1. Sipilitu ya mu kaye ya kulishaka yatha kukundama vati kulikehetha kwetu?

VIKA kwapwila kwakukalu kupangetha vitulilongetha mu Lijwi lya Njambi? Mwafwa kwatonda tupwe va kulikehetha, oloni kulikehetha kethi kwakwathi. Muno mu “matangwa a kukotoka” tuli mukati ka vanu “vaka-kulithzema vakevo vavenya, vaka-kuthzema vimbongo, vaka-kulishasha, vaka-kulijundula vakevo vavenya” na ‘vaka-kujeneka kulinyunga.’ (2 Tima 3:1-3) Tukalithzivi kuvihya nga vanu vamwetha sipilitu ya kulishaka, oloni tunatha kumona ngwetu vyuma vili na kuvendela vwino, cho vali na kulikuwa kuyoya. (Myatho 37:1; 73:3) Tunatha kulihula ngwetu: ‘Kuma kwa theho kutwameka vithinganyeka vya vakwetu kulutwe ndi? Nga njipwa “wamundondo,” cho vanu kuvanjithingimika ndi?’ (Luka 9:48) Nga twechelela sipilitu ya kaye ya kulishaka itungumune, cho twatha kwonowetha chithzemo na vuthamba vitukalikuwu mu chikungulukilo chetu vije vikamwetha ngwavo tu vaka-Kilisitu. Oloni tuvethzika nga tulilongetha vya vanu va mu Mbimbiliya na kuvatembwinina.

2. Twatha kutembwinina vati vangamba va Njambi va kulongwa?

 ² Nga tushaka kutembwinina vanu va kulongwa, cho tunapande kulilongetha vyuma vyavivwa vivalingile. Vika vyavakwathele vatakamethe vuthamba vwavo na Njambi na kuwana vivethzikitho vyendi, cho ndthzili yavakwathele kulinga chithzango chendi vaiwanene vati? Kulilongetha mu ngila eyi kunapu kwa theho manene.

3, 4. (a) Tukawana vati vukwathi vwa ku sipilitu? (b) Vika twendekela ngwetu kulilongetha Mbimbiliya kukwemanene lika ha kuthzivuka viñanda vyavingi?

³ Vakatunangula na kutulongetha mwamuvwa kupangetha Mbimbiliya na mavulu etu na wembusaiti yetu na JW Broadcasting na viwano vyetu vya chikungulukilo na viwano vyakama. Oloni kwetheketha na majwi a Yesu aje ali ku Yowano 4:34, kulilongetha Mbimbiliya kukwemanene lika ha kuthzivuka viñanda vyavingi. Vyuma muka vikwavo vitunapande kulinga? Yesu wendekele ngwendi: “Vyakulya vyange vinapu kwononoka chithzango cha uje wanjitumine na kumanetha vipangi vyanjanene ngechi njivilinge.”

⁴ Kuli Yesu, vyakulya vya ku sipilitu vinambatethelela na kukavangeya kutwamenena kwa Njambi. Vinapu ngwe vyakulya mu ngila muka? Mivila yetu ikakanyama na kuthikima nga tulya vyakulya vyavivwa, mu ngila imo lika, nga tulinga chithzango cha Njambi, cho tupwa va kuthimpa na kukala na likulahelo. Kuma kumwethi kulithziva kushuvuluka na kukala na ndthzili nga mutunda mu lihya ndi?

5. Vivethzikitho muka vituwana nga tukala na mana?

⁵ Kwononoka mashiko a Njambi kukekwo kukala na mana. (Myatho 107:43) Nga tulifwita kukala na mana tuvethzika. “Navimo vyahi viushaka vilyetheka na mana. . . . Mana anapu ngwe muti wa mwonyo nthsina ya kuvwahelela kwa voshe vaje vauvumbatela.” (Vithi 3:13-18) Yesu wendekele ngwendi: “Nga mwathzivuka vyuma evi, mukavethzika nga mukavilinga.” (Yowa 13:17) Kuvwahelela kwa Vandongethi va Yesu, kwemanene ha kutwalelelaho kulinga vije vyavalekele ngwendi valinge. Kuvononokele lika vilongetha vya Yesu ha thimbu yakele navo, oloni valingile ngocho mu kuyoya kwavo kwoshe.

6. Mwafwa vika tunapande kutwalelelaho kukala na mana?

⁶ Na matangwa ano kwapwa kwa theho kutwalelelaho kupangetha vyuma vitulilongetha. Chakumwenako, muka-kuvwahetha makina atha kukala na mana na vikwata vya kupangetha. Oloni vije vikwata kuvyatha kumukwatha nga kavipangetha. Nga muka-kuvwahetha makina ali na lyethzi, cho napande kutwalelelaho kupangetha vyanalilongetha mangana atwaleleleho kupwa chitongwe na kupanga mwamuvwa. Mu ngila imo lika, ha thimbu itupangetha vitulilongetha mu Mbimbiliya, tuvwahelela. Oloni kuvwahelela kwa thimbu yoshe kwemana ha kulikehetha na kwononoka mashiko a Yehova ha litangwa na litangwa.

7. Tulilongetha vika kuli vangamba va Njambi va kulongwa va kuthañulu?

⁷ Tuchimoneni vukalu vumo vuje vwatha kutwonowetha kupwa va kulikehetha, cho tulilongetha muvavuhyanenenemo vangamba va Njambi va kulongwa va kuthañulu. Kukola ku sipilitu kukwemanene lika ha kuthzivuka viñanda vyavingi. Ngechi, thinganyekethetheni mumwatha kupangethela  evi vithimpi, cho shangumukeni kulinga ngocho.

8, 9. Viñanda vivanathoneka ku Vilinga 14:8-15 vimwetha vati kulikehetha kwa kapositolo Paulu? (Kengeni chikupulo ha liputa 3.)

⁸ Njambi ashaka ngwendi “vanu voshe vovoke na kweta ku kuthzivuka vuthunga.” (1 Tima 2:4) Mukamono vati vaje kanda valilongethe vuthunga? Kapositolo Paulu wambulwilile mu masinangonge kuli vaje vathzivukile vyavindondo hali Njambi na kuli vaje kuvapwile Vayunda. Vanu vaje vakele na kulemetha tumponya muvathzivile muthzimbu wendi valingile vyuma vije vyethekele kulikehetha kwendi.

⁹ Ha vungendthzi vwendi vwa vumishinali vwa kulivanga, Paulu waile na Mbanambase ku nganda ya Lisitala. Vanu va ku Likaoniya vashangathzalele Paulu na Mbanambase ngwe vinjambi, cho vavalukile mathzina a vinjambi vavo a Zeyase na Helemese. Kuma oku kwalingithile Paulu na Mbanambase vashakethzeke luthsimo ndi? Kuma vathinganyekele ngwavo eyi inapu thimbu ya kuhwima ku mapaketho avaliwanene nawo mu vinganda vivali vivendelele ndi? Kuma vathinganyekele ngwavo kuvashangathzala kukwatha vanu vavangi vathzive muthzimbu wauvwa ndi? Embwe. Oho vene vatavothzwele vuthzalo vwavo na kushatukila mukati ka mbunga, cho vatambekele ngwavo: “Omwo vikajo muli na kulinga chuma echi? Netu tunapu tu vanu ngechi mweni.”—Vili 14:8-15.

10. Paulu na Mbanambase valumbunwine vika muvendekele ngwavo, navo vanu ngwe vaka-Likaoniya?

¹⁰ Paulu na Mbanambase muvendekele ngwavo navo vanu ngwe vaka-Likaoniya, kuvalumbunwine ngwavo navo vakele na kulemetha vinjambi va makuli. Kuma Njambi kethi ikeye wavangwile kupwa tumishinali ndi? (Vili 13:2) Kuma kuvavavwavethele na sipilitu ya kujela na kukala na lilavelelo ndi? Mukemwo vene, oloni Paulu na Mbanambase valumbunwine ngwavo nga vanu va ku Likaoniya vatambula muthzimbu wauvwa, cho navo vawana vivethzikitho vya kulifwa.

11. Nga twambulwila vanu, twatha kutembwinina vati kulikehetha kwa Paulu?

¹¹ Twatha kutembwinina vati kulikehetha kwa Paulu? Cha kulivanga, kethi tuvandamene nambe kutambula kathingimiko ha vyuma vitunalingi mundthzili ya Yehova. Munu na munu alihule ngwendi: ‘Njikamono vati vanu vanjikambulwila? Kuma njikayengula muyati wa vanu vamo ndi? Vakaleho va Yehova mu kaye koshe vakatondo vingila vya kwambulwilamo vanu vaje vatha kutambula muthzimbu wauvwa. Oku kukatondo valilongethe miyati na vithemwa vya vanu vaje vavamona ngwavo kethi va theho. Vakaleho vaje vambulwila ku vanu va chifwa echi kuvapandele kulimona kupwa va theho manene. Oloni vanapande kuvaka mbunge mangana muthzimbu wa Vumwene uvete ku vimbunge.

12. Epafalase wamwethele vati ngwendi wakele vakwavo mu vithinganyeka?

¹² Ngila ikwavo itumwetha ngwetu tunononoka lishiko lya Njambi, inapu kulombelela vaje ‘vali na likulahelo lije lya theho ngwe lyetu.’ (2 Petu 1:1) Mukemwo mwalingile Epafalase. Vanamutumbula lika lutatu mu Mbimbiliya, mu mikanda ya Paulu ya kuhwiminina. Muvamukutilile ku njuvo, Paulu  wathonekelele vaka-Kilisitu va ku Kolose ngwendi Epafalase, “thimbu yoshe [wavanukile] mu malombelo endi.” (Kolo 4:12) Epafalase wathzivukile mwamuvwa Vandolome, na kuvaka manene mbunge. Nameme Epafalase ‘wakele mu kamenga’ na Paulu, oloni kevalele vujene vwa ku sipilitu vwa vakwavo. (Filim 23) Cho wavakwathele. Oku kumwetha ngwavo wavakele mu vithinganyeka. Kulombelela vakwetu vangamba va Yehova kukakwatha manene, maneneni nga tuvatumbula ha mathzina avo.—2 Koli 1:11; Yako 5:16.

13. Mwatha kutembwinina vati Epafalase mu malombelo eni?

¹³ Anukeni vanu vamunatha kutumbula ha mathzina mu malombelo eni. Ngwe mwa Epafalase, mwatha kulombelela vaje vali na vipangi vya kulema na vaje vali mu vyetheko va mu nanga yeni nambe va mu chikungulukilo cheni. Mwatha kutumbula mathzina a vaje vali ha jw.org ha mutamba wa “Jehovah’s Witnesses Imprisoned for Their Faith.” (Yeni ha NEWSROOM > LEGAL DEVELOPMENTS.) Cho lalo munapande kwanuka na vaje vanathsitha na vaje vanovoka mu vindthzita na mu vukalu vwa kulithzila na vaje vali mu vuhutu. Oku kumwetha ngwavo tunapande kulombelela vandolome na vandokathzi vavangi, cho kulinga ngocho kuvakwatha. Nga tuvalombelela, cho tumwetha ngwetu kutushakathzeka lika vije vituthzivitha kuvwaha, oloni na vije vithzivitha vakwetu kuvwaha. (Fili 2:4) Yehova akakumbulula malombelo a chifwa echi.

14. Mwanja muka wauvwa wanatwakela Yehova mu kutolilila vakwetu?

¹⁴ Ngila ikwavo itumwethelamo kulikehetha, inapu kutolilila ku vakwetu. Mukanda wa Yakomba 1:19 utuleka ngwawo: ‘thzambuleni kutolilila.’ Yehova natwakela mwanja wauvwa mu kutolilila vakwetu. (Kusha 18:32; Yosh 10:14) Tuchimoneni ñanda ili ku mukanda wa Kutuhuka 32:11-14. (Tandeni.) Yehova kapandele kutolilila ku viyongola vya Mosesa, oloni wamutavethele kwendeka mwalithzivililile. Mwatha kutolilila munu uje akathevuka thimbu yoshe na kulinga vyanendeka ndi? Yehova akatolilila mwamuvwa vaje vakamulombo na likulahelo.

15. Twatha kutembwinina vati Yehova mu kuthingimika vakwetu?

¹⁵ Tuvavoshe tunapande kulihula ngwetu: ‘Nga Yehova atha kulikehetha na kutolilila ku vanu ngwe mwa Avilahama na Lakele na Mosesa na Yoshwa na Manowa na Elinja na Hezekiya, kuma yange kunjapandele kuthingimika vandolome vange na kutolilila viyongola vyavo na kuvilinga ndi? Mu chikungulukilo nambe mu nanga yange muli umo injinapande kwaka manene mbunge ha thimbu ino ndi? Njinapande kulinga vika? Cho njikamukwatha vati?’—Kusha 30:6; Maako 13:9; 1 Vimye 17:22; 2 Mithzi 30:20.

16. Mwene Ndaviti walingile vati mwamuluvalethele Shimei?

¹⁶ Kulikehetha kutukwatha tukwate mbunge, nameme vatuluvaletha. (Efeso 4:2) Mwanja wauvwa tuuwana ku mukanda wa 2 Samwele 16:5-13. (Tandeni) Ndaviti na vangamba vendi vakwatele mbunge omwo Shimei kavushoko ka Mwene Saulu wakele na kuvashaula na kuvatuka. Ndaviti wakwatele mbunge nameme wakele na ndthzili ya kumanetha vuje vukalu. Vika vyakwathele Ndaviti  mangana akwate mbunge? Tuviwana ku Myatho mu kapetulu ka mu chitatu.

17. Vika vyakwathele Ndaviti akwate mbunge, cho twatha kumutembwinina vati?

¹⁷ Mutwe wa kapetulu ka mu chitatu ka mukanda wa Myatho, umwetha ngwawo Ndaviti mwathonekele ou mukanda tai ‘ali na kutewa munendi Avisalome.’ Vesi 1 na 2 imwetha vyuma vili ku 2 Samwele kapetulu 16. Cho mukanda wa Myatho 3:4, umwetha kukulahela kwa Ndaviti ngwawo: “Njikatambeka kuli Shukulu Kalunga mu kunjikwatha, cho anjikumbulula kutunda ku lilundu lyendi lya kujela.” Netu tunapande kulombela nga vatulwitha. Yehova atwana sipilitu yendi ya kujela, cho itukwatha tukolethe mu vukalu. Vyuma muka vituliwana navyo vitulingitha tukwate mbunge nambe kukonekela vakwetu? Mwakulahela ngweni Yehova ali na kumona tuyando tweni, cho akamivethzikitha ndi?

18. Kutwalelelaho kwononoka mashiko a Njambi kutukwatha vati?

¹⁸ Tuwana vivethzikitho nga tulinga vyuma vyavivwa. Mukemwo ku Vithimo 4:7, NWT ngwavo: “Mana akewo a theho manene.” Kukala na mana kukwemanene lika ha kuthzivuka vyuma. Nambe mishwa vakala na mana. Mishwa vakala na mana avatanga nawo Njambi, cho akavalingitha valitulikile vya kulya ha thimbu ya nondwe. (Vithi 30:24, 25) Kilisitu, uje napu “mana a Njambi,” thimbu yoshe akalingi vije vithzivitha Ishe kuvwaha. (1 Koli 1:24; Yowa 8:29) Njambi atuvethzikitha nga tutwalelelaho kulikehetha na kulinga vyuma vya vuthunga. (Tandeni Mateo 7:21-23.) Pangeni na ndthzili mangana mukwathe vanu mu chikungulukilo vapwe va kulikehetha. Kulinga vyuma vya vuthunga kukambata thimbu, cho lalo kwatonda kuthimpa, oloni kutulingitha tulikehethe, cho tuvwahelela mu thimbu ino na ku myaka yoshe.