讲真实嘅话
“要彼此讲真实嘅话”——撒迦利亚书8:16
1,2． 带俾人类最大伤害嘅可能系乜嘢？边个用呢样嘢嚟伤害人类？
电话、电灯泡、汽车同埋冰箱呢啲发明可以令我哋嘅生活更加便利，而烟草、火药、地雷同埋核弹等等，就会对我哋造成伤害。不过，喺呢啲嘢出现之前好耐，世上就已经存在一样可能系有史以来带俾人类最大伤害嘅嘢。系乜嘢呢？就系谎言！如果一个人为咗呃人而讲出一啲佢明知系假嘅事，噉佢所讲嘅就系谎言嘞。边个讲咗世上第一个谎言？就系魔鬼撒但。耶稣将佢称为“谎话之父”。（请读约翰福音8:44）撒但几时开始讲大话？
2 呢件事发生喺几千年前。当时，上帝创造咗一个好靓嘅乐园，将第一对夫妇亚当同夏娃安置喺入面，使佢哋享有美好嘅生活。跟住，魔鬼就登场嘞。佢明知上帝吩咐呢对夫妇唔可以食“辨识善恶树”嘅果，亦都知道佢哋违反呢条诫命就会死，不过佢仲系通过一条蛇同夏娃讲：“你哋一定唔会死［呢个就系第一个谎言］。只不过上帝知道你哋食咗嘅话，嗰一日你哋嘅心眼就会打开，你哋会好似上帝一样，能够辨识善恶。”（创世记2:15-17；3:1-5）
3． 点解话，撒但讲大话系居心不良？撒但嘅大话导致乜嘢后果？
3 撒但讲大话可以话系居心不良，因为佢清楚知道，如果夏娃相信佢，食咗辨识善恶树嘅果，就一定会死。最终，亚当同夏娃都违背咗耶和华嘅诫命，因为罪而死去。（创世记3:6；5:5）更惨嘅系，呢种罪“传［咗］俾所有人”。事实上，“死亡一直作王管辖人，即使人所犯嘅罪同亚当所犯嘅唔同，亦要受死所管辖”。（罗马书5:12,14）上帝希望人类享有完美、永远嘅生命。不过而家，每个人都难免一死，人能够活到“七十岁，特别强壮嘅可能活到八十岁”就已经唔错嘞，而且人生通常都充满“烦恼痛苦”。（诗篇90:10）撒但嘅谎言带嚟几咁悲惨嘅后果！
4． （甲）呢篇课文会讨论乜嘢问题？（乙）根据诗篇15:1,2，点样嘅人先可以成为耶和华嘅朋友？
4 耶稣话，撒但“冇喺真理中企稳，因为真理唔喺佢入面”。而家，撒但依然冇喺真理入面，佢继续“迷惑……普天下嘅人”。（启示录12:9）我哋当然唔想俾撒但迷惑。所以，我哋会喺呢篇课文讨论三个问题：撒但点样迷惑人类？点解好多人都讲大话？我哋可以点样做一个“讲真话”嘅人，一直同耶和华保持亲密嘅关系？（请读诗篇15:1,2）
撒但点样迷惑人类
5． 今日撒但点样迷惑人？
5 使徒保罗知道，我哋可以避免俾“撒但趁机胜过我哋，因为我哋唔系唔知道佢嘅阴谋”。（哥林多后书2:11）我哋知道，成个世界，包括错误嘅宗教、腐败嘅政治同埋贪婪嘅商业制度，都喺撒但嘅控制之下。（约翰一书5:19）撒但同佢嘅邪灵会用“大话”嚟影响世上有权势嘅人。（提摩太前书4:1,2）好多大型企业都通过虚假嘅广告欺骗消费者，向人推销一啲有害嘅产品。
6,7． （甲）点解话欺骗人嘅宗教领袖罪大恶极？（乙）你听过边啲错误嘅宗教道理？
6 好多宗教领袖用错误嘅宗教道理欺骗人，佢哋真系罪大恶极。点解噉讲呢？因为一个人接受咗某啲错误嘅教导，做出上帝所憎恨嘅行为，就可能会失去永生。（何西阿书4:9）喺耶稣嘅日子，宗教领袖就系噉样误导咗好多人。所以，耶稣当面对佢哋讲：“抄经士同法利赛派啊，你哋呢啲虚伪嘅人有祸喇！因为你哋横越海洋陆地，要一个人归信，喺佢归信嘞，你哋就使佢比你哋加倍有罪，更应该揼入欣嫩谷［永远嘅毁灭］。”（马太福音23:15）耶稣强烈谴责嗰啲宗教领袖，话佢哋系从佢哋嘅父魔鬼呢个“杀人凶手”嗰度嚟嘅。（约翰福音8:44）
7 今日世上有好多宗教，呢啲宗教嘅领袖有好多唔同嘅衔头，例如牧师、神父、拉比、祭司、大师、道长等等。佢哋同1世纪嘅宗教领袖一样，“以唔正义嘅手段压制”上帝嘅话语，又“用虚谎取代上帝嘅真理”。（罗马书1:18,25）佢哋提倡错误嘅道理，例如“一次得救永远得救”、灵魂不死、投胎转世，同埋愚昧噉认为上帝会宽容同性恋以及同性婚姻。
8． 我哋期望政治领袖讲出边个宣布？我哋应该有点样嘅反应？
8 政治领袖亦都用谎言误导人。佢哋将会讲嘅一个谎言就系“和平安全嘞”。不过好快，“突如其来嘅毁灭就即时临到佢哋”。呢个事物制度已经摇摇欲坠，但政治领袖所讲嘅话就掩饰咗呢个真相。我哋千祈唔好俾佢哋呃到！因为我哋“清楚知道，耶和华嘅日子临到，就好似贼喺夜晚嚟到一样”。（帖撒罗尼迦前书5:1-4）
点解好多人都讲大话
9,10． （甲）点解人会讲大话？讲大话会引起乜嘢后果？（乙）关于耶和华，我哋应该记住乜嘢？
9 一个新发明或者新产品流行起嚟，就会被大量生产。讲大话亦都系噉。散播谣言喺今日嘅社交当中变得越来越普遍，所以唔系只系嗰啲有影响力嘅人先至会呃人。巴塔查尔吉喺佢嘅文章“点解我哋讲大话”（英语）里面指出：“好多人都认为，讲大话系一种根深蒂固嘅人类特性。”人经常会通过讲大话嚟保护或者抬高自己。佢哋为咗掩饰自己嘅错误同行为，或者想喺经济同其他方面谋取个人利益就讲大话。文章话，有啲人“无论喺大事抑或小事上，对陌生人、同事、朋友同埋亲人随口都讲得出大话”。
10 讲大话会导致乜嘢后果呢？会失去人嘅信任、破坏人同人之间嘅关系。请想象吓，如果一个妻子对丈夫不忠，佢为咗掩饰自己嘅行为就欺骗丈夫，呢个一定会令佢丈夫大受打击。或者，一个人可能私下虐待妻子同儿女，但喺其他人面前就扮到好似一个模范家主噉。不过，我哋唔好忘记，对耶和华嚟讲“万物都系赤露敞开嘅”，所以呢啲人喺佢面前根本隐藏唔到自己嘅秘密。（希伯来书4:13）
11． 我哋从亚拿尼亚同撒非拉嘅事例学到乜嘢？（请睇吓课文开头嘅图片）
11 圣经提到，公元1世纪嘅一对基督徒夫妇受撒但影响，竟然够胆欺骗耶和华。呢对夫妇就系亚拿尼亚同撒非拉。佢哋卖出一啲财产，但只系将一部分嘅钱交俾使徒。佢哋想会众嘅人觉得自己好慷慨，就专登呃使徒，话已经捐出咗全部资财。不过，耶和华清楚知道佢哋所做嘅一切，亦都因此惩罚佢哋。（使徒行传5:1-10）
12． 嗰啲不知悔改、蓄意讲恶毒谎言嘅人会被掟到边度？点解？
12 耶和华对谎言有乜嘢睇法呢？所有好似撒但噉不知悔改、蓄意讲恶毒谎言嘅人同撒但一样，都会被“掟到有硫磺烈火嘅湖入面”。（启示录20:10；21:8；诗篇5:6）因为喺耶和华睇嚟，“行事虚谎”同其他嘅可憎行为系一样嘅。（启示录22:15）
13． 我哋知道耶和华系点样嘅上帝？知道呢一点，我哋受到推动点样做？
13 我哋知道，“上帝同世人唔同，一定唔会讲大话”。事实上，佢系“唔可能讲大话”嘅上帝。（民数记23:19；希伯来书6:18）圣经话，“耶和华恨恶……讲大话嘅舌头”。（箴言6:16,17）为咗得蒙上帝悦纳，我哋就一定要按照佢嘅标准做一个诚实嘅人。噉样，我哋就唔会“互相讲大话”。（歌罗西书3:9）
“彼此讲真实嘅话”
14． （甲）我哋点样将自己同错误宗教分别开嚟？（乙）请解释路加福音6:45嘅原则。
14 真基督徒将自己同错误宗教分别开嚟嘅一个方法系乜嘢？就系“彼此讲真实嘅话”。（请读撒迦利亚书8:16,17）保罗指出，我哋要通过“真实嘅言语”，“事事表明自己系上帝嘅仆人”。（哥林多后书6:4,7）耶稣话：“人心里充满乜嘢，佢嘅口就讲出乜嘢。”（路加福音6:45）所以，一个真正诚实嘅人，喺大小事上对陌生人、同事、朋友同埋亲人都会讲真话。我哋可以点样表明自己凡事诚实？请睇以下嘅例子。
你睇唔睇得出呢个年轻姊妹嘅生活有乜嘢问题？（请睇第15、16段）
15． （甲）点解做双面人系唔明智嘅？（乙）乜嘢可以帮助年轻人抵抗不良嘅同辈压力？（请睇脚注）
15 年轻人，你系咪好想同辈接纳你呢？噉你就要小心，千祈唔好做双面人。有啲人同家人或者弟兄姊妹喺一齐嗰时就表现得好属灵，不过同世俗嘅年轻人交往或者上社交网站嗰阵就系另一个样。佢哋可能会讲粗口、着一啲唔端庄嘅衫、听低俗嘅音乐、滥用酒精或药物、偷偷地拍拖，甚至做出一啲更加唔好嘅事。佢哋喺父母、弟兄姊妹同埋耶和华面前戴住面具做人，所以佢哋嘅生活其实就系一个谎言。（诗篇26:4,5）耶和华清楚知道佢哋只系喺“口头上尊重［佢］，但系心就远离［佢］”。（马可福音7:6）箴言话：“你嘅心唔好羡慕罪人，要终日敬畏耶和华。”但愿我哋每个人都按照呢句话去做。（箴言23:17） *
16． 申请某种形式嘅特别服务嗰时，诚实嘅人会点做？
16 可能你好想做先驱或者参与某种形式嘅特别全时服务，例如伯特利服务。喺申请期间，所有同个人健康、选择嘅娱乐以及道德情况有关嘅问题，你都应该如实回答。（希伯来书13:18）如果你曾经做过一啲耶和华憎恨或者令自己良心不安嘅事，但系又冇同长老倾过，噉你应该点做呢？要向佢哋寻求帮助，噉你先可以怀住清白嘅良心事奉耶和华。（罗马书9:1；加拉太书6:1）
17． 喺王国工作受限制嘅地区，我哋被当局问到有关弟兄姊妹嘅问题嗰时应该点做？
17 如果喺你嘅地区，王国嘅工作受到政府限制，噉你被当局问到一啲有关弟兄姊妹嘅问题嗰时，你有冇必要将自己知道嘅话晒俾佢哋知呢？圣经话：“有静默嘅时候，有讲话嘅时候”。（传道书3:1,7）耶稣俾罗马统治者审问嘅时候，运用咗呢个原则，所以佢有时乜嘢都冇回答。（马太福音27:11-14）同样，喺类似嘅情况下，我哋最好保持谨慎，噉样就唔会将弟兄姊妹置于危险当中。（箴言10:19；11:12）
几时保持沉默，几时讲出真相，你会点样决定？（请睇第17、18段）
18． 当长老向我哋了解关于弟兄姊妹嘅事嗰阵，我哋应该点做？
18 如果你知道会众入面有人犯咗严重嘅罪，你应该点做呢？长老有责任保持会众嘅道德洁净，可能会问你同呢件事有关嘅问题。呢个时候，你会点做呢？圣经话：“实话实说嘅，谈论正义嘅事”。（箴言12:17；21:28）所以，就算呢件事涉及到你嘅好朋友或亲人，你都有责任要将全部嘅事实话俾长老知，而唔应该有所隐瞒或者加以歪曲。长老有权知道事实。全面了解事情之后，佢哋就能够用最好嘅方式去帮助犯错嘅人，使佢可以恢复同耶和华嘅关系。（雅各书5:14,15）
19． 下一篇课文会讨论乜嘢？
19 诗篇执笔者大卫向耶和华祷告话：“你喜爱嘅，系人嘅内心真诚信实。”（诗篇51:6）大卫清楚知道，一个人内心诚实先至系真正诚实。真基督徒喺生活嘅每方面都“要彼此讲真实嘅话”。向其他人传讲上帝嘅真理，系区分真基督徒同错误宗教嘅另一个方法。下一篇课文会集中讨论，我哋传道嗰阵可以点样教导人上帝嘅真理。
^ 15段 请睇《青年人所提出的问题——有实效的答案》第2册15章“我怎样才能抗拒同辈压力？”同16章“我是个‘双面人’吗？”。
