1. ¿Néna uá úni parhakpini anapuecheri jángua eskachi no xarhataaka kaxumbikua?

ÚKUA jukasïndi úni ambe engachi jorhenguarhijka Tata Diosïri Karakatarhu. ¿Andi? Ma rasoni jindesti jimboka ini “últimu jurhiatikuechani” jimbo no fásiliska kaxumbitiini para úni kumplirini. Irekaxakachi kʼuiripuecha jingoni engaksï imechajkumindu uékakuarhijka ka tuminani uékani, engaksï kʼéramakuarhijka ka teparakuarhini ka engaksï no ma ambe jimbo pʼíngukuarhijka (2 Tim. 3:1-3). Máru Tata Diosïri marhuarichaksï úpirindi no jiókuarhini inde jásï jánguani enga xáni xarharajka ka sési exenhani, peru enbidiariuani imechani engaksï ísï xarharajka eska sési nikuasïnga indeni ambe úparini (Sal. 37:1; 73:3). Uátiksï kurhamarhikuarhini sini meru jukaparhakueski orheta pérani máteruecheri ambe ka sini kʼuiripu janhanharhiaua engaksï ísï jámaaka komu “ima enga sánderu sapichitu ambeka” (Luk. 9:48). Jurajkuni eskachi úndaaka ísï jámani eska parhakpini anapuecha engaksï no uandanhiajka máteruecha jimbo, uáti eskachi no sési pájperaaka erachicha jingoni ka eskachi no xarharaaka eskachi kristianueska. Ísï jimbo, kánikuajtsïni marhuachiati estudiarini ka májkueni  jámani eskaksï máru ambakiti ejempluecha Bibliarhu anapu.

2. ¿Ambechi uá jorhenguarhini ióntki anapu Tata Diosïri ambakiti marhuaricheri?

² Parachi májkueni jámani eska Tata Diosïri ambakiti marhuaricha, jatsiskachi para inbestigarini ambe engaksï úpka. ¿Nénaksï niáraspi Jeobaeri amigu úkuarhini? ¿Ambeksï úspi paraka Jeoba seguirini japiringa jeiapanhiantaani? ¿Naniksï pʼiraspi uinhapikua paraksï úni ambe enga Jeoba uékenga? Í jásï estudiu, kánikua jukaparhakuesti para sési jorhenguarhini Jeobaeri ambe.

3, 4. a) ¿Ambe ka ambe úrakuarhisïni parachi jorhendanhani Tata Diosïri ambe? b) ¿Andichisï uá uandani eska uétarhisïnga sánderu ambe úni ka eska solu estudiarini para sési jarhani Tata Diosï jingoni?

³ Kristianuechachi uánikua konsejuechani intsïnhaasïnga ka jorhentperakua Biblia jimbo, publikasionicha, pájina jw.org, kanali JW Broadcasting, tánguarhikuecha ka kʼéri tánguarhikuecha jimbo. Peru parachi sánderu jorhenguarhini Tata Diosïri ambe, jatsiskachi para sánderu ambe úni ka eska solu estudiarini, Jesusi uandaspti: “Juchiti t’irekua jindesti eskani uáka ambe enga jeiapanhintajka ima engarini axaka, ka eskani kʼama[raaka] úni imeri úkuani o ánchikuarhitani” (Juanu 4:34).

⁴ Ísï eska Jesusi, kurhajchani Tata Diosïni, para jucha ísïsti komu tʼireni. ¿Néna jimbo? Engachi ambakiti ambe tʼirejka, agustuchi pʼikuarherasïnga ka felisi. Májkuenisti, engachi újka ambe enga Tata Diosï uéjka, juchari jakajkukua sánderu kʼésïndi ka sésichi jarhasïnga Tata Diosï jingoni. ¿A no eska ménisï engachi desanimadu nirajka aianhpini, tátsekuachi kʼuanhatsintasïnga tsípiparini ka uinhapikua jingoni?

5. ¿Nénajtsïni marhuachisïni engachi jánhaskakua jingoni jámajka?

⁵ Engachi újka ambe engajtsïni Jeoba jorhendajka, jánhaskatichi úkuarhisïnga (Sal. 107:43). Ka kánikua marhuasïndi ísï úni. Biblia arhisïndi eska no ma ambe enga kʼuiripu tsitijka úsïnga terokuntani jánhaskakua jingoni ka ístu eska jánhaskakua, ísïska komu “anhatapu tsípikueri para imecha engaksï jánhaskakua jingoni jámajka ka imecha engaksï no jurajkujka jánhaskakuani, arhinhaatiksï eskaksï felisiska” (Prov. 3:13-18). Ma xanhari, Jesusi arhiaspti imeri disipuluechani: “Engajtsï cha jánhaskajka ini ambe, ka úntsï eskaksïni ji na arhijka, tsípintsï jauaka” (Juanu 13:17). Seguirini japirindiksï felisini engaksï no jurajkupiringa kurhajchani Jesusini. Ka ísïksï úspti. Kumpliriuani Jesusiri instruksionichani ka májkueni jámani eska ima, no jindespti ambe ma engaksï no jukaparharapka, sino ambe ma engaksï úkuecha jingoni xarhatapka.

6. ¿Andichisï jatsi para seguirini jarhani kumplirini ambe engachi Bibliarhu jorhenguarhijka?

⁶ Iásï, májkueni jukaparhakuesti seguirini jarhani úni ambe engachi jorhenguarhijka Bibliarhu. Ju je ejemplu ma jatsikuni. Kʼuiripu ma enga mekanika estudiarika jorhenguarhistia inderi ambe ka jamberi jatsiati erramientechani ka ambe enga xáni uétarhijka para úni imeri ánchikuarhitani. Peru enga no úraaska erramientechani, para no ma ambeksï marhuakuati. Ístu, jamberi uátia máru ánchikuarhitechani ka ísï sánderu sáni mítikunia. Peru enga uéjka seguirini ambakiti mekaniku máeni, jatsisti para seguirini praktikarini ambe enga jorhenguarhika. Májkueni, engachi uénapka estudiarini Bibliani, úspkachi ambe engachi jorhenguarhipka ka marhuachisptijtsïni máru ambe jimbo. Peru parachi seguirini tsípikua jingoni irekani, jatsiskachi para pauani pauani kaxumbikua jingoni kumplirini ambe engajtsïni Jeoba jorhendajka.

7. Parachi jánhaskatini, ¿ambechi jatsiski para úni imani ejempluecha jingoni engachi Bibliarhu jorhenguarhijka?

⁷ Ju je exeni máru ambe enga uáka tsʼéjkuni na engachi xáni kaxumbitika ka nénaksï orhepani uérakuaspi i járhati tsʼéjkukuechani ióntki anapu Tata Diosïri ambakiti marhuaricha. Engachi uéjka uinhaperantani juchari pájperakuani Jeoba jingoni, nochi solu jatsiska para estudiarini ini  informasionini, sino jatsiskachi para sési eratsintani nénachi uá úni ambe engachi jorhenguarhiaka ka jirejiresï ísï úni.

8, 9. Ambe enga arhijka Ukuecha 14:8-15, ¿ambe xarhatasïni Pablueri kaxumbikueri ambe? (Exe je dibujuni enga uénakuarhu jaka).

⁸ Jeoba uékasïndi “eskaksï iámindu kʼuiripuecha pʼímutantskateaka, ka andajkuarhinksï mítini enga ísïka [o jurhimbikuani]” (1 Tim. 2:4). ¿Nénachi exeasïni imechani engaksï nótki mítini jaka jurhimbikuani? Ísïsti eska apostuli Pablu niraspka sinagogaecharhu para jirinhantaani imechani engaksï sánisï mítipkia Tata Diosïri ambe. Peru no solu judiuechani predikarikuaspti, sino ístu imechani engaksï máteru diosïchani kómarhiauenga. Na engaksï sési jiókuarhipka jurhimbikuani imecha engaksï diosï úkatechani kómarhiauenga, niáraspti jindeni tsʼéjkukua ma para Pablu de na enga xáni kaxumbipka.

⁹ Por ejemplu, enga Pablu uénapka imeri primeru biajini komu misioneru, Likaonia anapuechaksï ísï exespti eskaksï Pablu ka Bernabe jindespka diosïcha Seusi ka Ermesi engaksï kʼuiripu úkuarhintapka. ¿Jurajkuspiksï Pablu ka Bernabe eskaksï kʼéri ambe arhinhapiringa? ¿Ísïksï exespi eskaksï jukanchaspka paraksï ísï kánhani jimbokaksï no sési kánhaspka tsimani últimu iretechani jimbo engaksï nípka? ¿Eratsispiksï eska engaksï xáni mítikatepiringa marhuapiringa eianhpikuarhu? Nómbe. Jirejiresïksï karukuspti imecheri xukuparhakuani ka uinhachanksï kʼuiripuni japarini: “¿Andisïjtsï ísï újki? Juchajtuni májku jásï kʼuiripueska eska cha” (Uku. 14:8-15).

10. ¿Néna jimboksï májkuenispi Pablu ka Bernabe Likaonia anapuecha jingoni?

¹⁰ Pablu ka Bernabe jiókuarhisptiksï eskaksï xáni imperfektuespka komueska máteru kʼuiripuecha. Peru nóksï uékaspti ísï xarhatani eska imecheri kómarhikua májkuenispka eska Likaonia anapuecheri. Imechaksï misioneruespti engaksï míndakata japka para ánchikuarhita espesiali ma (Uku. 13:2). Ístuksï niáraspti espiritu santu jimbo erakukateni ka erokuarhikuaksï jatsispti para auandarhu irekani. Peruksï mítispti eska engaksï ima kʼuiripuecha jiókuarhipiringa jurhimbikuani ístuksï niárapirindi jatsini kóntperata para auandarhu nirani.

11. ¿Nénachi uá májkueni kaxumbitini eska Pablu engachi predikarijka?

¹¹ ¿Nénachi uá májkueni kaxumbitini eska Pablu? Ma ambe engachi uáka úni, jindesti eskachi no jatsiska para tsitini eskajtsïni kʼéri ambe arhiaka imani ambe jimbo engachi Jeobaeri jarhuajperata jimbo újka. Jatsiskachi para kurhamarhikuarhini: “¿Néna exesïni kʼuiripuni engani predikarikujka? ¿No sési exesïni kʼuiripueri rasani ma ísï eskaksï máteru kʼuiripuecha?”. Kánikua sési jarhasti engaksï Jeobaeri testiguecha seguirini jaka jirinhantaani kʼuiripuechani engaksï jiókuarhijka jurhimbikuani. Para i ambe úni, ménisï uétarhisïndi eskaksï máru kristianuecha jorhenguarhiaka idiomani ka pʼindekuechani imani kʼuiripuecheri engaksï máteruecha no xénchajka. Íksï erachicha no sánderu kʼéri exekuarhisïndi eska imecha, sánderu sési, jánguarhintasïndiksï kurhangukuni mándani arhini kʼuiripuni paraksï mítini nénaksï jarhuataua jiókuarhini Reinueri ambe.

12. ¿Néna xarhataspi Epafrasi eska uékaasïrenga ka interesi páni máteruecha jimbo?

¹² Máteru ambe jimbo engachi uáka xarhatani eskachi kaxumbitiska ka eskachi kurhajchasïnga Jeobani, jindesti kómarhijpikuani juchari erachichani (2 Ped. 1:1). Ísï úspti kristianu ma enga Epafrasi arhinhenga. Biblia solu tanimu xanharijkusï uandajti imeri ambe, Pablueri karakatechani jimbo. Enga apostuli Pablu ónhakata japka kʼumanchikuarhu ma jini Roma, karakuaspti Kolosasi anapu kristianuechani eska Epafrasi mintsita jingoni kómarhijpikuasïrenga imechani (Kol. 4:12). Epafrasi kánikua sési mítiaspti ka kánikua uandanhiasïrendi imecha jimbo. Ka nájkiruka  jatsikuarhiapka imeri mismu problemechani, jimboka májku jásï ónhakata jarhaspka Pablu jingoni, útasï uandanhiasïrendi eskaksï máteruecha sési japiringa Tata Diosï jingoni (Filem. 23). Jarhuatasïrendi ka ísï xarhatasïrendi eska uékaasïrenga ka interesi páni imecha jimbo. Kómarhikua engachi újka erachichani jimbo, kánikua marhuasïndi, sánderia engachi nombri jimbo kómarhijpikuajka (2 Kor. 1:11; Sant. 5:16).

13. ¿Nénachi uá májkueni úni eska Epafrasi engachi kómarhiaka Jeobani?

¹³ ¿Náki erachichaksï uétarhinchaxaki eskachi kómarhijpikuauaka? Ju je úraani nombrichani. Májkueni eska Epafrasi, uánikua iásï anapu erachichaksï kómarhijpikuasïndi kúnguarhikuarhu anapuechani, o familiechani jimbo engaksï kʼérati uandanhiatechani jatsiaka o engaksï jatsika para erakuni ambe ma enga jukaparhakua ambeka o orhepani uérakuni tsʼéjkukuani ma. Máteruechaksï úraasïndi imani nombrichani engaksï arini artikulurhu xarharajka “Testigos de Jehová presos por sus creencias”, pájineri jw.org/es (partirhu PRENSA > ASUNTOS LEGALES). Ístu, nochi jatsiska para mirikurhiani imechani engaksï uarhiranchaka nemani, imechani engaksï tsípiti pakaraka desastre naturali ma jimbo o guerra ma jimbo ka imechani engaksï kómu nitamani jaka tumina jimbo. Xarharasïndi eskaksï uánikua erachicha jarhaska engachi jatsika para kómarhijpikuani. Engachi ísï újka, xarhatasïngachi eskachi no solu juchajku pendiendi pákuarhisïnga, sino ístu máteruechani jimbo (Filip. 2:4). Jeoba kurhauasïndi indeni kómarhikuechani.

14. ¿Andichisï uandajki eska Jeoba jindeska sánderu ambakiti ejemplu para kurhajchaani máteruechani?

¹⁴ Máteru ambe engachi jimbo uáka xarhatani kaxumbikua, jindesti listu jarhani parachi kurhajchaani máteruechani. Santiagu 1:19 arhisïndi eska kristianu ma jatsiska para jorhenguarhini “sóntku kurhandini”. Sánderu ambakiti ejemplu íri ambe, jindesti Jeoba (Gén. 18:32; Jos. 10:14). Ju je exeni ambe engajtsïni jorhendajka Éxodo 32:11-14 (arhinta je). Jeoba no uétarhinchasïrendi mítini ambe eratsisïreni Moisesi, peru jurajkuspti eska Moisesi arhipiringa na enga pʼikuarherani japka. ¿Juchachi uékapirini tekantskua jingoni kurhajchani nemani enga no sési ambe úka ka úpirinchi ambe engajtsïni arhipiringa? Buenu, Jeoba tekantskua jingoni kurhajchaasïndi imechani engaksï mintsita jingoni kómarhijka.

15. ¿Nénachi uá ísïni eska Jeoba?

¹⁵ Táchanisïchi jatsipiringa para kurhamarhikuarhini: “Enga Jeoba kaxumbikua jingoni kurhajchaajka kʼuiripuechani komueska na úpka Abraani jingoni, Rakeli, Moisesi, Josue, Manoa, Elíasi ka Esekiasi jingoni, ¿no jatsipirini para jíjtuni májkueni úni? ¿Uá sánderuni sési kaani erachichani respetaripariani, jingontku kurhauani imecheri konsejuechani ka ísï úparini ambe engajtsïni arhiaka? ¿Jarhaski nema kúnguarhikuarhu o familiarhu enga uétarhinchani jaka eskani jingontkuni kurhajchaaka? ¿Ambe uá úni ji ini ambe jimbo?” (Gén. 30:6; Juec. 13:9; 1 Rey. 17:22; 2 Crón. 30:20).

16. ¿Ambe úspi Dabidi enga Simeí ikiatapka?

¹⁶ Kaxumbikua, ístujtsïni jarhuatasïndi parachi pʼíngukuarhini engajtsïni máteruecha ikiataaka (Efes. 4:2). Ambakiti ejemplu ma i amberi exentasïngachi ixú 2 Samuel 16:5-13 (arhinta je). Dabidi ka imeri marhuarichaksï tekantaspti enga Simeí, rei Sauliri parienti ma, no sési arhiapka ka no jurhimbikua jingoni kaani. Dabidi jatsispti uinhapikua para sési péntani indeni situasionini, peru tekantaspti. ¿Nani pʼiraspi uinhapikua para pʼíngukuarhini? Exentakachi mókuntskuani exeparini Salmo 3.

17. a) ¿Andisï Dabidi úpi pʼíngukuarhini? b) ¿Nénachi uá májkueni úni eska Dabidi?

¹⁷ Dabidi jiáni karaspti Salmo 3 enga uájpa Absalonini sïpakuarhikuni japka. Bersikuluecha  1 ka 2 sésiksï terokuntasïndi imani jingoni enga kapitulu 16 de 2 Samuel uandantajka. Salmo 3:4 xarhatasïndi na enga xáni Dabidi mintsinharhienga Jeobani. Ima uandaspti: “Uinhachaparini uandajpaaka Jeobani, ka imarini imeri pímbinhasï juátarhu uératini mókuchentaati”. Juchajtuchi uáka kómarhini engachi no sési kánhaaka. Jiájkani, Jeobajtsïni íntskuati imeri espiritu santu parachi úni tekantani. ¿Eranhaskasïnchi situasioni ma enga uétarhiaka parachi pʼíngukuarhini o puákuntani nemani engajtsïni ísku jatini úchiaka ambe ma? ¿Mintsikasïnchi eska Jeoba exesïnga na engachi no sési nitamakuarhini jaka ka eskajtsïni jarhuauaka?

18. ¿Náki kóntperatechanchi intsïnhaua engachi seguirini jauaka úni imani ambe engajtsïni Jeoba juramuchijka?

¹⁸ Engachi úska imani ambe engachi mítika eska sési jarhaska, uánikua kóntperatechanchi jatsiauaka. Rasoni jimbosï Proverbios 4:7 arhijti eska “mímixekua jindes[ka] enga sánderu jukaparhakua ambeka”. Nájkiruka jánhaskakua, jupindaskuarhijka imani ambe jimbo engachi xáni mítika, ambe enga meru xarhatajka eskachi janhaskatiska, jindestiksï ima ambe engachi erakujka úni, no ima ambe engachi mítika. Biblia arhisïndi eskaksï asta sïrukicha jánhaskatiska, jimbokaksï beranu jimbo tántasïnga imecheri tʼirekua (Prov. 30:24, 25). Kristu enga arhinhajka Tata Diosïri jánhaskakua, méntkisï úsïndi ambe enga Táti jemba jeiapanhintajka (1 Kor. 1:24; Juanu 8:29). Tata Diosï mítisti eska ma ambeska mítini ambechisï jatsi para úni ka eska méntku máteru ambeska úni ambe engachi mítika. Ima kóndiantasïndi imechani engaksï xarhatajka kaxumbikua ka tekantskua ka engaksï újka imani ambe engaksï mítika eska sési jarhaska (arhinta je Mateu 7:21-23). Ísï jimbo, ju je jánguarhintani úni eska kúnguarhikua jindeuaka lugari ma nani engachi iáminduecha kaxumbikua jingoni marhuakuaka Jeobani. Ísïsti, tiempu uétarhisïndi ka tekantskua parachi úni imani ambe engachi mítika eska sési jarhaska. Peru engachi úska, xarhataakachi eskachi kaxumbitiska ka tsípikua jingonchi irekaaka iásï ka para méntkisï.