1. ¿La nalaktlawa tayat xalak kakilhtamaku tataktujut nema kgalhiyaw?

TUWA tamakgkatsi naliskuja tuku katsinikan kxTachuwin Dios. ¿Tuku xlakata? Pulaktum, xlakata lamaw «kxaʼawatiya kilhtamaku», lu tuwa tamakgkatsi chuntiya nataktujuyaw. Akxtum katalamaw latamanin tiku x’akstukan kapaxkikan, paxkikgo tumin, chixkuwitnankgo, tlanka kamakgkatsikan chu ni machokgokgo tuku nitlan tlawaputunkgo (2 Tim. 3:1-3). Makgapitsi xlakskujnin Dios tlan nalakgmakgankgo uma tayat, nema anan kkakilhtamaku, pero max nalakgsitsikgo xlakata max tlan tuku kakitaxtuni amakgapitsin (Sal. 37:1; 73:3). Max nakakgalhskinkan komo tlan kitaxtu kalilakgaputsakan amakgapitsin chu komo latamanin nialh nakamaxkikgo kakni komo nataktujukgo (Luc. 9:48). Komo namastayaw talakaskin pi nakinkapasayan uma tayat xalak kakilhtamaku, nialh tlan katikatalaliw natalan chu nalaktlawa tuku litalakgapasaw la kstalaninanin Cristo. Wa xlakata, lu nakinkamakgtayayan nakgalhtawakgayaw chu namakglhkatiyaw xatlan xliʼakxilhtitkan tiku kalichuwinan Biblia.

2. ¿La nakinkamakgtayayan xliʼakxilhtitkan xlakskujnin Dios xala makgasa?

 ² Xlakata nastalaniyaw xliʼakxilhtitkan xlakskujnin Dios tiku ni makgxtakgkgolh, talakaskin liwana nalakputsananiyaw tuku tlawakgolh. ¿La tlan x’amigo Jehová litaxtukgolh? ¿Tuku tlawakgolh xlakata Dios chuntiya tlan xkaʼakxilhli? ¿Niku tiyakgolh litliwakga xlakata tlan namakgantaxtikgo xtalakaskin? Uma takgalhtawakga nakinkamakgtayayan liwana namatliwakglhaw kintakanajlakan.

3, 4. 1) ¿Niku makglhtinanaw tastakyaw xla kintakanajlakan? 2) ¿Tuku xlakata wanaw pi ni kajwatiya talakaskin nakgalhtawakgayaw xlakata tlan namatliwakglhaw kintakanajlakan?

³ Akinin kstalaninanin Cristo makglhtinanaw lhuwa tastakyaw chu tamasiy xalak Biblia, klikgalhtawakga xalak Biblia, ksitio jw.org, kcanal xla JW Broadcasting, ktamakxtumit chu klaklanka tamakxtumit. Pero xlakata namatliwakglhaw kintakanajlakan ni kajwatiya talakaskin nakgalhtawakgayaw, Jesús wa: «Nkiliwat, wa naktlaway xtalakaskin nti nkimalakgachalh, chu na nakmasputuy xtaskujut» (Juan 4:34).

⁴ Chuna la wa Jesús, kgalhakgaxmatkan Dios na kilhchanima namatliwakglhaw kintakanajlakan. ¿Tuku xlakata? Akxni wayaw xakgama liwat, tlan makgkatsiyaw chu paxuwayaw. Nachuna, akxni tlawayaw tuku Dios lakaskin, tatliwakglha kintakanajlakan chu tlan makgkatsiyaw chu paxuwayaw. ¿Ni xlikana pi lakgachunin lu taxlajwaninitaw akxni anaw lichuwinanaw Dios, pero akxni kitaspitaw lu paxuwayaw?

5. ¿Tuku tlan nakitaxtu komo skgalala nawanaw?

⁵ Akxni lilatamayaw tuku Dios kinkamasiyaniyan, skgalala wanaw (Sant. 3:13). Chu lu tlan tuku kitaxtu. Biblia lichuwinan pi tuku lakaskinaw ni tsinu tatalakxtumi liskgalala nema «litaxtu akgtum lanka kiwi xpalakatakan tiku lichipaxnankgo chu tiku ni makgxtakgkgo nakalilakgapaskan pi paxuwakgo» (Prov. 3:13-18). Akgtum kilhtamaku, Jesús kawanilh kstalaninanin: «Lapi katsiyatit yuma [...] nakgalhiyatit tapaxuwan komo natlawayatit» (Juan 13:17). Chuntiya xkgalhikgolh tapaxuwan komo ankgalhin xkgalhakgaxmatkgolh Jesús. Chu chuna tlawakgolh. Kgalhakgaxmatkgolh xtastakyaw chu makglhkatikgolh xliʼakxilhtit, ni kaj makgtum titaxtulh, wata chuna lilatamakgolh.

6. ¿Tuku xlakata ankgalhin nakgalhakgaxmataw tamasiy xalak Biblia?

⁶ La uku, chuntiya xlakaskinka nakgalhakgaxmataw tuku kinkamasiyaniyan Biblia. Kawiliw akgtum li’akxilhtit. Kalilakpuwaw chatum tiku tlawa chiki. Xla lakgapasa chu katsi la namaklakaskin xliskujni chu tuku nalitlawa chiki. Pero kajwatiya komo nalimaklakaskin uma liskujni, liwana natlawa chiki. Max tlawanita chiki chu lu katsini. Pero komo xla chuntiya liwana tlawaputun chiki, talakaskin chuntiya naliskuja tuku katsini. Nachuna akxni tsukuw likgalhtawakgayaw Biblia, tsukuw liskujaw tuku katsiniw chu tlan kinkakitaxtunin. Wa xlakata, komo chuntiya kgalhiputunaw tapaxuwan, talakaskin nataktujuyaw akxni kgalhakgaxmataw xtamasiy Jehová chali chali.

7. Xlakata skgalala nawanaw, ¿tuku tlan natlawayaw xlakata tuku katsiniyaw li’akxilhtit xalak Biblia?

⁷ Kalichuwinaw tuku max tuwa natlawa pi ni nataktujuyaw chu ka’akxilhwi tuku tlawakgolh xlakskujnin Dios xala makgasa akxni nachuna titaxtukgolh. Komo matliwakglhputunaw kintakanajlakan, ni kaj xman wa talakaskin nakgalhtawakgayaw. Talakaskin nalilakpuwanaw la tlan nalilatamayaw tuku nakatsiniyaw chu lakapala natlawayaw.

8, 9. ¿Tuku kinkamasiyaniyan Hechos 14:8-15 xlakata la xtaktuju apóstol Pablo? (Kaʼakxilhti xapulana dibujo).

⁸ Jehová lakaskin pi latamanin «paks na’akgaputaxtukgoy, chu nalakgapaskgoy wa ntalulokgtat» (1 Tim. 2:4). ¿La ka’akxilhaw latamanin tiku nina lakgapaskgo xTachuwin Dios? Xlikana pi apóstol Pablo kilalh k’akgatunu sinagogas xlakata nakaputsa tiku xkatsikgoya tsinu xlakata Dios. Pero ni kajwatiya katachuwinalh tiku judíos xwankgonit, nachuna tiku xkakninanikgo atanu dioses. Tuku kakgalhtikgolh limasiyalh komo xlikana xtaktuju.

⁹ Akgtum li’akxilhtit, akxni Pablo xapulana kilichuwinalh xTachuwin Dios kLicaonia, latamanin kanajlakgolh pi Pablo chu Bernabé wa dioses Zeus chu Hermes xwankgonit. ¿Tlan akxilhkgolh Pablo chu Bernabé pi lanka xkali’akxilhka chu lu xkalakgapaska? ¿Lakpuwankgolh pi xtalakaskin najaxkgo, xlakata xkaputsastalanikanit k’akgtiy kachikinin nema kilakgapaxialhnankgolh? ¿Lakpuwankgolh pi xlakata lu xkalakgapaska tlan xkakitaxtunilh akxni xlichuwinankgolh Dios? Ni chuna. Lakapala lakxtitkgolh klhakgatkan chu pixlanka kawanikgolh latamanin: «¿Tuwan nchuna ntlawayatit yuma? Sampi na kaj chixkuwin akinin [kkgalhiyaw takatsanajwat] lantla wixin» (Hech. 14:8-15).

10. ¿Tuku xlakata Pablo chu Bernabé wankgolh pi na xtachuna xwankgonit la latamanin xalak Licaonia?

¹⁰ Pablo chu Bernabé liwana xkatsikgo pi na kaj makglakgalhinanin xwankgonit chuna la umakgolh latamanin. Pero ni wankgolh pi xtatalakxtumi xtakakninkan latamanin xalak Licaonia. Xlakan misioneros xlitaxtukgo, tiku xkalakgayawakanit xlakaskinka taskujut (Hech. 13:2). Nachuna, xatalaksakni xwankgonit chu xkgalhikgo takgalhkgalhin xlakata na’ankgo k’akgapun. Pero xkatsikgo pi uma latamanin na tlan xkgalhikgolh takgalhkgalhin na’ankgo k’akgapun komo xkgaxmatkgolh tamakatsinin xalak Biblia.

11. ¿La tlan namakglhkatiyaw la taktujulh Pablo akxni lichuwinanaw Dios?

¹¹ ¿La tlan namakglhkatiyaw xliʼakxilhtit Pablo? Pulaktum, ni namastayaw talakaskin pi nakinkamalankikanan xlakata tuku tlan makgantaxtiyaw xlakata Jehová kinkamakgtayayan. Tlan nakinkakgalhskinkanan: «¿La kka’akxilha latamanin tiku kkalitachuwinan xlakata Dios? ¿Klaksakpaxkinan chuna la latamanin tiku lakatsu kkatawi?». Xtatayananin Jehová chuntiya putsamakgolh latamanin tiku makglhtinamputunkgo tuku xaxlikana. Lakgachunin, max natalakaskin pi nakatsinikgo atanu tachuwin chu xtalismaninkan latamanin tiku anta lamakgolh. Uma natalan ni tlakg lanka kamakgkatsikan nixawa umakgolh latamanin. Wata ka’akgatekgsnikgo latamanin xlakata nakatsikgo la nakamakgtayakgo namakglhtinankgo tamakatsinin xla Tamapakgsin.

12. ¿La limasiyalh Epafras pi xkapaxki chu xkalilakgaputsa amakgapitsin?

¹² Atanu la tlan nalimasiyayaw pi taktujuyaw chu kgalhakgaxmataw Jehová, wa akxni tlawayaw oración xpalakatakan kinatalankan (2 Ped. 1:1). Chuna tlawalh chatum kstalanina Cristo tiku xwanikan Epafras. Biblia kaj makgtutu lichuwinan, anta lichuwinan ktatsokgni nema tlawalh Pablo. Akxni Pablo xtanuma kpulachin anta kRoma, katsokgnanilh kstalaninanin Cristo xalak Colosas pi Epafras ankgalhin xtlawa oración xpalakatakan (Col. 4:12). Uma kstalanina Cristo liwana xkalakgapasa chu xkalilakgaputsa. Chu maski  na xkgalhi xta’akglhuwit, xlakata na xtanuma kpulachin akxni xtanuma Pablo, ankgalhin xkalilakgaputsa amakgapitsin xlakata xtakanajlakan (Filem. 23). Xkamakgtaya chu chuna xkalimasiyani tapaxkit xnatalan. Oración nema tlawayaw xpalakatakan natalan lu tlan kitaxtu, liwaka akxni kamapakuwiyaw (2 Cor. 1:11; Sant. 5:16).

13. ¿La tlan namakglhkatiyaw xliʼakxilhtit Epafras akxni tlawayaw oración?

¹³ ¿Tiku natalan tlan nakamapakuwiyaw kkiʼoracioneskan? Kalakapastakwi xtukuwanikan makgapitsi natalan. Chuna la Epafras, lhuwa natalan tlawakgo oración kxpalakatakan natalan xalak congregación o xlakata familias tiku titaxtumakgo tuku tuwa o wi tuku xlakaskinka xlilaksakatkan kxlatamatkan. Amakgapitsin, akxni tlawakgo x’oracioneskan kamapakuwikgo natalan tiku kalichuwinankan k’artículo «Testigos de Jehová presos por sus creencias», xla sitio jw.org (sección PRENSA > ASUNTOS LEGALES). Nachuna nakalakapastakaw natalan tiku chatum xalak xfamilia ninita, tiku lakgtaxtukgonit akxni la tuku masputunan chu guerras, chu tiku lipatinamakgolh xlakata ni anan tumin. Xlikana pi anan lhuwa natalan tiku talakaskin nakapalakaskinaw kkiʼoracioneskan. Akxni chuna tlawayaw, limasiyayaw pi ni kiʼakstukan kinkalilakgaputsakanan, wata nachuna kalilakgaputsayaw amakgapitsin (Filip. 2:4). Jehová kgaxmata umakgolh oraciones.

14. ¿Tuku xlakata wanaw pi Jehová kinkawiliniyan xatlan li’akxilhtit xlakata kakgaxmatnikan amakgapitsin?

¹⁴ Atanu la nalimasiyayaw pi taktujuyaw wa akxni xatapaxuwan kakgaxmatniyaw amakgapitsin. Santiago 1:19 lichuwinan pi kstalanina Cristo talakaskin «liwana kakgaxmatli». Tiku lu xatlan li’akxilhtit xlakata uma wa Jehová (Gén. 18:32; Jos. 10:14). Ka’akxilhwi tuku kinkamasiyaniyan Éxodo 32:11-14 (kalikgalhtawakga). Jehová ni tsinu xlakaskin nakgaxmatni tuku xlakpuwan Moisés, pero maxkilh talakaskin nawani tuku xmakgkatsi. ¿Tlan akinin xkgaxmatniw chatum tiku nitlan kitaxtunilh tuku xtlawaputun chu xkinkawanin tuku tlan xtlawaw? Jehová kakgaxmatni latamanin tiku tlawanikgo oración xliputum xnakujkan.

15. ¿La tlan namakglhkatiyaw xli’akxilhtit Jehová?

¹⁵ Chatunu akinin tlan nakinkakgalhskinkanan: «Komo Jehová liwana kakgaxmatnilh latamanin chuna la tlawalh xpalakatakan Abrahán, Raquel, Moisés, Josué, Manóah, Elías chu Ezequías, ¿ni xlikana pi nachuna kilitlawatkan? ¿Tlakg tlan nakkamaxki kakni natalan akxni tlan kkalikatsini chu akxni kkakgaxmatni tastakyaw nema mastakgo? ¿Wi tiku xalak kincongregación o kkifamilia tiku talakaskin liwana nakkgaxmatni? ¿Wi tuku tlan naktlawa?» (Gén. 30:6; Juec. 13:9; 1 Rey. 17:22; 2 Crón. 30:20).

16. ¿Tuku tlawalh David akxni Simeí xtalatlawama?

¹⁶ Tataktujut nachuna kinkamakgtayayan ni natlawayaw tuku nitlan akxni amakgapitsin kinkatlawaniputunkgoyan tuku nitlan (Efes. 4:2). Akgtum tlan li’akxilhtit xpalakata uma, tekgsaw klibro xla 2 Samuel 16:5-13 (kalikgalhtawakga). David chu xlakskujnin tayanikgolh tuku nitlan katlawanilh chu kawanilh Simeí, chatum xtalilakgapasni mapakgsina Saúl. David xkgalhi litliwakga xlakata xlakkaxtlawalh uma ta’akglhuwit, pero ni chuna tlawalh wata tayanilh. ¿Niku tiyalh litliwakga xlakata natayani? Tekgsaw xatakgalhtin akxni nalakputsananiyaw tuku wan Salmo 3.

17. 1) ¿Tuku xlakata David machokgolh tuku xtlawaputun? 2) ¿La tlan namakglhkatiyaw xliʼakxilhtit David?

¹⁷ Chuna la wan niku litsuku Salmo 3 tsokgka  akxni David «xtsalama xpalakata Absalón tiku xkgawasa». Versículos 1 chu 2 lu tatalakxtumi tuku wan kcapítulo 16 xla 2 Samuel. Salmo 3:4 lichuwinan la David xlipawan Jehová. Lichuwinalh: «Makgtum akit kkilhanilh [kinTlatikan] Dios xlakata kakimakgtayalh, y xla kimakaminicha xtamakgtayan asta latani wilacha, nak ama [...] sipi». Akinin nachuna tlan natlawayaw oración akxni kinkatalatlawakanan. Chu Jehová nakinkamaxkiyan x’espíritu santo xlakata tlan natayaniyaw. ¿Wi niku tlan nalimasiyayaw pi tapatinanaw akxni kinkatlawanikanan tuku nitlan? ¿Kanajlayaw pi Jehová akxilha tapatin nema kgalhiyaw chu pi nakinkamakgtayayan?

18. ¿La nakinkakitaxtuniyan komo chuntiya namakgantaxtiya xtalakaskin Dios?

¹⁸ Komo natlawayaw tuku katsiyaw pi chuna xlilat, namakglhtinanaw lhuwa tasikulunalin. Wa xlakata lu xlikana tuku wan Proverbios 4:7 pi «liskgalala wa tuku tlakg xlakaskinka». Tuku limasiya pi lakgskgalalan akinin wa akxni wi tuku laksakaw, ni wa xlakata lhuwa tuku katsiyaw. Biblia wan pi asta chaʼan o chan «lu lakgskgalalan». Pero uma ni wamputun pi lhuwa tuku katsinikgo, wata chuna wan xlakata tuku tlawakgo nema kamakgtaya kilhtamaku nema aku namin (Prov. 30:24, 25). Cristo litasiya «[xliskgalala] Dios» chu ankgalhin tlawa tuku makgapaxuwa xTlat (1 Cor. 1:24; Juan 8:29). Dios liwana katsi pi tanu kilhchanima nakatsiya tuku natlawaya chu atanu tuku kilhchanima natlawaya. Xla kasikulunatlawa tiku taktujukgo, tiku tayanikgo chu tiku tlawakgo tuku katsinikgonit pi chuna xlilat (kalikgalhtawakga Mateo 7:21-23). Wa xlakata, chuntiya kaliskujwi xlakata namakgtayayaw congregación pi akxtum naskujniyaw Jehová. Xlikana pi talakaskin kilhtamaku chu takgalhkgalhin xlakata nalilatamayaw tuku katsiyaw pi chuna xlilat. Pero, komo chuna natlawayaw nalimasiyayaw pi taktujuyaw chu nakgalhiyaw tapaxuwan la uku chu putum kilhtamaku.