1. ¿Ndáaña kivi ndoʼoyó xíʼin ña̱ kéʼé na̱ ñuyǐví yóʼo?

ÍXAYO̱ʼVI̱VAÑA xíʼinyó ña̱ keʼéyó ndiʼi ña̱ sákuaʼayó nu̱ú tu̱ʼun Ndióxi̱. ¿Nda̱chun? Iin xa̱ʼa kúúña saáchi íyoyó “tiempo nu̱ú ndíʼi” ta íxayo̱ʼvi̱ña xíʼinyó ña̱ vitá koo iniyó. Ndóoyó iin ñuyǐví nu̱ú ndóo na̱ yiví na̱ kúʼvi̱-ini xíni mií, kúʼvi̱-inina xínina xu̱ʼún, ni̱nu kúnina nu̱ú inkana, ta va̱ása xáʼnu̱na-inina (2 Tim. 3:1-3). Sava na̱ ndásakáʼnu Ndióxi̱ sana kúndasívana ña̱yóʼo, soo sana ndakanituxi̱nína ña̱ va̱ʼaníva íyo na̱ yiví na̱ kéʼé ña̱yóʼo (Sal. 37:1; 73:3). Kivi kixaʼána ndakanixi̱nína á ndáyáʼviní ña̱ kundi̱ʼi̱-inina xa̱ʼa inkana, ta sana va̱ása ixato̱ʼóka inka na̱ yiví miína xa̱ʼa ña̱ vitá íyo inina (Luc. 9:48). Tá ná kundiku̱nyó ña̱ kéʼé na̱ ñuyǐví yóʼo va̱ása viíka kitáʼanyó xíʼin na̱ hermanoyó, ta ni va̱ása na̱ʼa̱kayó ña̱ ndásakáʼnuyó Ndióxi̱. Xa̱ʼa ña̱yóʼo iin ña̱ va̱ʼaní kúúña ná sakuaʼayó xa̱ʼa na̱ nda̱sakáʼnu Jehová tiempo xi̱naʼá, tasaá kundiku̱nyó yichi̱na.

2. ¿Nda̱saa chindeéña miíyó ña̱ kundiku̱nyó yichi̱ na̱ nda̱sakáʼnu Jehová tiempo xi̱naʼá?

² Ña̱ va̱ʼa kundiku̱nyó yichi̱ na̱ nda̱sakáʼnu Jehová tiempo xi̱naʼá, xíniñúʼu kunda̱a̱ va̱ʼa iniyó xa̱ʼa ña̱ ke̱ʼéna. ¿Ndáaña ke̱ʼéna  ña̱ va̱ʼa xi̱kuuna migo Jehová? ¿Ndáaña ke̱ʼéna ña̱ va̱ʼa kǒo níndiʼi-xa̱ʼa ña̱ kítáʼanna xíʼinra? ¿Ndáaña chi̱ndeé miína ña̱ va̱ʼa ke̱ʼéna ña̱ kúni̱ra? Ña̱yóʼo kivi chindeéña miíyó ña̱ viíka sakuaʼayó xa̱ʼa Ndióxi̱.

3, 4. a) ¿Ndáaña chindeé miíyó ña̱ va̱ʼa sakuaʼakayó xa̱ʼa Ndióxi̱? b) ¿Nda̱chun su̱ví ña̱ kaʼvi kuitíyó kúú ña̱ chindeé miíyó ña̱ sakuaʼakayó xa̱ʼa Ndióxi̱?

³ Miíyó na̱ ndásakáʼnu Ndióxi̱ ku̱a̱ʼání ña̱ʼa sákuaʼayó nu̱ú Biblia ta saátu consejo ña̱ ndákiʼinyó, tutu ña̱ tává na̱ ñuu Ndióxi̱, ña̱ sitio ña̱ Internet jw.org, ña̱ canal JW Broadcasting, saátu reunión xíʼin asamblea. Soo íyoka inka ña̱ xíniñúʼu keʼéyó tá kúni̱yó sakuaʼa va̱ʼakayó xa̱ʼa Ndióxi̱, ta̱ Jesús ni̱ka̱ʼa̱nra: “Ña̱ keʼíi̱ ña̱ kúni̱ Ndióxi̱ nda̱a̱ táki̱ʼva íyo ña̱ xíxii̱ saá íyoña ta saxínui̱ chiñura” (Juan 4:34).

⁴ Nda̱a̱ táki̱ʼva ni̱ka̱ʼa̱n ta̱ Jesús xíniñúʼu kandíxayó Ndióxi̱ ña̱ va̱ʼa sákuaʼakayó xa̱ʼara. ¿Ndáaña kúni̱ kachi ña̱yóʼo? Tá va̱ʼaní xíxiyó, nda̱a̱ va̱ʼa kúniyó ta kúsi̱í-iniyó. Saátu tá kéʼéyó ña̱ kúni̱ Ndióxi̱, ndundakúka ña̱ kándíxayóra, ta va̱ʼaka kúniyó xíʼin ña̱ sákuaʼayó xa̱ʼara. ¿Á su̱ví ña̱ nda̱a̱ kúúña sava va̱ása va̱ʼa kúniyó tá ku̱a̱ʼa̱nyó sánáʼa̱yó xa̱ʼa Ndióxi̱, soo tá ndíkoyó veʼeyó kúsi̱íkaví-iniyó?

5. ¿Ndáaña va̱ʼa ndakiʼinyó tá kúúyó na̱ ndíchi?

⁵ Tá kéʼéyó ña̱ sánáʼa̱ Jehová miíyó, xa̱a̱yó ndíchika kooyó (Sant. 3:13). Ta ña̱yóʼo iin ña̱ va̱ʼaní kúúña. Biblia káʼa̱nña, ni iin ña̱ʼa ña̱ kútóoyó va̱ása kítáʼanña xíʼin ña̱ ndíchi, chi “na̱ ndákiʼin ña̱ ndíchi va̱ʼa kutakuna, ta na̱ kǒo táxi ndiʼi-xa̱ʼaña kusi̱í-inina” (Prov. 3:13-18). Iin yichi̱ ni̱ka̱ʼa̱n ta̱ Jesús xíʼin na̱ discípulora: “Tá kúnda̱a̱-inindó xa̱ʼa ña̱yóʼo, kusi̱íní-inindó tá ná keʼéndóña” (Juan 13:17). Tá ná kǒo sandákoona ña̱ kandíxana ta̱ Jesús si̱íníva koona. Tasaá ke̱ʼévana. Ndiʼi tiempo ka̱ndíxana ña̱ ni̱ka̱ʼa̱nra xíʼinna ta xi̱ndiku̱nna yichi̱ra.

6. ¿Nda̱chun va̱ása xíniñúʼu sandákooyó ña̱ keʼéyó ña̱ káʼa̱n Biblia?

⁶ Nda̱a̱ tiempo vitin, iin ña̱ ndáyáʼviní kúú ña̱ va̱ása sandákooyó ña̱ kandíxayó ndiʼi ña̱ sákuaʼayó nu̱ú Biblia. Ná chinúyó iin ejemplo. Ná kachiyó iin na̱ yiví sa̱kuaʼa va̱ʼana ña̱ kuuna mecánico, soo tá ná kǒo kuniñúʼuna ndiʼi ña̱ sa̱kuaʼana, va̱ása chindeévíñana. Sana nda̱a̱ ke̱ʼéna sava chiñu ta sa̱kuaʼakana. Soo tá va̱ása kúni̱na sandákoona ña̱ koona iin mecánico na̱ xíni̱ va̱ʼa, va̱ása xíniñúʼu sandákoona keʼéna ña̱ sa̱kuaʼana. Ki̱ʼva saá xíniñúʼu keʼé miíyó. Tá ki̱xaʼáyó káʼviyó Biblia ki̱xaʼá kéʼéyó ña̱ sákuaʼayó, ta ku̱a̱ʼá ña̱ va̱ʼa nda̱kiʼinyó xa̱ʼa ña̱yóʼo. Soo ña̱ va̱ʼa kusi̱íka iniyó, xíniñúʼu kandíxayó ndiʼi ña̱ sánáʼa̱ Jehová miíyó ndiʼi ki̱vi̱.

7. Tá kúni̱yó ndíchi kooyó, ¿ndáaña xíniñúʼu keʼéyó xíʼin ña̱ sákuaʼayó xa̱ʼa na̱ nda̱sakáʼnu Ndióxi̱ tiempo xi̱na̱ʼá?

⁷ Ná ka̱ʼa̱nyó xa̱ʼa ku̱mí ña̱ʼa ña̱ kivi ixayo̱ʼvi̱ xíʼinyó ña̱ vitá koo iniyó, ta ná kotoyó ndáa ña̱ ke̱ʼé na̱ xi̱ndasakáʼnu Ndióxi̱ tiempo xi̱naʼá ña̱ va̱ʼa ni̱ya̱ʼana nu̱ú ña̱yóʼo. Tá kúni̱yó ndakú va̱ʼa kooyó xíʼin ña̱ sákuaʼayó, va̱ása xíniñúʼu kaʼvi kuitíyóña ta xa̱a̱ va̱ʼaví, ña̱ xíniñúʼu keʼéyó kúúña ndakanixi̱níyó nda̱saa kivi keʼéyóña.

8, 9. ¿Ndáaña sákuaʼayó xíʼin ña̱ káʼa̱n Hechos 14:8-15 xa̱ʼa ña̱ vitá ni̱xi̱yo ini ta̱ Pablo? (Koto na̱ʼná ña̱ va̱xi chí xa̱ʼa).

⁸ Jehová kúni̱ra “ná ka̱ku ndiʼi na̱ yiví ta ná xa̱a̱na kunda̱a̱-inina xa̱ʼa mií ña̱ nda̱a̱” (1 Tim. 2:4). ¿Nda̱saa xítoyó na̱ yiví na̱ ta̱ʼán kunda̱a̱-ini xa̱ʼara? Ña̱ nda̱a̱ kúúña, ta̱ apóstol Pablo  ni̱xa̱ʼa̱nra sinagoga ña̱ va̱ʼa sanáʼa̱ra, na̱ xa̱a̱ xíni̱ loʼo xa̱ʼa Ndióxi̱. Soo su̱ví na̱ judío kuití nísanáʼa̱ra xa̱ʼa Ndióxi̱, chi sa̱náʼa̱tura na̱ xi̱ndasakáʼnu inka ndióxi̱. Ña̱ ke̱ʼéra ni̱na̱ʼa̱ ña̱ vitá ni̱xi̱yo inira.

⁹ Tá kúú tá ni̱xa̱ʼa̱n ta̱ Pablo ña̱ yichi̱ nu̱ú chí ñuu Licaonia, na̱ ñuu kán nda̱kanixi̱nína xa̱ʼa ta̱ Pablo xíʼin ta̱ Bernabé ña̱ kúúna ndióxi̱ Zeus xíʼin ndióxi̱ Hermes. ¿Á ni̱nu ku̱ni ta̱ Pablo xíʼin ta̱ Bernabé xa̱ʼa ña̱ nda̱sakáʼnunana? ¿Á nda̱kanixi̱nína ña̱ kúú ña̱yóʼo iin ña̱ va̱ʼa ndákiʼinna xa̱ʼa ndiʼi ña̱ ni̱xo̱ʼvi̱na ti̱xin u̱vi̱ saá ñuu ña̱ xa̱a̱ ni̱xa̱ʼa̱nna? ¿Á nda̱kanixi̱nína ña̱ kivi chindeé ña̱yóʼo miína xíʼin chiñu ña̱ kéʼéna nu̱ú Ndióxi̱? Va̱ása, na̱yóʼo ki̱xaʼána ndátana ti̱ko̱to̱na ta ni̱ka̱ʼa̱nna xíʼin na̱ yiví kán: “¿Nda̱chun kéʼéndó ña̱yóʼo? Na̱ yiví táʼan miíndó kúútu ndi̱ʼi̱va” (Hech. 14:8-15).

10. ¿Ndáa xa̱ʼa kúú ña̱ ni̱ka̱ʼa̱n ta̱ Pablo xíʼin ta̱ Bernabé ña̱ inkáchi ni̱xi̱yona xíʼin na̱ ñuu Licaonia?

¹⁰ Ta̱ Pablo xíʼin ta̱ Bernabé nda̱kunina ña̱ na̱ yiví ku̱a̱chiva kúúna táki̱ʼva íyo na̱ yiví kán. Soo su̱ví ña̱yóʼo kúni̱ kachiña ña̱ inkáchi ni̱xi̱yo ña̱ xi̱ndasakáʼnuna Ndióxi̱ xíʼin na̱ ñuu Licaonia. Chi na̱yóʼo misionero xi̱kuuna, ta xi̱kuumiína iin chiñu ña̱ ndáyáʼviní (Hech. 13:2). Saátu nda̱ka̱xin Ndióxi̱ miína ña̱ ku̱ʼu̱nna chí ndiví. Soo xi̱kunda̱a̱tu inina, tá ná sakuaʼa na̱ yiví kán xa̱ʼa Ndióxi̱ kivitu ku̱ʼu̱n na̱kánva chí ndiví.

11. ¿Nda̱saa kivi kundiku̱nyó yichi̱ ta̱ Pablo tá nátúʼunyó xíʼin na̱ yiví xa̱ʼa Ndióxi̱?

¹¹ ¿Nda̱saa va̱ʼa kundiku̱nyó yichi̱ ta̱ Pablo? Ña̱ nu̱ú, ná va̱ása kuni̱yó ndasakáʼnuna miíyó xa̱ʼa ña̱ kéʼéyó, chi Jehová kúú ta̱ táxi ndée ndaʼa̱yó. Ña̱ u̱vi̱, xíniñúʼu nda̱ka̱tu̱ʼunyó miíyó: “¿Ndáaña ndákanixi̱níi̱ xa̱ʼa na̱ yiví na̱ nátúʼi̱n xíʼin xa̱ʼa Ndióxi̱? ¿Á kúndasíi̱ na̱ yiví nda̱a̱ táki̱ʼva kéʼé na̱ yiví na̱ íyo nu̱ú íyoi̱?”. Iin ña̱ va̱ʼaní kéʼé na̱ ñuu Ndióxi̱ kúú ña̱, chíka̱a̱na ndée ña̱ nándukúna na̱ yiví na̱ kúni̱ sakuaʼa xa̱ʼa Ndióxi̱. Xa̱ʼa ña̱yóʼo savana nda̱a̱ sákuaʼana inka tu̱ʼun, ña̱ va̱ʼa natúʼunna xíʼin inka na̱ yiví. Na̱ hermano yóʼo va̱ása ni̱nu kúnina nu̱ú na̱ yiví. Chi ña̱ kéʼéna kúúña, ndákanixi̱nína ndáa ña̱ kivi keʼéna ña̱ va̱ʼa xa̱a̱ ña̱ sánáʼa̱na nda̱a̱ níma̱ na̱ yiví.

12. ¿Nda̱saa ni̱na̱ʼa̱ ta̱ Epafras ña̱ xi̱kuʼvi̱-inira xi̱xinira inkana, ta saátu xi̱ndi̱ʼi̱-inira xa̱ʼana?

¹² Inka ña̱ kivi keʼéyó ña̱ va̱ʼa na̱ʼa̱yó ña̱ kúúyó na̱ vitá-ini, ta saátu ña̱ kándíxayó Jehová kúú ña̱, ka̱ʼa̱nyó xíʼinra xa̱ʼa na̱ hermanoyó (2 Ped. 1:1). Saá ke̱ʼé iin ta̱ xi̱ndasakáʼnu Ndióxi̱ ta̱ xi̱naní Epafras. U̱ni̱ kuití yichi̱ káʼa̱n Biblia xa̱ʼa ta̱yóʼo, nu̱ú tutu ña̱ ka̱ʼyí ta̱ Pablo. Tá xi̱ndika̱a̱ ta̱ Pablo veʼeka̱a chí ñuu Roma, chi̱ndaʼára carta ku̱a̱ʼa̱n nu̱ú na̱ ñuu Colosas, ta ni̱ka̱ʼa̱nra xíʼinna, ña̱ ndiʼi yichi̱ xi̱ka̱ʼa̱n ta̱ Epafras xa̱ʼana xíʼin Ndióxi̱ (Col. 4:12). Ta̱ Epafras xi̱xini va̱ʼara na̱ hermano, ta xi̱ndi̱ʼi̱ní-inira xa̱ʼana. Ni xi̱kuumiítu ta̱yóʼo tu̱ndóʼo, chi xi̱ndika̱a̱ra veʼeka̱a xíʼin ta̱ Pablo, soo va̱ása nísandákoora ña̱ kundi̱ʼi̱-inira xa̱ʼa inkana (Filem. 23). Chi̱ndeétáʼanra xíʼinna ta ni̱na̱ʼa̱ra ña̱ kúʼvi̱-inira xínirana, ta ndíʼi̱-inira xa̱ʼana. Ña̱ káʼa̱nyó xíʼin Jehová xa̱ʼa na̱ hermanoyó chíndeéníña miína, ta va̱ʼaníka tá káʼa̱nyó ki̱vi̱na xíʼinra (2 Cor. 1:11; Sant. 5:16).

13. ¿Nda̱saa kivi kundiku̱nyó yichi̱ ta̱ Epafras tá káʼa̱nyó xíʼin Ndióxi̱?

¹³ ¿Ndáa na̱ hermano kúú na̱ kivi ka̱ʼa̱nyó xa̱ʼa xíʼin Ndióxi̱ tá káʼa̱nyó xíʼinra? Ná ka̱ʼa̱nyó ki̱vi̱na xíʼinra. Ku̱a̱ʼání na̱ hermano kéʼéna nda̱a̱ táki̱ʼva ke̱ʼé ta̱ Epafras, káʼa̱nna xa̱ʼa na̱ congregación, ta saátu xa̱ʼa sava na̱  familia, na̱ kúúmií tu̱ndóʼo á na̱ xíniñúʼu ndaka̱xin iin ña̱ keʼéna. Savatuna tá káʼa̱nna xíʼin Ndióxi̱, xíniñúʼuna ki̱vi̱ sava na̱ hermano na̱ va̱xi ti̱xin ña̱ artículo “Testigos de Jehová presos por sus creencias”, nu̱ú sitio ña̱ Internet jw.org (sección PRENSA > ASUNTOS LEGALES). Saátu va̱ása nandósóyó xa̱ʼa na̱ ni̱xi̱ʼi̱ na̱ táʼan, á na̱ ndóʼo inkaka tu̱ndóʼo, á na̱ kǒo xu̱ʼún kúúmií. Ku̱a̱ʼáníva na̱ hermano kivi ka̱ʼa̱nyó xa̱ʼa xíʼin Ndióxi̱. Tá ná keʼéyó ña̱yóʼo na̱ʼa̱yó ña̱ va̱ása ndíʼi-iniyó xa̱ʼa mií kuitíyó, chi na̱ʼa̱yó ña̱ ndíʼi-iniyó xa̱ʼa inkana (Filip. 2:4). Jehová va̱ʼaní xíniso̱ʼora oración táʼan ña̱yóʼo.

14. ¿Nda̱chun káʼa̱nyó ña̱ iinlá Jehová kúú ta̱ va̱ʼaní yichi̱ táxi nu̱úyó ña̱ kuniso̱ʼoyó ña̱ káʼa̱n inkana?

¹⁴ Ña̱ u̱ni̱ ña̱ kivi keʼéyó ña̱ va̱ʼa na̱ʼa̱yó ña̱ vitá íyo iniyó kúú, ña̱ kandíxayó kuniso̱ʼoyó inkana. Santiago 1:19 káchiña xíʼin na̱ ndásakáʼnu Ndióxi̱ “kuniso̱ʼondó tá káʼa̱n inkana”. Va̱ʼaní yichi̱ táxi Jehová nu̱úyó xíʼin ña̱yóʼo (Gén. 18:32; Jos. 10:14). Ná kotoyó ndáa ña̱ kivi sákuaʼayó xíʼin Éxodo 32:11, 13, 14 (kaʼviña). * Va̱ása níxiniñúʼuví ka̱ʼa̱n ta̱ Moisés xíʼin Jehová xa̱ʼa ña̱ ndákanixi̱níra, soo Jehová va̱ása nísasira nu̱úra ña̱ ka̱ʼa̱nra xíʼinra. ¿Á kandíxa miíyó kuniso̱ʼoyó iin na̱ xa̱a̱ ku̱a̱ʼání yichi̱ kéʼé ña̱ va̱ása va̱ʼa ta kundiku̱nyó ña̱ káʼa̱nna xíʼinyó? Jehová va̱ʼaní xíniso̱ʼora ndiʼi na̱ yiví na̱ káʼa̱n xíʼinra, tá kándíxanara.

15. ¿Nda̱saa kivi kundiku̱nyó yichi̱ Jehová?

¹⁵ Tá iin iinyó xíniñúʼu nda̱ka̱tu̱ʼun xíʼin miíyó: “Tá Jehová, vitá ni̱xi̱yo inira ta xi̱niso̱ʼora ña̱ ni̱ka̱ʼa̱n ta̱ Abrahán, ñá Raquel, ta̱ Moisés, ta̱ Josué, ta̱ Manóah, ta̱ Elías xíʼin ta̱ Ezequías, ¿á su̱ví saá xíniñúʼu keʼé miíi̱? ¿Á kivi ixato̱ʼókai̱ na̱ hermano ta kuniso̱ʼi̱ ña̱ káʼa̱nna xíʼi̱n? ¿Á íyo iinna ti̱xin congregación á ti̱xin veʼi̱ na̱ kivi kuniso̱ʼi̱ ña̱ káʼa̱n? ¿Á keʼíi̱ ña̱yóʼo?” (Gén. 30:6; Juec. 13:9; 1 Rey. 17:22; 2 Crón. 30:20).

16. ¿Ndáaña ke̱ʼé ta̱ David tá ke̱ʼé ta̱ Simeí ña̱ va̱ása va̱ʼa xíʼinra?

¹⁶ Ña̱ vitá íyo iniyó kivi chindeétuña miíyó ña̱ va̱ása sa̱a̱ kamayó tá sása̱a̱na miíyó (Efes. 4:2). Iin ejemplo táʼan ña̱yóʼo va̱xiña nu̱ú 2 Samuel 16:9-13 (kaʼviña). * Ta̱ David xíʼin na̱ xi̱nditáʼan xíʼinra ni̱xa̱ʼnu̱-inina tá ke̱ʼé ta̱ Simeí ña̱ va̱ása va̱ʼa xíʼinna, táʼan ta̱ rey Saúl xi̱kuu ta̱yóʼo. Ta̱ David xi̱kuumiíra ndée ña̱ sandiʼira tu̱ndóʼo yóʼo, soo kǒo níkeʼéraña, va̱ʼaka ni̱xa̱ʼnu̱-inira. ¿Ndáa mií ki̱ʼi̱nra ndée ña̱ va̱ʼa ni̱xa̱ʼnu̱-inira? Kunda̱a̱-iniyó xa̱ʼa ña̱yóʼo tá ná kaʼviyó Salmo 3.

17. a) ¿Nda̱chun va̱ʼa ni̱xa̱ʼnu̱-ini ta̱ David? b) ¿Nda̱saa va̱ʼa kundiku̱nyó yichi̱ ta̱ David?

¹⁷ Nda̱a̱ táki̱ʼva káchi tu̱ʼun ña̱ va̱xi nu̱ú kíxaʼá  ña̱ Salmo 3, ta̱ David ka̱ʼyí ña̱yóʼo tá xi̱nura nu̱ú se̱ʼera ta̱ Absalón. Ña̱ versículo 1 xíʼin 2 va̱ʼaní kítáʼanña xíʼin ña̱ va̱xi nu̱ú 2 Samuel capítulo 16. Ña̱ Salmo 3:4 náʼa̱ña nu̱úyó ña̱ va̱ʼaní xi̱kandíxa ta̱ David Ndióxi̱. Chi ka̱chira: “Ka̱ʼi̱n xíʼin Jehová ná chindeéra yi̱ʼi̱ ta ndakuiinra yuʼíi̱ chí yuku̱ nu̱ú káʼa̱nra”. Saátu miíyó kivi ka̱ʼa̱nyó xíʼin Ndióxi̱ tá kéʼéna ña̱ va̱ása va̱ʼa xíʼinyó. Tasaá taxi Jehová espíritu yi̱i̱ra ndaʼa̱yó ña̱ va̱ʼa i̱xandakú-iniyó. ¿Á xa̱a̱ ndákanixi̱níyó ama kúúña xíniñúʼu ka̱ʼnu̱-iniyó ta kooyó ña̱ káʼnu-ini xa̱ʼa na̱ kéʼé ña̱ va̱ása va̱ʼa xíʼinyó? ¿Á kándíxayó ña̱ xíto Jehová ndiʼi ña̱ ndóʼoyó ta chindeéra miíyó?

18. ¿Ndáaña va̱ʼa ndakiʼinyó tá ná keʼéyó ña̱ káʼa̱n Jehová xíʼinyó?

¹⁸ Tá kúnda̱a̱-iniyó ndáaña kúú ña̱ va̱ʼa ta kéʼéyóña, ku̱a̱ʼání ña̱ va̱ʼa ndakiʼinyó. Xa̱ʼa ña̱yóʼo Proverbios 4:7 káchiña “ña̱ ndíchi kúú ña̱ ndáyáʼvika”. Ndiʼi ña̱ kúnda̱a̱-iniyó kúú ña̱ chíndeé miíyó ña̱ kuuyó na̱ ndíchi, soo ña̱ kéʼéyó kúú ña̱ náʼa̱ á ndixa kúúyó na̱ ndíchi, su̱ví ña̱ kúnda̱a̱-iniyó. Nda̱a̱ tí ti̱o̱kó válí kúúmiírí ña̱ ndíchi káchi Biblia, chi kúnda̱a̱-inirí ama kúú ña̱ xíniñúʼu ndakayarí ña̱ kuxurí (Prov. 30:24, 25). Ta̱ Cristo kúú ta̱ kúúmií ña̱ ndíchi ña̱ kúúmií Ndióxi̱, ta nina ña̱ kútóo yivára kéʼéra (1 Cor. 1:24; Juan 8:29). Ndióxi̱ kúnda̱a̱ va̱ʼa inira su̱ví iin kúú ña̱ kunda̱a̱-iniyó ndáaña xíniñúʼu keʼéyó, xíʼin ña̱ keʼéyóña. Ta̱kán táxira ña̱ va̱ʼa ndaʼa̱ na̱ vitá-ini xíʼin na̱ ndakú-ini ta saátu na̱ kúnda̱a̱-ini ndáaña kúú ña̱ va̱ʼa ta kéʼénaña (kaʼvi Mateo 7:21). * Xa̱ʼa ña̱yóʼo ndiʼiyó ná chika̱a̱yó ndée ña̱ vitá koo iniyó tá ndasakáʼnuyó Jehová ti̱xin congregación. Xíniñúʼuyó tiempo ta saátu xíniñúʼu kúee koo iniyó ña̱ keʼéyó ña̱ va̱ʼa. Soo tá ná keʼéyóña na̱ʼa̱yó ña̱ kúúyó na̱ vitá-ini, ta si̱íní kooyó tiempo vitin ta saátu chí nu̱únínu.