遵行呢啲事就有福嘞
“我嘅食物就系遵行差派我嚟嗰一位嘅旨意，完成佢嘅工作。”——约翰福音4:34
1． 呢个世界嘅自私精神点样影响我哋？
点解实践上帝嘅话语并唔容易？一个原因系，做正确嘅事需要有谦卑嘅态度。喺呢个“最后嘅日子”，我哋周围都系“专爱自己，贪爱钱财，自负，高傲”同“漫无自制”嘅人。（提摩太后书3:1-3）身为上帝嘅仆人，我哋憎恨呢啲不良嘅精神态度。不过，有时我哋见到呢啲自私嘅人备受推崇，睇嚟亦都生活无忧，可能会羡慕佢哋。（诗篇37:1；73:3）我哋可能会谂：“我凡事都先顾及其他人，系咪真系值得呢？如果我‘行事为人好似后辈噉’，其他人系咪会睇低我呢？”（路加福音9:48）如果我哋容许世界嘅精神影响自己，噉我哋同弟兄姊妹之间嘅亲密关系就会受到损害，其他人亦都好难睇出我哋系真基督徒。只要我哋研读上帝嘅话语，效法圣经入面嘅好榜样，就可以从中得益。
2． 我哋可以从古代嘅上帝忠仆身上学到乜嘢？
2 如果我哋想向嗰啲忠于耶和华嘅人学习，就应该研读并沉思佢哋所做嘅一切，使自己嘅信心受到强化。乜嘢帮助佢哋成为上帝嘅朋友？佢哋点样蒙上帝悦纳？佢哋从边度得到力量去成就上帝嘅旨意？我哋思考呢啲问题，就可以更好噉吸收灵粮。
乜嘢帮助我哋保持信心坚强
3,4． （甲）耶和华点样教导我哋？（乙）点解话属灵嘅食物唔系只系获取知识？
3 我哋通过圣经、圣经出版物、JW.ORG网站、JW电视网，以及聚会同大会得到好多好好嘅劝告同教导。不过，吸收属灵嘅食物唔系只系获取知识。仲包括乜嘢呢？耶稣话：“我嘅食物就系遵行差派我嚟嗰一位嘅旨意，完成佢嘅工作。”（约翰福音4:34）
4 对耶稣嚟讲，属灵嘅食物包括按照上帝嘅旨意行事。点解话呢个系食物呢？正如食物可以使我哋嘅身体得到充足嘅营养，我哋遵行上帝嘅旨意，就会有满足感，自己嘅信心亦都受到强化。有时，我哋参加传道前聚会嗰阵觉得好攰，不过传道结束之后就觉得好开心。做属灵嘅工作的确可以使我哋重新得力！
5． 按智慧行事带嚟乜嘢益处？
5 我哋按照上帝嘅吩咐行事，就系有智慧嘞。（诗篇107:43）智慧可以带俾我哋好多益处。圣经话：“你喜欢嘅一切都唔能够同［智慧］媲美。 ……人持守智慧，智慧就系佢哋嘅生命树；紧守智慧嘅，必称为有福嘅人。”（箴言3:13-18）耶稣话：“你哋既然知道呢啲事，如果遵行，就有福嘞。”（约翰福音13:17）基督徒只要继续按照耶稣嘅吩咐去做，就可以享有恒久嘅喜乐。佢哋唔系只系一时听从耶稣嘅教导，而系喺生活各方面都时刻效法耶稣嘅榜样。
6． 点解我哋要不断将自己学到嘅实践出嚟？
6 今日，我哋应该坚持实践学到嘅知识。例如，一个机械修理师可能有工具、物料同知识。如果佢善用呢啲资源，就可以更好噉完成工作。但系，就算佢有好多宝贵嘅工作经验，都仲系要不断将自己学到嘅用出嚟，先可以继续做一个技巧精湛嘅工人。同样，我哋啱啱认识真理嗰时，可能因为自己可以将圣经嘅教导实践出嚟而感到开心，不过，我哋如果想得到恒久嘅喜乐，就要每一日都谦卑噉按照耶和华嘅指引嚟生活。
7． 我哋睇完圣经人物嘅榜样之后，点样做就系有智慧？
7 接住落嚟我哋会睇吓，一啲考验我哋忠贞嘅情况，同埋睇吓古代嘅忠仆遇到类似考验嘅时候点样做。我哋唔应该只系知道呢啲记载，仲要认真沉思，然后喺生活上应用出嚟。
唔好自命不凡
8,9． 使徒行传14:8-15嘅记载点样表明使徒保罗有谦卑嘅态度？（请睇吓课文开头嘅图片）
8 上帝嘅旨意就系要“各种各样嘅人都可以得救，确切认识真理”。（提摩太前书2:4）你对好多仲未认识真理嘅人有乜嘢睇法？虽然使徒保罗会去犹太会堂向嗰啲已经相信上帝嘅人传道，不过佢亦都向非犹太裔嘅人传讲真理。呢啲崇拜假神嘅人对好消息嘅反应，使保罗嘅谦卑受到考验。
9 喺保罗嘅第一次传道旅程，利考尼亚人将保罗同巴拿巴当成神明，分别称佢哋为宙斯同赫耳墨斯。保罗同巴拿巴有冇趁机成为大人物？喺过去两年期间，佢哋去到唔同嘅城市都受到迫害。佢哋有冇乐观噉认为，今次取得咗重大突破呢？佢哋会唔会以为，公开嘅方式可以促进传道工作呢？佢哋冇噉谂过！佢哋即刻撕裂外衣，大声噉澄清话：“各位，点解要噉样做呢？我哋都只不过系人，同你哋一样软弱。”（使徒行传14:8-15）
10． 点解保罗同巴拿巴冇觉得自己高人一等？
10 保罗同巴拿巴承认佢哋都系唔完美嘅，佢哋唔想将正确嘅崇拜同异教混为一谈。佢哋唔系受上帝委派做海外传道工作嘅咩？（使徒行传13:2）佢哋唔系受圣灵膏立，将来可以得享荣耀嘅咩？冇错，佢哋的确系。不过保罗同巴拿巴冇觉得自己高人一等，因为佢哋知道，呢啲利考尼亚人如果热切响应好消息，都可以享有同样嘅希望。
11． 喺传道工作上，我哋可以点样效法保罗谦卑嘅榜样？
11 我哋可以点样效法保罗表现谦卑？首先，好似保罗噉，我哋唔应该因为自己有特别嘅委派或者倚靠上帝嘅力量取得某啲成就，就觉得自己好犀利。我哋每个人都可以问吓自己：“我对传道对象有乜嘢睇法？我会唔会受大众嘅思想影响，对某啲群体怀有偏见？”值得称赞嘅系，世界各地嘅见证人都努力向各种各样嘅人传讲王国嘅好消息。虽然某啲种族或民族嘅人俾人睇低，但见证人为咗帮助呢啲人认识真理，甚至学习佢哋嘅语言文化。无论喺乜嘢情况下，见证人都唔会觉得自己比传道对象更加优越。相反，佢哋为咗帮助人接受王国嘅好消息，会尽力了解每一个人。
喺祷告中提到对方嘅名
12． 以巴弗点样表明佢无私噉关心其他人？
12 我哋谦卑噉遵行上帝旨意嘅另一个方式系，为嗰啲“同我哋一样有幸获得呢个信仰嘅人”祷告。（彼得后书1:1）以巴弗就系噉样做嘅。呢个名只系喺保罗嘅书信当中出现过三次。保罗喺罗马被软禁嘅时候写信俾歌罗西嘅基督徒。佢喺信入面提到，以巴弗“经常殷切为［佢哋］祷告”。（歌罗西书4:12）以巴弗好熟识佢嘅弟兄姊妹，亦都深切关心佢哋。虽然以巴弗“陪伴”保罗一齐坐监，不过佢仲系好关心其他人嘅属灵需要，设法做啲事去帮助佢哋。（腓利门书23）佢的确无私噉关心其他人。我哋可以效法以巴弗为弟兄姊妹祷告，甚至喺祷告中提到佢哋嘅名。噉样嘅祷告，大有力量。（哥林多后书1:11；雅各书5:16）
13． 你祷告嗰时可以点样效法以巴弗嘅榜样？
13 请谂吓，自己祷告嘅时候可以提到边啲人嘅名。好似以巴弗噉，好多弟兄姊妹都为自己会众嘅人、肩负家庭重任嘅人，同埋嗰啲要喺重大问题上做抉择或者正受到诱惑嘅人祷告。你可以为嗰啲素未谋面嘅弟兄姊妹祷告，喺jw.org“耶和华见证人因信仰被囚”呢篇文章可以揾到佢哋嘅名单。（点击“新闻室”> “法律诉讼”）另外，我哋可以为嗰啲痛失亲友嘅人、喺灾难或者战争幸存嘅人，同埋有经济难题嘅人祷告。我哋可以为好多弟兄姊妹祷告，噉样可以造益佢哋。我哋为呢啲弟兄姊妹祷告，就表明我哋唔系只关心自己，亦都关心其他人。（腓立比书2:4）耶和华会垂听呢啲祷告。
“敏于聆听”
14． 点解话，耶和华喺用心聆听方面系最好嘅榜样？
14 我哋表现谦卑嘅另一个方式系，人哋讲话嘅时候，用心聆听。雅各书1:19话，我哋要“敏于聆听”。喺呢方面，耶和华上帝为我哋立下完美嘅榜样。（创世记18:32；约书亚记10:14）我哋嚟睇吓出埃及记32:11-14（请读）嘅对话。虽然耶和华唔需要摩西嘅意见都可以做最正确嘅决定，不过佢仲系俾机会摩西表达自己嘅感受。有冇人愿意花好多时间去听一个犯错嘅人嘅建议，然后照住去做呢？耶和华就会噉做。就算一个人唔完美，只要佢怀住信心祈求，耶和华都会耐心聆听。
15． 我哋可以点样效法耶和华尊重人？
15 我哋每个人都可以问吓自己：“既然耶和华纡尊降贵，聆听亚伯拉罕、拉结、摩西、约书亚、玛挪亚、以利亚同埋希西家所讲嘅话，噉我唔系都好应该尊重弟兄姊妹，重视佢哋嘅睇法咩？如果佢哋提出好嘅建议，我可唔可以按住去做呢？我系咪可以更加关心会众或者屋企嘅某啲成员呢？我可以点样做呢？”（创世记30:6；士师记13:9；列王纪上17:22；历代志下30:20）
“话唔定耶和华睇见我嘅苦况”
大卫话：“由得佢咒骂喇”！你会点样做？（请睇第16、17段）
16． 大卫受到示每辱骂同攻击嗰时点样做？
16 我哋俾人激嬲嗰时，谦卑有助于我哋表现自制。（以弗所书4:2）关于呢一点，撒母耳记下16:5-13（请读）嘅记载值得我哋学习。示每系扫罗王嘅亲戚，佢曾经辱骂同攻击大卫及其手下。虽然大卫当时有能力对付示每，不过佢并冇噉样做。点解大卫可以控制到自己嘅情绪？我哋通过诗篇3篇可以明白呢一点。
17． 大卫点解可以保持自制？我哋可以点样效法佢？
17 诗篇3篇题记表明，呢篇诗系大卫“躲避儿子押沙龙”嘅时候写嘅。经文第1、2节所描述嘅，同撒母耳记下16章描述嘅系同一件事。跟住，诗篇3:4强调咗大卫对耶和华嘅信心。经文话：“我要扬声呼求耶和华，佢就从佢嘅圣山上回答我。”我哋遭受攻击嘅时候，同样都可以向上帝祷告。耶和华会赐我哋圣灵，帮助我哋忍受得住。我哋俾人恶意激嬲嗰阵，系咪可以付出更多努力表现自制同宽恕呢？你相唔相信耶和华会睇到你嘅难题并祝福你呢？
“最重要嘅系智慧”
18． 不断实践神圣嘅教导点样使我哋得益？
18 我哋做正确嘅事就可以得到好多福分。难怪箴言4:7话，“最重要嘅系智慧”！虽然智慧系以知识为基础嘅，不过判断一个人系咪有智慧，唔系在于佢有几多知识，而系睇佢有冇将知识实践出嚟。蚂蚁冇好多知识，不过佢哋喺夏天就识得为过冬准备食物。佢哋嘅行为表明，佢哋都有一啲本能嘅智慧。（箴言30:24,25）圣经话，基督系“上帝嘅智慧”，因为佢凡事都取悦耶和华。（哥林多前书1:24；约翰福音8:29）做正确嘅决定同埋按照呢个决定去做，其实系两回事。如果我哋知道乜嘢事系啱嘅，而且以谦卑嘅态度不断努力去做，就会得到耶和华嘅奖赏。（请读马太福音7:21-23）我哋每个人都可以继续努力，使会众充满谦卑嘅精神。实践学到嘅知识系需要时间嘅。如果我哋愿意耐心噉做，就表明我哋有谦卑嘅态度，无论而家定系将来都可以带俾我哋无穷嘅喜乐。
