1, 2. ¿Ambe jindeski enga sánderu no sési úkujka kʼuiripuni ka néski kulpabli?

TELEFONU, foku, karru ka refrijeradori, jindestiksï máru ambe engaksï únhaka para sánderu sóntku úni ambe ma. Ka jarhasti máteruecha engaksï peligrosueka komu pistola, bomba enga túskunhajka, sigarru ka bomba atomika ka íksï solu máru ambejkuesti. Peru ambe enga sánderu no sési úkujka kʼuiripuni, jindesti ambe ma enga desde iónisï jakaia ante de i ambe únhani. ¿Ambeski? Chkuanderakua, i ima ambesti enga mítinhaka eska no ísïska peru enga uandanhajka para enganiarpini. Tata Jesukristu uandaspti eska “tátemba chkuanderaricheri” jindeska Noambakiti, jimboka ima uénaspka chkuanderani (arhinta je Juanu 8:44). ¿Káni uénaspi chkuanderani?

² Iónistia, jini jardini de Edenirhu. Adani ka Eba sésiksï irekaxapti paraisurhu enga Tata Diosï íntsaapka. Peru Jeoba arhiaspti eskaksï no akupiringa “anhatapu mímixekueri enga jindeka sési amberi ka no sési amberi”. Engaksï no kurhajchapiringa, uarhipirindiksï. Nájkiruka Satanasi mítipka ini ambe, úraspti akuitsini ma para Ebani arhini primeru chkuanderakua: “Nójtsï uarhiaka”. Ka arhispti: “Jimboka Tata Diosï mítiska eska ima jurhiatikua engajtsï cha auaka indeni frutani, uákajtsï kánikua ambe mítini, ka ísïuakajtsï eska Tata Diosï, mítiakajtsï ambe sésiski ka ambe no sésiski” (Gén. 2:15-17; 3:1-5).

3. a) ¿Andichisï uandajki eska Satanasiri chkuanderakua jindespka para no sési útspini? b) ¿Ambe niáraski úkuarhini?

³ Satanasiri chkuanderakua jindespti para no sési útspini, jimboka  sési mítitixapka eska enga Eba jakajkukupiringa, uarhipirindi enga apiringa frutani enga no jatsipka para arhani. Eba ka uámba, nóksï kurhajchaspti Jeobani ka tiempu jingoni, uarhisptiksï (Gén. 3:6; 5:5). Peru ambe enga sánderu no sésika, jindesti eska pekadu jimbo uarhikua pakaraska “para iámindu kʼuiripuecha”, ka asta para imecha jamberi engaksï no “pekadu úpka eska Adani na no janhanharhipka Tata Diosïni” (Rom. 5:12, 14). Kʼuiripuechaksï no úsïndi perfektu irekani para méntkisï, ísï eska Tata Diosï na uékenga desde uénakuarhu, sino jatsisïndiksï para konformarikuarhini engaksï niárajkia 70 jatirini o engaksï útasï jatsiaka uinhapikua, niáranksï 80 jatirini. Ka nájkirukaksï niáraaka xáni jatirini kánikuaksï uandanhiasïndi ka no sési ambeksï nitamanchani imecheri irekuarhu (Sal. 90:10). ¡Xáni no sési ambe! Ka i ambe niárasti jarhani Noambakitiri chkuanderakua jimbo.

4. a) ¿Náki kurhamarhikuechaksï jukaparhakueski para mókuantani? b) Seguni Salmo 15:1, 2, ¿néchajkuksïsï uá Jeobaeri amigueni?

⁴ Enga Jesusi eksplikarini japka na enga jámajka Satanasi, uandaspti: “No jeiapanhintasïndi [ambe] enga ísïka jimboka no méni jurhimbitku uandasïnga”. Ka útasï májkueni jámasïndi. Noambakiti seguirixati enganiariuani “iámindu parhakpini anapuechani” chkuanderakuaparini (Jaŋ. 12:9). Peru juchachi no uékasïnga eskajtsïni enganiariuaka. Ísï jimbo, ju je mókuantani arini tanimu kurhamarhikuechani: ¿Néna chkuanderakusïni Satanasi kʼuiripuni? ¿Andiksïsï kʼuiripuecha chkuanderajki? Ka jimbokachi no uékasïnga ísïni eska Adani ka Eba ka nóteru jatsinia ambakiti pájperakua ma Jeoba jingoni, ¿nénachi xarhatasïni eskachi méntkisï jurhimbitku uandantasïnga? (arhinta je Salmo 15:1, 2).

5. ¿Néna chkuanderakuasïni Satanasi kʼuiripuechani iásï?

⁵ Apostuli Pablu mítispti eskachi no jurajkuaka parajtsïni Satanasi enganiarini, jimbokachi mítiska “na enga xáni mámaru ambe jimbo jirinhakuntajka para terongutpini” (2 Kor. 2:11). Mítiskachi eska Satanasi juramukuaxaka parhakpini anapuechani, enga jindeka relijioni no jurhimbitichani, gobiernuecha engaksï no jurhimbiti jámajka ka kʼérati negosiuechani (1 Juanu 5:19). Ísï jimbo, nójtsïni ísku pakatasïndi eska Satanasi ka demoniuechaksï úsïnga paraksï imecha engaksï kʼéri ambeka chkuanderaaka (1 Tim. 4:1, 2). Por ejemplu, máru kʼuiripuecha engaksï negosiuechani jatsiaka, chkuanderasïndiksï engaksï eianhpini jámajka ambe engaksï íntspikuarhijka solu paraksï atarantani imani ambe enga no sési útspejka oksï enganiariuasïndi kʼuiripuechani ka euakuarhianksï tumina.

6, 7. a) ¿Andiksïsï imecha sánderu kulpabli engaksï relijioni no jurhimbitichani orhejtsïkuajka? b) ¿Náki chkuanderakuechantsï kurhauaski engaksï relijioniri orhejtsïkuticha uandaajka?

⁶ Imecha engaksï relijioni no jurhimbitichani orhejtsïkuajka, imaksï sánderu kulpablisti. ¿Andi? Jimboka imecha engaksï jakajkukuajka imecheri chkuanderakuechani ka únksï imani ambe enga Tata Diosï kurhunhijka, uáti úni eskaksï no jatsiaka oportunidadi paraksï irekani para méntkisï (Os. 4:9). Jesusi mítispti eska imeri jurhiatikuecha jimbo, relijioniri orhejtsïkutichaksï chkuanderakusïrenga kʼuiripuni. Arhinharhikuaspti: “Lastima cha kararicha ka fariseuecha ísku aparicha, jimbokajtsï iápuru jámasïnga ka asta japonda [o mari] kʼérirhu parhikuni jamberi parajtsï jakajkutarani ma kʼuiripuni ísï eska cha na jakajkujka, ka engajtsï jakajkutarajkia, úsïngajtsï eska ima jindeuaka ma tsïnchikuarhu anapu tsimani uelta sánderu ka eska cha” (Mat. 23:15). Jesusi xukaaspti ka arhiaspti: “Chári táti jindesti Noambakiti”, enga uándikpiti máeka (Juanu 8:44).

⁷ Pastoricha o saserdoticha, na uéjkiksï arhinhani iásï, parhakpinirhuksï jarhasti uánikua relijioniri orhejtsïkuticha engaksï no jurhimbitku jámajka. Májkueni eskaksï fariseuecha, nóksï jorhentpesïndi Tata Diosïri Karakateri “ambe enga ísïka” ka mójtakustiksï Jeobaeri jurhimbikua ambeni chkuanderakua ambe jingoni (Rom. 1:18, 25,  Táta Diósïri Uandakua Tata Jesukristueri Aiatsperakua). Chkuanderakua ambeksï jorhentpesïndi, komu infiernueri ambe, eskachi alma ma jataska enga no uarhijka ka imani eratsikuani eska Tata Diosï jiókuarhisïnga imani kʼuiripuni enga omosexualika ka eska tataka ma uáka tataka ma jingoni tembuchani o nanaka ma nanaka ma jingoni.

8. a) ¿Náki chkuanderakuaksï uandaa no ióni jimbo politikuecha? b) ¿Ambechi uá jucha?

⁸ Politikuechajtuksï úrasïndi chkuanderakuani para kʼuiripuni enganiarini. Ma kʼéri chkuanderakua engaksï uandaaka no ióni jimbo, jindesti eskaksï iásï kʼóru konseguiriskia pínandikua ka seguridadi. Peru “jimajkaniminduksï no sési úkuarhinchaati”. Ju je no jurajkuni eskajtsïni enganiariuaka engaksï jánguarhintani jaka jískani na enga xáni no sési jaka parhakpini. Juchachi sési mítitixaka eska Jeobaeri “jurhiatikua ma repentkueuaka komueska ma kuárhukpiti enga chúrikua jimbo inchatspijka” (1 Tes. 5:1-4).

9, 10. a) ¿Andiksïsï kʼuiripuecha chkuanderajki ka ambe úkuarhisïni? b) ¿Ambechi jatsiski para miáni Jeobaeri ambe?

⁹ Ini jurhiatikuecha jimbo, kʼuiripu kánikua pʼindesti chkuanderani. Ka no solu imecha engaksï uinhapikua jatsika. Artikulu ma jimbo enga arhinhajka “Por qué mentimos”, rebisteri ma enga kánikua mítikateka arhisïndi: “Chkuanderakua, ambe máestia kʼuiripuecheri engaksï uinhamu pʼindekia úni”. Sáno méntkisï, kʼuiripu chkuanderasïndi para kuájchakukuarhini ka jískaani imeri errorichani ka ambe enga no sési úka, o para konseguiriuani kʼérati puestuechani ka niárani jatsini sánderu tumina ka para imajkumindu sési uéranchani. Artikulu arhisïndi eska kʼuiripu fásili chkuanderasïnga, sapichu o kʼéri ambe ma jimbo, chkuanderakuasïndiksï imechani engaksï no mítiaka, ánchikuarhitarhu anapu kompanieruechani, amiguechani ka imechani engaksï uékaajka.

¹⁰ ¿Ambe úkuarhisïni enga xáni chkuanderanhajka? Nóteru úsïndia mintsinharhiperanhani níteru sési pájperani. Por ejemplu, ju je eranhaskani na enga pʼikuarherajka achati ma enga imeri témba enganiarijka ka chkuanderakuni para uámba no mítini. Ka xáni no sési enga achati ma ísï xarharajka enajki ambakiti uámba ka táti máe, peru kʼumanchikuarhu no sési kámani imeri témbani ka uájpechani. Peru ju je miáni eskaksï i kʼuiripuecha no ma ambe uáka jiskakuni Jeobani, jimboka “iámindu ambe pʼenojchakurakata jarhaska imani japarini” (Ebr. 4:13).

11. ¿Ambejtsïni jorhendasïni Ananiasiri ka Safireri ejemplu engaksï no sési úpka? (Exe je dibujuni enga uénakuarhu jaka).

¹¹ Bibliarhu, exentasïngachi temungurhiriri ejemplu ma engaksï kúnguarhikuarhu ma jimbo japka primeru siglueri, Ananiasi ka Safira, enga Satanasi úpka eskaksï chkuanderakupiringa Tata Diosïni. Atarantasptiksï echeri ma ka arhiasptiksï apostulichani eskaksï iámindu tumina íntsaantaxapka na engaksï xáni jimbo atarantapka echerini, peruksï no iámindu íntsaantaxapti. Sésiksï uékasïrendi pakarani ermanuechani japarini ka exeraani eskaksï kánikua intsïmpitispka, ambe ma enga no xáni ísïpka. Peru Jeoba exespti eskaksï chkuanderaxapka ka kastigariuaspti (Uku. 5:1-10).

12. ¿Ambeksï úkuarhincha chkuanderaricha engaksï no arrepentirikuarhiska, ka andi?

¹² ¿Na exesïni Jeoba chkuanderakuani? Satanasi ka iámindu imecha engaksï chkuanderajka para no sési útspini, niáraatiksï imani “japondarhu enga méntku kurhini jaka chpiri”, o sea, kʼamajkunhaatiksï para méntkisï (Jaŋ. 20:10; 21:8; Sal. 5:6). ¿Andi? Jimboka Jeoba májkueni exeasïnga chkuanderarichani eska imechani engaksï ‘uíchueni’ jámajka, o sea imecha engaksï imani ambe pʼindejka úni enga Jeoba ikichajka (Jaŋ. 22:15).

13. ¿Ambechi mítiski Jeobaeri ambe, ka indeni ambe mítiparini ambechi jatsiski para úni?

¹³ Mítiskachi eska Jeoba “no kʼuiripu máes[ka] para chkuanderani”. Jimboka Tata “Diosï nómindu ú[sïnga] chkuanderani” (Núm. 23:19; Ebr. 6:18). Bibliarhu arhisïndi eska Jeoba no sáni jeiapanhintasïnga  “katamba ma enga chkuanderajka” (Prov. 6:16, 17). Parajtsïni Jeoba jeiapanhintani, jatsiskachi para kumplirini ambe engajtsïni juramuchijka ka méntkisï jurhimbitku uandani. Jatsiskachi para kumplirini ini juramukuani: “Asï jáma je chkuanderatsperani” (Kol. 3:9).

14. a) ¿Ambe jimbochi ménderueniski imecha jingoni engaksï relijioni no jurhimbitirhu jaka? b) Eksplikari je prinsipiuni enga Lukasʌ 6:45 jaka.

¹⁴ ¿Ambe jimboksï ménderueniski kristianu jurhimbiticha imecha jingoni engaksï relijioni no jurhimbitirhu jaka? Eskachi Tata Diosïri marhuaricha jurhimbitku uandantasïnga (arhinta je Efesu 4:25). Pablu eksplikarispti eska engachi jurhimbitku uandajka, ísïchi jámasïnga “eska na jatsika para jámani ma Diosïri jarhuajpiri” (2 Kor. 6:4, 7). Jesusi uandaspti eska ambe enga mintsitarhu jarhajka, ima ambesï uandanhajka (Luk. 6:45). Ísï jimbo, engachi mintsitarhu kámajka jurhimbikuani, jurhimbitkuchi uandasïnga. Nochi chkuanderasïnga kʼéri ni sapichu ambe ma jimbo, sino jurhimbitku ambechi eianguasïnga imechani engachi no mítiaka, ánchikuarhitarhu anapu kompanieruechani, amiguechani ka imechani engachi uékaajka. Ju je exeani máru situasionichani nani enga uétarhijka jurhimbitku uandantani.

15. a) ¿Andisï no sési jaki eskari tsimani jásï irekua uékaaka páni? b) ¿Ambekini uá jarhuatani engaksïni afuersa uékaaka úrani ambe ma? (Exe nota).

¹⁵ Engari tumbika o uátsïni, normalisti eskari uékaaka paraksï chíti kompanieruecha tʼungini jingoni kúnguarhini, peru asï méni tsimani jásï irekua pá, ísï eskaksï máru na újka. Imecheri familia jingoni ka kúnguarhikuarhu, ísïksï jámasïndi enajkiksï ambakiti kristianu máe, peruksï kánikua ménderueni jámasïndi engaksï máteru tumbicha o uátsïcha jingoni jarhajka engaksï no kristianueka o engaksï redesi sosiali ambe úrani jarhajka. No sési járhati uandakuechanksï úraasïndi, no sési xukuparhani, ikichakueni jásï musika kurhaani, kánikua alkoli arhani, droga ambe úrani, sïpatikuarku nobiueni nema jingoni, oksï jamberi sánderu no sési jásï ambe úni. Puruksï chkuanderani jámasïndi: chkuanderakuasïndiksï tátembechani, erachichani ka Tata Diosïni (Sal. 26:4, 5). Peru Jeoba mítisïndi engachi uandakuecha jingontku kʼéri ambe arhijka ka juchari mintsita iauani jarharitini jarhani (Mar. 7:6). Jimbosï sánderu sésiiti eskari uáka ambe enga i proberbiu arhijka: “Eska chíti mintsita no enbidiariuauaka pekadorichani; sánderu sési, chúskuta janhanharhi Jeobani” (Prov. 23:17). *

16. ¿Nénachi jatsiski para solisitudi ma uininharhitantani para tiempu kompletueri marhuani?

¹⁶ Jamberiri uékaaka prekursori regulari úkuarhini o tiempu kompletueri marhuani, komu  Beteli. Engari solisitudi ma uininharhitantani jauaka, jukaparhakuesti eskari jurhimbitku mókuantauaka kurhamarhikuechani engaksï saludiri ambe uandajka, tsípikuarhiteri ka chíti jángueri ambe (Ebr. 13:18). ¿Ka engari ikichakueni jásï ambe úkia o enga no sési jaka ka nori aianguani jarhani orhejtsïkutichani? Enga ísïka, arhia eskaksïni jarhuataaka parari úni marhuakuani Jeobani ambakiti konsiensia ma jingoni (Rom. 9:1; Gal. 6:1).

17. ¿Ambechi jatsiski para úni engajtsïni kurhamarhiska juchari erachicheri ambe?

¹⁷ Iásï, ju je eranhaskani máteru ambe, gobiernu juramusïndi eskachi nóteru uákia Reinueri ambe eianhpini ka juchari erachicheri ambejtsïni kurhamarhisïndi. ¿Jatsiskichi para iámindu ambe eianguani engachi xáni mítika? Ju je eratsintani ambe enga úpka Jesusi enga Roma anapu juramuti kurhamarhikuechani úkuapka. Ima ísï úspti eska na arhijka i prinsipiu: “Jarhasti tiempu para pínasku pakarani ka tiempu para uandani”, ka no ma ambe mókukuntaspti (Ecl. 3:1, 7; Mat. 27:11-14). Enga inde ambe úkuarhiska, jatsiskachi para jingoni jámani parachi no no sési úkuani juchari erachichani (Prov. 10:19; 11:12).

18. ¿Ambechi jatsiski para úni engajtsïni orhejtsïkuticha kurhamarhiska ambe ma erachiri ma?

¹⁸ Ju je eratsini máteru situasioni. Eranhaska je eska nema kʼéri pekadu ma úska ka juchachi mítini ambe enga úkuarhika. Komu orhejtsïkuticha jatsika responsabilidadi para pímbinhasï jatsini kúnguarhikuani, jamberijtsïni kurhamarhiati ambechi mítiska inde situasioniri ambe. ¿Ambechi mókuntaa, ka sánderia enga juchari amigueka o familiari ma enga no sési úka? Biblia arhisïndi eska kʼuiripu enga ‘jurhimbitku jámajka, jurhimbitku uandantasïnga’ (Prov.12:17; 21:28). Ísï jimbo, jatsiskachi para eianguani orhejtsïkutichani ambe enga xáni úkuarhika, no ma ambe mójtakuni ni jískani. Orhejtsïkutichaksï jatsisti para iámindu ambe mítini paraksï exeni nénaksï uá jarhuatani imani enga pekarika para ménderu jatsini ambakiti pájperakua ma Jeoba jingoni (Sant. 5:14, 15).

19. ¿Ambechi exea máteru artikulurhu?

¹⁹ Dabidi arhispti Jeobani kómarhikua ma jimbo: “Sésiri pʼikuarherasïnga jurhimbikua jimbo enga kʼuiripueri mintsitarhu jaka” (Sal. 51:6). Ísïsti, Dabidi mítispti eska jukaparhakueska eskachi mintsita jingoni jurhimbitku jámaaka. Kristianuechachi iámu ambe jimbo jurhimbitku uandantasïnga eska na arhijka textu i artikulueri. Máteru ambe enga xarhatajka eskachi Tata Diosïri marhuaricha ménderueniska, jindesti eskachi jorhendaasïnga kʼuiripuechani jurhimbikueri ambe. Máteru artikulu jimbochi exeaka néna úni.