1. ¿Tlen techpanos tla tikchiuaskej ken akinmej amo kitekichiuiliaj Jehová?

¿TLEKA ualeua oui tikchiuaskej tlen kijtoa toTajtsin Dios? Porque moneki tiyetoskej tiyolyamankej para tikchiuaskej tlen kuali. Tikatej itlamian tonalmej, ik non, oui tiyetoskej tiyolyamankej porque miakej san yejuan motlasojtlaj, kinekij kipiaskej miak tomin, moueyinekij, kuejsijkej uan amo kimatij monauatiskej (2 Tim. 3:1-3). Tejuan kuali tikmatij nin amo kuali pero xamo tikitaj yejuan okachi yolpakij uan kipiaj miak tlamantli (Sal. 37:1; 73:3). Xamo timotlajtlaniaj kox ok techtlakaitaskej tla timotekipachoskej intech oksekimej uan tla tiyetoskej tiyolyamankej (Luc. 9:48). Tla tikchiuaskej tlen oksekimej kichiuaj, ayakmo kuali timouikaskej iuan tokniuan uan ayakmo motas kox tikchiuaj ken Cristo. Pero tla tikchiuaskej ken akinmej okitekichiuilijkej toTajtsin Dios uan  okatkaj yolyamankej, techpaleuis ma tiyetokan tiyolyamankej.

2. ¿Ken techpaleuis tlen okichijkej itekipanojkauan toTajtsin Dios?

² Moneki tikmatiskej tlen okichijkej akinmej yiuejkika okitekichiuilijkej toTajtsin Dios. ¿Ken opejki mouikaj iuan Jehová? ¿Tlen okichijkej para ma kinseli Jehová? ¿Tlen okinpaleui ma kitekichiuilikan toTajtsin Dios? Nin tlamachtil techpaleuis ma tikpiakan chikauak totlaneltokilis.

3, 4. (1) ¿Ken techmachtia Jehová? (2) ¿Tlen moneki tikchiuaskej para tikpiaskej chikauak totlaneltokilis?

³ Jehová techmachtia ika jw.org, JW Broadcasting, nechikolmej uan uejueyij nechikolmej para ma tikpiakan chikauak totlaneltokilis. Amo san moneki tikmatiskej miak tlamantli tla tiknekij tikpiaskej chikauak totlaneltokilis. Jesús okijto: “Notlakual ye manikchiwa tlan kipaktia Akin onechaltítlanki, iwa maniktlami iteki” (Juan 4:34).

⁴ Jesús okitaya ken itlakual ijkuak okichiuaya tlen kipaktia iTajtsin. ¿Tleka? Porque ijkuak tlami titlakuaj, tiixuij uan tiyolpakij. Noijki tla tikchiuaskej tlen kipaktia toTajtsin Dios, tikpiaskej okachi chikauak totlaneltokilis uan tiyolpakiskej. Ualeua timoyolkokoaj ijkuak tiauij titetlapouitiuij pero ijkuak titlamij, tiyolpakij uan kuali timomachiliaj.

5. ¿Ken techpaleuis tla tiyetoskej tiixtlamatkej?

⁵ Tiyetoskej tiixtlamatkej tla tikchiuaskej tlen toTajtsin Dios techmachtia (Sant. 3:13). Sapanoa techpaleuis tla tiyetoskej tiixtlamatkej. Porque Biblia kijtoa: “Ixtlamatilistli kajki ken se kuauitl tlen kitemaka yolilistli uan yolpakiskej akinmej itech mokitskijtokej” (Prov. 3:13-18). Se tonal, Jesús okinmilui imachtijkauan: “Tla nonkajsikamatih iwa nonkichiwah tlan nomechilijtok, nonkipiaskeh miak pakílistli” (Juan 13:17). Yolpakiskiaj tla nochipa yetoskiaj iuan Jesús uan melauak ijkon okichijkej. Pero omonekiaya kichiuaskej ken Jesús uan kitlakamatiskiaj.

6. ¿Tleka moneki nochipa ma tikchiuakan tlen Jehová techmachtia?

⁶ Axkan tejuan noijki moneki tikchiuaskej tlen timomachtiaj. Ma timokuayejyekokan itech akin kinchijchiua kalmej. Ye kixmati uan kimati ken kitekitiltis tlen ika tekipanoa para kichijchiuas se kali. Kuali kinchijchiuas kalmej tla kuali kitekitiltis tlen ika tekipanoa. Xamo yokinchijchi miakej kalmej uan yikimati ken kinchijchiuas. Pero moneki tekipanos tlamo kilkauas tlen omomachti. Noijki tejuan ijkuak opejki timomachtiaj Biblia, opejki tikchiuaj tlen otimomachtiayaj uan sapanoa otechpaleui. Moneki nochipa tikchiuaskej tlen Jehová techmachtia tla tiknekij tiyolpakiskej.

7. ¿Tlen tikchiuaskej tla tiknekij ma techpaleui tlen timomachtiaj?

⁷ Itech nin tlamachtil tikitaskej seki tlamantli tlen uelis kichiuas ayakmo ma tiyetokan tiyolyamankej uan noijki tikitaskej tlen okichijkej itekipanojkauan  Jehová tlen okatkaj yiuejkika. Tla tiknekij ma techpaleui tlen timomachtiskej amo san moneki tiktlajtoltiskej. Noijki moneki ma timokuayejyekokan ken tikchiuaskej.

8, 9. ¿Tlen techmachtia Hechos 14:8-15 itech Pablo? (Xikita dibujo kanin peua tlamachtil).

⁸ Jehová “kineki mamomakixtikah nochteh iwa makixmatikah tlan milák” (1 Tim. 2:4). ¿Ken tikinmitaj akinmej amo momachtiaj Biblia? Tlatitlanil Pablo okintlapoui judíos maski yokixmatiayaj toTajtsin Dios. Pero noijki okintlapoui akinmej okinueyichiuayaj teotsitsintin. ¿Tleka Pablo omonekiaya yetos yolyamanki?

⁹ Ijkuak Pablo uan Bernabé yikin otetlapouitoj Listra, omokuayejyekojkej Pablo okatka teotsin Hermes uan Bernabé okatka Zeus. ¿Kuali omomachilijkej porque ijkon okinmiluijkej? ¿Kuali omomachilijkej non tonal maski itech okseki altepemej okintlajyouiltijkej? ¿Omokuayejyekojkej non kinpaleuiskia ma tetlapouikan? Amo. Sapanoa okualankej uan okinmiluijkej tlen ompa okatkaj: “¿Tleka ijkó nonkichiwah? Tejwah noiwa titlakah de nin tlaltíkpaktli kemi nomejwah” (Hech. 14:8-15).

10. ¿Tleka Pablo uan Bernabé amo omoueyinekej?

¹⁰ Pablo uan Bernabé okijtojkej noijki okatkaj tlajtlakolejkej. Pero amo okijtojkej otlaneltokayaj ken akinmej ompa ochantiayaj. Pablo uan Bernabé okintitlanki toTajtsin Dios ken misioneros (Hech. 13:2). Noijki okinpejpenkej ika espíritu santo uan chantiskiaj iluikak. Pero amo omoueyinekej porque okajsikamatkej akinmej ompa ochantiayaj noijki uelis kinpejpenaskia toTajtsin Dios.

11. ¿Ken uelis tikchiuaskej ken Pablo ijkuak titetlapouiaj?

¹¹ ¿Ken uelis tiyetoskej tiyolyamankej ken Pablo? Ijkon ken Pablo amo tiknekij ma techpatioitakan porque tiktekichiuiliaj Jehová. Ik non, ma timotlajtlanikan: “¿Ken nikinmita akinmej nikintlapouia? ¿Nikinchikoita?”. Itech nochi tlaltikpak iTlaixpantijkauan Jehová kintemoaj akinmej kinekij kikakiskej iTlajtol toTajtsin Dios. Sekimej mochijchikauaj momachtiskej okse tlajtoli uan costumbres tlen oksekimej amo kinpaktia. Ninmej tokniuan amo moueyinekij. Yejuan kinmajsikamatij oksekimej uan kinpaleuiaj ma momachtikan Biblia.

12. ¿Ken okiteititi Epafras omotekipachoaya intech tokniuan?

¹² Tla tiktlatlaujtiaj Jehová ma kinpaleui tokniuan, tikteititiskej tiyolyamankej uan tiktlakamatij toTajtsin Dios (2 Ped. 1:1). Ijkon okichi Epafras. Biblia san eyi uelta tlajtoa itech nin tlakatl uan ijkuilitok itech tlen Pablo okijkuilo. Ijkuak Pablo otsaktoka ikalijtik ompa Roma, okintlajkuilili tokniuan tlen ochantiaya Colosas uan okijto Epafras nochipa okitlatlaujtiaya Jehová ma kinpaleui tokniuan tlen ompa  ochantiayaj (Col. 4:12). Epafras kuali okinmixmatiaya tokniuan uan intech omotekipachoaya. Maski okipiaya ouijkayotl uan noijki otlajyouiaya ken Pablo, okimatiaya ken kinpaleuis oksekimej ma kipiakan chikauak intlaneltokilis (Filem. 23). Sapanoa intech omotekipachoaya uan okinpaleui. Epafras okilui Jehová akinmej okinekiaya ma kinpaleui uan melauak ijkon opanok (2 Cor. 1:11; Sant. 5:16).

13. ¿Ken uelis tikchiuaskej ken Epafras ijkuak tiktlatlaujtiaj Jehová?

¹³ ¿Akinmej uelis tikiluiskej Jehová ma kinpaleui? Uelis tikiluiskej ma kinpaleui akinmej inmiuan timouikaj uan oksekimej tokniuan tlen kixnamikij ouijkayotl. Noijki ma tikiluikan ma kinpaleui tokniuan tlen tsaktokej uan intoka nesij itech jw.org uan itech JW Broadcasting. Noijki ma tikiluikan Jehová ma kinpaleui akinmej omikik se inkalchanejka, akinmej otlajyouijkej ijkuak otlaxixinki, akinmej katej kanin onka guerras uan akinmej amo kipiaj tlen ika mopanoltiskej. Onka miakej tokniuan tlen sapanoa tlajyouijtokej uan moneki ma tikiluikan Jehová ma kinpaleui. Ijkuak tiktlatlaujtiaj Jehová ma kinpaleui tokniuan, tikteititiaj amo san totech timotekipachoaj (Filip. 2:4). Ye techkaki ijkuak tiktlatlaujtiaj.

14. ¿Ken uelis tikchiuaskej ken Jehová ijkuak oksekimej techtlapouiaj?

¹⁴ Ijkuak tikinkakij oksekimej noijki tikteititiaj tiyolyamankej. Santiago 1:19 kijtoa akin kichiua ken Cristo moneki “nonnochteh san xitlamatokah ijkuak nonkinkakiskeh oksikimeh”. Jehová ijkon iyelis uan ye kipaktia techkakis (Gén. 18:32; Jos. 10:14). Ma tikitakan tlen techmachtia Éxodo 32:11-14 (xiktlajtolti). Jehová amo omonekiaya kikakis Moisés pero okika ma kilui nochi tlen okimachiliaya. Ualeua tokniuan motlapololtiaj uan itlaj amo kuali kichiuaj, ¿tikinkakiskej ijkuak techpaleuiskej? Jehová techkaki ijkuak tiktlatlaujtiaj ika nochi toyolo.

15. ¿Ken uelis tikchiuaskej ken Jehová?

¹⁵ Moneki ma timotlajtlanikan: “Tla Jehová kuali okikak Abrahán, Raquel, Moisés, Josué, Manóah, Elías uan Ezequías, ¿amo moneki noijki ijkon ma tikchiuakan? ¿Uelis nikintlakaitas tokniuan uan nikchiuas tlen nechiluiaj? ¿Onka se tokni tlen moneki ma nikkaki noso se nokalchanejka? ¿Ken nikinpaleuis nokniuan?” (Gén. 30:6; Juec. 13:9; 1 Rey. 17:22; 2 Crón. 30:20).

16. ¿Tlen okichi David ijkuak Simeí okiuijuikalti?

¹⁶ Tikteititiskej tiyolyamankej tla timoyolseuiaj ijkuak ikaj techkualania (Efes. 4:2). Ijkon kiteititia 2 Samuel 16:5-13 (xiktlajtolti). Se ikalchanejka Saúl itoka Simeí okiuijuikalti David uan akinmej okipaleuiayaj noijki okinchiuili okseki tlamantli. David uelis itlaj kichiuiliskia Simeí pero ye okixiko. ¿Tlen okipaleui ma kixiko ouijkayotl? Tikmatiskej tlen okipaleui tla timomachtiskej tlen kijtoa Salmo 3.

17. (1) ¿Tlen okipaleui David amo san niman ma kualani? (2) ¿Ken uelis tikchiuaskej ken David?

 ¹⁷ David okijkuilo Salmo 3 ijkuak Absalón okinekiaya kimiktis. Noijki ijkuakon Simeí okinekiaya kimiktis pero David omoyolseui uan okijto tlen ijkuilitok itech Salmo 3:4. Okijto: “Chikauak niknotsas Jehová uan ye nechualnankilis ipan itepe tlen chipauak”. Tejuan noijki moneki ma tiktlatlaujtikan Jehová ma techpaleui ijkuak ikaj techkualania. Jehová techmakas iespíritu santo uan ijkon titlaxikoskej. ¿Tikxikoskej ijkuak ikaj techkualania? ¿Tikneltoka Jehová kita ken titlajyouiaj uan techpaleuis?

18. ¿Ken techpaleuis tla tikchiuaskej tlen Jehová technauatia?

¹⁸ Tikseliskej miak tlateochiualistli tla tikchiuaskej tlen Jehová technauatia. Ik non, Proverbios 4:7 kijtoa: “Ixtlamatilistli non tlen okachi ipati”. Maski ixtlamatilistli kisa itech tlen tikmatij, moneki tikteititiskej tiixtlamatkej ika tlen tikchiuaj. Biblia kijtoa hasta askamej noijki ixtlamatkej. Askamej kiteititiaj ixtlamatkej ijkuak kololoaj intlakual uan ijkon kipiaj tlen kikuaskej (Prov. 30:24, 25). Cristo “iixtlamatilis Dios” uan nochipa kichiua tlen kipaktia iTajtsin (1 Cor. 1:24; Juan 8:29). Jehová techteochiuas tla tiyolyamankej uan tiyetoskej tiixtlamatkej tla tikchiuaj tlen kuali (xiktlajtolti Mateo 7:21-23). Ma tikinpaleuikan tokniuan uan tinochtin ma tiyetokan tiyolyamankej uan ijkon kuali tiktekichiuiliskej Jehová. Moneki timochijchikauaskej uan amo ma timosotlauakan para tikchiuaskej tlen kuali. Tla ijkon tikchiuaskej, tikteititiskej tiyolyamankej uan nochipa tiyolpakiskej.