vapuli vakwetu mulyo, unene po apa atu va tumbura komadina.—2 Kol. 1:11; Jak. 5:16.

13. Ngapi no honena Epafurasa pokukanderera?

¹³ Gazadara ko ava no vhura kutumbura komadina pokukanderera. Ngwendi Epafurasa, sinzi sovanavazinyetu kukanderera po vapuli vakwetu womonombungakriste dawo nava va kara noyitumbukira momapata ndi ava vana kupita momaheteko. Wovanzi kukanderera po vanavazinyetu ava va tumbura mosirongwa sokoIntaneta zetu jw.org asi: “Nombangi daJehova kwa di zedira morwa epuro lyawo.” * Ntani hena, ayo mulyo nsene tu diworoka ava va zumbanesa vahali vawo monomfa nava va pita moyimpagwa nomoyita ntani nava vana kara moruhepo. Yosili, pwa kara vanavazinyetu wovanzi ava natu vhura kukanderera po. Apa atu va kanderere po, ose kulikida asi kapi tuna kukondjera tupu uwa wanyamwetu. (Fil. 2:4) Jehova kupurakena komakanderero ogo.

14. Ngapi omu Jehova ga tu tulira po sihonena sosiwa sokupurakena?

¹⁴ Nkedi zimwe omu natu likida elinunupiko kuna kara pokupurakena wopeke. Jakopo 1:19 kwa tanta asi twa hepa ‘kugenderera kuzuvha.’ Jehova ga tu tulira po sihonena sosiwa sokupurakena. (Gen. 18:32; Jos. 10:14) Tara eyi natu lirongera ko kononkango da kara mwaExodus 32:11-14. (Resa.) Nampili ngomu Jehova ga dilire kuhepa magano gaMosesa, age simpe ga mu pere mpito a pwagese malizuvho gendi. Kuvhura o purakene komuntu ogu a tura mapuko nokutambura hena magano gendi ndi? Jehova age, kupurakena kovakareli vendi wovalimburukwi.

15. Ngapi natu honena Jehova?

¹⁵ Natuvenye twa hepa kulipura asi: ‘Nsene asi Jehova kuruganena kumwe novantu pokuvapurakena ngwendi moomu ga yi rugene kwaAbirahamu naRakera naMosesa naJosuwa naManowa naEliya naHesekiyeli, name kuvhura ni purakene komagano govanavazinyetu nokugatambura ndi? Kweli ogu ana hepa evatero lyange mombungakriste ndi mepata lyetu ndi? Yisinke nani hepa kurugana ko?’—Gen. 30:6; Vap. 13:9; 1 Vah. 17:22; 2 Hist. 30:20.

16. Yisinke ga rugene Hompa Ndafita apa ga mu swawire Simeyi?

¹⁶ Elinunupiko kutuvatera tu lipangere nsene vana tu handukisa. (Efe. 4:2) Sihonena sagumwe ogu ga linunupikire kusigwana mwa-2 Samwere 16:5-13. (Resa.) Ndafita nomarenga gendi kwa lididimikilire eswauro lyaSimeyi gekoro lyahompa Sauru. Ndafita kwa lididimikire nampili ngomu ga kere nononkondo dokumutengeka. Yisinke ya mu vaterere a lipangere? Kuvhura tu gwane ko egano pokukonakona mEpisarome egaununo lyautatu.

17. Yisinke ya vaterere Ndafita a lipangere ntani ngapi omu natu mu honena?

¹⁷ Etwaromo lyEpisarome egaununo 3 kulikida asi egaununo olyo kwa li tjenge ‘apa  Ndafita ga tjwayukire a duke munwendi Abisaromo.’ Velise 1 nezi 2 kwa liza noyihorokwa eyi ya kara megaununo 16 lyaSamwere gwauvali. Episarome 3:4 kwa tanta asi: “Ame kukuga unene ekwafo kwaHOMPA, makura ta zuvhu nge kondundu zendi zokupongoka.” Nose kuvhura tu kanderere nsene kuna kupita momahepeko. Jehova nga tu pa mpepo zendi zokupongoka zi tu vatere tu lididimike. Kuvhura o gazadare ko ukaro omu wa hepa kulipangera nokugusira po ava vana ku handukisa mowina ndi? Wa yi pura asi Jehova kumona ruhepo roge ntani asi kuvhura a ku vatere ndi?

18. Mauwa musinke ngatu gwanena mo nsene tu tura pasirugana nompango domoBibeli?

¹⁸ Kurugana youhunga kureta matungiko. Eyi yiyo azi uyungire Bibeli moYisewe 4:7 asi: “Unongo yiso sininke sosinene po.” Nampili ngomu unongo va u tatekera kediwo, awo kwa kwatera mo matokoro aga atu tura po mevango tupu lyokudemenena kweyi twa lironga. Nampili yimbumburu kulikida unongo. Ayo kupungura nondya dayo pokurombo. (Yis. 30:24, 25) Kristusa ogu va singonona asi ‘unongo waKarunga’ kurugana nkenye apa eyi ayi hafesa Oguhwe. (1 Kol. 1:24; Joh. 8:29) Karunga ga diva elisigo eli lya kara pokatji kokutura po etokoro lyewa nokusikisa mo etokoro olyo. Age kufuta ava ava rugana youhunga nokulikida elinunupiko ntani elididimiko. (Resa Mateusa 7:21-23.) Yipo nye, twikira kuvatera wopeke yipo navenye womombungakriste va karerere Jehova nelinunupiko. Ayo kugusa siruwo ntani pwa hepa elididimiko mokurugana youhunga, nye ayo kulikida asi twa linunupika ntani ngayi tu retera ruhafo ngesi dogoro narunye.