1. Kasi mzimu wa kujighanaghanira wekha uwo wazara mu charu ungatikhwaska wuli?

CHIFUKWA wuli ntchakusuzga kulondezga ivyo tikusambira mu Mazgu gha Chiuta? Chifukwa chimoza ntchakuti pakukhumbikwa kujiyuyura kuti tichite icho ntchiwemi, ndipo mazuŵa ghano ntchipusu yayi kulutilira kuŵa ŵakujiyuyura. “Mu mazuŵa ghaumaliro” agha, tazingilizgika na ŵanthu “ŵakujitemwa, ŵakutemwa ndalama, ŵakujiŵikamo, ŵakujikuzga” kweniso “ŵambura kujikora.” (2 Tim. 3:1-3) Ŵanthu awo ŵali na nkharo yiheni ŵakutemweka ndipo vinthu vikuwoneka kuti vikuŵayendera makora. Muteŵeti wa Chiuta wangamba kudokera umo ŵakukhalira nangauli wangamanya kuti nkharo izi ni ziheni. (Sal. 37:1; 73:3) Munyake wangafika na pa kujifumba kuti: ‘Kasi pali chandulo chilichose para nkhuŵika vyakukhumba vya ŵanyane panthazi pa vyane? Kasi ŵanthu ŵalekenge yayi kunichindika para nkhuchita “nga ni muchoko chomene”?’ (Luka 9:48) Para tikuzomerezga kuti mzimu wa charu wa kujighanaghanira wekha ndiwo utilongozgenge, mbwenu tilekenge kutemwana mu mpingo ndipo ŵanthu viŵasuzgenge kumanya kuti  tili Ŵakhristu ŵaunenesko. Kweni tikutumbikika para tikusambira za ŵanthu ŵa mu Baibolo awo ntchakuwonerapo chiwemi na kuŵayezga.

2. Kasi nkhani za ŵateŵeti ŵakugomezgeka ŵa Chiuta zingatovwira wuli?

² Para tikukhumba kuchita nga mbanthu ŵakugomezgeka, tikwenera kusanda ivyo ŵakachita kuti ŵaŵe ŵabwezi ŵa Chiuta. Kasi ŵakachita wuli kuti Chiuta waŵatemwe? Kasi nkhongono zakuchitira viwemi ŵakazitora nkhu? Para tikusambira za ŵanthu aŵa na kughanaghanirapo, chipulikano chithu chikhorenge.

3, 4. (a) Ni nkhu uko tikupokera ulongozgi wauzimu? (b) Chifukwa wuli tingati kurya chakurya chauzimu nkhumanya waka vinthu yayi?

³ Tikusambira na kupokera ulongozgi uwemi kwizira mu Baibolo, mabuku ghakulongosora Baibolo, jw.org, JW Broadcasting, maungano gha mpingo na maungano ghakuru. Kweni mazgu gha Yesu agho ghali pa Yohane 4:34 ghakulongora kuti kurya chakurya chauzimu nkhumanya waka vinthu yayi. Kasi ntchivichi chinyake icho tikweneraso kuchita? Yesu wakati: “Chakurya chane ntchakuti nichite khumbo la uyo wakanituma na kufiska mulimo wake.”

⁴ Yesu wakawonanga kuti kuchita khumbo la Chiuta nako ntchakurya chauzimu. Chifukwa wuli? Mathupi ghithu ghakuŵa ghawemi kweniso ghankhongono para tikurya chakurya chiwemi. Mwakuyana waka, tikukhozgeka kweniso tikuŵa na chipulikano chakukhora para tikuchita khumbo la Chiuta. Nkhalinga apo muli kulutapo ku ungano wakunozgekera uteŵeti uku mukujipulika makora yayi, kweni mukati mwamara kupharazga mukajipulika makora chomene kweniso mukakhozgeka?

5. Pali vyandulo wuli para munthu wakuchita vinthu mwavinjeru?

⁵ Kuŵa na vinjeru chikung’anamura kulondezga ulongozgi wa Chiuta. (Sal. 107:43) Pali vyandulo vinandi ivyo munthu wavinjeru wakusanga. Baibolo likuti: “Pa ivyo ungadokera, palije icho chingayana navyo. . . . Ni khuni la umoyo ku awo ŵakuskepelera kwa ivyo, ndipo awo ŵakuvikoleska ŵachemekenge ŵakukondwa.” (Zinth. 3:13-18) Yesu wakati: “Usange mukumanya vinthu ivi, ŵakukondwa ndimwe usange mukuvichita.” (Yoh. 13:17) Kuti ŵasambiri ŵalutilire kuŵa ŵakukondwa, ŵakeneranga kulutilira kuchita ivyo Yesu wakaŵasambizga. Nyengo zose ŵakeneranga kupulikira na kuchita nga ndiyo, panyengo iyo waŵasambizgira pera yayi.

6. Chifukwa wuli tikwenera kulutilira kuchita ivyo tikusambira?

⁶ Lero napo ntchakuzirwa chomene kulutilira kuchita vinthu ivyo tikumanya kuti ni vyaunenesko. Mwachiyelezgero, makanika wangaŵa na viteŵetero vyakugwilira ntchito kweniso luso. Kweni wangasanga chandulo chilichose yayi para wakuleka kugwiliskira ntchito vinthu ivi. Usange kumanyuma wali kuchitapo ntchito ya umakanika ndipo wali na luso, wakwenera kulutilira kugwiliskira ntchito ivyo wali kusambira kuti walutilire kuŵa waluso. Mwakuyana waka, tikati tasambira waka unenesko tikaŵa ŵakukondwa chifukwa tikalondezganga ivyo tikasambiranga. Kweni kuti tilutilire kuŵa ŵakukondwa, zuŵa lililose tikwenera kuchita ivyo Yehova wakutisambizga.

7. Kasi tikwenera kuchita wuli kuti tisambireko ku ŵanthu awo ŵakuyowoyeka mu Baibolo?

⁷ Tiyeni tiwone vyakuchitika vinyake apo tingayezgeka usange tili ŵakujiyuyura na kuwona umo ŵanthu ŵakugomezgeka ŵa mu nyengo yakale ŵakachitira pa vyakuchitika ivyo. Kuti tiŵe ŵakukhora mwauzimu tikwenera kumanya waka nkhani izi yayi. Tikwenera kughanaghanirapo umo tingalondezgera ivyo tisambirenge, na kuchita mwaluŵiro ivyo tasambira.

8, 9. Kasi ivyo vili kulembeka pa Milimo 14:8-15 vikutisambizga vichi pa nkhani ya kujiyuyura kwa mpositole Paulosi? (Wonani chithuzi chakwamba.)

⁸ Chiuta wakukhumba kuti “ŵanthu ŵa mitundu yose ŵamanye makora unenesko na kuponoskeka.” (1 Tim. 2:4) Kasi mukuŵawona wuli ŵanthu awo ŵandasambire unenesko? Nangauli mpositole Paulosi wakapharazganga mu masunagoge ku ŵanthu awo ŵakamanyangako kale vya Chiuta, kweni wakapharazgiranga Ŵayuda pera yayi. Ivyo ŵakachita ŵanthu awo ŵakasopanga ŵachiuta ŵanyake vikamuyezga usange ngwakujiyuyura.

⁹ Mwachiyelezgero, pa ulendo wake wakwamba wa umishonale, ŵanthu ŵa ku Likawoniya ŵakaghanaghananga kuti iyo na Baranaba mbanthu ŵapadera chomene ndipo ŵakaŵapa mazina gha ŵachiuta ŵawo ŵautesi, Zeusi na Heremesi. Kasi Paulosi na Baranaba ŵakajikuzga chifukwa cha kuŵahaya? Kasi ŵakawona kuti ŵakhozgeka pakuti mu misumba yiŵiri iyo ŵakafumako ŵanthu ŵakaŵatambuzga? Kasi ŵakaghanaghana kuti makani ghawemi ghathandazgikenge chomene chifukwa chakuti ŵanthu ŵakaŵahayanga? Yayi. Nyengo yeneyiyo ŵakalongora kuti ŵakakondwa yayi na ivyo ŵanthu aŵa ŵakachita. Ŵakapalura malaya ghawo ghakuwaro ndipo ŵakanjira mu mzinda wa ŵanthu na kuchemerezga kuti: “Mwaŵanthu, chifukwa wuli mukuchita vinthu ivi? Nase tili ŵanthu ŵakutomboloka nga ndimwe.”—Mil. 14:8-15.

10. Kasi Paulosi na Baranaba ŵakawonanga kuti ŵakuyana waka na ŵanthu ŵa ku Likawoniya pa fundo wuli?

¹⁰ Apo Paulosi na Baranaba ŵakati nawo mbakutomboloka, ŵakang’anamuranga kuti kasopero kawo kakayananga waka na ka ŵanthu ŵambura kusopa Chiuta ŵara yayi. Ŵanthu ŵaŵiri aŵa ŵakaŵa ŵamishonale ndipo ŵakapika mulimo wapadera. (Mil. 13:2) Iwo ŵakaphakazgika na mzimu utuŵa ndipo ŵakaŵa na chilindizga chapadera. Kweni Paulosi na Baranaba ŵakamanya kuti para ŵanthu ŵa ku Likawoniya ŵangapulikira makani ghawemi, nawo ŵangaphakazgika na kuŵa na chilindizga nga ntchawo.

11. Kasi para tikupharazga, tingamuyezga wuli Paulosi pa nkhani ya kujiyuyura?

¹¹ Kasi tingamuyezga wuli Paulosi pa nkhani ya kujiyuyura? Tikwenera chara kuzomera para ŵanthu ŵakutihaya pa ivyo tachita na nkhongono za Yehova. Kweniso tikwenera yayi kukhazga kuti ŵanthu ŵatilumbenge. Waliyose wa ise wakwenera kujifumba kuti: ‘Kasi nkhuŵawona wuli ŵanthu awo nkhuŵapharazgira? Kasi nkhulongora sankho ku ŵanthu ŵanyake nga umo ŵanandi mu chigaŵa chane ŵakuchitira?’ Chakukondweska ntchakuti Ŵakaboni ŵa Yehova pa charu chose ŵakupenja mu chigaŵa chawo kuti ŵawone usange muchali ŵanthu ŵanyake awo ŵangategherezga makani ghawemi. Nyengo zinyake ŵangakhumbikwira kusambira viyowoyero na mitheto ya ŵanthu awo ŵanandi ŵakuŵawona kuti mbapasi. Ŵakaboni ŵakughanaghanapo yayi kuti mbapachanya kuluska awo ŵakuŵapharazgira. Kweni ŵakuyezga kupulikiska munthu waliyose kuti ŵamufike pa mtima na makani gha Ufumu.

12. Kasi Epafura wakalongora wuli kuti wakaŵa wakujighanaghanira yekha yayi?

¹² Nthowa yinyake iyo tingalongolera kuti tili ŵakujiyuyura nkhupulikira ulongozgi wa Chiuta wakuti tilomberenge ŵanji awo ŵali kale na “chipulikano chakuzirwa icho chikuyana na chithu.” (2 Pet. 1:1) Epafura ndimo wakachitira. Baibolo likumuzunura katatu pera, mu makalata agho ghakalembeka na Paulosi. Apo wakaŵa mu jele la panyumba ku Romu, Paulosi wakalembera Ŵakhristu awo ŵakakhalanga ku Kolose kuti Epafura “nyengo zose wakufwilirapo kumulomberani.” (Kol. 4:12) Epafura wakaŵamanyanga  makora ŵabali ndipo wakaŵafipiranga mtima chomene. Nangauli nayo wakaŵa “kayidi” nga ni Paulosi kweni wakatondeka yayi kumanya ivyo Ŵakhristu ŵanyake ŵakasoŵerwanga mwauzimu. (Filim. 23) Ndipo wakachitapo kanthu. Apa wakalongora kuti wakajighanaghaniranga yekha yayi. Para tikulombera ŵateŵeti ŵanyithu, chomenechomene para tikuŵazunura mazina ghawo, malurombo agha ghakuŵa ghankhongono chomene.—2 Kor. 1:11; Yak. 5:16.

13. Kasi mungamuyezga wuli Epafura mu malurombo ghinu?

¹³ Ghanaghanirani awo mungaŵazunura mazina pakuŵalombera. Nga ni Epafura, ŵabali na ŵadumbu ŵanandi ŵakulombera awo ŵali mu mpingo wawo, kweniso mabanja agho ghali na maudindo ghanandi panji agho ghakuyezgeka panji ghakukhumbikwira kusankha chakuchita. Ŵanandi ŵakulombera awo mazina ghawo ghali pa jw.org/tum pa nkhani yakuti “Uko Ŵakaboni ŵa Yehova Ŵajalirika mu Jele Chifukwa cha Ivyo Ŵakugomezga.” (Wonani pa chigaŵa chakuti NKHANI > NKHANI ZA MALANGO.) Tingachitaso makora kuŵalombera awo ŵakutemweka ŵawo ŵali kufwa, awo ŵali kupona ku nkhondo na ku masoka agho ghachitika sonosono, kweniso awo ŵakuzizipizga masuzgo gha vyachuma. Nadi, pali ŵabali na ŵadumbu ŵanandi awo ŵakukhumbikwira kuŵalombera. Para tikuŵalombera ŵanthu aŵa, tikulongora kuti tikulaŵiska pa vyakukhumba vithu pera yayi kweni na vya ŵanji. (Fil. 2:4) Yehova wakupulika malurombo ghanthena.

14. Kasi Yehova wakulongora wuli kuti ntchakuwonerapo chiwemi pa nkhani ya kutegherezga?

¹⁴ Chinyake icho tikulongolera kuti ndise ŵakujiyuyura nkhuŵa ŵategherezgi ŵawemi. Lemba la Yakobe 1:19 likuti ‘tipulikenge luŵiro.’ Yehova ntchakuwonerapo chiwemi chomene pa nkhani iyi. (Gen. 18:32; Josh. 10:14) Wonani ivyo tingasambirapo pa chidumbirano icho chili kulembeka pa Ekisodo 32:11-14. (Ŵerengani.) Yehova wakamupa mwaŵi Mozesi kuti wayowoye umo wakajipulikiranga nangauli chikaŵa chakukhumbikwa yayi. Ni munthu nju uyo wangategherezga kwa nyengo yitali na kulondezga masachizgo gha munthu uyo kanandi wakumunangira? Kweni Yehova wakuŵategherezga mwakuzikira ŵanthu awo ŵakumulomba mu chipulikano.

15. Kasi tingamuyezga wuli Yehova pa nkhani ya kuchindika ŵanji?

¹⁵ Waliyose wangachita makora kujifumba kuti: ‘Usange Yehova ndiyo wakujikhizga na kutegherezga ku ŵanthu nga umo wakachitira na Abrahamu, Rakelo, Mozesi, Joshuwa, Manowa, Eliya na Hezekiya, asi ine ndine nkhwenera kuŵachindika chomene ŵabali na kuŵategherezga kweniso kuchita ivyo ŵayowoya? Kasi pali munthu munyake mu mpingo panji mu banja lane uyo pasono wakukhumbikwira kumutegherezga chomene? Kasi ningachitapo vichi?’—Gen. 30:6; Ŵeru. 13:9; 1 Mathe. 17:22; 2 Mid. 30:20.

16. Kasi Themba Davide likachita wuli Shimeyi wakati walikwiyiska?

¹⁶ Kujiyuyura kungatovwiraso kuti tiŵe ŵakujikora para ŵanji ŵatikwiyiska. (Efe. 4:2) Chiyelezgero chiwemi pa nkhani iyi tikuchisanga pa 2 Samuyeli 16:5-13. (Ŵerengani.) Davide na ŵateŵeti ŵake ŵakazizipizga apo Shimeyi mubali wa Themba Sauli wakaŵawukira. Davide wakajikora nangauli wakaŵa na nkhongono zakumulekeskera. Kasi ntchivichi chikamovwira Davide kuti wajikore? Zgoro tingalisanga para tingasanda Salimo lachitatu.

17. Kasi ntchivichi icho chikawovwira Davide kuti wajikore, ndipo tingamuyezga wuli?

¹⁷ Salimo lachitatu likulongora kuti likalembeka  pa nyengo iyo Davide “wakachimbiranga mwana wake Abisalomu.” Vesi 1 na 2 likukolerana chomene na vyakuchitika ivyo vikuyowoyeka mu chipaturo 16 cha 2 Samuyeli. Kufuma apo, Salimo 3:4 likulongosora umo Davide wakalongolera kuti wakuthemba Chiuta. Iyo wakati: “Nichemerezgenge kwa Yehova, ndipo wanizgorenge kufuma mu phiri lake lakupatulika.” Nase tingalomba para tawukilirika. Yehova watipenge mzimu wake utuŵa, uwo ungatovwira kuti tizizipizge. Kasi mungaghanaghanira chakuchitika chinyake apo mungakhumbikwira kuŵa na mtima wakujikora panji apo mungakhumbikwira kugowoka na mtima wose? Kasi mukugomezga kuti Yehova wakuwona suzgo linu ndipo wangamutumbikani?

18. Kasi tisangenge chandulo wuli para tikulutilira kulondezga ulongozgi wa Chiuta?

¹⁸ Para tikuchita icho tikumanya kuti ntchiwemi titumbikikenge. Lekani lemba la Zintharika 4:7 likuti “vinjeru ntchinthu chakuzirwa chomene.” Nangauli munthu wavinjeru wakumanya vinthu, kweni tikulongora kuti tili na vinjeru usange tikusankha makora vyakuchita kuluska kumanya waka vinthu. Nyerere nazo zikulongora kuti zili na vinjeru. Zikulongora kuti zili na vinjeru chifukwa zikusungirathu chakurya mu chihanya. (Zinth. 30:24, 25) Khristu, uyo ni “vinjeru vya Chiuta” nyengo zose wakuchita vinthu vyakukondweska Adada ŵake. (1 Kor. 1:24; Yoh. 8:29) Chiuta wakumanya mphambano pakati pa kusankha vinthu mwakwenelera na kuchitapo kanthu pa ivyo tasankha. Nakuti wakutumbika awo ŵakulutilira kujiyuyura na kuchita icho ŵakumanya kuti ntchaunenesko. (Ŵerengani Mateyu 7:21-23.) Ntheura lutilirani kuyezgayezga kuŵa ŵakujiyuyura. Para muchitenge nthena viwovwirenge kuti waliyose mu mpingo wateŵetere Yehova mwakujiyuyura. Pakutora nyengo kweniso pakukhumbikwira kuzikira kuti tichite icho tikumanya kuti ntchaunenesko, kweni para tichitenge nthena tilongorenge kuti ndise ŵakujiyuyura, ndipo tiŵenge ŵakukondwa sono ndiposo muyirayira.