1, 2. (1) O maanan ko pakidemay a midokaˈ to tamdaw hani? (2) O cima ko pasowalay to saka cecay a mangah hani?

ADIHAYAY ko misangaˈan no tamdaw a dafong madepocay ko kaˈorip, tinakoen o tingwa, tinghoy, tosiya ato pinsiyang. Kawra, o roma dafong matongalay ko katalawan—tinakoen o kowang, i seraay a fakotang, tamako, ato kinsi fakotang. Iraay ko cecay dafong mikiˈayaway to misangaˈan no tamdaw, pakidemay ko pidokaˈ to tamdaw, o misamangahay! O misamangahay tamdaw mafanaˈay ko niyah to cowa ko soˈlinay, kawra padetengho cangra milipalaw to tao. O cima ko “misangaˈay” to saka cecay a mangah hani? Ci Akoma. Sowal ni Yis ci Akoma ‘o wama no misamangahay,’ sanay. (ˈOsien ko Yohani 8:44.) Hacowaay ci Akoma pasowal to saka cecay a mangah hani?

² ˈAyaw no pina patek miheca, saka cecay faˈinayan fafahiyan ci Atam aci Ifa, lipahakay a maˈorip i Itin. Ikor, pasowalan ni Akoma ci Ifa to saka cecay a mangah. Mafanaˈay ci Akoma to palimoˈotan no Kawas ci Atam aci Ifa, hamaan komaen to ‘pafafidaˈay to ngaˈayay tatiihay’ a heci, ano misafelit cangra toniya limoˈot, wa mapatay cangra. Kawra pakaynian ni Satan i cecay ˈoner pasowal ci Ifa: “Caay ka patay kamo [saka cecay mangah]. O sakasaan no Kawas i, mafanaˈ Cingra nawhani ano komaen kamo to heci noya kilang i, mafawahto ko mata  namo, o mamatiyato o Kawas kamo, maedeng kamo a mihapinang to ngaˈayay ato tatiihay.”​—Satapangan 2:15-17; 3:1-5.

3. (1) O mangah ni Satan hano tada tatiihay hani? (2) O mangah ningra mikidatay to maanan a teloc hani?

³ Tada tatiihay ko mangah ni Satan, mafanaˈay cingra ano tengilen ni Ifa ko sowal ningra, komaen toya heci, wa mapatay ci Ifa. Misafelit ci Ifa aci Atam to limoˈot no Kawas, salikor mapatayay cangra. (Satapangan 3:6; 5:5) Samanen mararaway cangra, ‘hato matenakay ko patay i polong a tamdaw.’ Teloc i, “haloya caay pilecad to raraw ni Atam a pacoli to limoˈot no Kawas a tamdaw ao mamapatay.” (Loma 5:12, 14) Mihaenay cowato ka matiya kita nano limasmas no Kawas, ira ko malefotay a ˈorip, tahadaˈoc a maˈorip. ˈOrip no roma tamdaw mahecaday to sowal no Fangcalay Cudad, “pito aca a poloˈ, ano tanektek ko tireng i, tangasa i falo a poloˈ ko mihecaan.” Ano koˈdaw ko ˈorip ita, kamayan matomes ko “roray ato pades.” (ˈOlic 90:10) O hatiniay kadayayan a teloc—sahtoay o mangah ni Satan ko palaˈosiay!

4. (1) Oniya lalakaw wa milengo to maanan toloay a salicay? (2) O sowal no ˈOlic 15:1, 2, o cima ko ngangaˈay malo widang ni Yihofa hani?

⁴ Sowal ni Yis ci Akoma Satan ‘miliyangay to soˈlinay kimad, samanen awaay ko soˈlinay kimad ilalomaˈ ningra.’ Padotocay awa ko soˈlinay kimad i falocoˈ ni Satan, kamayan cingra tano mangah a miorat to tamdaw. (Paˈarawan 12:9) Caka ciharateng kita malipalaw ni Satan. Oniya lalakaw wa milengo to tolo a salicay: Samaanay ci Satan milipalaw to tamdaw? Hano mararid ko tamdaw misamangah? Ano sapiliyasaw midemak to mahecaday ni Atam aci Ifa a raraw, sasamaan kita micerid “soˈlin ko sowal”, ho ngaˈay malo widang ni Yihofa hani?​—ˈOsien ko ˈOlic 15:1, 2.

5. Misakadademakay ci Satan to maanan a pakayraan milipalaw to tamdaw hani?

⁵ Sowal no tarokos ci Pawlo wa ngaˈay maliyas ita ko pilipalaw ni Satan, samanen “mafanaˈ kita to nisahalakaan ni Satan.” (2 Korinto 2:11) Pakayni i Fangcalay Cudad, mafanaˈay kita to makowanay ni Satan ko polong a hekal, mahawpay ko mararaway pihakelongan, manaholay a sifo ato maˈanofay a misasingdiay a lekakawa. (1 Yohani 5:19) Ci Satan ato tatiihay coyoh misakadademakay to cifadangalay a tamdaw, misamangah milipalaw to tamdaw, cowa ka fahkaˈen kita tonini. (1 Timoti 4:1, 2) Anini, o roma misasingdiay tamdaw tano kowangkaway pacakay to tatiihay dafong anca pakayni sapietanaw to payci a milipalaw to micakayay a tamdaw.

6, 7. (1) Hano taˈangayay ko raraw no ˈaˈideman no pihakelongan hani? (2) Tahatengilay kiso to maanan mararaway a sasowalen hani?

⁶ Taˈangayay ko raraw no milipalaway to tamdaw a ˈaˈideman no pihakelongan, samanen o mangah nangra mipalakay to hatokel no tamdaw. Hano haenen ko sowal hani? Ano pakasoˈlin ko tamdaw to mararaway pihakelongan, midemak to kapiliˈan no Kawas a demak, wa malahdaw ko tahadaˈocay ˈorip a hatokel ningra halatek. (Hosiya 4:9) Mirikecan ni Yis ko ˈaˈideman no pihakelongan itiya, mihaenay cangra a milipalaw to tamdaw. Sanay ko sowal ni Yis cangraanan: “O cacilafo kamo o misamangahay ko demak a pasifanaˈay to Rikec ato Farisay a tamdaw. Nawhani taliyoken namo a mirakat ko riyar ato hekal to sapipacomodaw to cecay a tamdaw i pakayraan namo. Maherek kamo a pacomod cingraan i, sangaˈen namo cingra a [mifalah i Hinnom, midaˈoc malaˈafo.]” (Matay 23:15) Pakideman ni Yis mirikec koniya ˈaˈideman no pihakelongan, samanen mahecaday cangra toya “mipatayay to tamdaw” a Akoma misamangah to tamdaw.​—Yohani 8:44.

⁷ Toniya hekal anini adihayay ko ˈaˈideman no pihakelongan, panganganan cangra to fokosi, sinpo, ato rapi. Mahecaday cangra to saka cecay hahekalan a ˈaˈideman no pihakelongan ‘mipenecay to soˈlinay kimad’ tano ‘makaniway micelol to soˈlinay Kimad no Kawas’. (Loma 1:18, 25) Tinakoen, miowingay cangra to “kinacecay malidong, tahadaˈoc malidong,” caka patay  ko saloˈafang, ato miliyaw hofocen sanay a mararaway a kimad, miowingayho to micadaay ko Kawas to tongsinlien ato raramod nangra, sanay a mararaway harateng.

8. (1) Paˈayaway ko Fangcalay Cudad to ˈaˈideman no mirikecay, wa pasowal to maanan a mangah hani? (2) Nikawrira, haharatengen ita ko maanan?

⁸ O ˈaˈideman no mirikecay misamangahay a milipalaw to ˈalomanay. Paˈayaway ko Fangcalay Cudad to sasomowal cangra no ikor to “rihaday kita awaay ko katalawan” mahaenay a mangah! Tiya, ‘fahal sanay a laˈafo wa tangsol sa patefo cangraanan.’ Mihaenay, hamaan malipalaw no ˈaˈideman no mirikecay kita, hato maraayayho ko kahererekan noniya lekakawa no hekal sanay. Ihkalay mafanaˈ kita, ‘o kaira no romiˈad ni Yihofa, mahecaday o kaira no mitakaway to lafii.’​—1 Tisalonika 5:1-4.

9, 10. (1) Hano misamangah ko tamdaw hani? (2) O teloc no samangahay o maanan hani? (3) O samangahay hano cowa ka lipalaw ci Yihofa hani?

⁹ Ano kaolahan no ˈalomanay ko cecay faelohay dafong, wa adihay ko misangaˈan. O misamangahay a pakayraan mahecaday. Anini, cowa ko cifadangalay aca ko milipalaway, o kalo a tamdaw marariday a misamangah. Itini “Hano Misamangah Kita” a lalakaw, o cecay safanaˈ mitatiliday ci Pitecaci, sanay ko sowal: “O misamangahay a pinangan, palidlid sanay cilamitay i falocoˈ no tamdaw.” O tamdaw sapidipotaw to niyah anca sapacakataw to niyah a misamangah. Mansa, tocerid sapisimedaw to raraw ato tatiihay waywayan ko tamdaw, anca sapilifokaw to hafay ato roma saka ngaˈay a misamangah. Sanay ko lalakaw: “Ano taˈangayay anca mimingay mangah, cawato ka ngodo kita to kafahalan tamdaw, cafay matayal, widang ato kaolahan a tamdaw,” sanay.

¹⁰ O teloc no samangahay o maanan hani? Cato ka pakasoˈlin ko tamdaw, o kalalaˈed no tamdaw mapalakayto. Haratengen, o cecay fafahi sapisimedaw to papotalay no ramod a olah, misamangah to faˈinay, anca o cecay faˈinay hato ngaˈayay a taˈarawan, o ngaˈayay a wama, ˈarawhan marariday a misetiˈ to fafahi ato wawa ningra, tada cowa ka sa tamdaw a waywayan konini. Nikawrira aka a matawal, o samangahay ngaˈay milipalaw to tao, kawra cowa ka lipalaw ci Yihofa. Samanen, “mawacay a maemin a maˈaraw no mata Ningra ko nisangaˈan Ningra.”​—Hipray 4:13.

11. Mikitini i milifetan ni Ananiyas aci Sapfira, o maanan ko mananamay ita hani? (Nengnengen ko satapangan coka.)

¹¹ Wa ngaˈay kita mikitini maˈoningay no Fangcalay Cudad maˈaraw ko cecay sapirikec. O cecay mararamoday Krisciyang ci Ananiyas aci Sapfira makayhiday ni Satan, caka talaw a milipalaw to Kawas. Ci Ananiyas aci Sapfira sapilipalawaw to tarokos. Pacakayan nangra ko omah, ˈarawhan mimingay ko pakiyahoan nangra a payci, kawra mieminan niyam a pakiyaho, sanay misamangah to tarokos. Mihaen ho masemer ko kasakopang to hinapaladaˈay cangra, sapacakataw to ngangan no niyah i kasakopang. Ihkalay a mahapinang no Kawas koniya tatiihay a waywayan nangra, misawkitan cangra a misayfang.​—Dmak 5:1-10.

12. O teloc no misamangahay ato cowa pasasiyor a tamdaw o maanan hani? Misamaanay hani?

¹² Samaanay ko harateng ni Yihofa to misamangahay hani? Sowal no Fangcalay Cudad ci Satan ato cowa pasasiyor a milipalaway tamdaw wa mafahkol tayra “i miwarakay ko ˈacefel a namanamalan.” (Paˈarawan 20:10; 21:8; ˈOlic 5:6) Misamaanay hani? Samanen itini pinengneng ni Yihofa, o misamangahay mahecaday to midemakay to tatiihay a tamdaw.​—Paˈarawan 20:15.

13. Malengo no Fangcalay Cudad ko Kawas mansanay ko sowal? Wa pakalalok kitanan samaan ko hademak hani?

¹³ Sowal no Fangcalay Cudad, o Kawas “caay ka matiya o tamdaw ko Kawas a misamangah a somowal”, hanaca “caay ko misamangahay ko Kawas.” (Saˈosi 23:19; Hipray 6:18) Mihaenayho ko sowal no Fangcalay Cudad: ‘Kaˈintehan ni Yihofa ko . . . misamangahay a sema.’ (Taneng 6:16, 17)  Ano makalimay kita malo widang no Kawas, o tatooren ita ko saali Ningra, malo soˈliˈlinay a tamdaw. Mihaenay, cowa ko mamisamangah kita, “kao soˈlinay ko sowal.”​—Kolosay 3:9.

14. (1) O soˈlinay Krisciyang wa midemak to maanan, ho mahapinang no tao to cowa ka lecad cangra to mihakelongay to mararaway pidoyongan hani? (2) Samaanen ita misakadademak ko safalod no Luka 6:45 hani?

¹⁴ O soˈlinay Krisciyang wa midemak to maanan, ho mahapinang no tao to cowa ka lecad cangra to mihakelongay to mararaway pidoyongan hani? “Kao soˈlinay ko sowal” ita. (ˈOsien ko Cikariya 8:16, 17.) Sowal no tarokos ci Pawlo, “itini i masamaamaanay a demak kami a pahapinang to nika o matayalay no Kawas kami,” ato “pasowal to soˈlinay a sowal.” (2 Korinto 6:4, 7) Sowal ni Yis: “Nawhani ano masamaanay ko falocoˈ noya tamdaw i, hatiraay ko masadakay i ngoyos ningra a sowal.” (Luka 6:45) O tamdaw ano ira ko soˈliˈlinay falocoˈ, wa soˈlin ko sowal. Ano taˈangayay anca mimingay a demak, wa soˈliˈlin ko sowal to kafahalan tamdaw, cafay matayal, widang ato paro no lomaˈ. Wa milengo kita to pina tinakoan, minengneng to sasamaan kita itini kihcod a demak misasoˈliˈlin ko waywayan.

15. (1) Hano cowa ka ngaˈay tosa ko palinian ita a maˈorip? (2) O kaemangay tamdaw, sasamaan ko demak cato ka malo milipalaway a tamdaw hani? (Nengnengen ko ilaenoay safanaˈ.)

¹⁵ Kaemangay tamdaw, sapirienangaw kiso to kapot no widang han? O roma kaemangay itini ˈaˈayaw no paro no lomaˈ ato kasakopang ngaˈayay ko waywayan, kawra ano malacafay to potalay no kasakopang a tamdaw i, anca itini picawmaˈan a wangcan masiromaayto ko demak. Somowalay to kaacekan, kincoay a kamotoˈ ko caˈedong, mitengilay to kaacekan a radiw, haliepahay, miselipay to etok, mitakaway makakaolah anca midemak to pakidemay tatiih a demak. Mihaen a tosa ko palinian o milipalaway to wama wina, kasakopang, milipalawayho ci Yihofaan. Ka pisinanot ko kaemangay, hamaan o milipalaway to niyah ato tamdaw ko kaˈorip. (ˈOlic 26:4, 5) Haratengen, ano o ngoyos aca ko mikangodoay ci Yihofaan, miraay ko falocoˈ, mafanaˈay ci Yihofa. (Marko 7:6) Tengilen ita ko limoˈot no Fangcalay Cudad: “Aka ka ˈinal to ciraraway a tamdaw, kararid ko falocoˈ iso a [midoko ci Yihofaan].”​—Taneng 23:17. *

16. Ano pangangan kiso to tayal no likakawa no Kawas, wa samaan ko hademak ita hani? Misamaanay?

¹⁶ Ciharatengay kiso malo misakafahay anca malo mikiriwiˈay mieminay to toki matayal, tinakoen malo matayalay i Pitil han? Ano pangangan kiso i, wa soˈliˈlin a pacaˈof to polong a salicay, mahawpay ko tanoktok no tireng, mipiliˈan a lawla ato notekedan a waywayan.  (Hipray 13:18) Ano na midemakay kiso to cowa ka korac a demak, anca misafelitay to safalod no Fangcalay Cudad a demak, kawra cowa pasowalen ko malohemay malitengay, misaali to sadama nangra i noˈadingoan, wa samaan ko hademak iso hani? O soˈliˈlinay tamdaw cowa ko mamiliflif, wa misaali to sadama no malohemay malitengay, ano mihaen wa ngaˈay tano tingalaway falocoˈ a matayal ci Yihofaan.​—Loma 9:1; Kalatiya 6:1.

17. Ano misaaliay ko mirikecay to pakayniay salikaka a demak, samaanen ita pacaˈof hani?

¹⁷ Itini roma kitakit ato kilac micongeday to noˈadingoan a tayal. Ano mahaen ko pakayraan, misaali ko mirikecay tisowanan somowal to pakayniay salikaka a demak i, wa samaan ko caˈof iso hani? Wa fanaˈen iso ko “kihcod” a demak han? Haratengen, tiya milicay ko tapang no Loma ci Yisan i, cowa pacaˈof to kihcod a demak. Mihaen ko demak ni Yis mahecaday to safalod no Fangcalay Cudad, “ira ko katomerepan, ira ko kacaciyawan a romiˈad.” (Patnakay 3:1, 7; Matay 27:11-14) Mihaenay, ano mahaen ko pakayraan wa misinanot kita, aka a pairaen ko katalawan no salikaka.​—Taneng 10:19; 11:12.

18. Ano mafanaˈ kita to midemakay ko salikaka to pakidemay misafelit to palinian no Fangcalay Cudad a demak, wa samaan ko hademak?

¹⁸ Ano mafanaˈ kiso to midemakay ko salikaka to pakidemay misafelit to palinian no Fangcalay Cudad a demak, sasamaan ko demak iso hani? Iraay ko ˈinorong no malohemay malitengay mitafo to kakorac no kasakopang, ano milicay cangra tisowanan to pina salicay, wa samaan ko caˈof iso hani? Ora mararaway ano o salawina anca o ngaˈayay widang iso, wa samaan ko demak iso hani? Sowal no Fangcalay Cudad: “O soˈlinay a sowal i, o pahapinangay to moecelay a demak.” (Taneng 12:17; 21:28) Wa soˈliˈlin kita mihadak to kafanaˈan a demak, cowa ka ngaˈay miliflif anca miraraw to mifekaday a demak. Soˈlin a mafanaˈ ko malohemay malitengay to mifekaday a demak ngaˈ, mihadak to matatodongay a sadama, padama to mararaway a tamdaw misalof to kalawidang ci Yihofaan.​—Yakop 5:14, 15.

19. Ilaenoay a lalakaw wa milengo to maanan hani?

¹⁹ Itini ˈOlic pasayraay ci Tafiti ci Yihofaan mitolon sanay: “O soˈlinay a falocoˈ ko nilongocan Iso.” (ˈOlic 51:6) Mitadtaday ko sowal ni Tafiti wa mikitini i falocoˈ kita malo soˈliˈlinay a tamdaw. Itini taˈangayay kaemingay a demak no kaˈorip, o soˈlinay Krisciyang wa ‘ka sasisoˈlin ko sowal’. O laenoay lalakaw wa milengo kita, sasamaan pakayni pitosil pasifanaˈ to tamdaw to soˈlinay kimad, paihkal to o soˈlinay a Krisciyang kita, o sikawdan no Kawas.